Kulejan ni Telefon Kukutwish Kwasong Mabuj

1. Mulong wak tufanyidina kuman anch kulejan uman ni telefon udi mutapu wa usey mu mudimu wetu wa kulejan?

¹ Mulong wak tufanyidina kushinshikin mutapu wa kusadil telefon mu mudimu wetu wa kulejan? Mulong udi mutapu ukwau wa kuyikwash nich antu akwau chakwel aka ronganyin rakin eza apanda. (2 Pita 3:9) Ap anch mutapu wetu wa kusambish wa kulejan nich rusangu ruwamp ra Want wa Nzamb udi wa kulejan ku chikumbu ni chikumbu, tukat kusanger kusadil mitapu yikwau mulong wa kuyishiken antu twakadia kutan kwolikwau.—Mat. 24:14; Luka 10:1-7; Kubur. 14:6.

2. Mutapu ik ufanyidina kutenchik mudimu wa kulejan ni telefon?

² Mutapu wa Kutenchik: Mudi muyidinga yitenchik ya chikumangan cha mudimu wa kulejan ku chikumbu ni chikumbu, kulejan ni telefon mu teritwar nikwawiy akutenchikin mulong wa in kulejan. Chitwishikin kulejan amwiney ap mudi antu aad ap asatu. Ndond yitenchikinau yifanyidin kwikal zoong. Antu avud amening anch chiwapining kushakam ku tebur ni kwikal nich mikand yikatau kusadil pa chisu chikatau kulejan ku chikumbu ni chikumbu.

3. Yom ik tufanyidina kulam mu muchim pa chisu tulejena ni telefon?

³ Mutapu wa Kulejan ni Telefon: Pa chisu cha kulejan ni telefon, minsamb yetu yifanyidin yikala chakin kamu mambamb. Antu amwing achisambishina mutapu winou akutwish amutangin mwin chikumbu minsamb ya kutang mu mutapu wa mambamb. Mazu ma kusambish nich madia mu buku Comment raisonner, mu Mudimu Wetu wa Want ni mu trakt Ov, Usotil Kwijik Uyakin? makutwish mikal ma ukwash nakash pa mulong winou. Anch wisambin minsamb yey amwiney, ijik bil mutu wa mulong, isambina chipul ni irijeka chakwel utangaku mifund mudia yakul. Chisu chivud ukupanany mikand yawiy yimwing mudi yipaninau pa chisu cha kulejan ku chikumbu ni chikumbu. Shinshikinany yiyul yiney: Itudisha ni lond pakemp-pakemp. Ikal ni kalimish, shimpish ni ikal murund, ni yom yiney yifanyidin kwovikan ku telefon. Tesh palondilay mwin chikumbu, kupwa mwitiyija ni mujikitisha mulong wa yilondilay. Babal, kangal wamulej mulong wa kupan mulambu, mulong chikutwish chovukan mudi wadi usotil umwita nfalang.

4. Kulejan ni telefon kukutwish kwatutwishish kusal ik mu teritwar wetu?

⁴ Muntu wisambina nend ku telefon ukutwish wikal chishet ap muyej ushichinga pa ndond yimwing ap muntu ukasikena kutan mu mudimu wa kulejan ku chikumbu ni chikumbu mulong wa program mukash wa mudimu wend. Kuding antu akwau ashichinga mu jimpangu ap mu yikumbu ya antu avud mukash kwandam. Chawiy lel, pitusadila usu mulong wa kuwanyish muchifanyidina mudimu wetu, tushinshikinany mutapu uwamp wa kusadil telefon mu kulejan uman.