Tukwangul Kwambatan Nich Usu Wetu
1 Yehova Nzamb wamekesha mu mitapu kushalijan rukat rend kud antu. Yesu wakasikeshina rukat rupandakena ra Nzamb, chisu chalejanay patok kud runtu radinga rikumangena anch Nzamb “ukat kupan muten watangay kuyimunyikin antu ayimp ni antu awamp kwakad kasolikany. Ukat kunakish kand ruvul kunakin kudi antu in kusal nawamp ni in kusal nayimp.” (Mat. 5:43-48) Mu chisu chikwau, Yesu wijikisha chisal chipandakena kuwap nakash cha rukat ra Tatukwend−chakupesh cha Mwan wa kuval kwend amwinend, wapanay Nzamb mulong wa dipandish dietu. (Yohan 3:16) Yesu wayikasikesha in kumutesh kumekesh kujikitish mulong wa rukat ra Yehova. Ov tukat kwikasikesh kusal mwamu?
2 Anch tusotil kumekesh sens kujikitish kwetu ni kutambul yiyukish ya chikupu yidiokila ku rukat ra Yehova, tufanyidin kwilej kumwijik. (Yohan 17:3) Tuswiridin chiyul ni umutakel piur pa mutapu witiyikina tukutwisha kumusadil ndiy. Yehova wamekesha anch ukat kutubangin ni utukatin nich kutwinkish Dizu diend dipepidilau, Baibel, ni kulangwish kand dirijek diend dipandakena kuwap, kutukata kutambwil chiyul ni yany. (Mat. 24:45-47; 2 Tim. 3:16, 17) Chitudia antu ipanina a Yehova, Yehova utufundishin njil yend. Ov tukat kumekesh ku usu wetu ayinetu anch tujikitishining mulong wa rukat ra Yehova? Ov tukat kutesh chiyul chend chakwel tumusangaresha ni kutaninamu ayinetu ukwash? (Isa. 48:17 NW; Jak. 1:22) Mupostol Paul wafunda mu 1Korint 3:8: “Mwin kukun mbut ni mwin kwichilap mem, awonsu adi kwau mutapu umwing, Nzamb ukez kumufut muntu ni muntu mudi mudia mudimu wend.”
3 Mwawiy, tufanyidin kutal nawamp chakwel kusal yitwitinay Nzamb kusal. Antu awonsu kakatap kukul muspiritu mutapu umwing bwat. Kudi yom yivud yikutwisha kwikal ni usu kanang pa kukul kwetu, ni chikwikalap cha manangu kulet yisikej ya kuchirish kwinyim. Pakwez, usu tukata kusal muntu ni muntu ipend udi wa usey nakash. Ov chom ik tufanyidina kusal chakwel kushal alamatina nakash ku dirijek? Ov kudi mitambu kanang tufanyidina kurijek chakwel kwitiyin yisend yetu mud in Kristu? Ov chitin usu wa mutapu ik chakwel kukwatikesh nawamp mijikit ya chikumangen? Ov kudi yany kanang ya dirijek tufanyidina kusadil? — 1Tim. 4:16.
4 Tuyilikejany Antu in Ritiy: Akadivar nau anambaz ashinshamena alejana Rusangu ruwamp ra Want mu kusut kwa makum ma mivu. Antu ashinshamena inay, mud Paul, afanyidin kamu kuyilikej. (1Kor. 11:1) Akula ku rukat ra Nzamb ni kwangul yiyukish yivud mulong wa mudimu wau ukash ni usu wau wa kulondul chiyul cha Baibel. Awiy adi mud dishin dikash dia in kusal mudimu mu chikumangen, kakatap kuchin chisend chau. Tukutwish kuman dibuj dia mudimu wa usu wau. — Rom. 1:13; 2 Kor. 3:1-3.
5 Nlel unou, yitot ya tunan twa antu asu yikat kupwil mu dirijek muvu ni muvu. (Isa. 60:8, NW) Niyau kand akat kusal nakash chakwel kwikal antu akudila muspiritu, ni mushiku wau mu mudimu wa kulejan udi kamu ufanyidina kubazin. Akat kutambul ukwash udiokila kukuman mutapu ukatay Yehova kuyukish antu akata kusal mudimu ukash mu mudimu wend. Chilikej cha akadivar ni anambaz akudila kal muspiritu chikat kuyikwash antu asu kwijik anch chinech chidiap chisu cha kuziy ap kwimik mudimu wa Nzamb wetu. Twikalap nchik antu asu ap in kulejan akweta ukaliweny, ov tukat kudandamen kukul muspiritu, kwitiyin yisend yetu ya win Kristu ni kutambul ukwash wa yitenchik yawonsu ya uteokras?
6 Tusadilany Yitukata Kwilej: Mivu yivud kurutu kwa Jakobu kufund anch tufanyidin kwikal ‘in kusal mudimu,’ Moses wayileja Ayuda anch: “Mazu minam chifanyidin mashakam mu michim yen.” (Jak. 1:25; Kuv. 11:18) Komb ronganyin arinar radingap riwanyidina kwau. Chading chiyifanyidin Ayuda kutek mu michim yau mazu ma Chijil nich kuziyil kud Yehova. Chijidik chinech cha dishin chikarumukinap ni katat. Chakin kamu, Yesu Mwan a Nzamb, wading wiji nawamp usey wa kuziyil. (Yohan 8:28) Walonda mu Mateu 7:24 anch: “Muntu mwawonsu ukata kutesh mazu mam ni kumaziyil, udi mudi muntu ukweta manangu.”
7 Ov tukat kusadil yitukata kwilej ku yikumangan ya munyimuku? Ov tujingunin mulong wak chidi cha usey pa chisu chinech kuchish kumes ni kudandamen kwetu kubabal? Ov tubabel ku yoziu ya ujindj ni mipit yitilay Djabul? Ov tukat kujikitish dirijek dia Yehova mulong wa yiyul ni kubabesh yipaninau chisu chin chawonsu pantaliken nich kuswir kwa kwikal ishitwila mu ngikadil ni muspiritu mu chikumangen? Ov mu chilik ik tukata kusadil muntu ipend yitukata kutesh? — Jak. 1:23-25.
8 Mutu wa mulong wa program wa chikumangan cha pakampwil cha dichuku dimwing wa muvu usu wa mudimu ushindamedin pa Mufund wa dishin: “Muziyilany Nzamb—Pakwez Rishany Nend Djabul.” (Jak. 4:7) Winou udi umutakel uwamp mud ik mu yirung yiney yikash! Kuziyil kwetu ku yijil ya Nzamb kututekin kamu mu kurish nend Satan. Program ukez kutufundish mutapu wa kujijaman chinyim nich kurijek kwa Djabul kukata kushesh ritiy, yirijek yiyimp. (Heb. 2:1) Anch twasal mwamu, tukwangul yiyukish kwambatan nich usu wetu.
9 Tutambulany Ukwash Udiokila ku Dilejan dia Muntu Ipend: Dilejan dia muntu ipend ditukwashin kutung ritiy rikash, ni kujimbish kusanger kwetu kwa uyakin. Dikat kutwinkish ruchingej ni kutuwanyish chakwel kulond nich ulabu. Dikat kutwinkish njingunin ni konganyin ni kutukwash chakwel kudjal untu usu. (Kol. 1:9-11) Pakwez, chakwel dilejan dikala dia ukwash ditin chisu ni usu, ni kwikil mutapu windjing wiswimp wa kutambul ronganyin rakin ni kukul kwa muspiritu. Tukez kand kutambwil ukwash mu yitukata kwilej. — 2 Kor. 9:6, 7; Gal. 6:7.
10 Ov tukat kwitekin chisu chiwanyidina rubing ni rubing chakwel kurijek yikumangan ya chikumangen? Winou wawiy mutapu umwing tukutwisha kumekesh kujikitish kwetu mulong wa yakudia ya muspiritu yitwinkishinay Yehova kusutil kashalapol wakin ukweta manangu. Kwirijek kuwamp mulong wa yikumangan kutukwashining kushal alamatina ku program wa kutang ni kwilej Dizu dia Nzamb. Ov tukat kwitekin chisu rubing ni rubing chakwel kulondul program wa kutang kwetu kwa Baibel urijekinau ku Shikol ya Mudimu ya Uteokras? Chitin kwitekin aminit akemp dichuku ni dichuku chakwel kutang ni kutongijokin pa yom utangina. Chikumangan cha Mudimu chitukwashin chidandamedin kutubabesh ku mitapu tukutwisha kusal chakwel mudimu wetu wa kulejan wikala ukweta mabuj. Ov tukat kwirijek, nich kutongijokin cha pakampwil mutapu ik tukutwisha kusadil yom tukata kwilej mu mudimu? Ov tukat kusal usu chakwel kuyisadil swa? Tufanyidin kukwat yitenchik yiwanyidina mulong wa kurijek Dilejan dia Tour de Garde ni Dilejan dia Buku dia Chikumangen. Ov mwawiy tukata kusal?
11 Twakulany ku Yikumangan: Tukutwish kuman ukwash ujim udiokila ku kwakul kwetu ku yikumangan. Kwirijek mulong wa yikumangan ni kusal usu wa kwakul kukat kutukwash kushal in kuta matu chisu cha yikumangan ni chikat kuswapej kud etu kutaninamu ukwash mu yirumburil ya antu akwau. Avud akat kuvurik ni katat usu ujim wasalau mu kupan yirumburil yau ya kusambish ku chikumangan ap misamb ya kusambish mud mwan a shikol ku Shikol ya Mudimu ya Uteokras. Ap anch chilik chijim cha wom chifanyidin kuchipandakan, ov tudandamedin kusal usu chakwel kukul kwetu kwa muspiritu kumekana kud antu awonsu? (1Tim. 4:15) Antu akwau akat kutaninamu ukwash ni dikasikesh kusutil yirumburil yetu. Anch twirijekinany nawamp, kwilej yom tukushinshikina ku yikumangan, kusadil kwetu kujim ku yikumangan kukez kuyibachik antu akwau ku rukat ni midimu yiwamp. — Heb. 10:23-25.
12 Yirumburil kiyifanyidinap kwikal yilemp yilemp ni yikasikena. Chiwapidil chisu chin chawonsu kupan yirumburil yiswimp yitwadila kapamp kamwing ku chakul cha yipul yipwilau ap kukwash kutokish kusadil kwa mufund. Anch twirijekany nawamp, tukutwish kupan yirumburil mu mazu metu ayinetu. Chisu tusadila mwamu, ukwash udi ujim nakash kud ayinetu ni kud antu akwau. Ov mulong wak? Mulong chitwitin kutongin piur pa yom tulondila ni kurumburil manans mutapu tumateshila. Chinech chikez kuswapesh antu akwau kutesh yom twilejina. Chikwau kand, chikez kutukwash kuvurik rusangu chakwel kusadil pa chisu chikwau.
13 Tukunany Nich Muchim wa Kupan mu Chingand: Mudimu wetu wa win Kristu udi chipau. (2 Kor. 4:7) Ov mwawiy tukata kuuman? Kusutil mudimu wa kulejan, tukwet chisend cha kumekesh ritiy retu kudi akwau. Yesu walonda anch kan kakat kulond ku kuvul kwa yom yidia mu muchim. (Luka 6:45) Usu tukata kusal muntu ni muntu ipend chakwel kusadil mu mudimu wa chingand ututwishishin kwangul yiyukish yivud. Tukat kutesh nawamp uyakin, ni kukudish ukaliweny ujim wa kusadil Baibel. Tukwet musangar wa kuyitwadil antu akwau uyakin ni kuyikwash kwilej piur pa Sakatang wau Mujim. Tudi mud Atuman ku want wa Nzamb utentamina ni win mangand wend. Tukwet musangar mulong twiji anch tumusangareshin Yehova, mulong atusala mu chifu chend ni tusadil rusot rend. — Mat. 5:48.
14 Anch tukat kudandamen kwisik usu wetu tusadila, difukwil dietu kud Yehova dikezap kwikal mudimu wa chamwamu. Ov chinech chirumburikin ik? Chirumburikin anch tukezap kwikal in michim yaad mu kwambatanish nich kusal rusot ra Nzamb, kupan chifanikesh cha mudimu kud ndiy ap kusal chisik kanang wakad kwipan kwa kashinsh. Tufanyidin kumusadil Yehova nich muchim wawonsu. Chidi chisend cha Baibel cha kwipan nich muchim wawonsu mu mudimu wend. (Kol. 3:23, 24) Chakin kamu, mikadil yikat kukarumok, ni Yehova kakatap kutwit yivud nakash kupandakanamu yitukutwisha kusal. Pakwez, chom tukutwisha kusal, chawiy chikatay kuchingejin etu kusal! (Mat. 22:37) Mulong ngikadil yetu yakad kuwanyin yitubachikin ku kwichidij, chiwapidil kwishinshikin ayinetu chisu ni chisu ni kuman ndond ik yitufanyidina kurijek mu mudimu wetu kud Nzamb. Ov tukwet chaku cha kusal mwamu?
15 Tufanyidin kubabal chakwel kwipuk kulikidil kwikimbin yisakin yetu ayinetu ni maku metu kutukangesh kupan chipandakena kuwap cha mudimu wetu kud Yehova. Kwisangarish, kwiswedish, ni mijikit ya kwipuwangesh yifanyidin kwikal pa ndond yay. Chikwau kand, tufanyidin kubabel chinyim nich yipwichik ya kwipan nakash mu midimu ya ku mujimbu. Anch twalondul chiyul cha Yesu chidia mu Mateu 6:22, 23, tukutwish chakin kusal usu nakash nich kulondul yisakin ya muspiritu ni kwangul mud chifanyidina usu wetu.
16 Mud kamu tudandamedina kusal mudimu ukash wa kudjal untu usu, tukwitiyin yisend yetu ayinetu mu kusadil yiyul yitukata kutambul ku yikumangan ya chikumangen, yikumangan ya munyimuku, yikunguril, ni kusutil ku mikand. Muntu ni muntu pakach petu ufanyidin kwilej nich mushiku, kwakul nich chirungil ku yikumangan, ni kusadil pamwing mu mudimu winou ujim wa kwikadish in kwilej kwambatan nich ngikadil wetu. Mu kwakulang nich kujikitish ku rukat ra Nzamb, tukutwish kwikal nich kashinsh ka kwangul difut diwamp dia muspiritu katat ni kulam ruchingej rikash ra mwom wa chikupu mu mangand masu ma Yehova.