Mekeshany Kujikitish Piur pa Chipan Chipandakena Kujimb cha Nzamb
1. Mulong wak tufanyidin pakampwil kumujikitish Yehova?
1 Ku ‘yiyukish yiwamp’ yivud ya Yehova, difut diatwinkishay kusutil kudi Mwanend dipandaken kujimb. (Yak. 1:17, MM) Diawiy ditwishikishina yiyukish yivud, ni dilikishin dia yitil yetu. (Efes 1:7, MM) Chawiy, tujikitishining mu jinjil jivud. Pa chisu cha chivurikish, twitekidining chisu cha pakampwil chakwel tutongijokina pa chipan chinech cha usey ujim.
2. Mutapu ik tukutwisha kukasikesh musangar piur pa difut ni mu majuku metu?
2 Tukasikeshany Musangar: Chakwel ukasikeshany musangar mu majuku men mu jimbing jitakedila chivurikish pa Rish 30, mulong wak ukusadilanyap pa chisu cha urel wa kwifukwil mu dijuku dichirikin dia malejan piur pa difut? Shinshikinany kand kutang kwa Bibil kwa pakampwil pa chisu cha chivurikish pichuku-pichuku mu dijuku. Imburijany pakampwil mutapu udia difut diwamp kumutambu wey ni mutapu dikubachikina kumutambu wa Yehova, amwiney, kudi antu akwau, ni mu machuku ma kurutu. Ukez kutanany kand musangar wa kwiyijidish mutapu wa Kuwang miminy yisu yaad yikezau kuwang ku chivurikish, anch ukwetany buku musu wa miminy.—Kus. 77:12.
3. Ov, mutapu ik tukutwisha kumekesh kujikitish kwetu?
3 Mitapu ya Kumekesh Kujikitish: Kujikitish piur pa difut kutubachikin tulejan rusangu piur pa Yehova ni rukat rend rijim patumay Mwanend. (Kus. 145:2-7) Pa Rish, Ndol, ni Ndol-Mem, majuku mamwing mamekeshining kujikitish kwau mu kwirijekang chakwel yid ya mu majuku mau yisala mudimu wa uchibol nkwash. Anch kichitwishikinap, ov, ukutwishany ‘kwilandin chisu’ chakwel utandurilany mujikit wen wa kulejan? (Efes 5:16, NW) Kujikitish kukez kutubachik kand chakwel tuyikwasha antu akwau eza akumangan netu ku Chivurikish. (Kubur. 22:17) Sambishany kusal list wa antu ukuchirikinanya, in kwilej a Bibil, anamakwen a kumujimbu, ambay nen a mudimu, ni amutej nen chakwel uyitazukany, ni kupwa ipanany nakash mu kampany wa pakampwil wa kupan diladikij dia Chivurikish.
4. Mu jinjil ik tukutwisha kusadil chisu cha Chivurikish ni manangu?
4 Chirung cha Chivurikish chitwinkishining chisu cha kumekesh kudiay Yehova mutapu tusangaredina nakash chipan chend mu mangand. Tukutwish kusadil chisu chinech chakwel tukasikesh ni tumekesh musangar wetu piur pa chipan ni piur pa “mapit makad kuchind ma Kristu.”—Efes 3:8.