Ov Ukat Kwilejany mu Dijuku?

¹ Ngatan umwing mwin Kristu wamuleja mukurump umwing anch: “Nipakishin kwikal ni dilejan dia dijuku diakad kujing, pakwez chikasiken. Chisu chimwing, yam amwinam nikata kujip dilejan, ap kand mukajam ndiy uburedina kwend impu ya kwilej ap kand anam awiy akweta yom yikwau ya kusal. Mbing jikat kusut pakad kusal usu wa kashinsh mulong wa kutenchik kand program wa dilejan dia dijuku diakad kujing. Nij anch tukwet nich kuswir ni tukusangar kutambul yiyul ap yitongijok yikwau.” Ov mazu minam makuvurishin chom kanang? Pamwing ap mwawiy, mulong majuku mavud makwet yikokujol ya chilik chimwing mulong wa kwilej Baibel mu dijuku wakad kujing.

² Tonginany bil pa yipul yiney: Ov mulong wak dilejan dia dijuku diakad kujing didi dia usey ni dikwet jintong ik? Ov nany ufanyidina kutakel dilejan? Ov mikand ik tukutwisha kusadil? Ov mutapu ik tufanyidina kusal chakwel dilejan dikala disangareshina ni diwamp, nakash kamu anch kudi an akweta chimbu cha mivu kushalijan? Ov mulong wak chifanyidina kusal dilejan dia mutapu winou pakad kujing?

³ Chisend cha Anvaj: Mifund yilejen kamu nawamp piur pa kwijik nany ukweta chisend cha kutakel mu kuyilil an. ‘Atatuku, . . . dandamenany kuyikand ni kuyibabesh nich malejan ma Yehova.’ (Efe. 6:⁠4) Atatuku afanyidin komb kwikal tayad chakwel kwitiy chisend chinech ni kusot kamu nakash kupan ronganyin riner ni yiyul yiney kud anau. Anch tatuku kadiap mwin ritiy, mband mwin Kristu ufanyidin kusal yawonsu yiswiridikina mulong wa kutakel dilejan dia dijuku ni kuyilil an. (2 Tim. 1:⁠5) Yisu yimwing, chitwishikin anch nambaz asenda yisend yawonsu yambatena nich dilij (kuyilil) dia anend. (Jinsw. 1:⁠8) Pakwez mud kamu chidinga chaku, tatuku, ap mutapu win wawonsu anvaj, awiy akweta chisend cha kuyifumb, kuyijidish ni kudimukin nswir ja anau.​—⁠Kuv. 6:​6, 7 ; 1 Tim. 3:2, 4.

⁴ Kuswapal ni Kupipal: Mu dilejan dia dijuku, akutwish kuwejinamu kutang ni misamb ya pamwing piur pa yikunku ya Baibel ap kand kushinshikin mitu ya milong yijikena yidiokila mu magazet ap mu mikand yikwau ya Sosait. Ufanyidinany kutond yom ya kwilej kwambatan nich maswir ma dijuku. Milong yiyitadila ansand, mud yipwichik ya arund a shikol, kwendijadin kwa muntu ikundj ni mband kuburedina rukat ra kashinsh (flirt), kwikal ku mijikit yitenchikinau ku shikol, masengan, kutond kwa mizik, milad ya kudjal ni kwileng ni yipwichik ya masandj, yom yiney yawonsu yikutwish kwikal milong ya kwambambin chisu cha dilejan. Kuchirikin yany ya Mifund ap kushinshikin yitongijok yau kukutwish kwikal kwa usey, nakash kamu mulong wa kuyirijek ansangarum mulong wa kurish nich yak ni yoziu yikeza kubudikin kwinyim.

⁵ Ap anch dilejan dia dijuku dikwikalap chilik chimwing nich chikumangan cha chikumangen, difanyidin kamu kwikal difundishina. Salany chakwel dikala chisu chimwing cha musangar; pikil kusadil chisu chinech mulong wa kupup. Yikasikeshany an kwakul mu mazu mau ayinau, chinech chikez kuyitwishish kuya kurutu swa. Ap anch an achidia anikanch nakash kakutwishap kutesh kurumburik kwa yom yawonsu ap kusanger yawonsu, ufanyidinany kumekesh anch ukat kutonginany kwikalaku kwau ni kuyikwash chakwel kupan yirumburil ku dilejan. Anvaj in manangu akez kubangin nakash maswir ma anau awonsu, ukaliweny wau wa kutesh, usu wau wa kwikuchik ni kuswapal kulond kukwetau. Uumwing wa dijuku ni ngikadil ya muspiritu yiwamp yikez kwikal yibudikin ya usu wa mushiku wen wizwila sens nich rukat.

⁶ Kangal Waziyany! Ov mulong wak kujijaman kudi kwa usey nakash pantaliken nich dilejan dia dijuku? Mulong tukwet milad ya kwipuwangesh yivud mu mwom ni yom yikwau yikutwisha kukangesh yitenchik twatenchikina mulong wa dilejan. Kangal twayishil yom yiney ndond yeza mu mutapu wakad kufanyidin pa chisu chimwing nich yitenchik tukwatina mu dijuku.

⁷ Dilejan diakad kujing mu dijuku dikat kuyifumb anetu ni kuyiwanyish chakwel kurish nich milong ya mwom. Anvaj, yen ukutwishanya kuyikwash nawamp anen mu kuwanyish yisend yikwinkinanyau kud Nzamb. Yehova ukez kukuyukishany kamu anch usadilany usu wen wawonsu mulong wa kwikal nich dilejan dia Baibel diakad kujing.