Mutapu Ukutwishau Atulam a Dilejan dia Buku dia Chikumangen Kumekesh Kubangin Padiay Muntu ni Muntu Ipend

¹ Rutong ra Dilejan dia Buku dia Chikumangen ridi ra “kubangin nakash kukul kwa muspiritu kwa muntu ni muntu. . . . Kwinoku kudi kumekesh kwa rukat ridimukina ra Yehova ra kuyibangin antwend.” (om p. 75; Isa. 40:​11, NW) Kalam wa dilejan dia buku ukwet chisend chijim cha kubangin padiay muntu ni muntu ipend.

² Ku Dilejan dia Buku: Mulong yisak ya malejan ma buku yiding yikemp-yikemp, kalam wa dilejan dia buku ukutwish kwijikijan nawamp ni yid ya chisak chend cha dilejan. (Jinsw. 27:23) Chisu ni chisu kuding yisu kanang ya kwisamb kurutu ni kupwa kwa dilejan dia rubing ni rubing. Mwi ngond wa kabuj, ukutwish kwisamb pakampwil ni muntu mwawonsu udia mu chisak cha dilejan. Chinech chikat kuyikwash yid ya dilejan dia buku kwiyov nawamp chakwel kwisamb ni kalam chisu chidiau mu yoziu ap chisu chiswiridinau dikasikesh.​—⁠Isa. 32:​2, NW.

³ Kalam wa dilejan dia buku ukat kupakish kuyikasikesh antu in awonsu kupan yakul chisu cha dilejan. Mutapu umwing ukatay kusal mwamu udi kusutin ku kutakel dilejan mu mutapu umwing wa urund, ni witudishina. (1 Tes. 2:​7, 8) Ukat kukimb mitapu kushalijan ya kuyandjik antu awonsu mu misamb, kuwejinaku ni ansand. Anch kudi amwing akad kuzangurok piur pa kupan yakul, ukutwish kuyinkish ukwash ku ujindj ni kwirijek nau pamwing kurutu kwa chisu chakwel atanga mufund umwing ap kupan chakul pa paragraf kanang. Ap kand ukutwish kuyilej mutapu wa kwakul mu mazu mau ayinau.

⁴ Anch nkwash’a kalam wa dilejan dia buku udi nkwash’a mudimu, kalam ukutenchik chakwel nkwash atakela dilejan dia buku kapamp kamwing mu angond aad. Chinech chikat kumukwash kalam kumutal nawamp nkwash ni kumwinkish yiyul ya ukwash. Didi ditenchik diwamp mud ik mulong wa kuyikwash akadivar kurijek ukaliweny wau wa kufundish!​—⁠Titus 1:⁠9.

⁵ Mu Mudimu wa Chingand: Chimwing cha yisend yijim yikwetay kalam wa dilejan dia buku chidi chisend cha kutakel mudimu wa kulejan. (Kuch. 27:​16, 17) Ukat kukwatang yitenchik yifanyidina kusadil mulong wa chisak cha dilejan ni kwikasikesh kuyikwash antu awonsu adia mu chisak cha dilejan kuman musangar mu mudimu wau. (Ef. 4:​11, 12) Chakwel kuwanyish chisend chinech, ukat kwitekin rutong ra kulejan pamwing ni muntu ni muntu mu chisak cha dilejan. Ukusadil kand pamwing ni kalam’a mudimu mulong wa kuyitenchik antu asotina kuwapish mitambu yikwau ya mudimu wau chakwel ayikwasha kud mwin kulejan ukweta ukaliweny nakash.

⁶ Mud Kafung Mwin Rukat: Kalam wa dilejan dia buku ukat kubangin antu atwishina kusadil pakemp mu mudimu wa kulejan mulong wa mikadil yau. Ukat kushinshikin nawamp anch antu akweta mipak mulong wa upal ap akad kutwish kushemunik mulong wa mayej ap ubid kanang, ni antu akweta mipak ya chisu chikemp mulong wa mayej makash ap mulong wa uyimp kanang, ij ditenchik diyitwishishina kupan rapor wa mudimu wa aminit 15 ni kusut anch katwishinap kupan rapor wa saa umwing kwi ngond. (Komite wa Mudimu wa Chikumangen ukat kutond antu afanyidina kusadil ditenchik dined.) Ukat kubangin kand antu adia mu chisak cha dilejan akutwisha kwikal alikina kal kusal mudimu wa kulejan, ni kupakish kuyikwash kuchirikin kand mudimu wau pamwing ni chikumangen.​—⁠Luka 15:​4-7.

⁷ Tudi in kujikitish mud ik mulong wa kubangin kwa rukat kumekeshinau atulam a dilejan dia buku! Kubangin kwau kwa pakampwil kuletin ukwash “djat ni pitukwikadila mu umwing mu ritiy . . . , kushik ku chilik chiwanyidina cha Kristu.”​—⁠Ef. 4:13.