Mareferans ma Mudimu ni Mashakamin ma in Kristu Mukand wa Chikumangan
NGOND WA 3 RUBING RA 4-10
YOM YA USEY YIDIA MU DIZU DIA NZAMB | ROM 12-14
“Chirumburikina Kumekesh Rukat ra win Kristu”
it-1-F p. 53 par. 2-3
Rukat ra Ukadivar
Rukat ra ukadivar (mu Grek phi·la·del·phiʹa, ap anch “rukat mulong wa mukadivar”) rifanyidin kumekan pakach pa antu awonsu adia mu chikumangen cha win Kristu. (Ro 12:10; Heb 13:1; tal kand 1Pi 3:8.) Chawiy, urund uyinungina antu adia mu chikumangen ufanyidin kwikal wa piswimp, ukash ni wa chirungul mudi uding pakach pa antu a mu dijuku dimwing. Ap anch antu a mu chikumangen akat kumekeshijadin rukat ra ukadivar ayikasikeshin kusal mwamu mu chilik chijim.—1Tes 4:9, 10.
Dizu dia Grek phi·loʹstor·gos, dirumburikina “kwikal ni rukat rikurikina,” adisadidin piur pa muntu udia mu urund wa piswimp ni mukwau. Dizu dimwing dia pa dishin piur pa kulond kwinoku kukurikina didi sterʹgo, disadidinau nakash mulong wa kumekesh rukat ra chivadik, mudi ridia pakach pa antu mu dijuku. Kambuy Paul wayikasikesha in Kristu kukudish mwikadil winou. (Ro 12:10) Paul walonda kand anch mu machuku mansudien antu akwikal ‘akad rukat ra chivadik’ (mu Grek aʹstor·goi) ni anch antu a mutapu winou afanyidin kwau kufa.—2Tm 3:3; Ro 1:31, 32.
wp09 1/10 paj 16 par. 3
“Ikalany Ni Chisambu Nau Antu Awonsu”
3 Tang Rom 12:17. Paul warumburila anch pa chisu cha kura nich kutusadil yom yiyimp, kitufanyidinap kwifundakesh ayinetu. Kutesh ni kusadil chiyul chend kudi kwa usey ujim pakampwil mu majuku maurikina pa mulong wa difukwil. Antu aad atijadina afanyidin kujijamen choziu cha kwifundakesh ku mazu ap kuyisal yakad kwikal yiwamp. ‘Kwifundakesh kuyip ku kuyip’ kuletiningap chibudikin chiwamp. Pakwez, mwikadil winou ukutwish wasal mwikadil wikal uyimp nakash.
w07 1/7 paj 26-27 par. 12-13
“Kangal Wamufundikeshinany Muntu Kuyip Ku Kuyip”
12 Chiyul chikwau kand chaletay Paul piur pa kuyisadil akaritiy ni antu akad ritiy anch: “Kangal wamufundikeshinany muntu kuyip ku kuyip.” Mazu minam madi chibudikin chiwamp cha yalonday kwisambishil, pakampwil: “Katukinany ku tuyimp.” Ov, mutapu ik ukutwishay muntu kulond anch chakin kamu ukisin yom yiyimp, anch ukat kusadil yom yiyimp mudi mutapu wa kuyifundakeshin antu akwau? Kusal mwamu kukez kwikal chinyim nich kwikal nich rukat ‘rakad rubabek.’ Kupwa Paul ulondil anch: “Ikalany ni kalimish ku mes kwa antu awonsu.” (Rom 12:9, 17) Mutapu ik tukutwisha kusadil mazu minam?
13 Kwisambishil, mu mukand wayifundinay in Korint, Paul wafunda piur pa mar mamanau atwimbuy. Paul walonda anch: “Atuteka kal kutumekesh ku mangand chikupu, ni kudi angel ni kudi antu. . . . Akat kutusal, etu tukat kuyiyukish; anch atupompat tukat kujikish; pakutulondau nayimp tukat kuyilondil.” (1 Korint 4:9-13) Chawiy chimwing, ilel antu a mangand minam ayitadil in Kristu akin. Antu atwombilamu pamenau yisal yiwamp yitusadila ap pa chisu chikatau kutusadil pakad kutentam, akutwish kusot kutesh nakash uruu wa Ukristu.—1 Pita 2:12.
wp12 1/11 paj 31 par. 13
Chifanyidin Kulikishijadin Umwing Ni Mukwau
13 Kukutwish kwikal yisu ukutwisha kuman anch ukutwish kumukwash muntu kanang wa kusadila uyimp chakwel aziyila yany ya win Kristu. Kambuy Paul wafunda anch: “Anch mukankuny ney wovil nzal, ey mwinkisha yakudia, anch ndiy wovil impu, ey mwinkisha yakuna. Mulong anch wasal mwamu, wamukwatish kal usany nakash. Kangal witiy kuyip kukupandakan usu. Pakwez chifanyidin ey kusal yom yiwamp mulong wa kupandakan kuyip.” (Rom 12:20, 21) Kusutil ku ranaken rey pakatau ku kusaal, ukutwish kuninetish ap mwikadil ukash ni kulet uwamp kudiau antu. Kusutil ku kumekesh chovu, riy—ap ranaken—kudi muntu wasala uyimp, ukutwish kumukwash chakwel ilejan uyakin udia mu Bibil. Chikala mutapu ik, chakul chitudishina chikez kumwinkish muntu chisu cha kutongijokin pa chaku chey chiwamp.—1 Pita 2:12; 3:16.
Kukimbijol Mapit ma mu Spiritu
Mutapu Tufanyidina Kutond Kwipuwangej
5 Chom chin chawonsu tusadining mu mwom wetu chikwatin ku difukwil dietu mulong wa Yehova. Paul warumburila chinech palonday anch: “Ipanany ayinen kudi Nzamb kwikal mudi yakupesh yikweta mwom, yidia yitumbila ya kumusangarish ndiy.” (Rom 12:1) Yesu walonda anch: “[Mukata Yehova] Nzamb wey nich muchim wey wawonsu, nich mupim wey wawonsu, nich manangu mey mawonsu, nich usu wey wawonsu.” (Marko 12:30, TMK) Tufanyidin chisu chawonsu kumwinkish Yehova yom yetu ya usey. Mu Isarel wa pasak, chisu chadingau antu kupesh annam kudi Yehova, ayitang kupan annam adia awamp. Anch apesh chidia chiyimp, Nzamb kafanyinap kuchitiy. (In Levi 22:18-20) Chilik chimwing, difukwil dietu akutwish kulik kuditiy kudi Yehova. Mutapu ik?
6 Yehova utulejin anch: “Ikalany antu atumbila, mulong am nidi utumbila.” (1 Pita 1:14-16; 2 Pita 3:11) Yehova ukwitiy difukwil dietu ching anch didi ditumbila, ap dishitwila. (Kuvurik Yijil 15:21) Difukwil dietu dikutwishap kwikal dishitwila anch tusadin yom yikisinay Yehova, mudi yom ya masandj, chisum, ap kwambamb nau ayilembil. (Rom 6:12-14; 8:13) Pakwez difukwil dikutwishap kumusangaresh anch twasambish kwipuwangej ni yom mudi yiney. Yom yeny yikutwish kujondish difukwil dietu ni kusal anch Yehova alika kuditiy ni yikutwish kuyipish kamu urund wetu ni Yehova.
w08 15/6 paj 31 par. 4
Manans Majim ma Buku wa in Rom
13:1—Mu mutapu ik udiau anyikel a piur ‘pa jindond jau ku usu wa Nzamb’? Anyikel a chiuntu adi pa jindond jau “ching [ku] usu wa Nzamb” charumburik anch Nzamb ndiy ulikina anch ikalaku, ni mu jinjil jimwing Nzamb wasambela kuman winyikel wau. Chom chinech chimekedin patok kusutil ku yilondilay Bibil piur pa in kuyikel avud.
NGOND WA 3 RUBING RA 11-17
YOM YA USEY YIDIA MU DIZU DIA NZAMB | ROM 15-16
“Muchingejina Yehova Mulong wa Kujijaman ni Rongoj”
w17.07 paj 11 par. 11
‘Dilany Nau Antu Adidina’
11 Rusangu piur pa ushon wovay Yesu chisu chafay Lazar kudi kwau kongoj kumwing pakach pa kongoj kuvud kudia mu Dizu dia Nzamb. Chinech chikutwishap kutukashimwish, mulong “yom yawonsu yafundau pakur ayifunda mulong wa malejan metu, chakwel ku kujijaman kwetu ni ku rongoj ra Mifund tutwisha kwikal nich ruchingej.” (Rom 15:4) Anch ukwet ushon, ukutan mazu ma kwongoj mu maverse malondwilaku am:
▪ ‘Yehoha udi piswimp nau awiy akweta michimyinenganena, ukat kuyipandish akweta michim ya runeng.’—Kuseng 34:18, 19.
▪ “Mu kuvul kwa minan mu muchim wam, kwongoj kwey [Yehova] kwatokish kal ku muchim wam to.”—Kuseng 94:19.
▪ “Tukat kumulembil Nsalejetu Yesu Kristu amwinend, ni Nzamb Tatukwetu watukata, chad watwinkish kujijaman kwa chikupu, ni ruchingej ruwamp ku ranaken rend. Tulembil anch ndiy ukez kukwongojany ni kukasikesh michim yen mu yisalijok yawonsu yiwamp, ni mu mazu mawonsu mawamp.”—2 Tesalonik 2:16, 17.
w16.04 paj 10 par. 5
‘Muchim wa Kujijaman Ufanyidin Kuwanyish Mudimu’
5 Mwita Yehova akwinkisha usu. Yehova ndiy ‘Nzamb ukata kupan kujijaman ni kongoj.’ (Rom 15:5) Ndiy amwinend wija nawamp mashakamin metu, yovil yetu, ni yisal yetu. Chawiy wij nawamp yom tuswirikedina chakwel tujijamana. Bibil ulondin anch: “Ukuwanyish rusot ra awiy akata kumwov wom, ukwov kudil kwau ni kuyipandish.” (Kuseng 145:19, TMK) Pakwez, mutapu ik ukwakulay Nzamb ku malembil metu chakwel atwinkisha usu wa kujijaman?
wp14 1/6 paj 9 par. 11
‘Ufanyidin Kumukat Yehova Nzamb Wey’
11 Yehova ‘utwinkin ruchingej ritwizwishina nich musangar wawonsu ni chisambu.’ (Rom 15:13) Chipan cha Nzamb chitukwashin chakwel tutwisha kujijaman ku yoziu ya ritiy retu. In Kristu azizidilau many amekeshina ‘kujijaman ni kushik ku rufu, akez kayinkish chibangul cha kupand mwiur.’ (Kuj. 2:10) Kulam kushinshaman kwa ruchingej pa mangand kukusal anch tusanger yiyukish ya chikupu mu paradis wa pa mangand washilaumu. (Luka 23:43) Ov, mutapu ik tukutwisha kwakul ku kushilamu kwinoku? Ov, tukwetap musangar uvud, ni chisambu, ni rukat mulong wa Chipan cha “Yom yawonsu yiwamp ni yiwanyidina”?—Jak. 1:17, TMK.
Kukimbijol Mapit ma mu Spiritu
w89-F 1/12 paj 24 par. 3
“Kupak Mulong wa Kuman Ukashinsh wa Rukat ren”
Chakin kamu, antu a michid ikala akadivar nau afanyina kwiyov abachikinau kuyikwash chisu chadingau mu mar. Chikwau kand, ading ni ‘dibaz’ dia pakampwil dia in Kristu a mu Yerusalem. Ov, rusangu ruwamp rapalanganap kudi antu a michid kudiokal mu Yerusalem? Paul watonga anch: “Anch in Kristu in Yuda angana mapit mau ma mu spiritu kudi antu a michid, antu a michid akwet dibaz dijim dia kuwanyish maswir mau ma ku mujimbu.”—Rom 15:27, The New English Bible.
it-2-F p. 647 par. 2
Kusambel Kutenchik ap Kurijek yom Kurutu
Mesia ap Kristu wading ufanyidin kwikal Mbut yashilawamu kusutin ndiy antu awonsu atentamina a majuku mawonsu ma pa divu afanyina kuyiyukish. (Gal 3:8, 14) Kapamp ka kusambish kajimbwilau “mbut” yiney kad kupwa kwa kusambish wintombwij mu Eden, pakwez kurutu kwa Abel kuvadik. (Dis 3:15) Kwasuta mivu 4000 kurutu kwa kulet kujingunik kwa ‘ujindj utumbila’ kusutil kumekan patok kwa “mbut” ya Umesia. Chawiy, ujindj winou ‘aulama mu ujindj mu yisu yivud.’—Ro 16:25-27; Ef 1:8-10; 3:4-11.
NGOND WA 3 RUBING RA 18-24
YOM YA USEY YIDIA MU DIZU DIA NZAMB | 1 KORINT 1-3
“Ov, Udi Muntu wa ku Mujimbu Anch wa mu Spiritu?”
Chirumburikin ik Kwikal Muntu wa mu Spiritu?
4 Mutapu ik utonginay muntu wa ku mujimbu? Muntu wa kumujimbu ukweting chitongijok cha mangand, chimedina pa maku mayimp ma ku mujimbu. Paul warumburila mwikadil winou mudi ‘spiritu ukata kuyikel pakach pa an in kubwambwil.’ (Efes 2:2) Mwikadil winou ukat kuyibachik antu avud kuyimburij antu ashichau nau. Akat kusal yom yimenau ku mes mau anch yiwapin pakad kushinshikin mbil ja Nzamb. Muntu wa ku mujimbu ap wa chiuntu ukat kutong nakash pa yom ya ku mujimbu ni kutong anch ndond yikwetay, nfalang ap usu ukwetay yidi ya usey nakash kusutamu yom yawonsu.
5 Muntu wa ku mujimbu ukat kusal yisu yivud yom yitazukinay Bibil anch ‘yisalijok ya ku mujimbu.’ (Galatia 5:19-21) Mu mukand wa kusambish wa Paul kudi in Kristu a ku Korint, wafundamu yom yikwau yisadiningau antu a ku mujimbu. Akat kwiyandjik mu matend, kusal usu wa kwauril antu, kuyibachik antu akwau kubwambwil, kufundijan ku dirumburish, akat kuyiburen kalimish antu atakedina ni amening yakudia ni kuna mudi yom ya usey nakash mu mwom yau. Muntu wa ku mujimbu kakatap kujijaman anch amupak mulong wa kusal yom yiyimp. (Jinswir 7:21, 22) Jud walonda anch antu a ku mujimbu akutwish kushadish spiritu wa Yehova.—Jud 18, 19.
Chirumburikin ik Kwikal Muntu wa mu Spiritu?
6 Chinyim ni muntu wa ku mujimbu, muntu wa mu spiritu ubangidining nakash urund wend ni Nzamb. Ukat kwitiy chakwel amutakela kudi spiritu wa Nzamb ni kusal usu wa kumwimburij Yehova. (Efes 5:1) Ukat kusal usu wa kwilej mutapu utonginay Yehova ni kuman yom mudi muyimenay Yehova. Umumening Nzamb anch udi Muntu udiaku kamu chakin. Chinyim ni muntu wa ku mujimbu, muntu wa mu spiritu ulimishining nakash mbil ja Yehova mu mwom wend. (Kuseng 119:33; 143:10) Kakatap kusal ‘yisalijok ya ku mujimbu’ pakwez usadining usu wa kukudish ‘dibuj dia spiritu.’ (Galatia 5:22, 23) Mulong wa kurumburil nawamp chirumburikina kwikal muntu wa mu spiritu, tongin pa chilakej ech: Muntu usadining nawamp mudimu wa kwisak amutazukining anch mwin kwisak, ni muntu ukata kubangin nakash piur pa difukwil diend mulong wa Nzamb amutazukin anch muntu wa mu spiritu.
Chirumburikin ik Kwikal Muntu wa mu Spiritu?
15 Mutapu ik tukutwisha kumwimburij Kristu? Korint wa kusambish 2:16 urumburil anch tufanyidin kwikal ni “chitongijok cha Kristu.” Rom 15:5 utuvurishin kukudish ‘yitongijok ya mutapu umwing mudi yadingay nich Kristu Yesu.’ Mulong wa kwikal mudi Kristu, tufanyidin kwilej mutapu wadingay kutong, kwiyov ni kusal yom. Yesu washinshikinang nakash pa urund wend ni Nzamb kusutamu yom yin yawonsu. Chawiy kwikal mudi Yesu kutusadin kwikal mudi Yehova. Chawiy chidia cha usey nakash anch twileja kutong mudi mwatongangay Yesu.
Kukimbijol Mapit ma mu Spiritu
it-2-F paj 854 par. 5
Manangu
Chawiy mangand kusutin manangu mend mamen ditenchik dia Nzamb diasalay kusutin Yesu mudi usup; anyikel au, ap anch ikala in kutakel awamp ashikena ‘kumupamp Nsalejetu wa uyaj ku mutond.’ (1Ko 1:18; 2:7, 8) Pakwez Nzamb wamekesha anch manangu ma antu a manangu a mangand madi usup, wayovisha usany mu kusadin yom yading yimenau awiy anch yidi ‘yom ya usup ya Nzamb’ mulong wa kuwanyish chitongijok Chend pamwing nau antu amenau anch adi ‘ayisup, aziyina ni a chamwamu.’ (1Ko 1:19-28) Paul wayivurisha in Kristu a ku Korint anch “manangu ma antu a mangand minam [ni] ma in kutakel a mangand minam” makwikal ma chamwamu; mulong manangu minam madingap ni ndond mu uruu wa mu spiritu wa kambuy. (1Ko 2:6, 13) Wayibabesha in Kristu a ku Kolosay pantaliken ni mupit wa ‘filozofi [phi·lo·so·phiʹas, kwawiy kulond anch rukat ra manangu] ni wa manangu ma antu ma kudimban makad usey. Yom yiney yikat kudiokal ku malejan makat kutambulau antu mu majuku ma angakau.’—Kol 2:8; ilikej ni verse 20-23.
w08 15/7 paj 27 par. 6
Manans Majim ma Mikand ya In Korint
2:3-5. Padingay ni kupan uman mu Korint, musumb ujim wa filozofi wa in Grek ni wa kwilej kujim, pamwingap Paul wadinga ni kubangin piur pa anch ukutwish kuyitiyikish in kumutesh. Pakwez, kadingap ni kulikin kuziy ap wom wadingay ni kwov umukangesha kusal mujikit wamwinkishau kudi Nzamb. Chawiy chimwing, kitufanyidinap kulikin mikadil yakad kufanyin yituchirisha kwinyim tulika kulejan rusangu ruwamp ra Want wa Nzamb. Tufanyidin nich ruchingej kumuchingejin Yehova atukwasha mudi mwasalay Paul.
NGOND WA 3 RUBING RA 25-31
YOM YA USEY YIDIA MU DIZU DIA NZAMB | 1 KORINT 4-6
“Chivish Chikemp Chikat Kututwish Dibot Diawonsu”
it-2-F p. 129
Chivish
Kambuy Paul wasadina chifanikesh chimwing chisu chalejay chikumangen cha win Kristu cha mu Korint kumwopat muntu muyimp mu chikumangen palonday anch: ‘Ov, kiwijanyap anch, chivish chikemp chikat kututwish dibot diawonsu? Dioshany chivish chikur, chad wikalany dibot disu, diakad kal kutek mwon. Mulong Kristu amupeshil kal, ndiy kamu mwan a Mukoku wa Pasak wetu.’ Kupwa walejana patok yading yikimbinay kurumburil piur pa ‘chivish’: ‘Chawiy tudandamenany kusal musambu, kadiap ni chivish chikur, ap chivish cha uyimp ni yitil, pakwez nich dibot diakad chivish dia win kashinsh ni uyakin.’ (1Ko 5:6-8) Pinap Paul wasadina kurumburik kwa chifanakesh kwa musambu wa in Yuda wa Mabot makad chivish, wasalangau kurutu kwa musambu wa Pasak. Mudi mutapu ukutwisha chivish chikemp kututwish pakad kulab dibot dia kabuj dia mikat ya kusamp, chilik chimwing chikumangen cha kabuj chafanyina kwikal chijondina ku mes ma Yehova anch chalik kumudiosh muntu ukweta yibachikin yiyimp. Chifanyidin kudiosh ‘chivish’ mukach mwach, mudi mutapu wafanyinau in Isarel kulik kwikal nich chivish mu yikumbu yau pa chisu cha musambu.
it-2-F p. 903 par. 6
Satan
Chom ik chirumburikina ‘kumupan mukayitil mu makas ma Satan mulong wa kusheshik kwa mujimbu’?
Pading papaninay Paul mbil ku chikumangen cha win Kristu cha mu Korint piur pa mipak ya kukwat pantaliken ni muntu walala ni mband a tatukwend, kambuy Paul wafunda anch: ‘Chifanyidin kumupan muntu winou mu makas ma Satan mulong wa kusheshik kwa mujimbu.’ (1Ko 5:5) Yiney yading mbil ya kumwopat muntu mu chikumangen ni kulik kubombakan nend. (1Ko 5:13) Kumupan mu makas ma Satan kwading kurumburikin kumudiosh mu chikumangen ni kumutek mu mangand mudiay Satan mudi nzamb ni nyikel. Mudi ‘chivish chikemp’ mu ‘dibot diawonsu,’ ikundj winou wading wa ku “mujimbu,” kwawiy kulond anch muntu wa musuny wading mu chikumangen; mu kumudiosh ikundj winou walala ni mband a tatukwend, chikumangen chading chikweta chitongijok cha mu spiritu chashesha “mujimbu” wading mukach mwach. (1Ko 5:6, 7) Chilik chimwing, Paul wamupana Himeney ni Alekizandre mu makas ma Satan, mulong alika ritiy ni kom kawamp ni ritiy rau rajiya.—1Tm 1:20.
lvs paj 241, mazu ma kwinsudiel
Kumwopat Muntu
Anch muntu wasadina chitil chijim walik kukarumuk ni walik kulondul mbil ja Yehova, kakwikalap kand mu chikumangen. Chifanyidin kumwopat. Anch amwopat muntu, tufanyidinap kand kubombakan ni muntu winou ni tufanyidin kulik kwambamb nend. (1 Korint 5:11; 2 Yohan 9-11) Ditenchik dia kumwopat muntu dikat kuchidij dijin dia Yehova ni chikumangen. (1 Korint 5:6) Kumwopat muntu didi kand dipup dikutwisha kumukwash muntu kukarumuk chakwel atwisha kand kumuchirikin Yehova.—Luka 15:17.
▸ Shapitre 3, paragraf 19
Kukimbijol Mapit ma mu Spiritu
wp09 1/5 paj 25-26 par. 16
Angel—adi “Aspiritu Mu Mudimu Wa Nzamb”
16 In Kristu adia mu yoziu ading mudi ‘ayijipin patok pa dibur kurutu kwa angel.’ (1 Kor. 4:9) Nich musangar ujim, angel akat kutalang yisal yetu ya kushinshaman ni akat kusangarang anch mukayitil wakarumuk. (Luka 15:10) Angel ij mwikadil wa amband in Kristu. Bibil ulejen anch: “Mband ufanyidin kwikal ni chijingidij pa mutu wend, mulong wa angel.” (1 Kor. 11:3, 10) Mwawiy, angel akat kusanger payimeningau amband in Kristu ni atushalapol awonsu a Nzamb adia pansh alondwil umutakel wa uteokras ni wa umutu. Kuziyil kwinoku kudi chivurish chiyifanyidina an inay a mwiur a Nzamb.
it-2-F p. 151 par. 2
Chijil
Chijil Kudi Angel. Ap anch Angel ayisutinamu antu, akat kulimish chijil ni mbil ja Nzamb. (Heb 1:7, 14; Kus 104:4) Yehova wamwinkisha yijidik ni wamutekina mimbu mukankuny nend Satan. (Job 1:12; 2:6) Mikayel mukurump wa angel wading wij ni walimisha ndond yikwetay Yehova mudi Nzuj wa Piur Nakash palonday chisu chading chirishinay ni Djabul anch: “Chifanyidin [Yehova] akuleja kadimu.” (Jud 9; ilikej ni Zak 3:2.) Yehova Nzamb wateka angel awonsu mwinshin mwa Yesu Kristu utumbishinau. (Heb 1:6; 1Pi 3:22; Mt 13:41; 25:31; Fl 2:9-11) Chawiy, kusutil mbil ya Yesu, mwangel umwing weza kumwinkish Yohan uruu. (Kuj 1:1) Mu 1 Korint 6:3 kambuy Paul ulondin anch akadivar a mu spiritu a Kristu akwikal ni chisend cha kuyirumburish angel, mulong niyau akulet dirumburish padi yitang ya mu spiritu yiyimp.