Sotany Antu Akashinsh
1 Yany ya Yesu piur pa kuwanyish mudimu wa kulejan yilejen anch ukutwish kwikal mudimu ukash. Ndiy walonda: “Piukushikany mu musumb ap mu ul, sotany muntu wa kashinsh.” (Mat. 10:11) Nlel antu kashichap kwau kwol kwau chisu chilemp, ov mutapu ik tukutwisha kuyikimb nawamp antu inay akashinsh?
2 Shinshikin Teritwar Wey: Sambish kushinshikin teritwar wey. Chisu ik chidiau antu avud ku yikumbu yau? Kwisu ukutwisha kuyitan chisu cha muten? Ov, kudi dichuku dimwing dia rubing ap chisu kanang cha dichuku chikutwishau kwitiyij kuyendil? Kutenchik mudimu wey kwambatan nich chaku ni mwikadil wa antu adia mu teritwar wa pol pen kukutwish kukukwash kutan yibudikin yiwamp.—1 Kor. 9:23, 26.
3 In kulejan avud atana yibudikin yiwamp pa yisu ya urel. In yikumbu avud akat kwiswedish ni akutwish kutesh pa chisu chinech. Kupan uman kusutil kwi nshing mu yisu ya urel kukweting yibudikin yiwamp. Kusadil mu mwab wa angend-a-mushing ni kupan uman mu jindond ja antu awonsu jidi nijawiy njil ja kuyishiken antu nich rusangu ruwamp.
4 Pa rubing ra mujikit wa pakampwil, chikumangen chimwing chatenchika kupan uman pa chisu cha urel nakash pa machuku ma Diampos ni ma Diarubing ni kupan kand uman urel wa Diakasatu ni Diakatan. Atenchika kand kupan uman kusutin kwi nshing ni kutenchik kusadil mu teritwar wa wingend-a-mushing. Yitenchik yiney yaleta chibudikin cha musangar ujim mulong wa mujikit wachawanyisha chikumangen chakwel chidandamena kutenchik mudimu pa yisu yiney ya urel.
5 Dandamen Kusal Kuchirikinamu Kusu: Anch chikasiken mu teritwar wey kuyitan antu kwol kwau piukata kuchirikinamu, pakish kushilamu kanang kuwamp chakwel kuchirikinamu kand kwinsudiel kwa kuchirikinamu kwin kwawonsu, pamwing ni kwez kwa kusambish. Kupwa, shinshikin kulam kushilamu. (Mat. 5:37) Pichifanyidina, ukutwish kwit nimero wa nshing ya mwin chikumbu. Chikutwish kukukwash kwambamb kand ni muntu winou.
6 Usu wetu wa kudandamen kusot antu akashinsh ni kuyichirikin antu asangera akez kuuyukish kud Yehova.—Jinsw. 21:5.