Mutapu Ditenchik Dia Dilejan Dia Buku Dia Chikumangen Ditukwashina
1. Mutapu ik yitukwashina yikumangan yetu yitan ya pa rubing?
1 Yikumangan yetu yitan ya pa rubing yishalijadin chimwing ni chikwau ku kujimb ni ku rutong. Pakwez, yawonsu yidi ya usey ni yitukwashin “tutalijanany muntu ni mukwau chakwel tukwashijanany kumekesh rukat ni kusal yisalijok yiwamp.” (Heb. 10:24, 25, MM) Ov, yisu yom ya pakampwil ni ya ukwash ya ditenchik dia Dilejan dia Buku dia Chikumangen?
2. Ov, yiyukish ik yidiokila ku kukumangan mu ka chisak kakemp ku dilejan dia buku?
2 Chitukwashin Kuya Kurutu mu Spiritu: Antu akata kukumangan ku dilejan dia buku ading akemp nakash kwilikej ni uvud wa antu akata kukumangan ku yikumangan yikwau ya chikumangen. Chinech chiswapeshin kuta urund swa udia musul wa kukwashijan mu spiritu. (Jinsw. 18:24) Ov, wapakishin kal kusal usu chakwel uyijika antu awonsu adia mu chisak chey cha dilejan dia buku, pamwing ap kuyit muntu ni muntu usala nau mudimu wa kulejan pamwing? Ditenchik dia dilejan dia buku dimukwashin kand kalam wa dilejan dia buku kwijik mikadil ya pakampwil ya muntu ni muntu udia mu chisak ni kumutwishish kumwinkish muntu ni muntu ukwash wa panrend.—Jinsw. 27:23.
3. Ov, mutapu ik ditenchik dia dilejan dia buku diyikasikeshina in kwilej Bibil kwakul ni kukumangan?
3 Ov, wayitazukin kal antu wilejina nau Bibil chakwel eza kukumangan ney ku dilejan dia buku? Antu asangeridina akad kusot kukumangan ku yikumangan yijim akutwish kusanger kukumangan mu ka chisak kakemp, ka sadidinau pakampwil mu chikumbu cha muntu. Mwikadil wa urund ukat kuyikwash ansand ni antu asu kwakul. Mulong ka chisak kadi kakemp, tukwet mitapu yivud ya kwakul ni kumushiman Yehova.—Kus. 111:1.
4. Ov, mu mitapu ik ditenchik dia dilejan dia buku dikutwisha kwikal diwanyidina?
4 Malejan ma buku mading yisu yivud mu jindond jiwanyidina jidia mu teritwar. Ap anch chitwishikinap kumutekin muntu mwawonsu dilejan pa ndond yidia piswimp, kukumangan ku dilejan dietu dia buku kukutwish kutwit kuya piswimp kupandakanamu kukumangan ku yikumangan yikwau. Ndond ya dilejan dia buku yikutwish kwikal ndond yiwanyidina mulong wa kukumangan ni mulong wa mudimu wa chingand.
5. Ov, mutapu ik kalam wa dilejan dietu dia buku ukutwishay kutukwash mu mudimu wa kulejan?
5 Ukwash Mulong wa Mudimu wa Kulejan: Kalam wa dilejan dia buku ufanyidin kumukwash muntu ni muntu chakwel ikala mwin kulejan pakad kujing, usongina mabuj, ni ulejena nich musangar. Chawiy lel, ukusal usu wa kulejan pamwing ni muntu mwawonsu udia mu chisak, kumukwash muntu ni muntu ipend mu milad kushalijan ya kulejan. Anch waman anch mulad kanang wa kulejan ukasiken, mudi kuchirikinamu kusu, muleja kalam wa dilejan diey dia buku. Pamwing ap ukutwish kutenchik chakwel ulejana pamwing ni mwin kulejan chifuvu udia mu chisak. Ukaliweny wey wa kulejan piur pa malejan ma Bibil ukez kuya kurutu anch washinshikin nawamp milad yiwamp ya kulejan yisadidinay kalam wa dilejan dia buku pakatay kutakel dilejan dia buku.—1 Kor. 4:17.
6. Ov, mulong wak tufanyidina kukimb kutaninamu ukwash wawonsu ku ditenchik dia dilejan dia buku?
6 Dilejan dia Buku dia Chikumangen didi ditenchik dia ukwash mudi ik! Ditenchik dined dia rukat dia Yehova ditukwashin kulam mwikadil wetu uwamp wa mu spiritu mu yisu yiney ya mar makash.—Kus. 26:12.