Dandamen Kuya Kurutu mu Mudimu wa Kulejan
1. Ov, yilakej ik ya mu mivu chitot ya kusambish yimekeshina anch tufanyidin kuya kurutu mu mudimu wa kulejan?
1 In Kristu afanyidin kuya kurutu mu mudimu wa kulejan. Chawiy chamubachika Yesu chakwel ayifumba in kwilejend mu mudimu wa kulejan. (Luka 9:1-5; 10:1-11) Chawiy kand, Akila nenday Prisil chamutazukau Apolo ni “amurumburila kand yom yikwau ya rusot ra Nzamb.” (Mid. 18:24-26) Chawiy chimwing kand, Paul wamukasikesha Timote mwin kulejan ukweta uman chakwel adandamena kusadil amwinend malejan mend chakwel “kukul kwend kumekana ku mes kwa antu awonsu.” (1 Tim. 4:13-15) Pitusadina mudi atushalapol a Mwant in kulejan rusangu ruwamp, tuswiridin kutenchik ukaliweny wetu wa kulejan.
2. Ov, mutapu ik tukutwisha kwilejin kudi antu akwau?
2 Ilejina Kudi Antu Akwau: Mutapu umwing wa kutenchik ukaliweny wetu udi wa kwilejin kudi antu akwau. (Jinsw. 27:17) Chawiy, ufanyidin kutal nawamp kamu mutapu ulejenau in kulejan akwau. Yipula in kulejan aswila kal yitongijok ya kusadil ni yitesha yom yilondinau. (Jinsw. 1:5) Ov, widjidjekining piur pa mutapu wa kuyichirikin antu, pa kusambish dilejan dia Bibil ap kwiyandjik mu milad yikwau ya mudimu wa kulejan? Ikal wakusambish kukwat mupak ni mwipula ntakel wa chirund ap mwin kulejan waswilakal chakwel akufumba. Vurik kand anch, spiritu utumbila wa Yehova ukutwish kutukwash tutenchika ukaliweny wetu, pitulembidininga chisu chawonsu.—Luka 11:13.
3. Ov, mutapu ik tufanyidina kwakul anch twatambul chiyul, pamwing ap mu mutapu wakad kuwanyin?
3 Kangal wajiman anch watambul chiyul cha kusadil mulong wa kutenchik ukaliweny wey, ap anch uchitinap. (Mul. 7:9) Mudi Apolo, itiy ukwash nich kwikepish ni kujikitish. Kusal mwamu kukumekesh manangu.—Jinsw. 12:15.
4. Ov, diyingishin ik dikash diapanay Yesu mulong wa kuya kurutu mudi in kulejan?
4 Kuya Kurutu Kukat Kumutumbish Nzamb: Pasadinay yilakej, Yesu wayikasikesha in kwilejend chakwel aya kurutu mu mudimu wa kulejan. Ndiy wifanikesha amwinend nich nviny pakwez wayifanikesha in kwilejend azizidilau many mudi mitiy. Ndiy walonda anch Tatukwend umening zwang mutiy usongininga mabuj ‘chakwel usonga mabuj kupandakan.’ (Yoh. 15:2) Mudi ndim wa nviny usotininga kukatwol mitiy ya nviny chakwel yisonga nakash, Yehova usotin anch tudandamena kuya kurutu mu ukaliweny wetu chakwel tubudisha “mabuj ma ku milamu yetu.” (Heb. 13:15, TMK) Ov, chisu ik chikwikala chibudikin chiwamp anch twadandamen kuya kurutu mudi in kulejan? Yesu watwakula anch: “Mwinomu mwawiy mukumutumbishilau Tatukwam anch en wasongany mabuj mavud.”—Yoh. 15:8, TMK.