“Yikatany Anamakwen in Kristu”

Mazu mapepilau ma mutu wa mulong winou udia kwiur oku amafunda pakur pasutin kal mivu tunan twaad. (1 Pita 2:17) Pakwez, tuswiridin kusadil mazu minam katat kupandakanamu pasak! Ov, mutapu ik tukutwisha kukat chom kanang chijim mudi ukadivar wa pa mangand mawonsu? Mu mangand minam makad rukat, ov, mutapu ik tukutwisha kwikal nich kashinsh anch rukat retu rikezap kupwa? (Mat. 24:12) Tal anch ukutwish kwakul ku yipul yilondwilaku ey chisu utadina band video ukweta mutu wa mulong ulondina anch Toute la communauté des frères.

(1) Ov, chisu ik twasambisha kwikal yid ya ukadivar wetu wa win Kristu? (2) Mijikit ik yisatu tukata kusal pamwing nau akadivar netu pa mangand mawonsu? (3) Ov, mutapu ik ukatau kumekesh akadivar netu kudandamen kwau mu kulejan (a) mwi mpay ya mu Alaska, (b) mu yau yijim ya mwi Mputu, ni (c) mu matikit makash kwandam mu Pérou? (4) Ov, mulong wak tufanyidinap kutong anch mudimu wa kulejan udi kwau chilik chimwing ni midimu yikwau? (5) Letany yilikej ya mutapu ukatau Atuman a Yehova kwongojijan ni kukwashijan umwing ni mukwau mu yisu ya yinship ya (a) kuzal kwa divu, (b) kupwa kwa rikind mukash, ni (c) ni jinjit pakach pa yisak kushalijan? (6) Mu mitapu ik ya kusadil etu awonsu tukutwisha kumekesh chijingidij chijim cha ukadivar wetu wa Ukristu? (Yoh. 13:35) (7) Ov, yiyukish ik yimwing yakusal pamwing mu mudimu wetu wa kutung Yot ya Want? (8) Mutapu ik wapandau muspiritu akadivar netu mwi Mputu wa Kwingangel ni mu Russie chisu chadingau mu kujidik kwa mudimu? (9) Usu ik wa pakampwil usadilau Atuman avud chakwel akumangana ku yitentam, ni mulong wak? (10) Ov, mutapu ik band video winou wakasikesha mupak wey wa (a) kumwifukwil Yehova ku yikumangan ya Ukristu mu uumwing ni akadivar ney, (b) kuyikwash akwau mu yisu ya mar, ni (c) kulejan nich kushinshaman chisu chin chawonsu ni ndond yin yawonsu pichitwishikina? (11) Ov, mutapu ik ni chisu ik tukutwisha kusadil band video mu mudimu wa kulejan?

Diyingish dietu dia pakampwil dia kwikal yid ya ukadivar wetu wa Ukristu didi mulong tumukatining Yehova. Chawiy lel, tukatining kwilej piur pend ni kuyifundish antu akwau piur pend. Ni tuyikatining kand antu akatiningay Yehova. Chisu tuyikwashininga pa yisu ya mar, tuchingediningap anch Nzamb atujikitisha. Pakwez, tumujikitishing Nzamb mulong tumening ukadivar wetu wa Ukristu mudi chipan cha usey chidiokila kudi ndiy. Mu machuku ma nsudiel ma mangand minam makad rukat mayila ni kupwa, el amboku tudandamenany kumekesh rukat piur pa ukadivar wetu wawonsu!