Yang Kurutu mu Mudimu Wey wa Kulejan

¹ Tatukwetu udia mwiur ukat kusangar anch atushalapol end aya kurutu muspiritu. Kuya kurutu kwinoku kurumburikin kuswa ni kwikal mwin kulejan usongina mabuj ma rusang ruwamp. Paul wamukasikesha Timote wadinga kalam, adandamena kwiyijidish amwinend chakwel kukul kwend kumekana. (1 Tim. 4:13-15) Etu awonsu tufanyidin kutenchik mutapu wetu wa kusal mudimu, ap anch tudi in kulejan aswila.

² Itekina Jitong Jey: Chakwel kuya kurutu kwitining kwitekin jitong. Jitong ja mutapu ik tukutwisha twitekin? Tufanyidin twikala nich nkeu ya kusadin mpak ya muspiritu, Bibil. (Efes 6:17) Pamwingap kudi mutapu umwing wa kulejan tuswiridina kuwapish, mud kulejanang mu jinjil, ku telefon, ap mwi ndond ya wingend a mushing. Ap kand tukutwish twasal mudimu nakash chakwel tumana kuchirikinamu kusu kuvud. Rutong rukwau rupandikena kuwap rid rakutenchik mutapu wetu wa kusambish ni kutakel malejan ma Bibil.

³ Yitenchik: Yikumangan ya chikumangen, pakampwil Shikol ya Mudimu wa Uteokras ni Chikumangan cha Mudimu ayitenchika mulong wa kutukwash twikal in kulejan akash. Mausu tukata kusal mulong wa kuyirijek ni kukumangan ni kusadin yiyul yitwinkinau, kuding kutaninamu kujim nakash anch twayisadin.—2 Kor. 9:6.

⁴ Tukwet kand kuswir kwa kukwashijan umwing ni mukwau chakwel tuya kurutu. (Jinsw. 27:17) Kuteshang nawamp mutapu usambishina mambamb kudi muntu tusadina nend mudimu pamwing kukutwish kwatukwash kuya kurutu. Chikwau kand, kalam wa dilejan dia buku ukutwish witenchik chakwel atukwasha. Kudi kwitapil dilau mud ik anch atukwasha kudi chibol ap kudi mwin kulejan mukwau uswila ukutwisha kutukwash chakwel tulejana nakash ni tutana musangar ujim mu mudimu wetu! Ov, kudi mwin kulejan musu mu dilejan dietu dia buku? Tukutwish pamwingap twamutazuk eza tusal nend mudimu pamwing.

⁵ Mudimu upandikena usey usadinau nlel udi mudimu wa win Kristu. Mudi mutumwikishina Yehova yakupesh ya “mabuj ma kumilam” yetu, tusotiling tumwikish yom yetu yiwamp. (Heb. 13:15) Anch twikasikesh tuya kurutu mu mudimu, tukwikal in mudimu akad “mulong wa kwov usany, [twend twalejan] mazu ma uyakin mu kutentam.”—2 Tim. 2:15.