Irijekany Mulong wa Chivurikish Nich Muchim wa Musangar
1. Ov, chisu cha Chivurikish chidi chisu cha pakampwil cha kusal ik?
1 Chivurikish chikez kwikal Diakaad, pa Rish 26, chiletining chisu cha usey nakash cha kusanger mutapu wasalay Nzamb mulong wa dipandish. (Isay 61:10) Ap kurutu kwa chivurikish chikwezap ech, musangar wetu ukez kutukwash twikala irijekina nawamp. Ov, mutapu ik?
2. Ov, yom ik yitina chakwel twirijeka pa chisu cha Chivurikish?
2 Kwirijek Mulong wa Chivurikish: Kuvurik Yakudia ya Urel ya Mwant chiding kamu chisu chijim ni chiswapela. Chikwau kand, chitining kwirijek kurutu kwa chisu mulong wa yom ya usey kiyifanyidinap kudiul. (Jinsw. 21:5) Chifanyidin kutond chisu ni ndond yiwanyidina. Chiswiridin kand kukimb yijingidij yifanyidina. Ndond ya kukumangen chiwapin kuyikomb nawamp ni kuyirijek kurutu. Mwin kulond watondau uswiridin kwirijek nawamp, akusutisha yijingidij ni in kwakan afanyidin kwikal atambwila yany yishitwila. Pakad kwidjidjek yom yivud ya kwirijek kwinoku ayisadin kal. Kusangar usu wa dipandish dia chakupesh kutubachikining chakwel twirijeka nawamp mulong wa chisu chinech chitumbila.—1 Pita 1:8, 9.
3. Ov, mutapu ik tukutwisha kurijek michim yetu mulong wa Yakudia ya Urel wa Mwant?
3 Kurijek Muchim: Chidi kand cha usey kurijek michim yetu chakwel tusangera kurumburik kwawonsu kwa Chivurikish. (Esi. 7:10) Chakwel tusala mwamu, tufanyidin kwitekin chisu cha kutang Bibil pakampwil chisu cha Chivurikish ni kutongijokin pa machuku mansudiel ma mwom wa Yesu pa divu. Kutongin nakash pa mwikadil wa kwipan wa Yesu kukez kutubachik chakwel tumwimbuj.—Gal. 2:20.
4. Ov, yiyukish ik yimwing ya chakupesh yikwinkishinanya musangar upandakena kujimb?
4 Rufu ra Kristu risadikining mulong wa kuchidij ukaleng wa Yehova. Ritukolining ku chitil ni ku rufu. (1 Yoh. 2:2) Ritufungwidining njil ya kwikal mu urund wa chisambu ni Nzamb ni njil ya mwom wa chikupu. (Kol. 1:21, 22) Ritukwashining kand kukasikesh mupak wetu wa kushakam kwambatan nich kwipan kwetu kudi Yehova ni kujijaman dang mudi in kwilej a Kristu. (Mat. 16:24) Piwirijekanya chakwel ukumangananya ku Chivurikish chezinap ech, musangar wen ukuvulijan mud ik!