Mareferans ma Mudimu ni Mashakamin ma in Kristu Mukand wa Chikumangan
NGOND WA 5 RUBING RA 6-12
YOM YA USEY YIDIA MU DIZU DIA NZAMB | 2 KORINT 4-6
“Tukuziyap”
w04-F 15/8 p. 25 par. 16-17
Tuziyin Pakwez Tulikinap
16 Chawiy, chidi cha usey kulam nawamp ukash wetu wa mu spiritu. Anch tukwet urund wa piswimp ni Yehova Nzamb, pamwing ap tukutwish kuziy ku mujimbu pakwez tukuziyap kumwifukwil ndiy. Yehova ndiy ukata “kumwinkish muntu uziyila usu, ni muntu wakad usu ujim ukat kumwinkish ukash.” (Isay 40:28, 29) Kambuy Paul wimenap amwinend uyakin wa mazu minam wafunda anch: “Michim yetu kiyiziyinap. Ap anch mijimbu yetu yayap nchik ni kusheshik, michim yetu yikat kupizurok pichuku pichuku.”—2 Korint 4:16.
17 Shinshikin bil mazu malondina anch “pichuku pichuku.” Mamekeshin anch tufanyidin kutaninamu mu yom yitenchikinay Yehova dichuku diawonsu. Nambaz umwing wasala mudi mishoner mu mivu 43 warisha yisu yimwing ni kuziy. Pakwez kalikap bwat. Ulondin anch: “Nitekina chaku cha kulankang pamanch nakash chakwel kurutu kwa kusambish mudimu win wawonsu, nisutisha chisu mu kumulembil Yehova ni kutang Dizu diend. Chaku chinech chankwasha kujijaman kushik ni katat.” Tukutwish kuchingejin mu ukash wa Yehova anch pakad kujing, ap anch “pichuku pichuku,” twamulembil ndiy ni twatongijokin piur pa mikadil ni kushilamu kwend kuwamp.
it-1-F p. 759
Kujijaman
Chidi kand cha usey nakash kulik kushadish ruchingej ra win Kristu ra kwikal ni mwom wa chikupu ni wakad chitil. Ap rufu mu makas ma in kutuzengol etu rikutwishap kukangesh ruchingej riner. (Ro 5:4, 5; 1Tes 1:3; Kuj 2:10) Mar ma katat makwikal ma chamwamu anch twamilikej ni kuwanyin kwa ruchingej riner rijim. (Ro 8:18-25) Kudi muntu wakaninau kal kutambul mwom wa chikupu, mar min mawonsu, ap makash nakash katat madi kwau ‘makemp ni ma chisu chikemp.’ (2Ko 4:16-18) Muntu ukata kuvurik anch yoziu yidi kwau ya chisu chikemp ni ulamina dang ruchingej ra win Kristu ukutwish kwiyep kushadish ruchingej ni ukwiyep kand kuburen kushinshaman kudiay Yehova Nzamb.
Kukimbijol Mapit ma mu Spiritu
w12-F 1/2 p. 28
“Ukumusangareshany Yehova”
David Splane wa mu Chisak Chitakedila washinshikina mutu wa mulong winou wa Bibil. (2 Korint 4:7) Chipau chom ik? Ov, ridi ronganyin ap manangu? Mwin kusal diskur wakula anch: “Bwat. Chipau chisambidinay kambuy Paul pinap udi ‘mudimu’ wa ‘kwijikesh uyakin.’” (2 Korint 4:1, 2, 5) Mukadivar Splane wayivurisha ansand a shikol anch angond atan asalangau mu kwilej ading kwau mulong wa kuyirijek ku chisend cha pakampwil mu mudimu winou. Chisend chinech chidi chom chimwing chifanyidina kukwat nich usey nakash.
Mwin kusal diskur warumburila anch ‘jimpas ja kam’ jimekeshin mijimbu yetu ya mbij. Waleta kushalijan kudia pakach pa jimpas jisadinau nich divu ni ja utad wa or. Jimpas ja or kakujisadinangap nakash. Pakwez jimpas ja divu, akat kujisal mulong wa kujisadin. Anch twatek chipau mu jimpas ja utad wa or, tukutwish kushinshikin nakash pa jimpas jinej kusutamu pa chipau. Mukadivar Splane walonda anch: “En ansand a shikol ukatinanyap anch akushinshikinany nakash. Chiudianya amishoner, mupak wen udi wa kuyibachik antu kudi Yehova. Udiany jimpas ja divu jikepishina.”
wp09 1/11 paj 24-25 par. 7
Jimbany Mu Rukat Ra Ukadivar
7 Chidi nchik kudi etu? Mutapu ik tukutwisha ‘kujimb mu michim’ mu kumekesh rukat ra ukadivar? Antu akweta mivu yimwing ap antu [a] muchid umwing akutwish akatijan swa umwing ni mukwau. Ni antu akweta yom yimwing ya kwipuwej nich akat kusutish chisu chilemp pamwing. Pakwez anch mutapu tukata kuyisanger in Kristu amwing kusadil anch twikala palemp ni akwau, chawiy tuswiridin ‘kujimb mu michim.’ Chikwikal cha manangu anch twiyipul ayinetu anch: ‘Nikat kuyang pa chipatu mu mudimu wa kulejan ap kwipuwej pa chipatu ni akadivar ni anambaz akad kwikal arund nam a piswimp? Ku Chot cha Want, niding palemp ni antu asu ezina mulong niyakamishin anch akutwish akwat nam urund? Ov, nikat kuyilangwish awonsu adia mu chikumangen ikala anikanch ap amakurump?’
NGOND WA 5 RUBING RA 13-19
YOM YA USEY YIDIA MU DIZU DIA NZAMB | 2 KORINT 7-10
“Mudimu Wetu wa Kuyikwash Antu”
w98-F 1/11 p. 25 par. 1
“Nzamb Ukatil Muntu Ukata Kupan Nich Musangar”
Chakusambish, Paul wayileja in Korint piur pa in Masedon, anch ading chilakej chiwamp piur pa mudimu wa kukwash. Paul wafunda anch: ‘Ap anch ayipaka in Kristu, musangar wau upandakena kujimb ni uzwendj wau ukash, ikala in kupan chipandakena.’ In Masedon kadingap nich kuswir kwa kuyibachik chakwel apana. Pakwez, Paul walonda anch “atulembijeka chakwel apana yom.” Muchim wa kupan wa in Masedon wading chilakej chiwamp nakash ap anch iyinau ading “atuzwendj nakash.”—2 Korint 8:2-4.
kr paj 209 par. 1
Ukwash Udi Mutapu Ukwau wa Kulejan
MU MUVU wa 46 C.C., mu Yudeya mwading nzal jikash. In kwilej a Kristu in Yuda adinga kwinikwa katwishap kuland yom mulong usey wakandama ni yakudia yakepa nakash. Ading ni nzal, ni kamungun wasambisha. Pakwez, chisu chinech chawiy chamanau diking dia chikas cha Yehova kupandakenamu ni in kwilej akwau. Ov, chom ik chashikena?
kr paj 209-210 par. 4-6
Ukwash Udi Mutapu Ukwau wa Kulejan
4 Mu mukand wend wakaad wayifundinau in Korint, Paul warumburila anch in Kristu akwet midimu yaad. Ap anch Mukand wa Paul autuma kudi in Kristu azizidilau many, lel unou mazu mend makwet usey ni kudi “amikoku akwau.” (Yohan 10:16) Chikunku cha mudimu wetu chidi “mudimu wa kuyichakwish antu,” mudimu wetu wa kulejan ni kufundish. (2 Kor. 5:18-20; 1 Tim. 2:3-6) Chikunku chikwau, udi mudimu tusadina mulong wa kuyikwash ambay netu akaritiy. Paul wisambina pakampwil piur pa “mudimu winou wa kuyikwash in Kristu.” (2 Kor. 8:4, TMK) Mazu minam “mudimu wa kuyichakwish antu” ni “mudimu wa kuyikwash in Kristu,” mu mawonsu maad mudi dizu “mudimu” wakarumunau kusutil ku dizu dia Grek di·a·ko·n’ia. Ov, mulong wak chidi cha usey?
5 Pasadilay dizu dined dia Grek mu kwisambin pa mijikit yiney yaad, Paul wateka pamwing mudimu wa ukwash ni mulad ukwau wa mudimu wadingau ni kusal mu chikumangen cha win Kristu. Kupwa washikena ku kulond anch: ‘Mitapu ya kumusadil ya Nsalejetu yishalijadin, pakwez Nsalejetu tukata kusadil udi umwing. Midimu kushalijan yiney akat kuyisal kudi spiritu umwing.’ (1 Kor. 12:4-6, 11) Chawiy lel, Paul wilikeja midimu kushalijan ya chikumangen nich “[mudimu] utumbila.” (Rom 12:1, 6-8) Chishimokishinap anch ndiy wamana anch chading cha usey kupan chisu chend mulong wa ‘kuyikwash antu a Nzamb’!—Rom 15:25, 26.
6 Paul wayikwasha in Korint chakwel amana mulong wak mudimu wa ukwash wading chikunku cha midimu yau ni cha kumwifukwil Yehova. Ndiy wasota kulond anch: In Kristu ayikwashining antu akwau mulong akat ‘kuziyil mu ritiy rau ku Rusangu ra Kristu.’ (2 Kor. 9:13) Mulong rusot rau ra kusadil malejan ma Kristu riyibachikin kusal mwamu, in Kristu ayikwashining ambay nau akaritiy. Paul walonda anch, yisal yikatau kuyisadil akadivar nau, yikutwishap kupandikan kumekesh kwa ‘ranaken rijim riletinay Nzamb.’ (2 Kor. 9:14; 1 Pita 4:10) Chawiy lel, pisambinau piur pa kuyikwash akadivar netu aswiridina ukwash, ap kusal mudimu wa kuyikwash, Chinong cha Kalam cha Kachirikin 1, 1975, chalonda anch: “Tufanyidinap kwidjidjek anch Yehova Nzamb ni Mwanend Yesu Kristu apanin usey wakin kamu ku mudimu winou.” Mwaning, mudimu wa ukwash udi mulad umwing wa usey nakash wa mudimu utumbila.—Rom 12:1, 7; 2 Kor. 8:7; Heb. 13:16.
kr paj 196 par. 10
Ov, Kwisu Kudiokila Nfalang ja Mijikit ya Want
10 Chakusambish, tupanining milambu ya kwisotin mulong tumukatin Yehova ni tusotin kusal “yom ya kumusangarish ndiy.” (1 Yoh. 3:22) Yehova wading ukat kusangar anch muntu ukata kumwifukwil wapan mulambu nich muchim wend wawonsu. Shinshikinany yalonday kambuy Paul piur pa kupan. (Tang 2 Korint 9:7.) Mwin Kristu wakin kakatap kumushindil ap kumubachik chakwel apana. Pakwez, ukat kupan mulong ‘watongin amwinend’ kusal mwamu. Chawiy lel, ukat kupan pamenay kuswir ni mutapu wa kuwanyish kuswir kwinoku. Yehova ukatining mwin kupan wa mutapu winou, mulong “Nzamb ukatil muntu ukata kupan nich musangar.” Mu Bibil mukwau afundin anch: ‘Nzamb uyikatil antu akatina kupan.’
Kukimbijol Mapit ma mu Spiritu
w16.01 paj 12 par. 2
Ikalany Abachikinau Kudi ‘Chipan Chijim’ cha Nzamb
2 Paul wading wij anch yakupesh yaYesu kadi kashinsh anch kushilamu kwawonsu kuwamp kwa Nzamb kukez kuwanyin. (Tang 2 Korint 1:20.) Chinech chirumburikin anch ‘chipan chijim’ cha Nzamb chirumburikin yakupesh ya Yesu ni ranaken ni rukat rishinshamena ritumekeshidinayYehova. Chipan chinech cha usey chikasiken nakash kuchirumburil mu mutapu tukutwisha kutesh nawamp. Chipan chinech cha pakampwil chikutwish kusal anch twiyova nchik? Nimutapu ik ufanyidina chipan chinech kutubachik chakwel twirijeka mulong wa Chivurikish cha rufu ra Kristu chikusadika Diakasatu machuku ma ngond 23 ngond wa 3, 2016?
g99-F 8/7 p. 20-21
Ov, Chidi Chiyimp Kwibaz?
Mu mifund ya Grek ya win Kristu, dizu kau·khaʹo·mai, dikarumwinau anch “kwibaz ap kwitumbish” adisadidin mu mutapu uwamp ni mu mutapu uyimp. Chilakej, Paul walonda anch tukutwish ‘kwitumbish mulong wa ruchingej ra uyaj wa Nzamb.’ Walonda kand anch: ‘Muntu mwawonsu usotila kwibaz, ibazina mu Yehova.’ (Rom 5:2; 2 Korint 10:17) Chinech chirumburikin kwibaz mu Yehova mudi Nzamb wetu, yovil yiney yikutwish kutubachik kwitumbish mulong wa dijin diend ni kalimish kend.
NGOND WA 5 RUBING RA 20-26
YOM YA USEY YIDIA MU DIZU DIA NZAMB | 2 KORINT 11-13
“Paul Wading ni ‘Muy mu Mujimbu’”
w08 15/6 paj 3-4
Akash Chikalap Nchik Kuziy
Kashalapol mukwau ushinshamena wamuleja Yehova amudosha “muy mu mujimbu,” mulong umwing wadinga udandamedina. Kambuy Paul wamwilembila Nzamb tupamp tusatu chakwel amudosha mu choziu chinech. Chikalap muchadinga, mudi muy umupampina, ni kwawiy kwadinga ni kumupwish Paul musangar wa kusal mudimu wa Yehova. Paul wakufanikesha nich kumubul jimbat chisu ni chisu. Chakul cha Yehova chadinga anch: “Ranaken ramam ruwanyidin kal kudi ey; mulong usu wamam ukuwanyishil mu kuziy.” Yehova kaudioshap muy winou wadinga mu mujimbu. Paul wafanyidina kura nich, pakwez wawejinaku kand anch: “Mulong anch niziyilip nchik chawiy nidi kal mukash.” (2 Kor. 12:7-10) Chom ik chasotay kulond?
Yehova Upanin “Spiritu Utumbila Kudi Awiy Akata Kumwit”
17 Mu kwakul ku malembil ma Paul, Nzamb wamuleja anch: “Ranaken ramam ruwanyidin kal kudi ey; mulong usu wamam ukuwanyishil mu kuziy.” Paul walonda anch: “Chawiy nasweja kusangar nakash mulong wa kuziy kwam, chakwel usu wa Kristu ukez kushakamin padi am.” (2 Korint 12:9; Kuseng 147:5) Chawiy, Paul wamana anch kusutil kudi Kristu, diking dia usu dia Nzamb diadinga padi ndiy mudi ntent. Nlel, Yehova wakwil ku malembil metu mu mutapu wawiy umwing. Ukat kuyibwik atushalapol end nich diking diend mudi cha kwibwik.
18 Chakin, ntent yikutwishap kukangesh ruval kunak ap rinkind kutut, pakwez yikat kulet diking ku yom yiney. Chawiy chimwing, diking didiokila ku “usu wa Kristu” dikatap kukangesh yoziu kutushiken ap yisu yikash. Pakwez, ukat kulet diking dia mu spiritu pantaliken nich yom yiney yiyimp ya mangand minam ni kurishish kwa nyikel wau, Satan. (Kuburik 7:9, 15, 16) Chawiy lel, ap anch urishin nich choziu chakad ‘kupwang,’ ukutwish kwikal nich kashinsh anch Yehova wij milong urishina nich ni ukutwish wakul ku ‘dizu dia chidil chey.’ (Isay 30:19; 2 Korint 1:3, 4) Paul wafunda anch: “Nzamb udi wakin, ndiy kakwitiyip en anozany kusut usu wen; pakwez yoziu anch yez, ndiy ukunilejany njil ya kukwasinik, chakwel ukwikalany ni usu wa kupandakan.”—1 Korint 10:13; Filip 4:6, 7.
“Ndiy Ukat Kupan Usu Kudi Uziyina”
8 Tang Isay 40:30. Tukutwish kwikal ni ukaliweny wa kusal yom yivud, pakwez tukwet mimbu mu yom tukutwisha kusal ku usu wetu ayinetu. Dined didi dilejan tukutwisha etu awonsu kwilej. Kambuy Paul wading ukatin kusal yom yivud, pakwez katwishap kusal yom yawonsu yakatay kusal. Pamulejay Yehova mutapu wading wiyovilay, Yehova wamuleja anch: ‘Usu wam ukat kwikal uwanyidina mu kuziy.’ Paul watesha yom yamulejau kudi Yehova. Chawiy chalonday anch: “Anch niziyil, chad nikwet [usu].” (2 Korint 12:7-10) Chom ik chakimbay kulond?
9 Paul wamana anch wading ukwet mipak piur pa yom yading yikimbinay kusal ni usu wend amwinend. Wading ukwet kuswir kwa kumukasikesh kudi muntu ukweta usu nakash. Spiritu utumbila wa Nzamb wafanyina kumwinkish Paul usu chisu chiziyinay. Ni spiritu winou wafanyina kand kusal yom yivud. Spiritu wa Nzamb wafanyina kumwinkish Paul usu wa kusal yom yakanganyay kusal ni usu wend amwinend. Yom mudi yiney yikutwish kand kutushiken etu. Anch Yehova watwinkish spiritu wend utumbila, tukwikal kamu ni usu!
Kukimbijol Mapit ma mu Spiritu
w18.12-F p. 8 par. 10-12
Yipul ya in Kutang
“Diur dia kasatu” dilejenau mu 2 Korint 12:2 dirumburikin Want wa Umesia utakedilau kudi Yesu Kristu nau antu 144000, adia “maur masu.”—2 Pita 3:13.
Alondin anch didi “diur dia kasatu” mulong Want udi wa piur, ujim kusutamu mant makwau.
Mu ‘paradis mwamutwalau’ Paul mu chishimushimu umekeshin yom yisatu yikwikalaku mu chisu chimwing mwi ngand yisu (1) Paradis ukwikala pa divu, (2) paradis wa mu spiritu, ukwikala mujim nakash kusutamu paradis wa mu spiritu udiaku katat, ni (3) “paradis wa Nzamb” udia mwiur.
it-1-F p. 753 par. 5
Kususujan
“Kususujan Kutumbila.” In Kristu a kusambish akijanang nich “kususujan kutumbila” (Ro 16:16; 1Ko 16:20; 2Ko 13:12; 1Tes 5:26) ap “kususujan kwa rukat” (1Pi 5:14), chimeken anch asalang pamwing ap mwamu pakach pa antu a mujimbu umwing. Mutapu winou wa kulangwishijan wa in Kristu a kusambish ufanaken ni chaku cha kulangwishijan cha in Hebereu alangwishijanang nich kususujan. Ap anch Mifund yilejenap yom yivud piur pa mulong winou, “kususujan kutumbila” ap “kususujan kwa rukat” kwading kumekeshin chakin kamu rukat rakin ni uumwing wadinga mu chikumangen cha win Kristu.—Yh 13:34, 35.
NGOND WA 5 RUBING RA 27–2 NGOND WA 6
YOM YA USEY YIDIA MU DIZU DIA NZAMB | GALATIA 1-3
“Namukanda Patok”
w17.04 paj 25 par. 16
Ov, Ukat Kumekesh Kutentam kwa Yehova?
16 Tang Galatia 2:11-14. Pita wova wom wa antu. (Jinswir 29:25) Pita wading wij mutapu wading wiyovilay Yehova piur pa Akamichid. Pakwez, wading ukwet wom anch in Kristu in Yuda atwadinau kal ku mukand akutwish kutong nayimp pa kudiokalau ku Yerusalem anch amutan ukat kwibomb pamwing nau in Kristu Akamichid. Kambuy Paul wamwela Pita anch wading mwin rubabek. Mulong wak? Mulong Paul watesha mutapu wayilondinau Akamichid kudi Pitamu chikumangan chasadika mu Yerusalem mu muvu wa 49. (Midimu 15:12; Galatia 2:13) Mutapu ik wafanyinau kusal in Kristu Akamichid arumbukinau kudi Pita? Ov, afanyina kwilik anch yom yiney yiyipwakesh? Pita wafanyina kushadish yisend yend mulong wa kurumbuk kwend?
wp13 1/3 paj 9 par. 12
Antu Amukatina Yehova, “Kakwetip Mulong wa Kwipwakal”
12 Pita wamekesha wom wa muntu, wipwakala yisu yivud; pakwez wadandamena kwikal mwin kutentam kudi Yesu ni kudi Yehova. Chilakej, ndiy wamutuna Mwant wend pakach pa antu, kamutunap kapamp kamwing bwat, pakwez wamutuna tupamp tusatu. (Luka 22:54-62) Kupwa, Pita wakanganya kusal yom mudi mwin Kristu, ndiy wayimana antu a michid in kwitiyij mudi antu akad usey kurutu kwa in Kristu in Yuda. Pakwez, kambuy Paul wamana yom patok—wading wij anch mu chikumangen mufanyidinap kwikal katond. Chaku cha Pita chading chiyimp. Kurutu kwa kwel anch chaku cha Pita chiyipisha ukadivar, Paul wasala usu chakwel amukand Pita patok. (Gal. 2:11-14) Ov, chibud cha Pita chamukangesha kudandamen mu kubambel kwa mwom? Bwat. Ndiy walondula chiyul cha Paul, wachisadila, ni wadandamena mu kubambel.
Kukimbijol Mapit ma mu Spiritu
wp14 1/9 paj 16 par. 20-21
Kushinshaman ap Anch Kudi “Mar Nakash”
20 Ov, yidi nchik piur pa kurish kwakad kumekan? Chilakej, mutapu ik tukutwisha kurish nich kuziy? Chom chimwing chiwamp nakash chifanyidina kusal chidi kutongijokin piur pa chakupesh cha difut. Chawiy chasalay kambuy Paul. Wading kwiyov yisu yimwing mudi muntu—uyindamina. Pakwez wading wija anch Kristu kafap mulong wa antu awamp, pakwez mulong wa akayitil. Paul wading kand umwing wa pakach pa akayitil inay. Pakwez, wafunda anch: “Mutapu wa mwom unikweta katat udi mwom unatambula mulong namwitiyija Mwan a Nzamb, ndiy kamu wankata am, chad wapana mwom wend mulong wa kwingambat am.” (Gal. 2:20) Mwaning, Paul witiya mulambu wa chakupesh. Witiyija anch mulambu winou aupana mulong wendendiy amwinend.
21 Chilik chimwing—kuman mulambu wa chakupesh mudi chipan chapanay Yehova mulong weyey amwiney—kukutwish kukukwash nakash. Chinech chirumburikinap anch yom yiziyishena yikezap kwikalaku kand. Chidi chakin anch, antu amwing pakach petu akutwish kurish ni njit jakad kumekan djat ni pakeza kwez ngand yisu. Pakwez vurik anch: Antu akeza kutambul difut adi antu akudandamena pakad kuziy. Tudi piswimp nakash ni dichuku ditumbila dikeza Want wa Nzamb kuchirish chisambu ni kuyichirish awonsu ashinshamena kwikal awanyidina. Ikal ni kashinsh anch ukwandam mu Want wa Nzamb—ap anch chikwitin kusutil mu mar nakash.
it-1-F p. 940
Galatia, Mukand Kudi in
Paul washimwoka anch: “En in Galatia, udiany ayisup!,” kwikil uman umekeshina anch wading utongin piur pa muchid umwing wa antu a ku Gallic ading ashicha kurul kwa Galatia. (Gal 3:1) Pakwez, Paul wading ukat kuyikand antu amwing a yikumangen yading ndond yikweta yibachikin ya mafundish ma in Yuda pakach pau, kudi in Yuda ading akatila kutek dirumburish diau kusutil Chijil cha Moses, pa ndond pa ‘kutentam mulong wa ritiy’ kudiokila ku manswik masu. (2:15–3:14; 4:9, 10) Kukwatijan ni ulombu wa chikit, ‘chikumangen cha Galatia’ (1:2) chafundinay Paul mukand chading chibombaken nau in Yuda ni Akamichid, pakach pa antu inay, padinga Akamichid akutwal ku mukand ni Akamichid akad kutwal ku mukand, ni pading kand antu akwau a ku Celte. (Mid 13:14, 43; 16:1; Gal 5:2) Awonsu pamwing ading ayitazukin anch in Kristu a ku Galadia mulong ndond yading yishichau ading ayitazukin anch Galatia. Mukand wakabuj wafunday wading umekeshin anch Paul wading uyij nawamp antu ading ashicha mu chikunku cha kwindum cha provens wa Rom, ni kadiap kudi antu akadiay kwijik ading ading ashicha kurul, ni chimeken anch kayap kwend kwi ndond yiney.