Ov Ukutwish Kupan Chikumbu Chey?

¹ Mu mivu chitot ya kusambish, in Kristu avud apana yikumbu yau chakwel kuyisadil mulong wa yikumangan ya chikumangen. (1 Kor. 16:19; Kol. 4:15; Filim. 1, 2) Mu yikumangen yimwing nlel, kwikil ndond jivud jifanyidina mulong wa yisak ya Dilejan dia Buku dia Chikumangen ni mulong wa yikumangan ya mudimu wa chingand. Chawiy chisadila anch yisak yimwing ya dilejan dia buku yikala ni antu 30 ap avud, kupandakanamu kamu nakash uvud usotilau wa antu 15.

² Chisend Chipandikena Kuwap: Ov utongin kupan chikumbu chey chakwel kuchisadil mulong wa Dilejan dia Buku dia Chikumangen? Kapalikany kakweta kujimb kuwanyidina ni kinangina, kakweta chitokish chiwamp ni musutina rinkind nawamp kafanyidin kamu mulong wa rutong riner. Mulong dilejan dia buku didi chikumangan cha chikumangen ni chikunku cha ditenchik dia Yehova mulong wa kuyifundish antwend, kwikal nich dilejan dia buku mu chikumbu chey chidi chisend chimwing chipandakena kuwap. Antu avud ashimunin anch ataninamu ukwash wa muspiritu kusutin ku kupan yikumbu yau kuyisadil mu mutapu winou.

³ Ang utongin anch ukwet chikumbu chifanyidina, yijikisha amboku amakurump. Pamwing ap akat kukimbijol ndond jikwau. Anch chitwishikinap kusadil dilejan dia buku kolikwey, ov chitwishikin kusadilaku yikumangan ya mudimu wa chingand? Ap anch kwikil kuswir kwa ndond pa chisu chinech, amakurump akusangar kamu nakash pa kwijik anch chikumbu chey chidi tayad. Ukutwish kusanger kwikal nich chisend chinech mu machuku ma kurutu.

⁴ Tumekeshany Yaku Yiwamp: Pitukumangena ku chikumbu chayen, in kukumangan awonsu afanyidin kumekesh kalimish mulong wa yom ya mwin chikumbu. Anvaj afanyidin kushinshikin anch an adi mwi ndond yitondinau mulong wa dilejan, kangal kwandamol mwi ndond yayen ya mwin chikumbu. Chifanyidin kand kumekesh kalimish mulong wa amutej netu, babalany chakwel kwipuk kuyivundangesh chakad kufanyin.​—⁠2 Kor. 6:3, 4; 1 Pi. 2:12.

⁵ Hebereu 13:16 utukasikeshin anch kangal wavuramenany “kusal yom yiwamp ni kukwashijanany muntu ni mukwau, mulong yakupesh ya mitapu yiney, yawiy yikata kumusangarish Nzamb.” Kupan chikumbu chey mulong wa kusadilamu chikumangan cha chikumangen yidi njil yimwing ya kusal yom yiwamp ni kukwashijan pamwing ni antu akwau ni ‘kumulimish Yehova nich yom yey ya usey.’​—⁠Jinsw. 3:⁠9.