Uman wa ku telefon ukweta mabuj

¹ Chitudia Atuman’a Yehova rutong retu ridap kusu ra kwipan mu kulejan rusangu ruwamp pakwez ridi kand ra kuyishiken antu awonsu pichitwishikina nich uruu wa Want. (Mid. 10:42; 20:24) Pakwez ap anch mudimu wa ku chikumbu ni chikumbu udandamedin kwikal mutapu wa kusambish wa kuyisankan antu, tumen anch ap nich mutapu wa kulejan winou tukatap kuyisankan antu awonsu. Chawiy lel chakwel ‘kuwanyish sens mudimu wetu,’ tukakusadil mitapu yikwau ya kulejan​—⁠mud uman wa ku telefon​—⁠chakwel kuman antu afanijadina ni amikoku.​—⁠2 Tim. 4:⁠5.

² Ndond jivud, antu ashiching mu yikumbu yimwing yikinginau nakash, mu yikumbu yishicha majuku mavud, ap mu jimpangu mudia yisak ya antu amwing, mukasikena kusadil mudimu wetu wa machuku mawonsu wa kulejan ku chis ni chis wa kuyishiken antu. Ap mu miab tukutwisha kusal mudimu wa ku chikumbu ni chikumbu, antu avud kadingap kwolikwau. Pakwez, in kulejan avud akat kuman yibudikin yiwamp mu kwambamb nau antu inay ku telefon. Dichuku dimwing pamanch mu mudimu wa ku chikumbu ni chikumbu, ambay aad a uruu ading ni antu chidivu akad kwikal kwolikwau. Kupwa pachirikau ku Chot cha Want, akimba pa list utekina manimero ma telefon ku maadres. Atazuka manimero minima ni atana antu chinan adinga kwolikwau!

³ Ov ukisining kuwejin ku mudimu wey uman wa ku telefon? Mukadivar umwing ulondil anch: “Nikisining muntu kwintazuk ku telefon wa ku chikumbu chakwel kwilandish chom, chawiy lel nikweting chitongijok chiyimp piur pa mutapu winou wa kupan uman.” Pakwez, kupwa kwa kutazuk ku telefon tupamp twaad kusu, walonda anch: “Chinkatishin! Kand kal nitonginap yikutwisha kubudikinaku, pakwez chinkatishin! Antu ading itudishina nakash ku telefon, ni ukwet yom yawonsu ukweta nich kuswir mulong wa kwambamb. Chinech chifanyidin kamu nakash!” Nambaz umwing wading ni yitongijok ya chilik chimwing: “Nadingap chakin ni kusanger kupan uman ku telefon. Chakin kamu, nadingap ni kusot ap kuchisal. Pakwez napakisha kuchisal, nachimana mudi chikweta mabuj nakash. Nikwet kuchirikinamu kusu 37 kwa uman wa ku telefon ni malejan mavud nakash minikangenya ap kutakel!” Anch usotin kupakish uman wa ku telefon, niyey kand ukutwish kuman chibudikin chiwamp.

⁴ Kurijek uman ku telefon: Mujikit wa kupan uman mu chikumangen akat kuutakelang kud kalam’a mudimu. Kulondwish ni nswir, chisak cha amakurump chikutwish kutond mukurump mukwau ap nkwash’a midimu umwing chifuvu chakwel kusadin pamwing nend mulong wa kurijek kupan kwa uman wa ku telefon. Mukadivar utadila miab ufanyidin niyend kusadin pamwing nau, mulong ukupan miab ni kwikal tayad nich rapor. Chawiy kand chimwing, kalam wa munyimuku ukutadil mutapu uyila program winou kurutu.

⁵ Anch kud yikunku mu mwab wen mukasikena kusal mudimu wa kupan uman ku chikumbu ni chikumbu, chifanyidin kurijek miab ya kulejan kusutin telefon. Mukadivar winkinau chisend chinech ukusal nawamp list wa maadres makarumwinau mud miab, yiney yifanyidin kwikal mu chisik chikemp chakwel akutwish kumasal chisu ni chisu. Makart mawonsu ma mwab nich yikunku yau yifanyidin kwikal ni chijingidij nich ka dipapel ka kufundin maadres yimekeshina anch chikunku kampand achitondin mulong wa uman wa ku telefon.

⁶ Ov kwisu ukutwisha kuman manimero ma telefon? Ukutwish kuman mukand ukweta list wa maadres ni manimero mwi ndond mukatau kulandishin mikand. Anch chikumbu chijim chilaminau nakash chikwet list wach achinach wa manimero ma telefon, ukutwish kutambul nimero kwinikwa. Ap bwat, chitwishikin kufund majin ma antu ashichamu mu mukand udia mu chikumbu cha kuyakin antu ni kuyikimbin mu buku ukweta manimero ma telefon.

⁷ Amakurump akutwish kusadin pamwing mu mudimu winou nich kurijek nau akadivar ija nawamp kupan uman wa ku telefon chakwel ayifundisha akwau, chitwishikin kusutin program wa Ayibol Akwashin Akwau. Chisu ni chisu, mu chikunku cha Chikumangan cha Mudimu cha nswir ja chikumangen akutwish kukasikeshin kuwap kwa mutapu winou wa kupan uman.

⁸ Chisu chisadinau amakurump kwendilan kwa ukafung kudi antu ayedila ap ayilim, akutwish kwikal tayad chakwel kuyikasikesh antu inay kupan uman wa ku telefon. Chitwishikin mukurump ukutwish kutazuk ku telefon chisu chikemp patadilay mwin kulejan. Kupwa mwin kulejan ukutwish kuman chisu kanang cha kutazuk niyend ku telefon. Avud asambisha mutapu winou akat kusal minit yikemp dichuku ni dichuku mu mudimu winou, ni chiyikatishin chakin.

⁹ Yiyul mulong wa kutwish: Chisu chayitumay Yesu in kwilej end kulejan, “wayituma aad aad.” (Luka 10:⁠1) Mulong wak? Wading wij anch, anch akat kusal pamwing akutwish kwilej ni kukasikeshijan muntu ni mukwau. Chidi chilik chimwing ni kupan uman ku telefon. Anch ukat kusadilany pamwing ni muntu mukwau, ukutwish kwilejany muntu ku mukwau, ukutwishany kwisambin yibudikin yen, ni kupanijan yiyul mulong wa misamb yikulondula. Ap pa chisu chiwisambinany ku telefon, ukutwishany kukwashijan kwijik jinsangu jifanyidina.

¹⁰ Chakwel kwikal ni yitongijok yiwamp ni kwipanamu, shakam ndond ukutwisha kutek yom ya kupan nich uman​—⁠Baibel, buku Comment raisonner, broshir Nzamb Witin, magazet, ni yikwau yikwau​—⁠kurutu kwey. Fund mitapu yimwing ya kusambish nich misamb, ni ikal nich pa ndond ukutwisha kuyiman. Irijeka nawamp chakwel kufund yawonsu nawamp, machuku ma ngond chisu ni dichuku chakwel kuvurik pa chisu ukulondwila kusanger watanina.

¹¹ Yisu yivud antu ababeling nakash anch atesh dizu dia muntu wakad kwijik ku telefon. Chawiy ikal ni chirungil, urund, ni kusadil manangu. Mwin chikumbu ukwet kusu dizu diey chakwel kujingunin yaku yey ni kashinsh key. Iswedisha ni kulond milong yidiokila mu muchim. Lond pakemp pakemp ni nawamp nich dizu diwanyidina chakwel akutesha. Mushila mwin chikumbu chisu cha kulond. Sadil dijin diey diawonsu, ni muleja anch ushich mu mwab udiay. Tusotinap anch antu atonga anch tudi angend a mushing a ku telefon. Pa ndond ya kulond anch uyitazukin antu awonsu adia ku chikumbu chimwing ap yikumbu yivud, tazuk kusu muntu umwing.

¹² Ya kusambish nich misamb ku telefon: Mazu mavud ma kusambish nich misamb madia pa paj 9-15 wa buku Comment raisonner akutwish kumambatanish nich uman wa ku telefon. Ukutwish kulond anch: “Nikutazukin ku telefon mulong nikwetap mutapu wa kwez amwinam ni kukutal. Nikutazukin mulong wa yiutongina piur pa chipul chimwing cha usey.” Kupwa sambish chipul.

¹³ Tukutwish kusadil cha kusambish nich misamb chidia mwishin mwa mutu wa mulong “Ubaj/Diking” (Crime/Sécurité) mutapu unou: “Alo. Yam _____. Nishich mu mwab udiany. Nisotil kukwijikish anch nidiap ngend a mushing ap mwin kutompan pa kan. Nikutazukin mulong nikat kwiyakamish mulong wa diking dia muntu. Kujipan kuvulijadin ndond tushicha, ni chitadin mwom wetu. Ov utongin anch kukez kwikal dichuku dikezau antu awonsu kutwish kwend mwi njil uchuku pakad wom? [Chingel chakul.] El nitangap yakanay Nzamb kusal.”

¹⁴ Kusadil misamb ya kapamp kamwing chakwel kwit kusambish kwilej ni muntu Baibel ku telefon kwikadil ni yibudikin yiwamp. Ukutwish kulejan mutapu wa kwilej mu aminit akemp kusu. Muleja anch usotin kumwendil ku chikumbu mulong wa kudandamen nich dilejan, ap anch muntu kasangaredinap, mwita kudandamen ni dilejan ku telefon dichuku dikwau.

¹⁵ Anch wapwishany misamb, ikal nich chom chimwing mu manangu chikez kukutakel piukumwendila muntu kwolikwend ap piukumutumina mukand kanang. Anch muntu widjidjek kukwinkish adres wend, mwita kwisamb nend kand ku telefon. Chitwishikin kutazuk tupamp tuvud kurutu kwa kwov musangar wa kukutazuk ku chikumbu chend.

¹⁶ Kukwat chiyul: Nambaz umwing wa mivu 15 wasambisha mudimu wend wa pamanch nich kutazuk ku telefon. Wisamba ni mband umwing witiya buku Connaissance. Pamuletinay nambaz buku ku chikumbu, mband winou wasota kwijik mutapu wijikay changadim nimero wend wa telefon, mulong kadingap wa kufund pa list bwat. Nambaz watazuka nimero winou pakad kwijik kwend! Mband winou wasambisha kwilej ni udi katat mwin kulejan wakad kutambul dibatish.

¹⁷ Nambaz umwing watambula mwab wa kulejan ku telefon pakwez walika kusal mu mwab winou jimbing jisatu mulong wa wom. Ov chom ik chamukasikesha kusambish? Wavurika Réveillez-vous! wa Chiwong 22, 1997, mutu wa mulong “Chisu Niziyila, Chawiy Nikweta Ukash.” Chikunku chinech chading ni kwisambin nambaz umwing ukata kulejan ku telefon chikalap nchik kuziy kwa mujimbu wend. Nambaz walonda anch: “Nalembila kud Yehova, namwita ukash. Namwita kwingikish mazu mafanyidina chakwel kusambish misamb yam.” Ov chibudikin ik chatambulay pa dichuku diend dia kusambish kupan uman ku telefon? Ulondil anch: “Yehova wakula ku dilembil diam. Antu antesha, natenchika mulong wa kuchirikinamu kusu.” Kupwa uman wend wa ku telefon washikena ku dilejan dia Baibel. Upwishidil nich kulond anch: “Yehova wanfundisha kumuchingejin nakash pa ndond pa kwichingejin amwinam.”​—⁠ Jinsw. 3:⁠5.

¹⁸ Kulejan uyakin ku telefon kwikadil kal mutapu umwing wa kulejan rusangu ruwamp ukweta mabuj. Irijeka nawamp, ni chisala ni muchim wey wawonsu. Kangal wachirikin kwinyim anch kumekenap chakul chiwamp pa kutazuk kukemp kwa kusambish. Mwita Yehova akutakel, ni isikej yiufundina nich yifundinau akwen akata kulejan mwi njil yiney yisangarishina. Nich rusot ra kulik kuburen muntu ap umwing mu mwab wetu, tukutwish kusal nakash nich mushiku mudimu wetu nich kuswapal.​—⁠Rom 10:​13, 14.