Yakul Ku Yipul yen

◼ Kurutu kwa mwin kwilej wakad kubabatishiu atambula dibabatish, ov, mu chilik ik chimwing chifanyidinay kukumangan ku yikumangan ya chikumangen ni kwipan mu mudimu wa kulejan?

Kutambul dibabatish udi mupak upandakena usey ukezay muntu kukwat. Chawiy lel, kurutu kwa muntu kutambul dibabatish, ndiy ufanyidin kwikal ni ronganyin rifanyidina piur pa yom yimwitinay Nzamb. Chikwau kand, ndiy ufanyidin kwikal tayad mu kumekesh mupak wend kushakam kwambatan nich yimwitinau kudi Nzamb.

In Kristu ayitin chakwel kangal alik chaku cha kukumangan ayinau pamwing, chawiy mwin kulejan wakad kubabatish ufanyidin kwikal tayad mu kumekesh kapamp kamwing mushiku wend wa kukumangan ku yikumangan ya chikumangen. (Heb. 10:24, 25) Yisu yawonsu, ndiy ufanyidin kand kupan yakul ku yipul. Chilik chimwing kand, ndiy ufanyidin kupan dijin diend ku Shikol ya Mudimu wa Uteokras ap kudiap chom chimwitinau kuwanyish.

Chikwau kand, mulong in Kristu ayinkisha chisend cha kulejan rusangu ruwamp ni kuyikadish antu in kwilej, chawiy mwin kulejan wakad kubabatishiu ufanyidin kwipan chisu chawonsu mu mudimu wa kulejan kurutu kwa kutambul dibabatish. (Mat. 24:14; 28:19, 20) Ov, angond inch chifanyidinay kulejan kurutu kwa kutambul dibabatish? Chakin kamu, ndiy ufanyidin kusutish chisu chiwanyidina chakwel amekesha anch wipanin ni usu chisu chawonsu nich mushiku mu mudimu wa kulejan ngond ni ngond. (Kus. 78:37) Pakwez, chitiningap chisu chilemp nakash kudiosh pasambishay kulejan djat ni pakez kuwanyish yitinau mulong wa dibabatish, pamwing ap chikutwish kwikal kamu mu angond akemp. Ov, uvud ik wa yisu ya mudimu wa chingand ufanyidinay kupan? Kwikil yany yitekinau ya kulondul. Amakurump afanyidin kushinshikin mashakamin ma mwin kulejan mwin mwawonsu ni kwikal isikena ni manangu mawamp.—Luka 21:1-4.

Amakurump (ap ankwash a mudimu adia mu chikumangen chidia ni amakurump akemp) akumangeninga pamwing ni muntu ukubabatishiwa afanyidin kuvurik anch muntu ni muntu ushalijadining, afanyidin kand kusadil manangu mafanyidina mu kukwat mupak anch muntu uwanyishin yitinau mulong wa dibabatish. Awiy akutwish kujingunin nawamp anch ndiy umekeshin maswir makin ma kwikal umwing wa Atuman a Yehova ni umekeshin musangar piur pa chisend cha kwinung pamwing ni dirijek dia Yehova ni cha kwipan mu mudimu wa kulejan. Amakurump akwijik anch pamwing ap ndiy kandikal akula muspiritu ap kandikal ikal nich ukaliweny wa in kulejan ababatishau kal akweta uman. Anch amakurump ajingunin anch muntu winou kandikal awanyisha yitinau mulong wa dibabatish, awiy afanyidin kumulej mu mutapu uwamp mayingish ma Bibil mulong wa mupak wau ni kumukwash muspiritu.