Tuyishikenany Antu Avud Nich Rusangu Ruwamp Pichitwishikina
1. Yom ik yasalau in Kristu a pasak chakwel kuyishiken antu avud nich rusangu ruwamp pichitwishikina?
1 In kwilej a pasak a Yesu asota kupalangesh nich kashinsh uruu wa Want. Asadila mitapu yifanyidina mulong wa kulejan rusangu ruwamp kud antu avud pichitwishikina. In Kristu in kufund Bibil afunda mifund yau yatakelau nich spiritu mu Ugrek wa antu awonsu, wikala rudim ra michid yawonsu ya Want wa Rom. Chikwau, in kulejan akweta mushiku a mu mivu chitot ya kaad ni ya kasatu C.C. atwisha kubol (kusut kurutu) mu kusadil kwa kodeks, wadinga uswapela kusadil kupandakanamu muvungur mulong wa kukimb mareferans.
2, 3. (a) Mutapu ik uwanyidina Isay 60:16 mu yisu ya katat? (b) Mutapu ik usadidilau winchij mulong wa kutwal difukwil diakin kurutu?
2 Kusadil kwa Winchij: Kusutil kud muprofet Isay, Yehova wasambela kulond anch: “Ukez chakin kwamu mayel ma michid.” (Is. 60:16 NW) Mu kuwanyin kwa uprofet winou mu machuku ma katat, atushalapol a Yehova akat kusadil misul ya usey yidiokila kud akamichid chakwel kutwal kurutu mudimu wa kulejan. Chilakej, mu 1914, kurutu kwa kusadil kwinoku kwa winchij kutwisha kwikal kwa kusadil mu winsak, in Kwilej Bibil asambisha kulejan “Photo-Drame de la Création.” Kulejan kwinoku kwa filim wa yipich, ya ulombu ni mazu, mu asaa chinan kwapana uman wa usu ku mamiliyon ma antu.
3 Nlel unou, antu a Nzamb asadidil mashiny majim ma kuchap swa ni ma kompyut chakwel kupalangesh ma Bibil ni mikand ya Bibil mu yitot ya mazu. Mutapu uswapela wa transpor ukat kushemunin mikand ya Bibil ku yikunku yilemp ya divu, kuyishiken antu mu jingand 235. Kusutil spiritu wend, Yehova wayikasikeshin atushalapol end kusadil nawamp winchij mud winou, kusalang uyakin wa Bibil wikal kud antu avud nakash kupandikan kwinsambishil kwa rusangu.
4. Yitenchik ik yasadilau amwing mu mwom yau mulong wa kuyishiken antu avud nich rusangu ruwamp?
4 Yitenchik ya Pakampwil: In kwifukwil akin ayikasikesha kand kusal yitenchik ya pakampwil mulong wa kuyishiken antu avud nich rusangu ruwamp. Avud apipesha mwom yau chakwel kwipan nakash mu mudimu wa kulejan. Amwing ashemunika chakwel kusadil kwi ndond kudia kuswir nakash kwa atutwambil a Want. Akwau atandurila mudimu wau kusutil ku kwilej rudim ra wingendj.
5, 6. Yom ik yikutwisha kusadik chakwel kuyishiken antu avud pichitwishikina mu teritwar wen?
5 Chikwau kand, tukutwish kuyishiken antu avud nich rusangu ruwamp kusutil kulejan chisu chidiau antu ku chikumbu ni ndond yikutwishau kwikal antu. Anch chisu ni chisu antu kadiap ku chikumbu muten mu teritwar wen, ov, ukutwish kutenchik program wey chakwel kulejan mu yisu ya urel? Ov, kudi ndond ja antu awonsu jakutwish kupanin uman? Wapakishin kal kulejan uman wa ku telefon ni kusadil mu teritwar wa winsak? Ukat kukimb mitapu ya kulejan uman wa chikashimwish?
6 Dilau dijim mud ik twitapidila dia kwipan mu kulejan uman ujim ulejenau piur pa dijin ni Want wa Yehova! Tudandamenany amboku kwangan uyakin upanina mwom wa Dizu dia Nzamb nau antu avud pichitwishikina.—Mat. 28:19, 20.