Mareferans ma Mudimu ni Mashakamin ma In Kristu Mukand wa Chikumangan
NGOND WA 8 RUBING RA 3-9
YOM YA USEY YIDIA MU DIZU DIA NZAMB | KUBUDIK 13-14
“Imanany Dang, wez Umanany Dipandish dia Yehova”
wp13 1/2 paj 4 par. 3
Moses Ikundj Mwin Ritiy Rikash
Moses chitwishikin kadingap wija anch Nzamb wading piswimp ni kwauril Karung Musuz, chawiy lel kwazuril njil ya in Isarel kuchinin. Pakwez, Moses wading nich kashinsh anch Nzamb ukusal chom kanang chakwel kuyiking antwend. Ni Moses wasota ambay nend in Isarel chakwel ikala nich kashinsh ka chilik chimwing. Tutangin anch: “Moses wayileja antu anch: ‘Kangal wovany wom, imanany dang, wez umanany dipandish dia [Yehova] mudi mukez kasalay kudi en nlel.’” (Kubudik 14:13) Ov, Moses watwisha kukasikesh ritiy ra ambay nend in Isarel? Chakin kamu, mulong Bibil ulondin kangal kusu piur pa Moses pakwez piur pa in Isarel awonsu anch: “Ku ritiy in Isarel auka pansh pa Karung Usuz mudi endil kwau pansh paumina.” (Hebereu 11:29) Ritiy ra Moses ramukwashap kangal kusu amwinend pakwez antu awonsu ilejina manangu ma kutek ritiy mudiay Yehova.
Udi Mwin Dikand Diawonsu Pakwez Ukat Kubangin
13 Tang Kubudik 14:19-22. Tong bil mudi udi pamwing nau in Isarel. Udiany mu ubaj. Amasalay in Idjibit adi kwinyim kwen ni Karung Musuz udi kurutu kwen. Kupwa Nzamb wasal kal chom chikash. Dinguj dia didj didia kurutu kwen diashemunik kal diachirik kwinyim, dikal kal pakach penen nau in Idjibit. Katat awiy adi mu mididim, chad en udiany mu chitokish chiwamp nakash! Kupwa umen mutapu utandjekinay Moses chikas chend pa karung, ni rinkind mukash udiokila kwingangel, wabaril kal njil yijim djat ni ushad ukwau wa karung. Chawiy ey, dijuku diey ni yivam yey, en awonsu wendidinany mu ulal wa karung mu mutapu uwamp pamwing nau antu akwau awonsu. Chad ukat kushimwok nakash mulong divu dibwatatinap ni disidinap. Diumin ni dikasiken, chawiy chiswapel kwendinap. Mudi chibudikin, ap antu endina pakemp nakash atwishin kushik nawamp ushad ukwau.
w09-F 15/3 p. 7 par. 2, 3
Kangal Wamuvuramenany Yehova
Pading parishinau in Idjibit ni matemb mau majamanga kal, in Isarel awonsu ading awukang kal uchad ukwau wa kwingangel. Moses watandjeka chad chikas chend pa Karung Musunz. Ni Yehova wabombakesha mbumb ja mem jading jisadina njil mu karung. Maton mavud ma mem mamubwika Farao ni amasalay end. Kwikil mukankuny ap umwing wapanda. In Isarel iyova pee!—Kub. 14:26-28; Kus. 136:13-15.
Rusangu riner raletisha wom nakash ku michid yading kuns. (Kub. 15:14-16) Kupwa kwa mivu makum manying, Rahab wa ku Yeriko wayileja in Isarel aad anch: “Tukwet wom wenen . . . mulong twatesha mudi mwaurilay [Yehova] mem ma Karung Musuz kurutu kwen piwadiokalanya mwi ngand ya Idjibit.” (Jos. 2:9, 10) Michid ya apagan yavuramenap mutapu wapandishay Yehova antu end. Chakin kamu, in Isarel niyau kafanyinap kuvuramen yom yiney ap pakemp.
Kukimbijol Mapit ma mu Spiritu
it-1-F p. 1015 par. 6
Njil Yijim, Balibal
Kudiosh pakur nakash, jinjil jijim ni mabalibal kuwejinaku ni tujil tukwau twa in kwisak twabombakeshang misumb ni mant mwi ngand ya Palestin. (Kuch 20:17-19; 21:21, 22; 22:5, 21-23; Jos 2:22; Ank 21:19; 1Sam 6:9, 12; 13:17, 18; tal ROUTE DU ROI.) Njil yading yimenau mudi yijim yadiokalang ku Idjibit kuya ku misumb ya Filistin wa ku Gaza ni ku Askalon ni yayangany pakemp pakemp ku mutambu wa kwiyand ni kwingangel kudia Megido. Yadandamena kuya kushik ni ku Hasor, udia kwiyand kwa Karung wa Galalia ni kupwa yashikang ku Damas. Njil yiney yasutinang mwi ngand ya Filistin yawiy yading njil yiswimp yidiokila mu Idjibit kutwal mwi Ngand ya Kushilamu. Pakwez mulong wa kuwap kwend kwa muchim, Yehova wayitwadina in Isarel mwi njil yikwau chakwel kangal aziya mulong wa kuyirishikish kudi in Filistin.—Kub 13:17.
it-1-F p. 848 par. 4-5
Kubudik
Ndond ik yaurikina Karung Musunz chakwel in Isarel asuta?
Chifanyidin kwijik anch kupwa kwa kushik pa ndond ya kaad yapiminau mu weny wau ku Etam udia “kuns kwa mpay,” Nzamb wamuleja Moses anch “yileja in Isarel achirika, atekil chibeng ku Pihahirot . . . ku chikum cha karung.” Kwend mu mutapu winou kwafanyina kumubachik Farao kutong anch in Isarel “ashadik kal.” (Kub 13:20; 14:1-3) In kwilej milong ya Bibil atongina anch njil ya el Hadj yading yiwamp alejen anch dizu dia Hebereu dikarumwinau anch “kuchirik” dioviken kamu nawamp ni dirumburikinap “kusenguril” ap “kwendin kuns,” pakwez dirumburikin kamu kuchirik kwinyim ni kuswimp njil. Kukwatijan ni in kwilej inay, chimeken anch kupwa kwa kushik Kwiyand kwa musong wa Nkurubuk ya Suez, in Isarel achirika ni eza ashik ku mutambu wa Kwingangel kwa Djebel ‘Ataqa, mikandu yivud yilongina Kurand kwa Nkurubuk. Anch ayilondula Kwiyand, rumb ra antu mudi mwadingau in Isarel kafanyinap kuman mutapu wa kukwasinik mwi ndond yinaya, afanyina kwiman ndond yimwing mulong karung wading uyijikidin njil.
Yishankur ya in Yuda a mu mivu chitot ya kusambish C.C niyau yilejen yom ya mutapu umwing. (Tal PIHAHIROTH.) Pakwez chom cha usey nakash chidi anch Bibil niyend ulejen yom mutapu winou, yishalijadina ni yitongijok yipalangeshinau kudi in kwilej milong ya Bibil. (Kub 14:9-16) Chimeken patok anch in Isarel asutina kulemp ni nsudiel ya Nkurubuk (ap kwiyand kwa Karung Musunz) chakwel amasalay a Farao akanganya kunyimburik Nkurubuk ni kushik swa ushad ukwau wadingau in Isarel.—Kub 14:22, 23.
NGOND WA 8 RUBING RA 10-16
YOM YA USEY YIDIA MU DIZU DIA NZAMB | KUBUDIK 15-16
“Mushimanany Yehova Nich Miminy”
w95-F 15/10 p. 11 par. 11
Mulong wak Tufanyidin Kumwov Nzamb Wakin Wom Kusambish Katat?
11 Kusutil kushesh yisak ya amasalay ya in Idjibit, Yehova witumbisha ku mes ma atushalapol end ni wijikisha dijin diend kulemp nakash. (Joshua 2:9, 10; 4:23, 24) Mwaning, dijin diend dikala piur nakash pa anzamb a makasu a in Idjibit, amekesha anch kakwetap usu wa kuyikamunin antu ayifukwilang. Kuyichingejin anzamb au, kumuchingejin muntu ukata kufa ni kuyichingejin amasalay kwayinenganesha nakash in Idjibit. (Kuseng 146:3) Chinech chawiy chasala anch in Isarel awanga miminy ya kushiman yamekesha anch ading amwovil Nzamb mwom wom, ndiy ukata kuyikamunin antu end mu mutapu ushimwokishena!
w95-F 15/10 p. 11-12 par. 15-16
Mulong wak Tufanyidin Kumwov Nzamb Wakin Wom Kusambish Katat?
15 Anch twading pinapa ni Moses, twafanyina niyetu kwov ja kuwang anch: ‘Nany udia mudi ey, A! Yehova, pakach pa anzamb? Ov, nany udia mudi ey, mu ukaleng wa kutumb kwey, ukweta midimu ya uyaj yikata kulet wom ni yishimokishena.’ (Kubudik 15:11) Mu kusut kwa mivu, yovil yamekeshau mu miminy winou adandamena kuyichirokin. Mu mukand wa nsudiel wa Bibil, kambuy Yohan ulondin piur pa chisak cha atushalapol ashinshamena azizidilau many a Nzamb anch “ading ni kuwang muminy wa Moses, kashalapol wa Nzamb, ni muminy wa Mwan a Mukoku.” Muminy winou ujim ulondin piur pa yom ik? “[Yehova] Nzamb Mwin Dikand Diawonsu, yisalijok yey yidi yijim yikwamushena! Ey udi Mwant wa michid yawonsu, jinjil jey jidi jakin jitentamina. A! [Yehova]! Ov, nany wakad kukwov ey wom? Ov, nany wakad kupan uyaj ku dijin diey?”—Kujingunik 15:2-4.
16 Chilik chimwing nlel, Yehova ukwet atushalapol end akwodilay kal akata kusanger yom yatangay, midimu ya makas ma Nzamb, ni akatina kand yijil yend. Antu a michid yawonsu ayikwodil kal mu spiritu, ayauril kal ni mangand mikisina mulong itiyin ni asadidin yijil yitentamina ya Nzamb. Muvu ni muvu, antu avud akat kudiokal mu mangand minam mayimp mulong wa kwez mu dirijek dishitwila ni ditentamina mudiau atushalapol a Yehova. Piswimp ap, kupwa kwa Nzamb kurumburish relijon wa makasu ni mangand mayimp, atushalapol end akushakam chikupu mwi ngand yisu yitentamina.
it-2-F p. 360 par. 6
Mizik
Miminy yivud yawangangau mu chisak mu Isarel yading pamwing ap ya kwambulijan, kwawiy kulond anch yisak yaad ya in kuwang yawangang kwa kuswimpijan muminy umwing, ap kand muntu umwing wawangang amwinend ni antu akwau amwakulang. Yawiy yitazukinau pamwing ap mu Mifund anch ‘kwakul.’ (Kub 15:21; 1Sam 18:6, 7) Mutapu winou wa kuwang aulejen kand mu mitapu yafundau mikand yimwing ya kuseng, mudi Kuseng 136. Yom yilejenau piur pa yisak yaad ya in kuwang awanga mulong wa kumujikitish Nzamb a pa chisu cha Nehemiy ni mutapu wawangau pa chisu cha kupan rubumbu ra Yerusalem, yimekeshin anch awanga mu mutapu winou.—Neh 12:31, 38, 40-42; tal CHANT.
it-2-F p. 674 par. 1
Muprofet Mband
Miriam ndiy mband wa kusambish ujimbwilau mu Bibil anch wading muprofet mband. Chakin kamu Nzamb wamwinkisha uruu kapamp kamwing ap tupamp tuvud, pamwing ap wamupepila kuwang miminy. (Kub 15:20, 21) Chawiy chinech chamubachika ndiy ni Aron kumulej Moses anch: ‘Ov, Yehova kalondap kand kudi etu?’ (Kuch 12:2) Yehova amwinend walonda kusutil muprofet Mike anch wamutuma “Moses, ni Aron ni Miriam” kurutu kwa in Isarel payibudishay mu Idjibit. (Mk 6:4) Ap anch Miriam wikala ni chisend cha kumusadin mulong wa kulejan uruu wa Nzamb, urund wadingay nich Moses ni Nzamb wading usutinamu urund winou. Chisu chalikay kulimish ndond yend, Nzamb wamukanda nakash.—Kuch 12:1-15.
Kukimbijol Mapit ma mu Spiritu
w11-F 1/9 p. 14
Ov, Wij?
Mulong wak Nzamb wayinkisha in Isarel kudia angwad chisu chadingau mwi mpay?
Kupwa kwa in Isarel kubudik mu Idjibit, Nzamb wayinkisha in Isarel tupamp twaad mbij jivud kusutil kuyitumin angwad.—Kubudik 16:13; Kuchind Michid 11:31.
Angwad adi atujil akemp akweta kulep kwa asantimetre 18 ni kulim kwa agram 100. Akat kutung yinswal mu jindond kushalijan ja mu Aziy wa kurand ni mu Erop. Mulong adi atujil akat kushemunok, pa chisu cha mashik nakash akat kwez mu Afrik wa Kwiyand ni mu Arabi. Pashemunikinau, akat kutwik mu chisak chijim mu ulal wa Karung wa Mediterane ni mu Ditung dia Sinay.
Kukwatijan ni The New Westminster Dictionary of the Bible, atujil inay akat “kutwik nawamp ni mau nakash, ni kulondul mutapu uyila rinkind; pakwez anch wapep mutambu windj, ap anch angwad aziy kutwik mulong wa weny ulemp, chisak chawonsu chikat kuwa pansh ni kukashimuk.” Kurutu kwa kudandamen ni weny wau, akat kupim pansh dichuku dimwing ap maad, ni chinech chikat kusal anch antu ayikwata swa. Kwinsambishil kwa mivu ya 1900, Idjibit walandishang mu jingand jindj mamiliyon masatu ma atujil inay muvu ni muvu.
In Isarel adia angwad inay tupamp twaad ni tupamp twinetu twaad twading mu chishipu. Ap anch angwad asutang mu teritwar wa Sinay pa chirung chinacha, Yehova ndiy wasala anch ‘rinkind atuta’ mulong wa kuyipwepul atujil inay mu chibeng cha in Isarel.—Kuchind Michid 11:31.
w06 1/2 paj 27 par. 3
Yipul ya in Kutang
Chisu chikemp kusu kwinyim kwa kukolik kwau mu Idjibit, in Isarel asambisha kununganijan mulong wa yakudia. Chawiy Yehova wayinkisha mana. (Kubudik 12:17, 18; 16:1-5) Pa chisu chinech, Moses wamwela Aron anch: “Tambul nsab, utekamu chilik cha kachimpay kamwing ka yakudia yidiokila mwiur, yiteka kurutu kwa [Yehova] kulam mulong wa majuku mey ma kurutu.” Rusang ridandamedin kulond anch: “Mudi mwamulejau Moses kudi [Yehova], chawiy Aron wateka nsab kurutu kwa Uman kumulaminaku.” (Kubudik 16:33, 34) Pakad kwidjidjek Aron wateka mana mwi nsab pa chisu chinicha, kumatek kurutu kwa Uman kwadinga mulong wa kuchingel djat pakezay Moses kusal Mushet ni kutekamu masalet.
NGOND WA 8 RUBING RA 17-23
YOM YA USEY YIDIA MU DIZU DIA NZAMB | KUBUDIK 17-18
“Amakundj Ikepishina Akat Kuyifumb Antu Akwau ni Kuyinkish Yisend”
wp13 1/2 paj 6 par. 2
Moses Ikundj Mwin Rukat
Moses wamekesha rukat mulong wa ambay nend in Isarel. Awiy ajingunina anch Yehova wading umusadidil Moses chakwel kuyitakel antu end, chawiy lel eza kudi Moses kumuletin Milong yau kushalijan. Tutangin anch: “Antu amwimanyina Moses kudiosh pamanch kushik ni urel.” (Kubudik 18:13-16) Tong bil mutapu chafanyina kumuziyish Moses mud ik kupwa kwa kuyitesh in Isarel pamulejinau dichuku diakabuj piur pa milong yau! Pakwez, Moses wadinga ni musangar wa kuyikwash antu adinga akatinay.
w03-F 1/11 p. 6 par. 2
Ruchingej Ridi ra Usey Mulong wa Kwikal ni Mwom Usangareshina
Amakundj inay amekesha mikadil yikwatijadina ni rusot ra Nzamb kurutu kwa kuyitek pa jindond jijim. Amekesha patok anch amwovil Nzamb wom; ading ni kalimish kakurikina mulong wa Sakatang ni ading ovil wom wa kumunenganesh. Chamekana patok kudi antu awonsu anch amakundj inay ading kusalang yom yikutwishau mulong wa kulimish mbil ja Nzamb. Alikang kuyikatul milamu, chinech chamekana kusutil usu wadingau nich wa kukangesh chakwel alika kuyidimb kudi antu ayikedina. Kayipishap ruchingej ra antu akwau mulong wa kutaninamu kwau ayinau, kwa anamakwau ap kwa arund nau.
w02-F 15/5 p. 25 par. 5
Kujijaman Kukat Kuyitakel Antu Atentamina
Moses niyend wading wikepishin nakash ni wading wij mimbu yend. Chisu chaswelangay mulong wa kupwish milong ya antu akwau, tatuwenend Jetro wamwinkisha chiyul cha manangu anch: Pan yisend yimwing kudi amakundj akwau a kuchingejin. Mulong wading wij mimbu yend, Moses witiya nich manangu chiyul chinech. (Kubudik 18:17-26; Kuchind Michid 12:3) Muntu wija mimbu yend kakatap kwidjidjek kupan yisend yend kudi antu akwau ap kwov wom wa kushadish usu ukwetay mu kwangan midimu ni antu akutwisha kuyisal nawamp. (Kuchind Michid 11:16, 17, 26-29) Pakwez, ukatining kuyikwash chakwel aya kurutu mu spiritu. (1 Timote 4:15) Ov, kafanyidinap kulond mwamu piur petu?
Kukimbijol Mapit ma mu Spiritu
w16.09 paj 10-11 par. 14
“Kangal Walikumukany mu Makas”
14 Aron ni Hur amukwasha Moses kwimik makas mend chisu cha njit jarishau nau in Amalek. Nlel unou kand, tufanyidin niyetu kukimb mitapu ya kuyikwash antu akwau. Akadivar amwing amen mar mulong wa upal wau, mayej, kuyizengol kud anamakwau, ad an anshon ap afishin kal muntu ukatinau. Tukutwish kand kuyikasikesh ansand arishina yisu yivud mulong wa kusal yom yiyimp ap akimbina kwikal ni katumb ka mangand minam. (1 Tesalonik 3:1-3; 5:11, 14) Sal usu wa kuyisanger antu ku Chot cha Want, mu mudimu wa kulejan, kudia nau pamwing ap kwambamb nau ku telefon.
it-1-F p. 395 par. 1
Mikand ya Bibil Yapepilau
Anch mifund ya Moses yadiokala kudi Nzamb, kwawiy kulond anch ayipepila kudi Nzamb ni yikat kulet umutakel uwamp mu difukwil dishitwila, chinech chimeken mwamu kusutil uman udia mu mikand yiney. Moses kikalap kalal ni ntakel wa muchid wa Isarel ku rusot rend amwinend; kwisambishil, walika bil chisend chinech. (Kub 3:10, 11; 4:10-14) Pakwez Nzamb ndiy wamukasikesha ni kumwinkish usu wa kusal yilay yamanau ni in kupesh a Farao anch Moses wasala yom yiney ku usu wa Nzamb. (Kub 4:1-9; 8:16-19) Moses kadingap ni impu nakash ya kwikal mwin kulond ni mwin kufund. Pakwez chidi mulong wa kuziyin kwi mbil ja Nzamb ni chidi mulong wa usu watambulay kusutil spiritu utumbila, yawiy yasala Moses atwisha kulond nawamp ni kufund mikand yimwing ya Bibil yapepilau.—Kub 17:14
NGOND WA 8 RUBING RA 24-30
YOM YA USEY YIDIA MU DIZU DIA NZAMB | KUBUDIK 19-20
“Mutapu Ukutadina Yijil Dikum”
w89-F 15/11 p. 5 par. 6
Yijil Dikum Yirumburikin ik Kudi ey?
Yijil yinying ya kusambish yikasikeshidin pa yisend tukweta kurutu kwa Yehova. (Chakusambish) Udi Nzamb witina kwipan ching kudi ndiy kusu. (Mateu 4:10) (Cha kaad) Antu amwifukwidina kafanyidinap kusadin yirumbidij. (1 Yohan 5:21) (Cha kasatu) Tufanyidin kusadin dijin dia Nzamb mu mutapu uwamp, uwanyidina ni wa kalimish. (Yohan 17:26; Rom 10:13) (Cha kanying) Mashakamin metu mafanyidin kwimen pa yom yitumbila. Chinech chikat kutukwash kwiswedish ap ‘kulimish sabat,’ mulong wa kwipuk mwikadil mudi wa Afaris.—Hebereu 4:9, 10.
w89-F 15/11 p. 6 par. 1-2
Yijil Dikum Yirumburikin ik Kudi ey?
(Cha katan) Anch an ayiziyin anvajau, chinech chikat kukwash ku uumwing wa dijuku ni chikat kulet yiyukish ya Yehova. Ni “chijil cha kusambish chawejauku ku kushilamu” chinech chiletin ruchingej ruwamp! Chidiap kwau ching mulong “ushakam nawamp” pakwez achiletin kand mulong wa “kulal mivu yivud pa mangand.” (Efes 6:1-3) Katat mulong tushich mu “machuku ma kwisudiel” ma mangand minam mayimp, ansand akata kuyiziyin anvajau akwet ruchingej ra kushakam chikupu.—2 Timote 3:1; Yohan 11:26.
Kuyikat amutej netu kukutukangesh kuyisadin yom yiyimp mudi (Cha musamban) kujipan, (Cha sambwad) makaj, (Cha chinan) wij ni (Cha chidivu) kuyitwambil makasu. (1 Yohan 3:10-12; Hebereu 13:4; Efes 4:28; Mateu 5:37; Jinswir 6:16-19) Chidi nchik piur pa yibachikin yetu? Chijil (Cha dikum) chijidikina kwikal ni ris chituvurishin anch Yehova utwitin anch twikala chisu chawonsu ni yibachikin yiwamp ku mes kwend.—Jinswir 21:2.
Kukimbijol Mapit ma mu Spiritu
it-2-F p. 658 par. 5-6
Mwin Kupesh
Win Kupesh wa Win Kristu. Yehova wayikana in Isarel anch ang alam mansuk mend akwikal “want wa in kupesh ni muchid utumbila” kudi ndiy. (Kub 19:6) Pakwez, win kupesh wa dijuku dia Aron wafanyina kudandamen kushik ni pakwezina win kupesh ujim nakash wasambelau kulejan. (Heb 8:4, 5) Wafanyina kudandamen kwikalaku kushik ni pakupwila mansuk ma Chijil ni kusambish mansuk masu. (Heb 7:11-14; 8:6, 7, 13) Kutazuk mulong wa kwikal in kupesh a Yehova ni kusal mu Want wend washilaumu kwading kuyitadin bil cha kusambish in Isarel, kupwa kutazuk kwinoku kwashika kand kudi Akamichid.—Mid 10:34, 35; 15:14; Ro 10:21.
In Yuda akemp ashalaku awiy amwitiya Kristu, chawiy chasala anch muchid ukanganya kulet antu akin akwikala mu want wa in kupesh ni muchid utumbila. (Ro 11:7, 20) Mulong wa kuburen kushinshaman kwau, Nzamb wayibabesha in Isarel kurutu kusutil muprofet Ozey anch: “Walikany kwingijikany am, walikany kand malejan mam. Chawiy katat niyam nakulikany kal, kinikwitiyap anen amakundj kwikal in kupesh am.” (Ozey 4:6) Chilik chimwing, Yesu niyend wayileja amakurump a in Yuda anch: “Akez kukwamukany Want wa Nzamb, akez kuupan kudi antu a muchid ukwau akata kusal mudi musotilay Nzamb.” (Mt 21:43) Mulong Yesu Kristu wading uziyidin Chijil chisu chadingay panap pansh, wading wij anch win kupesh wa dijuku dia Aron wading uchidandamedin kusal, chawiy wayilejang antu okangay musong wa mak kuya kumuman mwin kupesh ni kupan milambu yifanyidina kupan.—Mt 8:4; Mar 1:44; Lk 17:14.
w04-F 15/3 p. 27 par. 1
Manans Majim ma Buku wa Kubudik
20:5—Mutapu ik ukatay Yehova kulet ‘kadimu mulong wa kurumburik kwa atatuku’ ku majuku makeza kez? Anch muntu wawanyish mivu yimekana anch wapam kal, muntu ni muntu akutwish kumurumburish kukwatijan ni yom yisadinay ni yitongijok yend. Pakwez pasambishau in Isarel kwifukwil anzamb akwau, amana mar mu mivu yivud mulong wa yom yasalau. Ni mar minam mayikwata in Isarel ading ashinshamena, kupumbuk kwa muchid wa kabuj kwayikwashap kushal ashinshamena.
NGOND WA 8 RUBING RA 31–6 NGOND WA 9
YOM YA USEY YIDIA MU DIZU DIA NZAMB | KUBUDIK 21-22
“Ikala ni Chitongijok cha Yehova Piur pa Mwom”
it-1-F p. 553 par. 1
Kubulan
Mwin Hebereu wadinga nau aswik wading ni mbil ya kumubul musuk wend nich mutond, ikala ikundj ap mband, anch wamubwambwil ap walik kumuziyin. Chad anch wamujip ni yibul, afanyina kumupup mwant wend. Anch wadandamen kwikal mwom mu dichuku dimwing ap maad, chinech chamekesha anch mwant wend kamubulangap mulong wa kumujip. Mwant wading ni mbil ya kumupup musuk wend, mulong musuk winou wading mudi ‘nfalang jend.’ Muntu kakutwishap kamu kwend kukat kushesh yom yend ya usey mulong wa kuyishadish. Chikwau kand, anch musuk wafa kupwa kwa dichuku dimwing ap mavud, chading chikasiken kwijik anch rufu riner ridiokil ku yibul ap ku chom chikwau. Chawiy anch musuk wadandamen kwikal mwom dichuku dimwing ap maad, kamupupangap mwant wend.—Kub 21:20, 21.
Ukwatining Mwom Nich Usey Mudi Muukwatiningay Nzamb?
16 Mwom wa muntu mwawonsu udi wa usey nakash kudi Yehova. Ap wa mwan uchidia mwivum udi wa usey kudi ndiy. Mu Chijil cha Moses, anch muntu wamudjukul mband ukweta madikaj chad ndiy ap mwan wafa, Yehova wafanyina kumufish nich mudi mwin kujipan pakad kwijik. Chinech chirumburikin anch ap anch wading akisidan, mwom wa muntu wajipangau afanyina kuufut. (Tang Kubudik 21:22, 23.) Kudi Nzamb, mwan uchidia mwivum udi muntu ukweta mwom. Mulong wijik kal yom yiney, utongin anch Yehova wiyoviling nchik piur pa kudiosh madikaj? Ey utongin nchik mutapu wiyovilingay Yehova pameningay akat kujip muvu ni muvu mamiliyon ma an achidia mwivum?
w10-F 15/4 p. 29 par. 4
Yehova Ukatin Anch Twikala mu ‘Diking ni Akash’
Chijil chading chilejen kand yibau yifanyidina kupan anch nnam wa pol wasal uyimp. Anch ikwal a ngomb wamujip muntu nich miseng yend, mwin ngomb wafanyina kumujip ngomb wend mulong wa kuyiking antu akwau. Mulong kafanyinap kudia mbij jend ap kujilandish, kujip nnam winou kwading kamu kushadish kujim. Pakwez tong bil mudi anch nnam wamusal muntu nayimp ni mwin nnam walik kumulam nnam wend nawamp. Yom ik yikushikena? Anch ikwal a ngomb winou washiken kukujip muntu, afanyina kumujip nnam winou ni mwin nnam. Chijil chinech chayikwasha antu akweta annam kutong mulong wa kulik kudiul annam au.—Kub. 21:28, 29.
Kukimbijol Mapit ma mu Spiritu
wp10 1/1 paj 10 par. 4, 5
Mulong Wak Ufanyidina Kwipan Amwiney Kudiay Yehova?
4 Kwipan kwa Ukristu kudi mulong wa usey. Kupandakenamu kulemp kushilamu kwa chamwamu. Mutapu ik lel tukutwisha kutaninamu mu kwipan? Kusutil ku kwilikej, el tushinshikinany mutapu kudinga kwa usey kushilamu pakach pa antu. Chilakej chimwing chidi cha kukwat urund. Pakwel kusanger urund ni muntu, ufanyidin kwitiyij chisend cha kwikal murund. Chom chinech chitining kushilamu—ukwiyov anch ufanyidin ubangina nakash urund wey. Urund umwing ujim wisambidinau mu Bibil udi urund wenday David ni Yonatan. Asuka ni manswik ma urund. (Tang 1 Samwel 17:57; 18:1, 3, NW.) Ap anch urund wa mutapu winou wa kusuk manswik ukasiken nlel, urund uvud ukat kudandamen anch arund alam kushilamu kwau, ap anch iyov anch akwachikin umwing ni mukwau.—Jinsw. 17:17; 18:24.
5 Chijil chamwinkishau Isarel kudiay Nzamb chisambidin urund ukwau wadingau ni kukwat antu nich kushilamu. Anch musuk wakat diking dia kushal chikupu kudiay mwant wend, wadinga ufanyidina kushilamu chikupu ni mwant wend. Chijil chilondil anch: “Anch muswik walond anch: ‘Nimukatil mwant wam, ni mukajam, ni anam nalik kal kwam wan ipau,’ mwant wend kukamutwal kudi Nzamb, ukamushikij piswimp ni dinguj ap ku chibamb cha ku chis. Mwant wend ukamubuz ditu diend nich mubur, chad muswik ukez ku musadil midimu mu mivu yawonsu chikupu.”—Kub. 21:5, 6.
it-1-F p. 545 par. 4
Miseng
Mazu madia mu Kubudik 21:14 makutwish kurumburik anch ap mwin kupesh anch amufish nich anch wajipanang, afanyidin kumujip; mulong chisal cha kukwat ku miseng ya chintamb chadingap chimuchidijina muntu wajipanang kwa kwikatin.—Ilikej ni 1Ant 2:28-34.