Ov, Ukutwish Kusal Mudimu wa Kupan Uman pa Chisu cha Urel?
1. Kwambatan ni mulej umwing, ov, chisu ik chalejanangay kambuy Paul ku chikumbu ni ku chikumbu?
1 Kwambatan nich buku Daily Life in Bible Times, kambuy Paul wading ni chaku chakusal mudimu wa kulejan wa ku chikumbu ni ku chikumbu “kudiokal pa saa wa 16 djat ni kushik uchuku.” Twijap anch mudimu winou wa kulejan urel wading chakin kamu program wa Paul, pakwez twij anch Paul wasotanga “kusal yom yiney yawonsu mulong wa rusangu ruwamp.” (1 Kor. 9:19-23) Mudimu winou wamwita kutenchik yisakin yend ya ku mujimbu chakwel aya kulejan ku chikumbu ni chikumbu pasotay kwisamb ni antu avud.
2. Ov, mulong wak chisu cha urel chiding chisu chiwamp cha kwipan mu mudimu wa kulejan?
2 Mu jindond jivud, in kulejan akweting chaku cha kuya ni kulejan ku chikumbu ni ku chikumbu pamanch mu rubing. Ov, mwi ndond yey, chisu chinech chipandaken kuwap? Chibol umwing wisambidin piur pa teritwar wend anch: “Chikasikening kumutan muntu ap umwing ku chikumbu pa chisu cha muten. Pakwez, antu avud ading ku yikumbu pa chisu cha urel.” Chawiy lel, kupan uman pa chisu cha urel chikutwish kwikal chisu chipandakena kuwap cha kuyitan antu, pa kampwil mulong wa kuyilej rusang ruwamp. Yisu yivud in chikumbu ading tayad ni asotining kwisamb. Anch chiwapin kusal mwamu, amakurump afanyidin kutenchik yikumangan mulong wa mudimu wa kulejan pa chisu cha urel.
3. Ov, mutapu ik tukutwisha kujingunin chisu twipanina mu mudimu wa kupan uman pa chisu cha urel?
3 Sadilany Njingunin: Kujingunin kudi kwa usey nakash patusadininga mudimu wa kupan uman pa chisu cha urel. Chilakej, anch wajingunin anch chisu chinech chifanyidinap kudi mwin chikumbu, mudi pa chisu chend cha kudia, chiwapin nakash kumuchirikin chisu chikwau. Anch kwajal kal, chiwapin kwiman ndond yikutwishay mwin chikumbu kukuman, ni imekesha amwiney pakad kulab ni lond rutong rey ra kuchirikin. Chidia kand cha manangu kusal mudimu ni muntu wakaad ap mu chisak ni kuchingel ku dikonk dia mikombil pakad kwiyauril. Chiwapinap kuyichirikin in chikumbu chisu chirijekinau mulong wa kuya kulal. (2 Kor. 6:3) Anch kwajal kal ndond yiudianya yidi mu ubaj, chifanyidin kulejan ching pa yisu ya urel.—Jinsw. 22:3.
4. Ov, yiyukish ik yidiokilinga ku kupan uman pa chisu cha urel?
4 Yiyukish: Mudimu wa kulejan uding nich musangar uvud nakash chisu tutwishininga kupan uman. Pitupanininga nakash uman, tukwetining yisu yivud ya kuyikwash antu akwau chakwel “apanda ni kwijik uyakin.” (1 Tim. 2:3, 4) Ov, ukutwish watenchikany chakwel usalany mudimu wa kupan uman pa chisu cha urel?