Ov, Usotin Kwambatanish Nich Mwikadil?

1. Payila yom mu mangand ni kuswimp, ov, yitenchik ik yitwitinau tutenchika?

¹ Mu 1 Korint 7:31, Bibil ufanikeshin mangand nich chimet cha in kusengan chiswimpininga masengan ni in kusengan pakad kwimik. Payila yom mu mangand ni kuswimp, chitwitin anch tutenchik chisu ni chisu, milad yetu, program wetu ni mutapu wetu wa kuyisejin antu. Ov, usotin kwambatanish nich mwikadil?

2. Ov, mulong wak tufanyidin kwambatanish nich mwikadil chakwel tuya pamwing nich dirijek?

² Milad Yen ya Kulejan: Chikumangen cha in Kristu chambatishanga yisu yawonsu milad ya kulejan nich mwikadil. Chisu chayitumay Yesu in kwilejend kapamp ka kusambish, wayileja anch kangal asend nsapu ya kudia ap nfalang mu masakosh mau. (Mat. 10:9, 10) Kupwa, wayivurisha yany yiney mulong wa yom yikash yela kuyishiken in kwilejend mu machuku ma kurutu ni kutandurik kwa mudimu wa kulejan mu materitwar makwau. (Luka 22:36) Pasutin kal chitot cha mivu, dirijek dia Yehova diasadina milad kushalijan ya kulejan—chilakej mudi makart ma kupan nich uman, maradio ni miotak yikweta yijimbish ya dizu—kwambatan nich maswir ma pa chisu chin chang. Nlel unou, mulong antu adia mu jindond jivud kashakaminingap ku yikumbu yau, chawiy chitongijok chidi cha kuvudish mudimu wetu wa ku chikumbu ni chikumbu pamwing ni kupan uman wa patok ni wa kukashimwish. Atukasikesh kand kulejan ku chikumbu ni chikumbu pa chisu cha urel nakash anch antu adiokal kal ku midimu yau. Mudi muyila kurutu ditemb dia mwiur dia Yehova ni kutenchik mutapu wad wa kuya, ov, uyiling pamwing nich ditemb dined?—Ezek. 1:20, 21.

3. Ov, mutapu ik kwikal mwin kwambatanish nich mwikadil kutukwashining twikala ayifuvu mu teritwar wetu?

³ Mutapu Wey wa Kwisamb ni Antu: Ov, antu ik mu teritwar wen iyakamishininga pa mulong kanang? Ov, udi mulong wa nfalang? Wa Dijuku? Wa Njit? Chidi cha usey kwijik milong ya katat ni mikadil yikata kuyishiken antu awonsu adia mu teritwar wetu chakwel turijeka mutapu wetu wa kwisamb nau mu mutapu uwanyidina. (1 Kor. 9:20-23) Chisu chimekeshinau in yikumbu yitongijok yau, pa ndond pa kuyinkish chakul cha piur-piur ni kudandamen nich minsamb warijekang, chiwapil mud ik kwambatanish nich mwikadil ni kushinshikin pa milong yau.

4. Ov, mulong wak tufanyidin kusal swaa chakwel twambatanisha nich mwikadil?

⁴ Piswimp ap kamu yom ‘ya mangand’ yikez kupwa ni mar makash makez kusambish. “Chisu chakep kal.” (1 Kor. 7:29) Chidi cha usey mud ik, kwambatanish nich mwikadil ni kusal mwamu pakad kulab, chakwel tutwisha kuwanyish yivud nakash mu chisu chikemp chashalaku kal!