Ov, Ukutwish Kuswimp Program Wey?

1. Mutapu ik tufanyidina kuswimp program wetu wa kulejan rusangu ruwamp?

¹ Chitudia in Kristu akin, twitiyijin kal kutazuk kwa kwikal “ayibind a antu.” (Mat. 4:19) Mud muntu ukata kuta ansh, tukwikal ni yibudikin yiwamp nakash mu mudimu wa kukimb antu anch twarijek chisu cha kulejan padiau antu ku yikumbu. Mu jingand jivud, angond a kurutu ay akwikal yisu yiwamp nakash. Urel nakash ni muten anch washik pa mulamu wa kambundj, antu avud ading ku yikumbu. Yisu yivud, antu akat kwiswedish ni akutwish kwak angendj. Ov, ukutwish kuswimp program wey chakwel kulejan rusangu ruwamp pa yisu yiney?​—⁠1 Kor. 9:⁠23.

2. Mitapu ik yimwing tukutwisha kuyilej antu avud rusangu ruwamp?

² Kulejan Uman Urel: Kwirijek kurutu mulong wa kulejan yisu ya urel kukutwish kutukwash kuyilej antu avud rusangu ruwamp. (Jinsw. 21:⁠5) Ansand akutwish kulejan chisu cha urel anch abudik ku shikol. Antu akwau akutwish kusal mwamu anch apwish mudimu. Yirund yimwing ya dilejan dia buku yikutwish kwirijek kulejan saa umwing kurutu kwa dilejan dia pa rubing.

3. Mutapu ik ukutwisha kulejan mu yisu ya urel ni anch muten washik pa mulamu wa kambundj mu teritwar wey?

³ Kulejan ku chikumbu ni chikumbu urel ni muten anch washik pa mulamu wa kambundj kukutwish kukwash kulond nau antu akad kwikalang ku yikumbu chisu chawonsu. Mu materitwar mavud, mudimu wa kulejan mu mukombil ni milad yikwau ya kuyilej antu awonsu uman yikutwish kand kusadik urel. Ni avud amen anch yisu ya urel yidi yiwamp nakash kuchirik ni kuyital antu ni kusambish malejan ma Bibil.

4. Mulong wak chidi cha usey kwikal mwin kujingunin ni mwin chovu chisu ulejena uman urel?

⁴ Tukwet Kuswir Kwa Kujingunin: Kujingunin kuwamp kudi kwa maswir chisu tulejena uman urel. Chidi chiwamp nakash kukepish kulejan uman chisu cha urel nakash, ap kuya ni kuyital in chikumbu chisu chisotinau kwirijek mulong wa kulal. (Filp. 4:⁠5) Anch wakokal ku chis, iman ndond yikutwishau kukuman, ni iyijikisha nawamp. Lejan pakad kulab rutong ra kwez kwey. Anch wez chisu chiyimp, chisu chidilau in chikumbu, yikana mulong wa kuchirik chisu chikwau. Ikal mwin kutong mulong wa akwen chisu chawonsu.​—⁠Mat. 7:⁠12.

5. Mutapu ik tukutwisha kwipuk mikadil ya ubaj chisu tulejena?

⁵ Tukwet kand kuswir kwa kubabel mikadil yikutwisha kwikal ya ubaj. Anch ulejen uman urel nakash ap anch kwajal kal, chidi chiwamp kwend antu aad ap kwend pa chisak. Endil mu mikombil mudia chitokish nau antu akwau. Lejan uman mu jindond wovila anch udi mu diking. Ipuk jindond jikutwisha kwikal ja ubaj anch kwajal kal.​—⁠Jinsw. 22:⁠3.

6. Ukwash ik ukwau ukutwisha kudiokal ku kulejan uman urel ni muten anch washik pa mulamu wa kambundj?

⁶ Kulejan uman urel ni muten anch washik pa mulamu wa kambundj kukutwish kutukwash kulejan nau ayibol ankwash ni ayibol a rawonsu. (Rom 1:12) Ov, ukutwish kuswimp program wey mulong wa kwipan mu mulad winou wa mudimu?