Yakul Ku Yipul yen

◼ Nany ufanyidina kwijikish ni mutapu ik muminy wa kusambish nich Shikol ya Mudimu wa Uteokras, Chikumangan cha Mudimu, Chikumangan cha Antu Awonsu, ni wa Dilejan dia Chinong cha Kalam?

Miminy yatondau kal ya rubing ni rubing ya kusambish Shikol ya Mudimu wa Uteokras yidi mu Program wa Shikol ya Mudimu wa Uteokras mwi wenjil wa Mudimu Wetu wa Want wa Mwinkind. Muminy wa kusambish nich ni wa nsudiel ya Chikumangan ya Mudimu cha rubing ni rubing ayilejen pa paj wa 2 wa Mudimu Wetu wa Want. Chilik chimwing kand ni manimero ma miminy ya Dilejan dia Chinong cha Kalam dia rubing ni rubing yidi pa paj wa 2 wa nimero ni nimero wa Chinong cha Kalam. Miminy yiletinau yidi chikunku cha chikumangan chawonsu ni afanyidin kuyiwangish kudi mukadivar utakedila chikumangan chinech pa ndond pa kuyiwangish kudi ntakel wa chikumangan chikwau chasambelang.

Chilakej, kalam wa Shikol ya Mudimu wa Uteokras ukez kuyak in kukumangan, ukwijikish ni kuwangish muminy wa kusambish, ukutakel shikol, ni kupwa ukumutazuk ukusala chikunku cha kusambish cha Chikumangan cha Mudimu eza ku chimet. Mukadivar ukusala chikunku chinech cha Chikumangan cha Mudimu ndiy ufanyidina kwijikish ni kuwangish muminy wa kusambish wa Chikumangan cha Mudimu.

Chilik chimwing, muminy wa Chikumangan cha Antu Awonsu akuwijikish ni kuuwangish kudi ntakel. Ntakel ukez kuyak nich chirungul in kukumangan awonsu ni kuyit awanga pamwing nend muminy wa kusambish utondinay ukusal diskur. Ntakel (ap mukadivar mukwau uwanyishina yitinau utondinau kurutu kwa chisu) ukusal malembil ma kusambish nich chikumangan. Ndiy ukumwijikish ni kumutazuk ukusala diskur ni kulejan mutu wa mulong wa diskur diend. Kupwa kwa diskur, pa ndond ya kwiswimpish kusu yalondangay wasalang diskur, pakwez ukulejan mu wiswimp kusanger malejan minam. Ukwijikish mutu wa mulong wa diskur dia rubing rilondwila, kupwa ukuyit in kukumangan awonsu achingela dilejan dia Chinong cha Kalam. Ntakel kaswiridinap kuyipul in kukumangan anch asotin kutum ulong wa rukat ku chikumangen cha ngendj wasalang diskur. Kupwa, ntakel ukumutazuk kalam wa Dilejan dia Chinong cha Kalam ku chimet.

Kalam wa Dilejan dia Chinong cha Kalam ukwijikish ni kuwangish muminy wambatena nich dilejan. Ukutakel dilejan kukwatijan nich yany yalejanau kal ni kupwa ukwijikish ni kuwangish muminy wa nsudiel. Kalam wa Dilejan dia Chinong cha Kalam, ndiy ukumutazuk mukadivar wasalang diskur chakwel asala malembil ma nsudiel.

Kusadil yany yiney yawonsu kukutukwash kwijik nich kashinsh anch yikumangan ya chikumangen chetu ayitakedil mu mutapu umwing kwawonsu.