Salany “Yom Yawonsu Mulong wa Rusangu Ruwamp”

Salany “Yom Yawonsu Mulong wa Rusangu Ruwamp”

1. Chom ik chisotinay mwin kulejan wa Want kuyisadil antu akwau, ni mulong wak?

¹ Kambuy Paul wiyova anch ufanyidin kuyilej antu akwau rusangu ruwamp. (1 Kor. 9:16, 19, 23) Chawiy chimwing, kwiyakamish kwetu mulong wa mashakamin mawamp ma chikupu ma antu matubachikining tuya tukayileja rusangu ruwamp.

2. Pa chisu tulejena, yom ik tukutwisha twatenchik, ni mulong wak?

² Lejanany Kwindond Kudia Antu pa Chisu Chifanyidina: Chibind wa ansh muwamp utiling wand wend, kichidiap kwindond ni pa chisu chikatishinay ndiy, pakwez pa ndond ni pa chisu chikutwishay kuyitan ansh. Niyetu, mudi “ayibind a antu,” tuswirikedin kwitenchik chakwel tuyitana antu mu teritwar wetu ni kusanger nakash chisend cha kuyikumangej “ansh a mitapu yawonsu.” (Mat. 4:19; 13:47) Ov, tukutwish twaya pa yisu ya urel chakwel tuyitana antu ku yikumbu yau ap yisu ya pamanch chakwel tulejana mu mikombil? Rutong ra Paul radinga ra kuwanyish “kulejan rusangu ruwamp,” ni wasadila chisu chifanyidina chadingay nich mulong wa kusal mwamu.—Mid. 17:17; 20:20, 24.

3, 4. Pa chisu tudia mu mudimu, mwi njil ik tukutwisha kwiyambatanish, ni kukwikal yibudikin ik?

³ Ambatanish Minsamb Yey ni Maswir ma Muntu: Chisu ni chisu ayibind a ansh atenchikining mitapu yau ya kusadil chakwel akwata mutapu wa ansh kanang. Ov, mutapu ik tukutwisha kulejan rusangu ruwamp ra Want mu mutapu wa kuyisangaresh antu adia mu teritwar wetu? Tufanyidin, nich kubabal kusambish minsamb piur pa rusangu kanang riyakamishina antu ni kutesh nawamp yikulondau pa mulong winou. (Yak. 1:19) Tukutwish twayipul piur pa yitonginau. (Jinsw. 20:5) Mwi njil yiney tukez kutwish kwambatanish minsamb yetu ya kulejan nich rusangu ruwamp mu mutapu umwing ukutwisha kuyisangaresh antu. Paul wikala “yom yawonsu kudi antu awonsu.” (1 Kor. 9:22) Kwiyambatanish nich kudi kwa usey chakwel kuyipukun antu ku michim.

⁴ Udi musangar mudi ik wa kuyilej antu “rusangu ruwamp” ra yom yiwamp! (Isay 52:7) El tusalany “yom yawonsu mulong wa rusangu ruwamp” chakwel tuyileja antu avud muchitwishikina.—1 Kor. 9:23.