Mulong udi nvaj, ufanyidin kuyikwash aney chakwel amukata Yehova ni kupan mwom wau kudi ndiy. Yom ik ufanyidina kusal mulong wa kuyikwash aney chakwel atambula dibatish? Mutapu ik ukutwisha kwijik anch awanyin kal kutambul dibatish? Yesu wayileja in kwilejend anch: ‘Yikadishany antu a michid yawonsu in kwilej, yibatishany.’ (Mat. 28:19) Kukwatijan ni mazu minam, chom chakusambish chitinau mulong wa kutambul dibatish chidi kwikal mwin kwilej—kulik kwikal ching mwin kutesh ni mwin kwitiyij mafundish ma Kristu pakwez mwin kulimish mafundish minam. Chinech chidi chom chifanyidinau kusal ap kudi ansand.

Ikal chilakej chiwamp kudi aney, ni yifundisha mafundish ma Yehova. (Kuv. 6:6-9) Chinech chitin kand kusadin nsangu jidia mu buku Chom ik Chakin Kamu Chifundishinay Bibil? ni “Ilamany Ayinen mu Rukat ra Nzamb” mulong wa kuyifundish uyakin wa pa dishin wa Bibil ni kuyikwash kusadin mbil ja Bibil patonginau piur pa milong kanang. Yikwasha aney chakwel ikala ni mutapu wa kurumburil ayinau yitiyij. (1 Pita 3:15) Ronganyin ni kukasikesh kutambwilau kudi ey ni kusutin ku dilejan diau dia Bibil, yikumangan, ni arund awamp akutwish kuyikwash chakwel aya kurutu ni kutambul dibatish ni kusal yom yikwau. Yikwasha itekina mipak ya mu spiritu.

Jinswir 20:11 ulondin anch: ‘Chawiy chimwing ni yend mwan ukat kumekesh mu yisalijok yend, anch yidi zwang ni yitentamin.’ Yisalijok ik yimwing yikutwisha kumekesh anch mwan, mband ap ikundj, udi katat mwin kwilej wa Yesu Kristu ni wirijekin mulong wa kutambul dibatish?

Mwan uyila kurutu mulong wa kutambul dibatish ufanyidin kuyiziyil anvajend amwovila Nzamb wom. (Kol. 3:20) Chisu chadingay Yesu ni mivu 12, Bibil ulondin anch: ‘Wadandamena kuyiziyil [anvajend].’ (Luka 2:51) Chakin kamu, ufanyidinap kumuchingejin mwan anch ikala uwanyidina. Pakwez muntu ukweta kuswir kwa kutambul dibatish ufanyidin kulondul chilakej cha Yesu ni kwikal wijikena anch uyiziyidin anvajend.

Ukumekesh kand anch usangaredin kwilej uyakin wa Bibil. (Luka 2:46) Ov, mwaney ukat kukumangan ku yikumangan ni kwakul ku yikumangan yiney? (Kus. 122:1) Ov, ukwet impu ya kutang Bibil chisu chawonsu ni kusal dilejan dia muntu panrend?—Mat. 4:4.

Mwan uyila kurutu mulong wa kutambul dibatish ukat kutek yisakin ya Want pa ndond ya kusambish. (Mat. 6:33) Wij nawamp chisend chend cha kwikal mwin kulejan wakad kutambul dibatish ni kuya mu mudimu wa kulejan, ni kulejan ku chikumbu ni chikumbu. Ukat kwipan mu mitapu kushalijan ya mudimu wa kulejan ni kakwetingap usany wa kwiyijikish kudi alej end ni kudi arund nend a shikol anch udi Kaman wa Yehova. Ukat kurijek nich mushiku yikunku yend ya Chikumangan Mudimu ni Mashakamin.

Ufanyidin kand kusal usu wa kushal wishitwila mu manangu kusutin ku kwiyep arund ayimp. (Jinsw. 13:20; 1 Kor. 15:33) Yiney yikutwish kumeken ku mutapu wend wa kutond mizik, mafilim, maprogram ma televizion, masengan ma video, kusadin kwa Internet.

An avud atanidinamu mu usu usadinau anvajau, akat kukwat nich usey uyakin, ni awanyishin yom yitinau mulong wa kutambul dibatish pachidiau an akemp. Yehova ukukuyukishany mulong uyikwashinany anen kukasikesh urund wau ni ndiy.

ruu Kudi Mwin Kulejan Wakad Kutambul Dibatish:

Chidi chisend cha kusal pamwing ni chikumangen mudi mwin kulejan wakad kutambul dibatish. Tukujikitishin mulong wa kuya kurutu mu spiritu. Washikedin ku kumwijik Nzamb kusutin ku kwilej Dizu diend ni watekin ritiy mu kushilamu kwend.—Yoh. 17:3; Heb. 11:6.

Kurutu usambisha kwilej nau atuman a Yehova, wading pamwing ap mu marelijon kushalijan ap wadingap kwey mu relijon kampand. Pamwing ap wasalang midimu yakad kwovijan ni mbil ja Bibil. Pakwez katat umekeshin ritiy kusutin ku kukarumuk, charumburik anch winanin nakash piur pa yom yiyimp wasala pakur, ni waswimpin, charumburik anch walikin kusal kand yom yiyimp ni wakwatin mupak wa kusal yom yiwamp ku mes ma Nzamb.—Mid. 3:19.

Chikwau kand, pamwing ap mudi Timote, “kudiokal ku wanikanch wey, ey wij kal Mikand Yitumbila,” ni kupwa wiyepa kwiyandjik mu yisalijok yakad kwikal ya win Kristu ni kulik kusal yitil yijim. (2 Tim. 3:15) Wilejin mutapu wa kujijamen yibachikin ya arund ni yibachikin yikwau ya kusal yom yidia yiyimp ku mes ma Yehova. Wamekeshin ritiy pa kukwash difukwil diakin ni kuyilej antu akwau piur pa yitiyij yey. Akufumbin mu mudimu wa kulejan. Katat amwiney wakwatin mupak wa kumusadin Yehova mudi mwi kulejan wakad kutambul dibatish.

Ap anch wileja kumwijik Yehova kudiokal ku wanikanch wey ap anch washikedin kumwijik wapamin kal, ukutwish chad kutong kusal yom yaad mu kuya kurutu kwey kwa mu spiritu, kwawiy kulond anch kwipan ni dibatish. Wipanin kudi Yehova kusutin kumusejin mu malembil ni kumulej mupak wey wa kwipan kudi ndiy rawonsu. (Mat. 16:24) Mulong wa kumekesh anch wipanin kal, ukutwish chad kutambul dibatish mu mem. (Mat. 28:19, 20) Kudiosh wipana mu malembil ni kutambul dibatish, wikadil mwin kusal mudimu witiyinau kudi Yehova Nzamb. Chisend chiwamp mud ik!

Mudi muwilejina mu dilejan diey dia Bibil, ukutwish kurish ni milong kushalijan. Vurik anch chisu chikemp kupwa kwa dibatish, “Yesu amutwala mwi mpay kudi spiritu chakwel akamwoza kudi Satan.” (Mat. 4:1, TMK) Mulong watambul kal dibatish mudi mwin kwilej wa Kristu, ukutwish kurish ni yoziu yivud. (Yoh. 15:20) Yoziu yiney yikutwish kwikal ya mitapu kushalijan. Yikutwish kwikal rupompat ra antu a mu dijuku. (Mat. 10:36) Akutwish kukuzengol kudi arund ney a ku shikol, a ku mudimu ni arund ney akur. Chad vurik mazu ma Yesu madia mu Marko 10:29, 30 malondina anch: “Chakin kamu nakulejany, muntu ukutwish kusha chikumbu chend, ap anamakwend amakundj ni amband, ap makwend, ap tatukwend, ap anend, ap yir yend mulong wa kwingambat am, ap mulong wa kwambat Rusangu Ruwamp anch muntu wasal mwamu ukez kutambul yikumbu, ni anamakwend amakundj ni amband, ni amakwend, ni anend, ni yir yend tupamp chitot nich kuzengol. Chad kurutu ukez kutambul mwom wa chikupu.” Chawiy, dandamen kusal usu wa kushal piswimp ni Yehova ni kushakam kukwatijan ni mbil jend jitentamina.

Anch uswiridin kutambul dibatish, yijikisha amakurump a chikumangen mupak winou. Yipul yilondwila uruu winou ukuyisambin nau amakurump a chikumangen mulong wa kuman anch uwanyidin kutambul dibatish. Ukutwish kusambish kuchirikin yipul yiney amwiney kusutin program wa dilejan diey.

Piurijekina minsamb yiney, itekina chisu cha kutang ni kutongijokin pa Mifund yijimbwilau. Yisu yivud, yikutwishap kulet kamu chakul ku chipul chipwilau, pakwez yikukukwash kuman Mufund ukasikeshidina chakul. Anch ukwetap kashinsh piur pa chipul chipwilau, ukutwish kutan ukwash mu kukimbijol piusadidina Bibil ni mikand yibudishinau kudi “kashalapol ushinshamena ni kubabal.” (Mat. 24:45, TMK) Ukutwish kufund yom kampand mu buku winou ap mu buku mukwau. Ukutwish kusadin yom yiney wafundina mu buku chisu wisambina nau amakurump a chikumangen. Anch uteshinap yipul nawamp, ukwit ukwash kudi muntu wilejina nend Bibil ap kudi amakurump a chikumangen.

Piuwisambina nau amakurump a chikumangen, kangal watong anch ufanyidin kupan yakul yilemp ap yikasikena kutesh. Ufanyidin kwakul amwiney mu mutapu uswapela ni wovikena. Mulong wa kwakul ku yipul yikwau, ufanyidin kujimbul maverse mulong wa kumekesh anch yom wakwila yimedin pa Bibil.

Anch wijap yom yivud piur pa mafundish ma pa dishin ma Bibil, amakurump akusal usu wa kukukwash chakwel utwisha kwakul amwiney kukwatijan ni mutapu uteshina Mifund mulong wa kumekesh anch uwanyishin yom yitinau mulong wa kutambul dibatish chisu chikwau.