En Anvaj, Yifundishany Anen Chakwel Ikala ni Ronganyin

Tushich mu mangand mamenau yom yidia yiwamp anch yid yiyimp ni yiyimp anch yid yiwamp. (Is 5:20) Cha ushon, antu amwing akat kusal yom yikisinay Yehova, mud mikadil yijondina ya utun. Ansand adia ku shikol ap antu akwau akutwish kusal usu wa kwandjik yitongijok yiney mu manangu ma anetu. Mutapu ik ukutwisha kusambel kuyirijek aney chakwel atwisha kupandakan yoziu mud yiney?

Yifundisha aney chakwel ikala ni ronganyin piur pa mbil ja Yehova. (Lev 18:3) Yilejang pakemp pakemp yom yilondinay Bibil piur pa yisal ya masandj kukwatijan ni mivu yikwetau. (Kuv 6:7) Iyipul anch: ‘Ov, nikat kuyifundish anam piur pa mutapu uwamp wa kumekesh rukat, usey wa kudjal nawamp ni usey wa kwijik anch antu akwau afanyidin kulimish yom yau ya ujindj? Ov, anam ij nawamp yom yifanyidinau kusal anch muntu kanang wakimb kuyilej pornografi ap anch wayilej kusal yom yikisinay Yehova?’ Anch asembel kwijik nawamp yom kurutu kwa chisu chikuyikwash kwipuk milong yivud. (Jnsw 27:12; Mul 7:12) Anch wayifundish aney, umekeshin patok anch usangaredin uswan wakwinkishau kud Yehova.—Kus 127:3.

TAL VIDEO TUNG CHIKUMBU CHIKUJIJAMANA​—MU KUYICHIDIJ ANEY KU “YOM YIYIMP,” NI KUPWA AKUL KU YIPUL YILONDWILAKU EY:

• Mulong wak anvaj amwing akat kwidjidjek kuyifundish anau piur pa yid ya ukundj ni wimband?

• Mulong wak anvaj afanyidin kuyifundish anau mu ‘kuyikand ni kuyibabesh nich malejan ma Yehova’?​—Ef 6:4

• Yom ik yapaninau kal mu dirijek dia Yehova kud anvaj mulong wa kuyikwash kuyifundish anau piur pa yid ya ukundj ni wimband?​—w19.05 paj 12, mushet

• Mulong wak ufanyidin kwambamb nau aney chisu chawonsu kurutu kwa milong kushiken?