Twijikishany dijin dia Yehova ni midimu yend
1 “Panany kujikitish kudi [Yehova, NW], tazuk pa dijin diend, lejan kudi michid rusangu ra midimu yend. . . . Wayuk kwend mwawonsu ukata kumusot Nzamb.” (Kus. 105:1, 3) Mwin kuseng wafunda mazu minam wamana musangar ujim mu kuyilej akwau piur pa Yehova ni “midimu” yend. Ov yidi midimu ik? Chakin yidi midimu yambatena ni want wa katumb wa Nzamb ni ‘rusangu ruwamp ra dipandish diend.’—Kus. 96:2, 3; 145:11, 12.
2 Pitushejidina piswimp ni chirung cha Chivurikish cha 2001, tukwet yivud ya kusanger piur pa midimu ya Yehova kud etu. Yakudia ya Urel ya Mwant yidi kamu chakin, chivurish chijim nakash cha muvu kud in Kristu akin awonsu. Kwikil musambu ukwau mud winou upandakena usey, rutong, ap mutapu wa kuusal. Chinech chidi chisu chetwetu awonsu kuvurik yasalay Yehova ni Yesu mulong wa kulet njil ya dipandish dietu. Chidiap cha kushimok anch pa chirung cha Chivurikish tuchingejina kuman mijikit yivud mu mudimu wa chingand, mulong tusotin etu awonsu kwijikish “rusangu ruwamp ra dipandish”!
3 Ov ukwikal chibol nkwash? Mwi Ndol wa muvu wasutina ou antu 7 644 mu Congo Kinshasa ni antu 556 mu Congo-Brazzaville asala mud ayibol ankwash. Ov muvu unou, tukutwish kusal Rish ni Ndol angond amwing a pakampwil a kuvudish mijikit mu mudimu wa kulejan? Ngond wa Rish ukwikal ni machuku ma Diampos matan, ni ngond wa Ndol ukwikal ni machuku ma Diarubing matan. In kulejan avud akata kusal mudimu kudiosh pamanch kushik urel, amen anch nich kutenchik machuku ma kusal mudimu dichuku dia kabuj kwisudiel kwa rubing, akutwish kwikal ayibol ankwash. Chakwel kushiken uvud wa asaa 50 kwi ngond, chibol nkwash uswiridin mwayen wa asaa 12 ku rubing. Shinshikin nawamp maprogram mapaninau madia mu kapalakany kadia pa paj 4. Ov padiaku umwing wambatena nich mikadil yey? Anch bwat, ukutwish kusal program wey amwiney chakwel kusal uchibol nkwash mwi ngond wa Rish ni wa Ndol.
4 Amakurump afanyidin kusambish katat kamu kukudish mushiku mulong wa mudimu winou ni kukukwatikesh. Muvu wasutina ou mu chikumangen chimwing amakurump awonsu ni ankwash’a midimu awonsu asala mudimu wa uchibol nkwash, mwading in kulejan 64 pa in kulejan 121 asala mudimu wa uchibol nkwash mwi Ndol! Asangara kand pa kuman in kulejan akad kubatishiu musamban kusambish kupan rapor mu Rish ni Ndol. Chakin kamu, chinech chawiy chisu chiwamp mulong wa an ni antu asu kuyipul amakurump anch awanyishin yitinau chakwel kusambish kubudik mu mujikit wa kulejan.
5 Kusal usu nakash kuletining yiyukish: Yikumangen yikata kwitekin rutong ra pakampwil ni kusal usu nakash mulong wa kuyishiken yikat kumanang yiyukish yivud. Yikumangen yimwing yikutwish kwikasikesh nakash kupwish mwab wakadau kusal yisu yivud, kushindamen pa mitapu kushalijan ya kulejan, mud kukasikeshin uman wa ku telefon—mutapu umwing ukweta mabuj mulong wa kwisamb ni antu akad kwikal kwolikwau ni antu akasikena kutan ku chikumbu.
6 Ov mayej ap kunanap kufanyidin kumuchirish muntu kwinyim chakwel kwipan nakash mud kamu chitwishikina mu mudimu wa kulejan? Bwat kwau anch kulondwish ni nambaz umwing wa mivu 86 uyedina musong wa kanser. Mikalap nchik mend mend mayedina, wasadil mudimu wa uchibol nkwash mwi ngond wa Ndol wasutina ou. Kupan uman wa ku telefon kwamutwishishin kusal sens mudimu wa kulejan, wawejinaku kushiman kwend kud Yehova. Chinech chading dikasikesh kud ndiy ni ku chikumangen.
7 Irijeka nawamp mulong wa chivurikish: Muvu unou Chivurikish chikwikal pa Ndol 8. Mulong dined dikwikal dichuku Diarubing, chitwishikin kud antu avud kwez ni kukumangan. Tukutwish kukumangan antu avud anch twasal yitufanyidina kusal nich (1) kwikal ayinetu pakach pa in kukumangan ni (2) kuyitazuk akwau kwez kwinung netu pamwing ku Chivurikish. Ov nany tukutwisha kutazuk?
8 Tal mu yiukata kufund mu karne wey wa mudimu wa chingand majin ma antu amekeshina kusanger kanang mulong wa uyakin, ap anch ukatap kuya ni kuyital chisu ni chisu. Machuku maad ap masatu kurutu kwa Chivurikish, ikasikesha kuyendil antu awonsu chakwel kuyishil dipapel dia diladikij dia Chivurikish. Anch kudi mutapu, tenchik mutapu wa kwez ni kuyisend antu asotina kukumangan.
9 Mu yikumangen yimwing, kakusadilangap mapapel mawonsu machapinau mulong wa Chivurikish. Atulam’a ujindj a chikumangen afanyidin kutal nawamp anch mapapel ma diladikij mikalaku pa chisu chifanyidina chakwel kumangan mawonsu. Ukutwishany kufund kwishin kwa dipapel dia diladikij chisu ni ndond yidia Chot muukusadilanya Chivurikish. Ap ukutwishany kuwejinaku kadipapel ka kwijikish adres wa Chot cha Want anch yawiy ndond ukusadilanya Chivurikish. Mud kuvurish, chisu chivud mapapel ma diladikij dia Chivurikish chifanyidin kumapan ku chikas cha mwin chikumbu amwinend.
10 Tuvurikany antu alikina kusal mudimu wa kulejan: Chiding cha musangar anch muntu wilejina Baibel wipan kud Yehova ni kumekesh chinech nich kutambul dibatish. Muvu ni muvu, amwing mukach mwetu akat kulik kukumangan netu pamwing, ni akat kulik kuyilej akwau piur pa dijin dia Yehova ni midimu yend. Tukwet mulong wa kashinsh wa kubangin. Ap anch in kulik kusal mudimu wa kulejan avud kalikinap uyakin, chitwishikin anch imikin kal mudimu wa kulejan mulong wa kuchirikin kwinyim, mulong wa milong yikwetau, ap mulong wa yakamish ya mwom yikwau. (Mat. 13:20-22) Akwau adia mu kuziok kwa muspiritu aswiridin ukwash chakwel kuchirikin ku chikumangen kurutu ditenchik dia Satan dieza kuyiminy. (1 Pit. 5:8) Pa chirung cha Chivurikish chinech tusotin kusal usu wa pakampwil mulong wa kuyikwash awonsu alikina kusal mudimu wa kulejan awanyishina yitinau kuchirikin kand mu mudimu wa kulejan rusangu ruwamp.
11 Kalam’a ujindj wa chikumangen ufanyidin kuyijikish antakel a dilejan dia buku muntu mwawonsu wakad kusalang mudimu wa kulejan udia mu chirund chau. Komite wa Mudimu wa Chikumangen ukutakel mu kurijek chakwel amakurump ayendina antu awonsu in kulik kusal mudimu wa kulejan. Anch aman anch muntu winou uwapidil kutambul ukwash wa muntu ipend udiokila ku kwilej Baibel, komite wa mudimu ufanyidin kukwat chiyul cha kwijik nany ufanyidina kutakel dilejan. Ap anch dilejan diswiridinap kuditakel chirung chimwing chilemp, muntu winkinau kuditakel ukutwish kuchind asaa, kuchirikinamu kusu, ni dilejan dia Baibel.
12 Ndol wasutina ou nambaz umwing wadinga ni kusal mudimu wa ku chikumbu ni chikumbu wapana magazet kud nsand umwing mwi njil. Nsand winou walonda anch watijadin ni mband umwing udia Kaman wa Yehova walika kal mudimu wa kulejan. Wamwipula ndond yidia Chot cha Want ni wamutazuka nambaz kwez ni kumwendil ndiy ni mukajend. Ambay a uruu akumangana ku chikumangan chalondula ni itiya kwilej Baibel.
13 Twikalany tayad mulong wa kuwejinaku mujikit! Mwin kuseng walonda anch tufanyidin kwijikish dijin dia Yehova ni midimu yend wawejinaku anch: “Muwangilany, mushimanany nich muminy, londany ya midimu yend yikwamushena. Ibazany mu dijin diend ditumbila.” (Kus. 105:2, 3) Tumekeshany kubangin kwetu mulong wa kujimb kwa dijin dia Yehova ni “midimu yend yikwamushena” nich kuwejinaku usu wetu mu mudimu wa kulejan, kusal chisu cha Chivurikish chinech kwikal chijim nakash!
[Caption on page 4]
[Box on page 4]
Mitapu Kushalijan ya Kusal Program wa Asaa 12 ku Rubing Chakwel Kusal Uchibol Nkwash
Dichuku Asaa
Diamond 1 2 - -
Diakajikaad 1 - 3 -
Diakasatu 1 2 - 5
Diakanying 1 - 3 -
Diakatan 1 2 - -
Diampos 5 4 3 5
Diarubing 2 2 3 2
Uvud: 12 12 12 12
Ov padi program ukufanyidina ey pa maprogram minam? Anch bwat, mulong wak ukutwishap kwisadil program wey amwiney?