¹ Chivurikish chikusadik pa Ndol 14 chiletin chisu chimwing cha pakampwil cha kukudish ni kumekesh kujikitish kwetu mulong wa kuwap kwa Yehova. Rusangu ridia mu Luka 17:11-18 rumekeshin mutapu Yehova ni Yesu umeningau kujikitish. Chaushon, ching kusu umwing wa ku antu dikum adinga nich musong wa mak ndiy wasadila chisu cha kumekesh kujikitish. Mu machuku ma kurutu chakupesh cha difut chikez kwok mayej mawonsu ni kusal chakwel mwom wa chikupu wikal wakin! Chakin kamu, tukez kumujikitish Yehova pichuku-pichuku mulong wa yiyukish ya mutapu winou. Ov, mutapu ik tukutwisha kumekesh kujikitish kwetu mu jimbing jilondwilaku ej?

2. Ov, mutapu ik tukutwisha kukudish kujikitish mulong wa chakupesh?

² Kudish Kujikitish: Yovil ya kujikitish yidiokiling mu yitongijok. Mulong wa kutukwash chakwel tukasikesha kujikitish kwetu piur pa chakupesh, tukutwish kutan program wa kutang Bibil kwa pakampwil pa chisu cha Chivurikish mu jindond jivud mudi mu wenjil B12 wa Traduction du monde nouveau utenchikinau kand, mu kalandriye ni mu Examinons les Écritures chaque jour. Ov, mulong wak ukutwishanyap kushinshikin jinsangu jinej mu dijuku? Kusal mwamu kukez kukasikesh kujikitish kwetu mulong wa chakupesh. Kupwa, chinech chikez kwikal nich chibachikin chiwamp pa ngikadil yetu.​—2 Kor. 5:14, 15; 1 Yoh. 4:11.

3. Ov, mu mitapu ik tukutwisha kumekesh kujikitish kwetu pa chisu cha Chivurikish?

³ Mekesh Kujikitish: Kujikitish kumekening kusutil ku yisal. (Kol. 3:15) Mwin musong wa mak wamekesha kujikitish wasala usu wakumutan Yesu ni kumujikitish. Pakad kwidjidjek, ndiy walonda kand nich musangar kudi antu akwau piur pa mutapu wamwokau mu chilay. (Luka 6:45) Ov, kujikitish kwetu mulong wa chakupesh kukez kutubachik chakwel twipana nich mushiku mu kampany wa kulejan piur pa Chivurikish? Mudimu wa uchibol nkwash ni kwipan nakash mu mudimu wa kulejan pa chisu cha Chivurikish uding mutapu ukwau uwamp wa kumekesh kujikitish. Urel wa Chivurikish, muchim wa kujikitish ukez kutubachik chakwel tuyaka angendj ni twitekina chisu cha kwakul ku yipul yau.

4. Ov, mutapu ik tukutwisha kusal Chivirikish chinech pakad kunenganan?

⁴ Ov, Chivurikish chinech chikez kwikal cha nsudiel kudi etu? (1 Kor. 11:26) Twijap. Pakwez twij anch chinech chikez kusadik ni chikez kwikal chisu chimwing cha pakampwil cha kumekesh kujikitish kwetu. Ov, ukez kusadilany chisu? El amboku, mazu ma kujikitish ma mukan mwetu ni ma manangu mitutongijokina mu muchim wetu mamusangaresha Yehova, mwin Kupan mujim wa chakupesh.​—Kus. 19:14.

[Yipul ya Dilejan]