Mukwasha Kalam Wey wa Dilejan dia Buku dia Chikumangen

¹ Muntu ni muntu pakach petu ukat kutan yiyukish yivud yidiokila ku Dilejan dia Buku dia Chikumangen. Ngond wasutina ou twisambidin mutapu ukatay kuwanyish Kalam wa Dilejan dia Buku dia Chikumangen mudimu wend. Chawiy lel chom ik tukutwisha kusal chakwel kumukwash ni kutaninamu ayinetu ni antu akwau ukwash?

² Kumangan Rubing ni Rubing: Mulong yisak ya dilejan dia buku yiding yikemp-yikemp, kwikalaku kwey kudi kwa usey nakash. Itekina rutong ra kukumangan rubing ni rubing. Ukutwish kand kukwash nich kushikang kurutu kwa chisu, chinech chikumutwishish kalam kusambish chikumangan mutapu uwamp.​—⁠1 Kor. 14:⁠40.

³ Yirumburil Yitungina: Njil yikwau yiukutwisha kumukwashin yidi kwirijek nawamp ni kupan yirumburil yitungina. Yirumburil yasidina pa dinans dimwing kusu yipandakening kuwap nakash, ni chinech chikat kuyikasikeshang antu akwau kupan yirumburil yau. Ipuk kwisambinang yom yawonsu yidia mu paragraf kapamp kamwing. Anch kudi dinans didia mu yom twilejina dikusangareshina, wapish misamb ni kuyishimunin akwen chitongijok chey mu yirumburil.​—⁠1 Pi. 4:⁠10.

⁴ Anch ukwet chisend cha kutang maparagraf mulong wa chisak, ikal nich mushiku wa kuwanyish nawamp chisend chinech. Kutang kuwamp kukat kuwejinang ku kuwap kwa dilejan ni kusangarish.​—⁠1 Tim. 4:⁠13.

⁵ Kulejan kwa mu Chisak: Kuding yikumangan ya midimu ya chingand yikata kusadikang ku jindond ja dilejan dia buku, ni kunung kwey chikas ku yitenchik yiney kukat kumukwash kalam chisu chitakedilay mudimu wa kulejan. Ufanyidin kukwat yitenchik yiney mud ndond ja kusejin piswimp ni akadivar ney ni kuyikasikesh.

⁶ Rapor wa Mudimu wa Kulejan: Kutum swa rapor wey wa mudimu wa kulejan kwisudiel kwa ngond ni ngond yidi njil yikwau ya kumukwash kalam. Ukutwish kumwinkish kapamp kamwing rapor wey ku chikas ap kumutek mu mushet urijekinau mulong wa rapor wa mudimu udia ku Chot cha Want. Kalam’a ujindj ukutwish kuusadil mulong wa kukumangej rapor wa mudimu wa kulejan wakumangejinau kud atulam’a dilejan dia buku.

⁷ Kusadil kwey pamwing ni Kalam wa Dilejan dia Buku dia Chikumangen kukezap kwikal kwamwamu bwat. Chipandakenamu yawonsu, ukwikal nich kashinsh anch Yehova ukez ‘kwikal nich spiritu umekeshina.’​—⁠Filp. 4:23.