Dilejan Dia Buku Dia Chikumangen—Mulong Wak Tudiswiridina?
1. Ov mutapu ik wasambisha Dilejan dia Buku dia Chikumangen?
1 Mu muvu wa 1895, yirund ya dilejan ya in Kwilej a Bibil, mwamu mwayitazukangau Atuman’a Yehova, ayitazukang yirund ya dilejan dia buku anch Yirund ya Muten Musas ya Dilejan dia Bibil. Asadila mavolim ma buku Aurore du Millénium mu dilejan. Kupwa, yikumangan yiney ayitazukang kand anch Yirund ya Dilejan dia Buku ya in Berey. (Midimu 17:11) Chisu ni chisu chirund cha antu akemp adinga ni kukumangan mu chikumbu cha muntu urel ukutondau mu chirund. Yikumangan yiney yadinga disambishil dia Dilejan dia Buku dia Chikumangen.
2. Ov mutapu ik tukutwisha kuwejin ku “kwongojijan” ku dilejan dia buku?
2 Dikasikesh ni Ukwash: Chiding chisu chiwamp nakash kud in kukumangan cha kumekesh ritiy rau, yawiy yikepishidinau uvud wa in kukumangan ku yirund ya dilejan dia buku. Chibudikin kudi “kwongojijan ku ritiy retu”—Rom 1:12.
3, 4. Ov mutapu ik ditukwashining ditenchik dia dilejan dia buku kuwanyish mudimu wetu?
3 Kushinshik mutapu ufundishinay kalam’a dilejan dia buku kukutwish kutukwash ‘kulejan mazu ma uyakin mu kutentam.’ (2 Tim. 2:15) Shinshikin mutapu ukasikeshidinay Mifund yengamidina dilejan. Anch yifanyidin mutapu utenchikinau chichap twilejina, ndiy ukutwish kukasikeshin manans majim ku dichirikin dia nsudiel, nich kusadil kand Bibil. Chilikej chend chiwamp chikutwish kutukwash kuwapish kulejan kwetu mu mudimu wa win Kristu.—1 Kor. 11:1.
4 Kuwejinaku ku kutakel dilejan dia pa rubing, kalam’a dilejan dia buku ukat kutakel mudimu wa kulejan rusangu ruwamp. Mu kukwashijan ni kalam’a mudimu, ndiy ukusal yitenchik mulong wa mudimu wa chingand. Ndiy ukat kukimb kukwash antu awonsu a mu chirund awanyish chisend chau cha Ukristu cha kulejan rusangu ruwamp ni kwikadish in kwilej.—Mat. 28:19, 20; 1 Kor. 9:16.
5. Ov ukwash ik wa pakampwil udiaku kusutil ku dilejan dia buku?
5 Kalam’a dilejan dia buku ukat kusanger mwikadil uwamp wa muspiritu wa muntu mwawonsu wa mu chirund. Ndiy ukat kumekesh kusanger kwinoku ku yikumangan ya chikumangen ni pasadinay ni antu akwau mu mudimu wa chingand. Ndiy ukat kusadil kand yisu yiyilay ni kuyital akadivar ku yikumbu yau mulong wa kuyikasikesh muspiritu. Antu awonsu afanyidin kwov musangar wa kusej kud kalam’a dilejan dia buku mulong wa ukwash wa muspiritu chisu chin chawonsu chiswiridinau.—Is. 32:1, 2.
6. (a) Ov mutapu ik wikasikeshau akadivar netu mu jingand jikwau kukumangan mu yirund yikemp-yikemp? (b) Ov mutapu ik watanidinamu mu ditenchik dia dilejan dia buku?
6 Kukasikeshijan Umwing ni Mukwau: Mwi ngand jijidikinau mudimu wa atushalapol a Nzamb, yisu yivud akadivar akat kukumangan mu yirund yikemp-yikemp. Mukadivar umwing wavurika anch: “Ap anch midimu yetu ya Ukristu ayijidika, pa chisu chitwishikina, twasalanga yikumangan yetu rubing ni rubing mu yirund ya antu 10 kushik ku 15. Yikumangan yiney yatukasikeshanga muspiritu, mulong twading ni kwilej Bibil ni twading ni kusanger urund amwing ni akwau. Pitwalejijana yoziu ya muntu ni muntu, twijika anch umwing ni umwing wetu urishin nich yom yawiy yimwing.” (1 Pi. 5:9) Mwamu, niyetu, tukasikeshijanany umwing ni mukwau kusutil ku kukwash ditenchik dia Dilejan dia Buku dia Chikumangen muchifanyidina.—Ef. 4:16.
[Caption on page 1]
[Study Questions]