Tusadilany Chisu Chetu Mutapu Uwamp

Muntu ni muntu ukweting chisik cha chisu cha chilik chimwing rubing ni rubing. Chikunku tukata kupan mu kupalangesh rusangu ruwamp chidi chipandikena usey mulong chiding chisu chitukata kusutish mu mudimu umwing wa dipandish. (Rom 1:16) Tumekeshining kusanger kwetu mulong wa chinech pitukata kwirijek nawamp mulong wa mudimu wa kulejan, kushik kurutu kwa chisu ku yikumangan ya mudimu wa kulejan, ni kuya pakad kulab mu teritwar. Chiwapidil kulejan pa ndond pa kushadish chisu. Yehova chatufundishay anch “ku chom chawonsu kuding chisu chitondinau,” tufanyidin kusadil chisu chitwitekidina mulong wa kusal mudimu wa kulejan mutapu uwamp nakash.​—⁠Mul. 3:​1, NW.

² Tusadilany Chisu Chetu Nich Manangu: Tutambwiling yisakin yivud pitukata kudandamen kulondul program ututwishishina kulejan pakad kujing. Chakin, mabuj mawamp tukata kuman mu mudimu wa kulejan mambaten ni chisu tukata kusutish mu kulejan. Ov tukutwishap kusutish chisu chivud mu kulejan anch twalimunin pakemp milad yimwing ya yaku yetu? Chilikej, anch twapwish mudimu wa kwangan mamagazin Diampos, ov mulong wak tukutwishap kwitekinaku chisu chikwau cha kusal yichirikinimu yisu? Anch twasambishin kulejan Diarubing, ov mulong wak tukutwishap kusal yichirikinimu yisu ap kwendish dilejan dia Baibel? Ov chitwishikin kudandamen nich mujikit wetu wa ku chikumbu ni chikumbu ni kupan uman wa mu mukombil? Mu mutapu umwing ni ukwau tukutwish kurijek mudimu wetu.

³ Pitudia mu mudimu wa kulejan, chiswapel kushadish chisu chifanyidina anch tubabelap. Chidi chakin, anch chirung cha muten chiwapinap, kupim chisu chikemp kukutwinkish usu ni kukutukwash kudandamen kusal mudimu. Pakwez, twikalany ni upakachikach, mulong kupim mud kwinoku kukutwishap kwikal chisu chawonsu kuswiridikina.

⁴ Mu mivu ya kwinyim ey, chikasiken nakash kutan antu kol kwau. Chakwel kurish nich mwikadil winou, antwarubil avud asadiling mudimu wau wa kupan uman ku chikumbu ni chikumbu mu yisu kushalijan ya dichuku. Ov tukutwishap kupakish kupan uman urel nakash ap pachizwekina muten?

⁵ Chiwapinap anch antwarubil asambisha kwambamb padiau mu mujikit wa kupan uman mu mukombil. Pakwez chiwapin kwaurijan ni kwisamb ni antu chakwel kusambish nau mambamb. Mwi njil yiney, tukutwish kusadil chisu chetu mutapu uwamp ni tukwikal ni musangar ujim.

⁶ Twisakinany Yisu ya Kupan Uman: Mwin kwisamb chadingay ni kulond anch yimusangarishinap kwend, ntwarubil umwing muntu mband wamwipula anch mu chikumbu mwading muntu mukwau ukutwishay kwambamb nend. Chad lel, wisamba n’ikundj, wading muyej mivu yivud ni chisu chivud wadinga ni kulalol. Ruchingej ra Dizu dia Nzamb ravuvurisha kand kusanger kwend mu mwom. Kupwa chiyovay nawamp, wading ni kukumangan ku Chot cha Want, ni kulejan ruchingej rend risu.

⁷ Nambaz umwing wa dikum dia mivu wasadila chiyul cha kubudikin mu chingand saa yimwing kurutu kwa Dilejan dia buku. Ku chis cha kusambish, wasankana changadim wa mivu 13 watesha nawamp ni witiya mukand. Dichuku diambakenap ku shikol, nambaz wamumana changadim winou. Kupwa, wamwita kwilej nend Baibel, ni ndiy witiya.

⁸ Tuchisalany Chikala Chisu Chimwing Chipandikena Kuwap: Kulejan pakad kujing kutukwashin kukulish ukaliweny wetu wa kupan rusangu ruwamp. Ov tukutwish kurijek ukaliweny wetu wa kusambish misamb mutapu ukweta mabuj? Ov tukutwish kwikal alej amwing ayifuvu pitwendishina dilejan dia Baibel? Anch twasal mwamu, tukutwish chakin kusadil mutapu uwamp chisu chetu mu kulejan ni mudimu wetu ukwikal chakin ni mabuj nakash.​—⁠1 Tim. 4:⁠16.

⁹ ‘Chikwashala kal chisu chiswimp,’ mwom wetu ufanyidin kwikal wizwila nich midimu ya Ukristu. (1 Kor. 7:29) Kwitekinaku chisu cha kulejan kufanyidin kwikal pa ndond ya kusambish. Twinunginany nakash, nich mushiku mu mudimu wa kulejan. Chisu chidi chipar chipandikena kuwap chatwinkishay Yehova. Tuchisadilany pichuku pichuku nich manangu ni mutapu uwamp.

[Caption on page 4]

[Box on page 4]

Tutonginany Yiyul Yilondwila:

◼ Tushikany ku yikumangan ya kulejan kurutu kwa chisu.

◼ Chiwapidil kusal yirund yikemp yikemp mulong wa kulejan.

◼ Kangal twalab kuya mu teritwar.

◼ Tulejanany pachidau antu avud kol kwau.

◼ Tulejanany ayinetu yisu yimwing, anch kudap chak.

◼ Tusalany yichirikinimu yisu piswimp ni teritwar mutulejena ku chis ni chis.

◼ Anch antwarubil a chirund chetu achilabidil ku chis kanang, tudandamenany kulejan.

◼ Chisu chawonsu pichitwishikina, kulondulijan ni yisu, tulejanany mu chirung cha saa yimwing ni kusut.