Yikumangan Yikata ‘Kutubachik ku Rukat ni ku Midimu Yiwamp’

KUDIOSH pakur, antu a Yehova ading kukumangan pamwing mu mutapu uwamp. Mu Isarel wa pasak, amakundj awonsu asalang weny wa kuya ku Yerusalem mulong wa kusal misambu yisatu yijim. (Kuv. 16:16) Mu mivu chitot ya kusambish, in Kristu akumanganang chisu chawonsu, nakash mu yikumbu yau. (Flm. 1, 2) Nlel unou, tukat kusanger yikumangan, yitentam ya munyingumuku ni ya rejon. Mulong wak atushalapol a Nzamb akat kukumangan? Chakusambish chidi cha usey mulong wa difukwil dietu.—Kus. 95:6; Kol. 3:16.

² Yikumangan yiding kand ya usey kudi antu akata kukumangan. Mulong wa Musambu wa Ankunku wa muvu wa sambwad, ayileja in Isarel anch: “Yikumangejany antu, amakundj, ni amband, ni an, ni ngez ushichanya nend chakwel niyau atesha, ilej kumwov [Yehova] Nzamb wen wom chakwel kand alama ni kusadil mazu mawonsu ma yijil yiney.” (Kuv. 31:12) Chimeken patok anch diyingishin dia usey dia kukumangan pamwing didi dia kwikal ‘afundishinau kudi Yehova.’ (Isay 54:13) Yikumangan yikat kutukwash kand kwijikijan umwing ni mukwau, kukasikeshijan ni kutambul usu kudi antu akwau.

YIKUMANGAN YA CHIKUMANGEN

³ In kwilej akumangana pamwing kupwa kwa Pentekot wa muvu wa 33 C.C. ipana ayinau ku mafundish ma atwimbuy ni “awiy ading ni kudandamen pichuku pichuku mu tempel nich muchim umwing.” (Mid. 2:42, 46, TMK) Kupwa, chisu chakumanganangau in Kristu mulong wa kwifukwil, atanganga mifund yapepilau ni mikand yafundau kudi atwimbuy nau in kwilej akwau. (1 Kor. 1:1, 2; Kol. 4:16; 1 Tes. 1:1; Jak. 1:1) Kwading kand kulembil pamwing. (Mid. 4:24-29; 20:36) Yisu yimwing, amishoner alondang kand yom yamanau mu mudimu wa kulejan. (Mid. 11:5-18; 14:27, 28) Ashinshikinang kand malejan ma dishin ni kuwanyin kwa uprofet. Apanang malejan piur pa mashakamin ma win Kristu ni kwipan kudi Nzamb. Ayikasikeshang antu awonsu kwikal ni mushiku wa kulejan rusangu ruwamp.—Rom 10:9, 10; 1 Kor. 11:23-26; 15:58; Efes 5:1-33.

⁴ Nlel unou, yikumangen ya win Kristu yilondwil chilakej cha atwimbuy. Tukat kuziyin ku chiyul chapepilau chidia mu Hebereu 10:24, 25: ‘Tutalijanany muntu ni mukwau . . . , Kangal twalikany chaku cha kukumangan pamwing, mudi mukat kulikau antu amwing, pakwez tukasikeshijanany muntu ni mukwau, mulong umenany anch, dichuku dikat kusej piswimp.’ Mu machuku minam mayimp, tukwet kuswir kwa dikasikesh didiokila ku kukumangan pamwing pakad kujing chakwel tutwisha kulam usu wa mu spiritu ni kujijaman. (Rom 1:11, 12) Mulong tudi in Kristu, tushich pakach pa antu ayimp. Tulikin kumubwambwil Nzamb ni tulikin maku mayimp ma mangand minam. (Fil. 2:15, 16; Tit. 2:12-14) Chakin kamu, kwisu tukutwisha kwikal nawamp kusutamu kwikal pamwing nau antu a Yehova? (Kus. 84:10) Ni chom ik chikutwisha kwikal cha usey kusutamu kwilej Dizu dia Nzamb ni kudisambin? Tal yikumangan kushalijan yatenchikau mulong wa uwamp wetu.

DISKUR DIA ANTU AWONSU

⁵ Diskur dia Antu Awonsu akat kudisal kwinsudien kwa rubing pamwing ni Dilejan dia Chinong cha Kalam. Aditazukin anch diskur dia antu awonsu mulong diskur dia Bibil adilejen kudi antu awonsu, antu amwing, pamwing ap kawiy kapamp ka kusambish kwez ku yikumangan. Diskur dined didi dia usey mulong dikat kuwanyish maswir ma mu spiritu ma antu ibombina netu ap antu a mu chikumangen.—Mid. 18:4; 19:9, 10.

⁶ Kristu Yesu, atwimbuy end ni akwau asalang madiskur ma antu awonsu mudi masangaredinau kand nlel unou antu a Yehova mu yikumangen. Pakad ntad, Yesu wading mwin kusal madiskur mujim panap pansh. Alondang piur pend anch: ‘Kwikil muntu walondap kal mudi muntu winou.’ (Yoh. 7:46) Yesu walondang ni ulabu, chawiy chayipukunang ku muchim in kumutesh. (Mat. 7:28, 29) Antu ateshang nawamp uruu wend ataninamu nakash. (Mat. 13:16, 17) Atwimbuy imburija chilakej chend. Mu Midimu 2:14-36, tutanginamu diskur dia usu diasalay Pita dichuku dia Pentekot wa muvu wa 33 C.C. Diayikasikesha antu avud kusal kukwatijan ni yom yateshau. Kupwa, antu avud ikala in kwitiyij kupwa kwa kutesh diskur dia Paul mu Aten.—Mid. 17:22-34.

⁷ Chilik chimwing nlel unou, mamiliyon ma antu akat kutaninamu ku Madiskur ma Antu Awonsu makatau kusal ku yikumangan ap madiskur makatau kusal ku yitentam. Madiskur mudi minam makat kutukwash kwijik mafundish ma win Kristu ni kudandamen mu mudimu wa Want. Anch twayitazuk antu asangaredina uyakin ni antu akwau, tukat kusal usu wa kuyikwash antu ajingunina mafundish ma pa dishin ma Bibil.

⁸ Mitu ya milong yikatau kwisambin mu Madiskur ma Antu Awonsu yishalijadining. Madiskur mamwing makat kwisambin malejan ma pa dishin ma Bibil, uprofet, mbil ja Bibil, yiyul piur pa mashakamin ma dijuku, milong ya antu atijadina, milong yirishinau nich ansand ni mwikadil wa win Kristu. Makwau makat kwisambin piur pa yom yishimokishena yatangay Yehova. Makwau kand makat kwisambin piur pa yilakej ya antu a pasak ading akweta ritiy, kutakaman, kujijaman ni kuman mutapu tukutwisha kuyisadin nlel.

⁹ Mulong wa kutaninamu nakash mu Madiskur ma Antu Awonsu, chidi cha usey kuta matu nakash, kulondul mu Bibil maverse majimbwilau kudi mwin kusal diskur ni kumutesh nawamp patanginay ni parumburilay. (Luka 8:18) Anch twashinshikin yom yilondinau, tukusal usu wa kulam yom twilejina ni kuyisadin.—1 Tes. 5:21.

¹⁰ Anch in kusal madiskur adiaku, chikumangen chikutenchik program wa kusal madiskur rubing ni rubing. Yisu yimwing, akat kutazuk in kusal madiskur angej mu yikumangen yidia piswimp. Anch kudi in kusal madiskur akemp, akutwish kutazuk in kusal madiskur angej anch chitwishikin.

DILEJAN DIA CHINONG CHA KALAM

¹¹ Kupwa kwa diskur dia antu awonsu kukat kwikal Dilejan dia Chinong cha Kalam, minsamb ya yipul ni yakul yimedina pa mutu wa mulong udia mu Chinong cha Kalam cha kwilej. Kusutin ku dilejan dia Chinong cha Kalam, Yehova ukat kutwinkish yakudia ya mu spiritu pa chisu chiwanyidina.

¹² Mitu ya milong ya kwilej yikat kwisambin mutapu wa kusadin mbil ja Bibil mu mashakamin ma pichuku pichuku. Yikat kuyikasikesh in Kristu mulong wa kwipuk “[spiritu] wa mangand” ni yaku yiyimp. (1 Kor. 2:12) Chinong cha Kalam chikat kulet chitokish piur pa mafundish ma pa dishin ni piur pa uprofet, chawiy chikata kutukwash etu awonsu kwikal ni ronganyin ra uyakin ni kushal mwi njil yitentamina. (Kus. 97:11; Jinsw. 4:18) Kukumangan ni kwakul ku Dilejan dia Chinong cha Kalam kukutwish kutukwash chakwel tusangera mu ruchingej ra ngand yisu yitentamina yashilayimu Yehova. (Rom 12:12; 2 Pita 3:13) Kubombakan nau akwetu in Kristu kukat kutukwash kukudish dibuj dia spiritu ni kukudish maswir ma kumusadin Yehova nich mushiku. (Gal. 5:22, 23) Chikat kutukasikesh mulong wa kurish ni yakamish ni tukasikesha ‘dishin diwamp mulong wa machuku ma kurutu’ chakwel tutwisha “kutambul mwom udia wakin.”—1 Tim. 6:19; 1 Pita 1:6, 7.

¹³ Mutapu ik tukutwisha kutaninamu mu ditenchik dined mulong wa yakudia ya mu spiritu yitwinkishinau? Tufanyidin kurijek dilejan kurutu, mu dijuku ap muntu panrend, kutang maverse majimbwilau ni kwakul mu mazu mey. Chinech chikusal anch uyakin wikala mu michim yetu, ni antu akwau akutaninamu mu kulond patok ya ritiy pakututeshau. Anch twatesh nawamp yakul ya antu akwau, tukutaninamu mu dilejan dia rubing ni rubing.

MUDIMU NI MASHAKAMIN MA IN KRISTU

¹⁴ Chikumangen chikat kukumangan ku Chot cha Want rubing ni rubing mulong wa program ukweta mutu wa mulong ulondina anch Mudimu ni Mashakamin ma In Kristu. Chikumangan chinech chikwet yikunku yisatu mulong wa kutukwash kwikal ‘awanyidina kusal’ mudi in kusal mudimu a Nzamb. (2 Kor. 3:5, 6). Program ni yom ya kwilej akuyilejan ngond ni ngond mu Mudimu ni Mashakamin ma In Kristu—Mukand wa Chikumangan. Mu Chikumangan Mudimu ni Mashakamin ma In Kristu Mukand wa Chikumangan mudi kand yakumenaku ya chilakej mulong wa mudimu wa kulejan.

¹⁵ Chikunku cha kusambish cha chikumangan chinech achitazukin anch Yom ya Usey Yidia mu Dizu dia Nzamb, chikutukwash kwijik nawamp ngand ni nsangu ja mu Bibil ni kwilej mutapu tukutwisha kujisadin. Mu chikunku cha chikumangan chinech mudi diskur, kutang kwa Bibil ni minsamb yimedina pa kutang kwa Bibil kwa rubing. Mudimu ni Mashakamin Mukand wa Chikumangan ukwet kand yipich ni mafish ma kutongin mulong wa kutukwash kwijik yom yivud. Kushinshikin kukurikina kwinoku kwa Bibil kutukwashin mu mwom wetu wa pakampwil ni mu kufundish kwetu, chakwel twikal ‘awanyidina ni kwikal kand nich ukash wa kusal midimu yawonsu yiwamp.’—2 Tim. 3:16, 17.

¹⁶ Chikunku cha kaad cha chikumangan chinech achitazukin anch Ipana mu Mudimu wa Kulejan, achitenchikin mulong wa kutufumb mu mudimu wa kulejan. Mitu ya milong piur pa mudimu wa kulejan yidiokil mu Mudimu ni Mashakamin Mukand wa Chikumangan ni mu yom yikwau ni mu mavideo. Chikwau kand, mulong wa kwirijek mulong wa mudimu wa kulejan, akadivar nau anambaz akat kusal yakumenaku ya chilakej, kuchirikin antu ap kutakel malejan ma Bibil. Chikunku chinech cha chikumangan chikat kutukwash chakwel twikala ni “rudim ra antu afundishinau” mwamu tukutwish ‘kwijik mutapu wa kumwakul muntu uziyila nich dizu diwamp.’—Isay 50:4.

¹⁷ Chikunku cha kasatu cha chikumangan chinech, Mashakamin ma Mwin Kristu, chikat kushinshikin mutapu wa kusadin mu mwom mbil ja Bibil pichuku pichuku. (Kus. 119:105) Chom cha usey mu chikunku chinech didi Dilejan dia Bibil dia Chikumangen. Mudi muding Dilejan dia Chinong cha Kalam, Dilejan dia Bibil dia Chikumangen yidi minsamb ya yipul ni yakul. Akat kutang maparagraf, kwipul yipul, kupan yakul ni kutang maverse. Kurutu kwa kuwang muminy ni kusal malembil ma nsudien, kuding kuchirikin ni kulejan mu wiswimp malejan ma rubing rikwezap.

¹⁸ Ngond ni ngond, anch twatambul Mudimu ni Mashakamin Mukand wa Chikumangan, ntakel wa chisak cha amakurump ap mwin kumukwash, ukat kushinshikin nawamp ni kwangan yikunku kudi antu. Ukutambul yiyul kudi Kalam wa Chikumangan Mudimu ni Mashakamin. Ngond ni ngond, Ntakel wa Chikumangan Mudimu ni Mashakamin ap mukurump mukwau watondau kudi chisak cha amakurump ukusal mudi mwin kutakel chikumangan. Chisend chend chidi cha kwikal ni kashinsh anch chikumangan chisambishin ni chipwil pa chisu ni kuyinkish yiyul antu adia akweta yikunku ya kusal.

¹⁹ Kusutil kwirijek kwetu kuwamp mulong wa kukumangan ni kupan yakul ku Chikumangan Mudimu ni Mashakamin, tukwikal ni ronganyin ra Bibil, tukwijik nawamp mbil ja Bibil, tukwikal kand ni ukaliweny wa kulejan rusangu ruwamp ni kwikadish in kwilej. Antu akumangena akad kwikal Atuman abatishau kal akat kutaninamu nakash mu urund uwamp ni minsamb yikasikeshina ya mu spiritu. Mulong wa kutukwash kwirijek nawamp mulong wa chikumangan chinech ni yikwau, tukutwish kusadin nawamp Watchtower Library, JW Library, Bibiliyotek udia pa kapend (anch yidiaku mu dizu diey) ni bibiliyotek wa ku Chot cha Want. Bibiliyotek wa ku Chot cha Want ukwet mikand yivud ya Atuman a Yehova, Index des publications des Témoins de Jéhovah ap Ukwash wa Kukimbijol Nich wa Atuman a Yehova, concordance, ndinguril ap yom yikwau ya ukwash mulong wa kukimbijol. Bibiliyotek winou akutwish kumusadin kudi muntu mwawonsu kurutu ap kupwa kwa yikumangan.

YIKUMANGAN MULONG WA MUDIMU WA KULEJAN

²⁰ Yisu yimwing mukach ap kwinsudien kwa rubing, yisak ya in kulejan yikat kutanijan mu chisu chikemp mulong wa yikumangan ya mudimu wa kulejan. Yikumangan yiney yikat kusadik nakash ku yikumbu ap jindond jikwau jiwanyidina. Akutwish kand kusadin Chot cha Want mulong wa yikumangan yiney. Anch yisak ya in kulejan yatanijan jindond kushalijan mu teritwar, in kulejan akutwish kuya swa ku yikumangan yiney ni mu teritwar mulong wa kulejan. Akutwish kwanganijan swa-swa ni kuya mu teritwar pakad kulab. Antakel a yisak akutwish kuyishinshikin nakash antu adia mu yisak yau. Ap anch chidi chiwamp anch yisak yitanijana panrau, yishiken yikutwish kusal anch yisak yitanijana pamwing. Chilakej, anch in kulejan akemp akat kulejan mukach mwa rubing, chikutwish kwikal cha usey kukumangej yisak pamwing ap ku Chot cha Want ap ndond yikwau kand. Mwamu, chikuswapal kudi mwin kulejan mwawonsu kuman muntu wa kulejan nend. Chikutwish kand kwikal cha usey anch chikumangen chitanijana ku Chot cha Want machuku makadau antu kusal mudimu. Ap kand, kupwa kwa Dilejan dia Chinong cha Kalam, chikumangen chikutwish kukumangej antu awonsu mulong wa mudimu wa kulejan.

²¹ Anch chisak chakumangan panrau, ntakel wa chisak ndiy ukutakela chikumangan mulong wa mudimu wa kulejan. Yisu ni yisu, ntakel wa chisak ukutwish kumutond nkwash wend ap mukadivar mukwau uwanyididina mulong wa kutakel chikumangan chinech. Pa ndond pa kushinshikin mufund wa dichuku, ntakel ufanyidin kwirijek mulong wa kwisambin yom yimwing yikutwisha kwikal ya ukwash mulong wa mudimu wa kulejan. Ukutenchik mulong wa kulejan ni ukutond muntu wa mu chisak mulong wa kulembil. Chisak chikutwish chad kuya mu kulejan pakad kulab. Yikumangan yiney yifanyidin kusal aminit atan ap sambwad, pakwez yifanyidin kwikal yiswimp anch kwading yikumangan ya chikumangen. Yifanyidin kuyinkish antu ayila mu kulejan kukasikesh, yiyul ya usey ni umutakel. Antu asu ni akwau akweta kuswir kwa ukwash akutwish kulejan pamwing nau in kulejan akweta ukaliweny mulong wa kuyifumb.

KUTENCHIK KWA YIKUMANGAN MU YIKUMANGEN YISU AP MU YIKUMANGEN YIKEMP

²² Mulong in kwilej adandamedin kuvul, uvud wa yikumangen niyau uyil kurutu. Yisu yivud, kalam wa munyingumuku ndiy ukata kwit anch kwikala chikumangen chisu. Pakwez, yisu yikwau, chisak chikemp chikutwish kuman anch chidi cha usey kubombakan ni chikumangen cha piswimp.

²³ Yisu yimwing, mu yikumangen yikemp mukutwish kwikal kwau ching anambaz. Anch chidi mwamu, nambaz ulembila mu chikumangen ap utakedina yikumangan ufanyidin kudjal chom ku mutu, kukwatijan ni ditenchik dia Mifund. (1 Kor. 11:3-16) Yisu yivud, ufanyidin kushakam kurutu kwa chisak. Anambaz kakusalangap madiskur ku yikumangan. Pakwez, akat kutang malejan marijekinau kudi dirijek ni kumisambin, ap mutapu ukwau, akutwish kusadin malejan minam mudi minsamb ap yakumenaku. Biro wa mutiy ukumwit nambaz umwing mulong wa kufundijadin ni kutambul mikand ya biro ni kutenchik yikumangan. Mu kusut kwa chisu, anch kwikal akadivar awanyidina kusal mwamu, akutwish kuwanyish yisend yiney.

YITENTAM YA MUNYINGUMUKU

²⁴ Muvu ni muvu, kukat kwikal kutenchik mulong yikumangen yidia mu munyingumuku umwing yikumangana mulong wa yitentam yaad ya munyingumuku. Yisu yiney ya musangar yikat kusal anch antu awonsu ‘michim yau yazurika nakash’ mu urund wa in Kristu akwau. (2 Kor. 6:11-13) Nich kutongin piur pa maswir ma pakampwil, dirijek dia Yehova dikat kurijek mitu ya milong ni yikunku kushalijan ya program winou. Akat kufundish kusutil madiskur, yakumenaku, yom yamanau, kuchirikin yom yasadika ni kuyipul antu. Antu awonsu akata kukumangan akat kutaninamu mu malejan mudi minam. Ku yitentam yiney, in kwilej asu akat kutambul dibatish mulong wa kumekesh patok kwipan kwau kudi Yehova.

YITENTAM YA REJON

²⁵ Kapamp kamwing pa muvu, kukat kwikal yikumangan yijim. Yidi yitentam ya rejon ya machuku masatu, yikata kukumangej yikumangen ya minyingumuku yivud. Mitiy yikemp yikutwish kuman anch chiwapin yikumangen yawonsu yikumangena ndond yimwing. Mu jingand jimwing, yitenchik piur pa yitentam yiney yikutwish kuswimp kukwatijan ni ndond ap ni umutakel wa dirijek. Yisu yimwing, yitentam ya antu adiokila pa mangand mawonsu ap ya pakampwil yikat kusadik mwi ngand yimwing ni kukumangej tunan twa Atuman adiokila mu jingand kushalijan. Mu mivu kanang antu avud atesha rusangu ruwamp ra Want kusutin kupalangesh kwa nsangu kwasalau piur pa kukumangan kwinoku kwa Atuman a Yehova.

²⁶ Kudi antu a Yehova, yitentam ya rejon yidi yisu ya musangar nakash mulong wa kumwifukwil mu uumwing. Yitentam yiney yikat kulet kurumburil kwa katat mulong wa chitokish piur pa uyakin. Ku yitentam yimwing, akat kubudish mikand yisu mulong wa dilejan dia chikumangen ap dia muntu panrend ni mulong wa kusadin mu mudimu wa kulejan. Kukat kwikal kand kubatish antu. Yitentam yidi ya usey nakash mulong wa kukul mu spiritu. Yikat kulet kashinsh anch antu a Yehova asadin dijuku dia pa mangand mawonsu dia in Kristu akweta chijingidij cha pakampwil cha in kwilej a Yesu Kristu.—Yoh. 13:35.

²⁷ Anch twakumangan ku yikumangan ya chikumangen ap ku yitentam ya antu a Yehova, akat kutukasikesh mulong wa kusal rusot ra Yehova. Tukat kwichidij ku yibachikin yiyimp ya mangand yikutwisha kuyipish ritiy retu ra win Kristu. Yikumangan yawonsu yiney yikat kumutumbish ni kumushiman Yehova. (Kus. 35:18; Jinsw. 14:28) Tukutwish kumujikitish nakash Yehova mulong wayinkisha antu end yisu yiney ya kwikal adishinau mu spiritu mu machuku minam ma nsudiel.

YAKUDIA YA UREL YA NSALEJETU

²⁸ Kapamp kamwing pa muvu, pa dichuku dia kufa kwa Yesu Kristu, yikumangen ya Atuman a Yehova ya pa mangand mawonsu yikat kuvurik Chivurikish cha rufu ra Kristu, ap Yakudia ya Urel ya Nsalejetu. (1 Kor. 11:20, 23, 24) Chinech chidi chikumangan cha usey nakash cha muvu kudi Atuman a Yehova. Atwinkishin mbil ya patok ya kusal Chivurikish.—Luka 22:19.

²⁹ Dichuku dia ngond dia Chivurikish dikwatijadin nich dichuku dia Kusut kwa Yehova, dilejenau patok mu Bibil. (Kub. 12:2, 6; Mat. 26:17, 20, 26) Chivurikish cha Kusut kwa Yehova chading chivurikish cha muvu cha Kubudik kwa in Isarel mu Idjibit mu muvu wa 1513 K.C.C. Pa chisu chinicha Yehova watonda dichuku dia 14 dia ngond wau wa kusambish mudi dichuku diau dia kudia mwan a mukoku wa Kusut kwa Yehova ni kudiokal mu ubindj mu Idjibit. (Kub. 12:1-51) Dichuku dined akat kuditan kusutil ku kuchind machuku 13 kudiokal pa ngond musu piswimp ni musaj a nvul wilikena kulep kwa dichuku ni uchuku pamekenay ngond mwawonsu wa kabuj mu Yerusalem. Yisu yivud, kuvurik Chivurikish muvu ni muvu kukat kuwil pa dichuku dia kusambish dikatay ngond kubudik mwawonsu wa kabuj kupwa kwa musaj a nvul wilikena kulep kwa dichuku ni uchuku.

³⁰ Mu Mateu 26:26-28, Yesu amwinend walejana nawamp mutapu ufanyidina kusadik Chivurikish. Kadiap musambu wa akish ap wa yishankur, pakwez yidi yakudia ya chijingidij yikatau kudia antu atondilau kal mulong wa kwikal answan pamwing nend Yesu Kristu mu Want wa mwiur. (Luka 22:28-30) In Kristu awonsu ni antu asangaredina uyakin akat kuyikasikesh mulong wa kukumangan ku Yakudia ya Urel ya Nsalejetu mudi in kukumangan a kalimish. Kusutil ku kukumangan kwau, akat kumekesh kujikitish kwau mulong wa ditenchik dia Yehova Nzamb diasalay mulong wa kutaninamu kwa antu awonsu kusutin Mwanend Yesu Kristu. Kupwa kwa Chivurikish, kukat kwikal diskur dia patok mulong wa antu asangaredina dilejan dia Bibil.

³¹ Atuman a Yehova akat kuchingel nich musangar yisu ya yitentam mulong wa kukumangan pamwing, kukatau ‘kutalijan umwing ni mukwau mulong wa kutubachik ku rukat ni ku midimu yiwamp.’ (Heb. 10:24) Kashalapol ushinshamena ni kubabal udimukin pa kutenchik yikumangan yiney chakwel yikwatijana ni maswir metu ma mu spiritu. Atushalapol awonsu a Yehova ni antu asangaredina uyakin ayikasikeshin mulong ataninamu mu yitentam yiney ya kukumangan pamwing. Anch twamekesh muchim wa kujikitish mulong wa yitenchik ya Yehova yisadinay kusutin dirijek diend, antu a Nzamb akat kwikal pamwing mu uumwing. Cha usey nakash, tukat kumushiman ni kumutumbish Yehova.—Kus. 111:1.