Kupan Uman ku Chikumbu ni Chikumbu

1. Mudimu wa ku chikumbu ni chikumbu ulangwishin chipul ik, ni mulong wak?

¹ “Antu adia ayifuvu mu mitapu kushalijan ya kupalangesh Uyakin akez kwitiyij anch kulejan ku chikumbu ni chikumbu nich mukand AURORE DU MILLENIUM kudi katat, mutapu umwing upandakena kuwap nakash wa kulejan Uyakin.” Mazu minam madioshinau mu nimero wa Le Phare de la Tour de Sion wa Kafunfut 1, 1893 mamekesha usey wa mudimu wa kulejan ku chikumbu ni chikumbu. Antu avud pa divu pawonsu ashikedin ku kuman mudimu winou mudi chijiken cha Atuman a Yehova. Ov, mutapu winou wa kulejan uchikwet usey ni katat, mulong mwi ngand jimwing chiyil ni kukasikan kamu nakash kuyitan antu ku yikumbu yau?

2. Yom ik yilondilay Bibil piur pa uman wa ku chikumbu ni chikumbu?

² Aulejen mu Bibil ni Udi wa Usey: Mudimu wa kupan uman ku chikumbu ni chikumbu wimedin pa Bibil. Yesu wayileja in kwilej 70 kuya aad aad ku yikumbu ya antu. (Luka 10:​5-7) Machuku makemp kupwa kwa rufu ra Yesu, Bibil ulondil ya in kwilej end anch: “Awiy adandamena pichuku pichuku kulejan mu chikumbu cha Nzamb ni mu yikumbu ya antu. Ading ni kulejan rusangu ruwamp.” (Midimu 5:​42, MM) Kambuy Paul niyend walejana nich mushiku ku chikumbu ni chikumbu.​—⁠Midimu 20:⁠20.

3. Uman wa ku chikumbu ni chikumbu ukwet yibudikin ik yiwamp?

³ Kupan uman ku chikumbu ni chikumbu kudandamedin kwikal mulad umwing wa usey nakash wa kupalangesh rusangu ruwamp nlel. Kukat kutukwash ‘kusot’ antu a kashinsh mu mutapu umwing ufanyidina ni wakad kanvundangesh. (Mat. 10:11) Antu ading chisu chivud iswedishina ku chikumbu. Kwambamb nau mes ni mes​—⁠kutesh yilondilau, kuyital kwi mpal, ni kushinshikin yikwetau​—⁠kukat kutukwash kujingunin yikatinau ni maswir mau. Chitwinkining chisu chipandakena kuwap chetwetu kwisamb nau chisu chilemp.

4. Mutapu ik tukutwisha kwikadish uman wa ku chikumbu ni chikumbu ukweta mabuj nakash?

⁴ Swimp Mikadil Yey: Kambuy Paul wasotanga nakash kuswimp mikadil yend “mulong wa rusangu ruwamp.” (1 Kor. 9:23) Pamwing ap tukutwish kuswimp program wetu chakwel kulejan pa chisu chidiau antu avud kwolikwau, mudi pa kuzwek kwa muten, kwisudiel kwa rubing, ap pa chisu cha konje. Fund ndond yiwakad kutan antu, ni pakish kuchirik kand dichuku dikwau mu rubing ap pa chisu chikwau cha dichuku.

5. Mutapu ik ukutwishau antu akata kuyelol kusal mudimu ku chikumbu ni chikumbu?

⁵ Ap antu akata kuyelol akutwish ni yawiy kulejan ku chikumbu ni chikumbu. Pamwing ap tukutwish kurijek chakwel kuya nau ku yikumbu yidia piswimp ni kukutwishau kushik swa, ni kuyikwash kusal kulondulijan ni usu wau. Nambaz umwing chading chimukasikedin kupim nawamp, watwisha kulejan chisu ni chisu ku chikumbu chimwing kusu pa chikunku ni chikunku cha saa. Pakwez, ndiy wasangara ni kuzangam kupwa kwa kusal mudimu wa kulejan pamwing ni antu akwau!

6. Mulong wak tufanyidina kupan uman ku chikumbu ni chikumbu chisu chawonsu mu mudimu wetu?

⁶ Antu avud adia mudi amikoku adandamedin kuyitan ku yikumbu yau. Katwambil umwing wakokala ku chis ni amuleja anch: “Andam. Nikwij nawamp. Nading ni kumwit Nzamb mu malembil anch antumina muntu wa kwinkwash, ni kupwa natesh kal muntu ukokil ku chis. Nzamb watesh kal kulembil kwam ni wakutum kal.” Yibudikin yikat kumekesh anch Yehova uyukishin mutapu winou wa kulejan. (Mat. 11:19) Jijaman kupan uman ku chikumbu ni chikumbu chisu chawonsu mu mudimu wey.