Ikalany Ishitwila mu Manangu Nsudiel Piyashejina Kal Piswimp
1 Dizu dia Nzamb disambidin chisu chivud piur pa dichuku dia Yehova anch dikat kwez mud mukatay kwez “mwij”—charumburik anch, cha kukashimuk, kapamp kamwing, swa-swa. (1 Tes. 5:2; Mat. 24:43; 2 Pi. 3:10; Kuj. 3:3; 16:15) “Chawiy kand,” chalonday Yesu, “ikalany irijekina kal, mulong pa chisu chiukulikanya kutong en, chawiy chikwezay Mwan a muntu.” (Mat. 24:44, TMK) Ov mutapu ik tukutwisha kulam kubabal kwetu kwa muspiritu nsudiel piyashejina kal piswimp? Mutapu wa kutwish udi mu kubabesh kwinoku kupepidilau: “Ikalany ishitwila mu manangu.”—1 Pi. 4:7, NW.
2 Kwishitul mu manangu kwitin kuman yom mud muyimenay Yehova. (Efes. 5:17) Kutukwashin kwishinshikin ayinetu chitudia “angez ap mudi aeny” mu ditenchik dia yom dined dia katat. (1 Pi. 2:11) Kukat kutukwash kushinshikin yom yidia chakin kamu ya usey, kutek yom ya usey pa ndond ya kusambish, ni kukwat mipak yiwamp.—Filp. 1:10.
3 Itekinany Jintong ja Muspiritu: Kwitekin ni kuwanyish jintong ja muspiritu kukat kutukwash kwikal ishitwila mu manangu. Ov ukwet jintong ja muspiritu ulondwila katat? Ov ukat kwikasikeshang kutang Baibel dichuku ni dichuku, kukumangan ku yikumangan yawonsu ya Ukristu, kutang nimero ni nimero wa Tour de Garde ni Réveillez-vous!, pamwing ap kujimbish kusadil kwey mu mudimu wa kulejan? Ang witekin jintong jifanyidina, dandamen kujilondul nich chiyul cha kujiwanyish, ni mwita Yehova ayukisha usu usadila, ukutwish washimok pa kuman yibudikin.
4 Mukurump umwing wayipula ambay a uruw asu piur pa jintong jau ja muspiritu. Chipul chayishikija ku kutong anch, ang apipej mwom wau ni kupwish mabaz majim, akutwish kusal mudimu wa uchibol. Awiy akwata mupak wa kwitekin chinech kwikal rutong rau. Afuta nich mushiku mabaz mau ni amana mitapu ya kukepish mijikit yakad usey yadinga ni kusutish chamwamu chisu chau ni usu wau. Kupwa kamu kwa muvu umwing, awanyisha rutong rau. Nich chibudikin ik? Ikundj ulondil anch: “Pakad kwitekin jintong twelap kwikal nich mwikadil tukweta katat. Tukwet musangar nakash. Mwom wetu udi zoong ni upandiken kuwap. Ukwet kurumburik kwakin ni rutong rakin.”
5 Pituchingedina dichuku dia Yehova, tulamany amboku kudimuk kwetu kwa muspiritu mu kushakam nich manangu, ni kutek muchim pa kusal rusot ra Nzamb.—Titus 2:11-13.