Yakul ku Yipul yen

◼ Ov chisu ik chifanyidina kusal chirund chikwau cha Dilejan dia Buku dia Chikumangen?

Chakwel kusal chirund chisu chifanyidin kushinshikin anch chidi cha usey kulam kukumangan kwa uvud wa antu 15 ap antu akemp ku chirund ni chirund cha dilejan dia buku, kuwejinaku ni chirund chidia ku Chot cha want. Ov mulong wak chidia mwamu?

Anch yirund ya Dilejan dia Buku ya Chikumangen yidi yikemp yikemp, chikumuswapel mwin kutakel dilejan dia buku kushinshikin muntu ni muntu ukata kukumangan ku chirund chau. Chikwau kand, antu awonsu akwet mutapu wa kwakul mwi ndond yimwing yiyikwashina kulejan patok ritiy rau. (Heb. 10:23; 13:15) Kwikal ni yirund yikemp yikemp mu mwab wawonsu wa chikumangen kufanyin kamu nakash mulong kukat kuswapej kukumangan ku Dilejan dia Buku dia Chikumangen ni yikumangan ya mudimu wa chingand yikat. Yikumangen yasadina yirund yisu yamen anch uvud wa antu awonsu akata kukumangan ku dilejan dia buku wiwejidinaku kand.

Kukutwish kwikal mikadil ya pakampwil yiwapidilau kusal chirund chikwau, ap anch chikwikal chikemp nakash. Chinech chikutwish kwikal mwamu mu mwab udia kulemp ni chikumangen ap kwi ndond kudia antu avud akata kukumangan ap anch kuburedin ndond ya kushakam yifanyidina. Anch kudi kuswir, akutwish kusal chirund chikutwisha kukumangan dichuku dikutwishau antu adia amapal kumenaku ukwash, in kusal mudimu uchuku, ap anambaz akweta amakundj akad kwikal Atuman.

Chirund ni chirund cha dilejan dia buku chifanyidin kwikal ni in kulejan avud adia akash muspiritu akweta mushiku, mwin kutakel ni mwin kutang ayifuvu. Akadivar afanyidin kushiken kuwanyish nswir jinej mu chikumangen chau.

Amakurump akutwish kukasikesh kuya kurutu kwa chikumangen nich kutal nawamp anch yirund ya dilejan dia buku yidi yiwanyidina nawamp mu uvud wa antu ni akat kuyilam nawamp muspiritu ni kutal anch akat kukumangen ndond yifanyidina. Pichifanyidina, chiwapidil kusal yirund yisu chakwel anch antu awonsu atambula sens ukwash wa ditenchik dined dia muspiritu. Ov ukutwish kulet chikumbu chey mulong wa kwilejinamu dilejan dia buku? Antu avud asadila mwamu amen yiyukish yivud ya muspiritu.