Mareferans ma Mudimu ni Mashakamin ma In Kristu Mukand wa Chikumangan

NGOND WA 6 RUBING RA 1-7

YOM YA USEY YIDIA MU DIZU DIA NZAMB | DISAMBISHIL 44-45

“Josef Wayilikishina Anamakwend”

w15-F 1/5 p. 14-15

‘Ov, Am Nidi pa Ndond ya Nzamb?’

Josef wasabula chad mupit watay. Wayileja antu end kuyilondul anamakwend ni ayikwata ni kuyifish nich anch iy kal rupas. Patanau rupas mwi ntuku wa Benjamin, ayichirisha awonsu kudi Josef. Katat Josef wading ni mutapu kwijik yisal ya anamakwend. Yuda wading pakach pau mudi mwin kuyilondin. Wilemba chakwel ayovila riy ni kwit anch awonsu 11 ikala kwau asuk mu Idjibit. Josef wayileja anch ching Benjamin ndiy wafanyina kushal mu Idjibit mudi musuk, pakwez akwau awonsu afanyina kuchirik.—Disambishil 44:2-17.

Yuda wakula nich ushon anch: “Ndiy ushadil dia amwinend kudi makwend, ni tatukwetu umukatil.” Mazu minam mamupukuna Josef ku muchim, mulong ndiy wadinga mwan ikundj wa kusambish wa Rachel, mband wading ukatinay Jakob ni wafa pa kumuval Benjamin. Mudi tatukwend, Josef niyend wading umukatin makwend Rachel. Pamwing ap kwikal an a muntu umwing kwasala anch Benjamin akatijan nakash ni Josef.—Disambishil 35:18-20; 44:20.

Yuda wamwilembina Josef chakwel kangal Benjamin ikal musuk. Ni wipana amwinend mulong wa kwikal musuk pa ndond ya Benjamin. Kupwa wapwisha nich mazu ma runeng anch: “Ov, mutapu ik nikutwisha kuchirik kudi tatukwam anch mwan kachirikinap ni yamam? Kinikatilap kuman chom chiyimp chikamushikena tatukwam.” (Disambishil 44:18-34) Kulond kwinoku kwamekesha anch waswimpin kal. Kamekeshap kusu anch wakarumukin kal pakwez wamekesha kand mikadil yiwamp mudi ranaken, muchim wa kwipan ni riy.

Josef katwishap kand kwilam. Wafanyina kumekesh yovil yend. Wayibudisha atushalapol end awonsu pol ni wasambisha kudil ni dizu dia piur ni dizu diovakana mu chikumbu cha Farao. Kupwa wiyijikisha amwinend anch: “Am nidi Josef.” Wayibwikata anamakwend ni wayilikishina mulong wa yom yawonsu yiyimp yamusalau. (Disambishil 45:1-15) Mwamu Josef wamwimburija Yehova, ukata kulikishin kwa kwikatin. (Kuseng 86:5) Ov, niyetu tukat kusalang mwamu?

Kukimbijol Mapit ma mu Spiritu

it-1-F p. 606 par. 4-5

Kwapol Yidjal

Chading chijingidij chimwing chijikena nakash cha kumekesh runeng kudi in Yuda, pamwing nau antu a Kwingangel, nakash anch ayilej rusangu ra rufu ra mwanamakwau. Yisu yivud, chijingidij chinech chading chitin kwapul kabwik pantaliken ni dibwambu mulong wa kumekesh ntul, kadingap kamu kwapul masun mawonsu bwech mulong wa kukangany kumadjal kand.

Kapamp ka kusambish kalondinau mu Bibil piur pa chisal chinech kadi piur pa Ruben, mwan ikundj wa kusambish wa Jakob, pachirikay kutal mu dibuku mwadingay Josef ni kutan mwamwamway, wapola yidjal yend ni kulond anch: “Mwan mu dibuku mwamwamu! Ing am nikuya kwisu akwetu?” Mulong Ruben wading kabuz-ivum, ndiy wading ni chisend cha kumuking mwanchend. Pamulejau Jakob anch mwanend wafil, ndiy wapula chidjal chend ni wadjala yinzany mulong wa kutek chidil (Dis 37:29, 30, 34), pamukwatau Benjamin mudi mwij mu Idjibit, anamakwend a Josef amekesha runeng rau papulau yidjal yau.—Dis 44:13.

w04-F 15/08 p. 15 par. 15

Amukisa Pakad Mulong

¹⁵ Chom ik chikutwisha kutukwash kulik kuyilamin rukuny antu atukisina pakad mulong? Tufanyidin kuvurik anch akankuny netu a kusambish adi Satan ni ayilembil end. (Efes 6:12) Chisu chimwing antu amwing akat kutupompat kwa kwikatin, pakwez akwau ayipompatina antu a Nzamb akat kusal mwamu pakad kwijik ni mulong ayibachikin kusal mwamu kudi antu akwau. (Daniel 6:4-16; 1 Timote 1:12, 13) Yehova usotin anch ‘antu a mitapu yawonsu apanda ni kushiken kwikal ni ronganyin rakin ra uyakin.’ (1 Timote 2:4) Chawiy antu amwing ading in kutupompat pakur adi katat akadivar netu in Kristu mulong ashinshikina mwikadil wetu uwamp. (1 Pita 2:12) Chikwau kand, tukutwish kwilej dilejan kusutil chilakej cha Josef, mwan wa Jakob. Ap anch Josef wamana mar nakash mulong wa yisal ya anamakwend, pakwez ndiy kayilaminap rukuny. Mulong wak? Mulong wamana anch chikas cha Yehova chading chikat kutenchik yom mu mutapu uwamp mulong wa kuwanyish chitongijok Chend. (Disambishil 45:4-8) Chilik chimwing kand, Yehova ukutwish kulikidil mar min mawonsu madiokila ku kuburen kutentam tukutwisha kujijamen mulong wa kutumbish dijin diend.—1 Pita 4:16.

NGOND WA 6 RUBING RA 8-14

YOM YA USEY YIDIA MU DIZU DIA NZAMB | DISAMBISHIL 46-47

“Yakudia pa Chirung cha Kamungun”

w87-F 1/5 p. 15 par. 2

Kupandish Mwom pa Chirung cha Kamungun

² Mivu sambwad ya yakudia yivud yapwa ni kamungun wasambisha, mudi mwalejenay Josef—kamungun winou kadingap kwend ching mu Idjibit pakwez wading pa ‘mangand mawonsu.’ Pasambishau antu a mu Idjibit ading akweta nzal kumudidin Farao mulong wa yakudia, Farao wayileja anch: “Yangany kudi Josef, salany yawonsu yikakulejanyay.” Josef wayilandisha in Idjibit yakudia kushik ni papwila nfalang jau. Kupwa aswimpa yivam yau ku yakudia. Kwinsudiel, antu eza kumulej Josef anch: “Tulanda kwey, etu ayinetu ni divu dietu ku yakudia, mwamu twikala kusu ayinetu ni divu dietu aswik a mwant.” Chawiy Josef wamulandina Farao divu diawonsu dia in Idjibit.—Disambishil 41:53-57; 47:13-20.

kr paj 234-235 par. 11-12

Want Uwanyishin Rusot ra Nzamb pa Divu

¹¹ Kuvul kwa yom. Mangand mamen mar ma nzal ya muspiritu. Bibil watakela kubabesh anch: “Chisu chikat kwez chinikeza katum chipupu cha kamungun mwi ngand ya Isarel. Antu akez kov nzal, pakwez kiyidiap nzal ya yakudia. Akez kov impu, pakwez kiyidiap impu ya mem. Akez kov nzal ni impu ya mazu madiokila kudi [Yehova].” (Amos 8:11) Ov, anangand a Want wa Nzamb ela kuman niyawiy mar ma nzal? Yehova watakela kulejan kushalijan kukwikalaku pakach pa antwend ni pa akankuny nend anch: “Awonsu akata kwingifukwil am ni kwinziyil akez kikal nich yakudia ni ya kuna yiwanyidina, pakwez en ukez kafany nzal ni impu. Awiy akez kasangar, pakwez en ukez kovany usany.” (Isay 65:13) Ov, wamana kuwanyin kwa mazu minam?

¹² Uvud wa yakudia ya muspiritu utwinkishinau udi mudi mem ma kawit madandamedina kuvulijan. Mikand yetu yimedinga pa Bibil, yikwatinau mu makaset ni mavideo, yikumangan, yitentam ni yom yitekinau pa Internet—yawonsu pamwing yikat kuvulijan ni kusut mu mangand minam mamena nzal ya yakudia ya muspiritu. (Ezek. 47:1-12; Joel 3:18) Ov, usangaredinap pa kuman kuwanyin kwa kushilamu kwa Yehova piur pa kuvulijan kwa yom dichuku ni dichuku mu mwom wey? Ov, usadin usu chakwel udandamena kudia ku tebur wa Yehova pakad kujing?

Kukimbijol Mapit ma mu Spiritu

it-1-F p. 227 par. 16

Yisal ni Majest

Kwazuk makas pa mes ma muntu wafang kal. Pamulejau Jakob kudi Yehova anch ‘Josef ukwazuk makas mend pa mes mey’ (Dis 46:4), wading mutapu wa kumekesh anch Josef ukez kabwit mes ma Jakob anch wafa, mwan wa kusambish ndiy wafanyinang kusal mwamu. Pinap chimeken anch Yehova wamuleja Jakob anch uswan wa mwan wa kusambish wafanyina kwikal kudi Josef.—1Jnsg 5:2.

nwtsty yom ya kwilej yidia mu Mid 7:14

Antu awonsu ading 75: Stefan kajimbulap verse umwing wa mu Mifund ya Hebereu palejanay uvud wa antu a mu dijuku dia Jakob andama mu Idjibit anch wading wa antu 75. Uvud winou udiap mu mifund ya Masoret yidia mu Mifund ya Hebereu. Dis 46:26 ulondin anch: “Antu awonsu a mu dijuku dia Jakob ashikay nau mu Idjibit, wakad kuyitekaku amawenend, ading makum musamban ni musamban.” Verse 27 udandamedin kulond anch: “Kuvul kwa antu a dijuku dia Jakob eza mu Idjibit ading makum sambwad.” Pinap antu ayichindin mu mitapu yaad yishalijadina, mu uvud wa kusambish mudi antu a mash mend ni wa kaad mudi uvud wa antu awonsu andamay nend mu Idjibit. Uvud wa an a Jakob aulejen kand mu Kub 1:5 ni Kuch 10:22, ni alejen anch ading “makum sambwad ni atan.” Chimeken anch Stefan upanin uvud wa kasatu mwakad kwikal ching antu a mu dijuku dia Jakob. Antu amwing akat kutong anch mu uvud winou mudi an ni ijukur a an a Josef, Manase ni Eferayim, alejenau mu Bibil wa Septante mu buku wa Dis 46:20. Akwau akat kutong anch mu uvud winou mudi kand amawenend a Jakob, akad kujimbulau mu uvud ulejenau mu Dis 46:26. Chawiy uvud wa “makum sambwad ni atan” ukutwish kwikal uvud wa antu awonsu. Chawiy uvud winou wading wimedin pa makopi ma Mifund ya Hebereu yading mu mivu chitot ya kusambish C.C. Mu mivu yivud, in kwilej milong ya Bibil ading ij anch uvud wa “makum sambwad ni atan” wawiy wading uvud ulejenau mu Dis 46:27 ni mu Kub 1:5 mu Bibil wa Grek wa Septante. Chikwau kand, mu mivu ya 1950, ajingunina mivungur yaad ya mu Karung Musuz ya Kub 1:5 mu Hebereu ni yading ni uvud wa “makum sambwand ni atan.” Chimeken anch uvud walejanay Stefan wading wimedin pa mifund yiney ya pasak. Ap anch chitongijok chinech chidi chakin, uvud ulejenay Stefan wading umekeshin kwau mutapu ushalijadina wa kuchind uvud wawonsu wa an awonsu Jakob.

NGOND WA 6 RUBING RA 15-21

YOM YA USEY YIDIA MU DIZU DIA NZAMB | DISAMBISHIL 48-50

“Antu Apamina kal Akutwish Kutufundish Yom Yiwamp”

it-1-F p. 1228 par. 8

Jakob

Kurutu kwa kufa, Jakob wayiyukisha ijukurend, an amakundj a Josef, ni kusutil umutakel wa Nzamb, wamuteka Eferayim, wadinga mwan mukemp, kurutu kwa yayend Manase. Kupwa wamuleja Josef, wafanyina kutambul uswan wa mwan wa kusambish tupamp twaad anch: “Am nakwinkish kal . . . ndond yimwing yipandakenamu ya anamakwey. Ndond yiney yawiy yinatambula pinayipandakana in Amor kwi mpak yam ya musamun, ni ku ut wam wa nseu.” (Dis 48:1-22; 1Jnsg 5:1) Mulong Jakob walanda ngand yiney mu chisambu kudi an amakundj enday Amor, ndond yadinga piswimp ni Sikem (Dis 33:19, 20), chimeken anch kukan kwinoku kwamukanau Josef kudi Jakob kwading kumekeshin ritiy ra Jakob, walonday mazu ma uprofet piur pa kukwat ngand ya Kanan kudi anend mudi mading masadikin kal kusutil mpak yend ya musamun ni ut wa nseu. (Tal AMORITE.) Yikunku yiney yaad ya uswan wa ngand yakwatau yading ya Josef afanyina kuyipan ku muchid wa Eferayim ni wa Manase.

it-1-F p. 623 par. 1

Machuku ma Nsudiel

Uprofet walonday Jakob kurutu kwa kufa. Chisu chayilejay Jakob anend anch: “Kumanganany en ayinen pamwing, chakwel nikulejany yom yikeza kushik kudi en mu machuku makez keza” ap “mu machuku ma nsudiel” (AT), wading ukat kurumburil chisu chikuwanyina mazu minam mu machuku ma kurutu. (Dis 49:1) Kurutu kwa mivu yitot yaad, Yehova wamuleja Abram (Aburaham) ngakend a Jakob anch mbut yend yikez kaman mar mu mivu 400. (Dis 15:13) Chawiy pa mulong winou, chisu cha kurutu chatazukay Jakob anch “machuku makez keza” mafanyina kusambish kupwa kwa mivu 400 ya kuman mar. (Mulong wa kwijik yom yivud piur Disambishil 49, tal mitu ya mulong yisambidina piur pa an a Jakob kukwatijan ni majin mau.) Mazu minam mafanyina kand kuwanyin mu machuku ma kurutu piur pa ‘Isarel wa Nzamb.’—Gal 6:16; Ro 9:6.

w07 1/6 paj 30 par. 10

Amapal—Chiyukish Cha Ansand

¹⁰ Amapal akutwish kand kwikal chibachikin chiwamp kudi ambay akaritiy. Josef mwan wa Yakob wasala chisal chimwing cha ritiy mu upal wend chikweta usu nakash pa mamiliyon ma in kwifukwil akin ikalaku kwinyim kwend. Wadinga nich mivu 110 “wayileja . . . mutapu wa kusend mafup mend,” pakampwil, pakezau in Isarel kubudik mu Idjibit, akez kusend mafup mend. (Hebreu 11:22; Disambishil 50:25) Mbil yiney yadinga mudi chijingidij cha ruchingej kudi in Isarel mu mivu yivud ya uyong wa mar makash wikalaku kwinyim kwa rufu ra Josef, wapana kashinsh anch kukolik kwau kukez kwez.

Kukimbijol Mapit ma mu Spiritu

w04-F 1/6 p. 15 par. 4-5

Ayuk Kwau Antu Akata Kumwinkish Nzamb Uyaj

⁴ Kurutu kwa in Isarel kwandam mwi ngand ya kushilamu, antu a muchid wa Gad ita mbil chakwel ashakama mwi ngand yikutwishau kulamin annam yadinga kwingangel kwa Yordan. (Kuchind Michid 32:1-5) Kushakamin kwinakwa kwafanyina kuyiletin milong yivud nakash. Michid yading yishicha kurand yading mu diking mulong wa Nkurubuk ya Yordan—yading mudi chikangesh chikangeshina amasalay kwandam. (Joshua 3:13-17) Pakwez, piur pa ngand yadinga kwingangel kwa Yordan, tutangin mu Géographie historique de la Terre sainte (mu Inglish) wafundau kudi George Adam Smith anch: “[Yading] yishikin kamu djat ni ku mukandu wa Arabi. Chawiy, antu a ndond jindj ezang kubuu ngand yiney mulong wa nzal, ni amwing ayibuwang muvu ni muvu mulong wa kudishilamu yivam yau.”

⁵ Muchid wa Gad wafanyina kurish mutapu ik ni ubaj winou wa chisu chawonsu? Yitot ya mivu kurutu, ngakau Jakob walonda mazu ma uprofet chisu chadingay pifil anch: “Gad akez kamukumangen kudi antu in kusheshan, pakwez ndiy ukez kayopat ni kuyichany ku tupolantundu twau.” (Disambishil 49:19) Cha kusambish mazu minam mading mameken mudi ma ushon. Pakwez mu win kashinsh, mafanyina kuyinkish in muchid wa Gad mbil ya kurishish niyau. Jakob wayinka kashinsh anch ang ayirishikish kudi akankuny nau, afanyina kuwin, kuyovish usany ni kudandamen kuyilondul ndjat ni mwi ngand yau.

it-1-F p. 299 par. 7

Benjamin

Ukaliweny wa kurish njit wa antu a muchid wa Benjamin aulejana kudi Jakob kurutu kwa rufu rend palonday piur pa mwanend mukatish anch: “Benjamin udi kangol ukata kufa nzal, pamanch ukat kudia mbij ja kuzanon, ni urel ukat kwaurol yishadilap.” (Dis 49:27) In kurish njit a muchid wa Benjamin ading ijiken mulong wa ukaliweny wau wa kwas nseu nawamp nich chikas cha kamaku ap cha katatuku ni asang chom chikimbinau “ku ruswich rumwing wakad kurez.” (Ank 20:16; 1Jnsg 12:2) Nkalasambu Ehud, wasadinang chikas cha kamaku, wamujipa mwant muyimp Egilon, wading wa muchid wa Benjamin. (Ank 3:15-21) Chimeken kand anch pading “pamanch,” ap anch kwisambishil kwa want wa Isarel pawiy pabudishay muchid wa Benjamin, ap anch wading “muchid upandakena kukemp,” mwant wa kusambish wa Isarel, Saul mwan ikundj wa Kis, wikala mwin kuyirishikish in Filistin njit. (1Sam 9:15-17, 21) Chilik chimwing, chading chisu cha “urel,” mu muchid wa Isarel, dijuku dia Benjamin diawiy diabudisha Mwant Mband Ester ni ministre wa kusambish Maridoke, awiy asadinau mulong wa kuyipandish in Isarel akimbau kushesh mu Want wa in Peris.—Est 2:5-7.

NGOND WA 6 RUBING RA 22-28

YOM YA USEY YIDIA MU DIZU DIA NZAMB | KUBUDIK 1-3

“Am Nikez Kwikal Chinitondina Kwikal”

wp13 1/3 paj 28 par. 4

Limishany Dijin Dijim dia Yehova

⁴ Tang Kubudik 3:10-15. Pawanyishay Moses mivu 80, Nzamb wamwinkisha chijil chinech chikash anch: “Ey ukez kuyidiosh antwam, awiy kamu in Isarel adia mu Idjibit.” Moses wamwakula nich kalimish kusutil ku chipul chimwing cha usey nakash. Chaad, Moses wamwipula anch: ‘Dijin diey nany?’ Mulong dijin dia Nzamb diading dijikena kudiosh pasak, pisu padinga pimedina chipul cha Moses? Chimeken patok anch, ndiy wasota kwijik yom yivud piur pa untu wend wamekesay kusutil ku dijin diend—yom yafanyidina kuyikasikesh antu a Nzamb anch ndiy ukez kuyipandish chakin kamu. Chitongijok cha Moses chading cha usey, mulong pa chisu chimwing, in Isarel adinga mu uswik. Awiy asambisha kwiyipul anch Nzamb wa angakau wela kutwish kuyipandish. Kupwa kand, in Isarel amwing asambisha ap kuyifukwil anzamb a in Idjibit!—Ezek. 20:7, 8.

kr paj 43, mushet

KURUMBURIK KWA DIJIN DIA NZAMB

DIJIN Yehova didiokil ku dizu dia Hebereu dirumburikin “Kwikadish.” In kwilej amwing amana anch dizu dined adifunda mu mutapu wa kulejan anch yom yidandamedin kusalik. Chawiy lel antu avud ij anch dijin dia Nzamb dirumburikin anch “Ndiy Ukata Kwikadish.” Dizu dined dimekeshin mudimu wa Yehova mudi Sakatang. Ndiy watanga maur ni yitangil yawonsu yikweta manangu ni udandamedin kusal anch rusot ni rutong rend rikala rakin.

Katat, mutapu ik tufanyidina kutesh chakul chapanay Yehova ku chipul cha Moses mu Kubudik 3:13, 14? Moses wamwipula anch: “Anch naya kudi in Isarel nakayilej anch: Nzamb wa atatukwen wantum kal kudi en! Awiy anch angipul anch: Dijin diend nany? Ov, am nikez kuyakul nchik?” Yehova wamwakula anch: “AM NIDI MUDI NIDIA.”

Chimeken anch Moses kamwitap Yehova anch amuleja dijin diend. Moses ni in Isarel ading ij kal dijin dia Nzamb nawamp. Moses wasota anch Yehova amekesha chom chimwing chikash piur pa untu wend, chom chimwing chela kumeken kusutil ku kurumburik kwa dijin diend. Chawiy lel, pamwakulay anch, “AM NIDI MUDI NIDIA,” Yehova wamekesha chom chimwing chamushena piur pa untu wend: Mu mwikadil ni mwikadil, ndiy wikala chom chawonsu chisotinay mulong wa kuwanyish rusot rend. Chilakej, kudi Mose ni kudi in Isarel, Yehova wikala Mupandish, Mwin Kupan Yijil, ni Mwin Kupan—ni wasala kand yom yivud. Chawiy lel, Yehova wikala chom chawonsu chasotay kwikal mulong wa kuwanyish rusot rend kudi antwend. Mulong mu dijin dia Yehova mukutwish kwikal chitongijok chinech, ndiy ukutwish kusal yawonsu yisotinay kusal. Mudi kand yom yisadinay mu chitang chend chakwel kwikal mu kuwanyish kwa rutong rend.

Kukimbijol Mapit ma mu Spiritu

g04-F 8/4 p. 6 par. 4

Ov, Moses Wading Muntu Wakin Anch Ngany Kwau?

Pakwez, ov, choviken kutong anch mwan mband wa mwant wa in Idjibit ndiy wamulila mwan winou? Bwat, mulong relijon wa in Idjibit wafundishang anch chitin kusal yom yiwamp mulong wa kuya mwiur. Piur pa kulil mwan wayen, mwin kukimbijol yom ya pansh Joyce Tyldesley ulondin anch: “Amband in Idjibit atwisha kwilikan nau amakundj in Idjibit. Amband inay ading ni mbil yimwing pa milong ya mbur matad ap ya kwisak, yasadikangap kwau mwamu, ching kwau mu kulond, ni . . . alilang an ayen.” Mushij umwing ukur ulejen piur pa mband umwing mwin Idjibit wayilila an atubindj. Piur pa mutapu wamutondau mband mwin kumulil Moses, ndinguril umwing (The Anchor Bible Dictionary) ulondin anch: “Mutapu wamutondau makwend wamuvala Moses mulong wa kumwamwish . . . utanijadin ni mutapu wa kulil an ayen wasalangau in Mesopotamiy.”

w04-F 15/3 p. 24 par. 4

Manans Majim ma Buku wa Kubudik

3:1—Ov, Jetro wading mwin kupesh wa mutapu ik? Pa chisu cha anshankur, ntakel wa dijuku ndiy wading mwin kupesh wa dijuku diend. Chimeken anch Jetro wading ntakel wa muchid wa in Madian. Mulong in Madian ading an a Aburaham kusutil mukajend Ketura, pamwing ap amwifukwilang Yehova.—Disambishil 25:1, 2.

NGOND WA 6 RUBING RA 29–5 NGOND WA 7

YOM YA USEY YIDIA MU DIZU DIA NZAMB | KUBUDIK 4-5

“Nikwikal Ney pa Chisu Ukulonda”

w10-F 15/10 p. 13-14 par. 5

Mutapu ik Umeningay Yehova Kwiyingish Nich?

“Nikutwishap kwam.” Ukutwish kwiyov anch uwanyidinap kwey mulong wa kwikal mwin kulejan rusangu ruwamp. Atushalapol amwing ashinshamena a Yehova a pasak iyova anch kakutwishap kuwanyish yisend yayinkau kudi Yehova. Tal bil chilakej cha Moses. Pamwinkishau chisend cha pakampwil kudi Yehova, Moses walonda anch: “A! [Yehova], nlikishina amboku! Am kinidiap mwin kulond swa, ap pasak, ap katat chiulondila kudi am kashalapol wey. Am nikat kulond pakemp pakemp ni rudim ram rilimin.” Ap anch Yehova wamuleja nich kashinsh, Moses wamwakula anch: “A! [Yehova], nakwilembil amboku, mutumap muntu mukwau.” (Kub. 4:10-13) Mutapu ik wakulay Yehova?

wp14 1/4 paj 13 par. 5-6

Ov, Umumen “Wakad Kumekanang ku Mes”?

⁵ Kurutu kwa Moses kuchirik mu Idjibit, Nzamb wamufundisha chany chimwing cha pakampwil, chany chinech chawiy chafunday kand Moses mu mukand wa Job anch: “Kumwov Nsalejey wom—mawiy manangu.” (Job 28:28) Mulong wa kumukwash Moses ku wom winou ni kwikal ni manangu, Yehova wamekesha kushalijan kudiaku pakach pa antu ni Nzamb wa Dikand Diawonsu. Yehova wamwipula anch: “Ov, nany watanga kan ka muntu? Nany wamutanga kamam, ap kajika matu, ap mwin kuman, ap mputames? Kiyamap, [Yehova]?”—Kub. 4:11.

⁶ Ov, dilejan ik ditwilejidina ku yom yiney? Moses kafanyinap kwov wom. Yehova ndiy wamutuma, wading ukwet kuswir kwa kumwink Moses yawonsu yading yitwishikina mulong wa kutwal uruu wa Nzamb kudiay Farao. Ku mutambu ukwau, Farao niyend kadingap ukwet usu kurutu kwa Yehova. Chikwau kand, kadingap kapamp ka kusambish kudi atushalapol a Nzamb kuwil mu ubaj mu winyikel wa in Idjibit. Pamwing ap Moses wading kutongijokin piur pa mutapu wamulamay Yehova: Aburaham, Josef, ni Moses mwin mu umutakel wa Farao mukur. (Dis. 12:17-19; 41:14, 39-41; Kub. 1:22–2:10) Patekay ritiy mudiay Yehova, “wakad kumekanang ku mes,” Moses waya ni usu kudiay Farao mulong wa kumulej mazu mawonsu mamulejay Yehova kulond.

w10-F 15/10 p. 14

Mutapu ik Umeningay Yehova Kwiyingish Nich?

Yehova kamutambulap Moses chisend chamwinkishay. Pakwez, Yehova wamutonda Aron chakwel amukwasha Moses kuwanyish chisend chinech. (Kub. 4:14-17) Kupwa, mu mivu yalondulaku, Yehova wamukwasha Moses ni wamwinkisha yom yawonsu yading yiswirikedinay mulong wa kuwanyish chisend chamwinkishau kudi Nzamb. Chilik chimwing nlel, ukutwish kwikal nich kashinsh anch Yehova ukutwish kuyisadin ambay ney in Kristu akweta ronganyin mulong wa kukukwash niyey kusal mudimu wa kulejan. Chidia cha usey nakash, Dizu dia Nzamb ditwinkishin kashinsh anch Yehova ukutwish kutwikadish in kusal mudimu awamp.—2 Kor. 3:5; tal mushet ‘ Les années les plus heureuses de ma vie. ’

Kukimbijol Mapit ma mu Spiritu

w04-F 15/3 p. 28 par. 4

Yipul ya in Kutang

Mazu malonday Sefora anch “ey udi ngatan wa ku mash kudi am” madi mazu makad kusadinangau nakash. Mazu minam malejen ik piur pa Sefora? Palimishay mbil jidia mu chijil piur pa kutwalan ku mukand, Sefora wamekesha anch wading wij kwikalaku kwa mansuk masukay Yehova ni Isarel. Mansuk ma Chijil masukau in Isarel mamekesha anch mulong adi mu urund wa mansuk minam, afanyina kumuman Yehova mudi ngatan ni awiy ading mudi ngachik. (Jeremiy 31:32) Chawiy, pamulejay Yehova (kusutil mwangel wend) anch udi “ngatan wa ku mash,” Sefora wamekesha anch uziyidin ku yijil ya mansuk. Chidi mudi ndiy witiyija kwikal ngachik wa mansuk ma kutwalan ku mukand ni Yehova Nzamb wading mudi ngatan. Chikalap nchik mwamu, mulong waziyina kwi mbil ja Nzamb, wapandisha mwom wa mwanend ikundj.

it-1-F p. 1257 par. 3

Yehova

“Kwijik” kurumburikinap kamu kwau kwitiyij kwikalaku kwa chom kanang ap kwa muntu kanang. Mbwambol Nabal wading wij dijin dia David pakwez wipula anch: “Ov, David winou wachad nany?” chidi mudi wakimba kwipul anch: “Ov, David udi nany?” (1Sam 25:9-11; ilikej 2Sam 8:13.) Chilik chimwing kand, Farao niyend wamwipula Moses anch: “[Yehova] udi nany unikutwisha am kwitiy dizu diend, ing niyilikishaku in Isarel kuya? Am kinimwijap [Yehova]! Ni chikwau kand, kinikutwishap kuyilikaku in Isarel kuya.” (Kub 5:1, 2) Palonday mazu minam, Farao wamekesha kamu anch kadingap kamumena Yehova mudi Nzamb wakin ni Nzamb kadingap ni ulabu pa mwant wa Idjibit ni milong yend, ni kadingap ni dikand mulong wa kuwanyish rusot Rend mudi mwarilejenau kudi Moses ni Aron. Pakwez katat, Farao ni in Idjibit awonsu, kuwejinaku kand in Isarel afanyina kwijik chakin chirumburikina dijin dined ap kumwijik mwin dijin dined. Mudi mutapu wamurumburilau Moses kudi Yehova, afanyina kwijik yom yiney chisu chawanyishay Nzamb rusot rend padi in Isarel, kusutil kuyikwol, kuyandjik mwi Ngand ya Kushilam mulong wa kuwanyish mansuk masukay Yehova nau angakiril au. Mu mutapu winou, mudi mwalonday Nzamb, ‘awiy akez kwijik anch, am nidi Yehova Nzamb wen.’—Kub 6:4-8; tal TOUT-PUISSANT.