Video Ufanyidina Kamu Kushinshikin Nakash
“Video winou utongishin chakin kamu!”
“Video winou wanshika kamu nakash ku muchim!”
“Natonga nakash mu muchim!”
1 Ov, mwamu wiyova niyey kupwa kwa kutal kapamp ka kusambish video Les jeunes s’interrogent. . . Comment se faire de vrais amis ? Kwasut kal mivu kanang, mukadivar umwing uchidia nsand wading ni yikokujol nakash mu mwom wend, yawonsu yiney yamushikena mulong wa arund atonday. Amushikija ku kushadish kuburen kwend kusanger uyakin ni washadisha urund wend nend Yehova. Kupwa abudisha video Vrais amis. Ndiy wafunda anch: “Pinadinga ni kutal video tupamp tuvud, nadila mansoj. Namujikitisha Yehova mulong wa ukwash wa pa chisu chifanyidina.” Video wamubachika kukarumun mashakamin mend ni kwikal ni arund awamp. Ndiy walonda kand anch: “Chimeken kamu patok anch wijany kamu nawamp milong yikwetau ansand.” Anvaj nau ansand, ov, ukutwishanyap amboku kutal kand video winou pa chisu cha dilejan dien dia dijuku? Imikany video kupwa kwa chikunku ni chikunku, ni kwisambin pamwing patok ni muchim umwing yipul yidia mu maparagraf malondwila am.
2 Mazu ma Kusambish: Murund wakin uding mutapu ik?—Jinsw. 18:24.
3 Yikata Kukangesh Urund: Mutapu ik ukutwisha kupandakan yitongijok ya kwiyov mudi udi amwiney? (Filp. 2:4) Mulong wak ufanyidina kusot kuwapish untu wey, ni nany ukutwisha kukukwash kusal mwamu? Yom ik yikutwisha kukukwash kwikal ni arund avud, ni kwisu ukutwisha kuyitan?—2 Kor. 6:13.
4 Urund Nend Nzamb: Mutapu ik ukutwisha kukudish urund wa piswimp ni Yehova, ni mulong wak kusal mwamu kwitin kwikasikesh? (Kus. 34:8) Ov, nany ukutwisha kukasikesh kamu nawamp urund wey nend Nzamb?
5 Mulad wa Arund Ayimp: Arund ayimp adi anany? (1 Kor. 15:33) Mutapu ik ukutwishau arund ayimp kumushikij muntu ku kuwa mu spiritu? Rusangu ridia mu Bibil ra Dina rikufundishin ik?—Dis. 34:1, 2, 7, 19.
6 Dram wa Katat: Kwikal pa amwinend kwikala ni usu ik padiay Tara? Mutapu ik wiyingishay Tara mulong wa kukimb urund wa ansand a mu mangand? Arund nend amuteka mu mikadil ik ya ubaj? Mulong wak anvaj end akanganya kuman ubaj wadingay nich, chad mutapu ik waswimpau yitongijok mulong wa kumukwash kuchirish kand mwom wend wa mu spiritu? Mutapu ik wamekeshay nambaz umwing chibol anch wadinga murund wakin wa Tara? Mulong wak in Kristu afanyidin kutesh chiyul chidia mu Jinswir 13:20 ni Yeremiy 17:9? Dilejan ik dia usey dilejay Tara?
7 Dipwishil: Malejan ik wilejina kal ku video winou? Mutapu ik ukutwisha kumusadil chakwel uyikwasha antu akwau?—Kus. 71:17.