Sakatang Wetu wa Rukat Ukat Kutubangin

1. SAKATANG WETU NDIY UKATA KUTUBUDISHIN MUTEN

Utongin nchik anch mwom pa divu wading wakad kwikal nich chitokish cha muten? Muten wawiy ukata kupan usu ku mitond chakwel yibudisha mayij, yisalamb, mabuj, mis ni ntit. Wawiy kand ukata kukwash mitond chakwel mij yipwita mem ni kutwal ku mayij makusala anch mem minam maya mu rinkind.

2. SAKATANG WETU NDIY UKATA KUTUNAKISHIN RUVAL

Ruval chid chipan cha usey chapanay Nzamb chikata kukwash divu chakwel disonga yakudia tukweta nich kuswir. Nzamb ndiy ukata kutunakishin ruval ni Kutwinkish yirung ya kwangul, ukat kutwinkish yakudia yikata kutusangaresh.

3. SAKATANG WETU UKAT KUTWINKISH YAKUDIA NI YIDJAL

Atatuku avud iyakamishining yisu yivud mulong chiyikasikedining kutan yakudia ni yidjal mulong wa majuku mau. Pakwez Mifund Yitumbila yilondin anch: “Talany atujil a mwisuku. Awiy kakukunangap mbut, kakwangulangap, ap kakutekangap ya kwangul mwi nkil, pakwez Tatukwen udia mwiur ukat kuyilam. Ov, en kiukwetanyap usey kuyipandakanamu atujil?”—Mateu 6:25, 26.

‘Talany yisalamb ya mu masuku muyikat kukul . . . ; pakwez nakulejany anch, [Mwant] Salomon ni mu uyaj wend wawonsu kamulengap mudi chisalamb chimwing. Pakwez Nzamb, anch wamadjikaku masuku ma mwi mpat mwamu . . . , ov, komb ndiy katwishap kukudjikany en?’—Mateu 6:28-30, TMK.

Pakatay Nzamb kutwinkish yakudia ni yidjal, tukutwish kwikal nich kashinsh anch ukutwinkish kand yom yikwau tukweta nich kuswir. Anch twadandamen kusal rusot ra Nzamb, ndiy ukutwish kuyukish usu wetu tusadina mulong wa kudim ap kand kutukwash chakwel tutana mudimu ukutwisha kutukwash tulanda yom kanang tukweta nich kuswir.—Mateu 6:32, 33.

Chakin kamu, anch twashinshikin piur pa muten, ruval, atujil ni piur pa yisalamb, tukuman komb anch tukwet mayingishin makin mafanyidina kutubachik chakwel tumukata Nzamb wetu wa rukat. Mutu wa mulong ulondwilaku ou ukwisambin piur pa mutapu wambambangay Sakatang wetu nau antu.