Ikal Nich Kashinsh Anch Tukupand ku Disudiel dia Mangand

Piswimp ap Yehova kakumashimpishinap kand mangand minam muchim. Relijon wa makasu akumushesh, michid yikubombakan mulong wa kuyirishikish antu a Nzamb, ni Yehova ukuyijiyish antu ayimp ku Harmagedon. In Kristu achingedin kuman yinship yiney ya usey.

Chakin kamu, twijap yom yawonsu piur pa mar makash. Chilakej, twijap kamu nawamp nakash chisu chikusambisha mar minam. Twijap mayingishin makusadinau kud mant ma chipolitik mulong wa kushesh relijon. Twijap anch michid yikubombakana yikuyirishikish antu a Nzamb mu machuku minch ni mutapu ukusalau mwamu. Ni twijap kamu nawamp yom yikusadinay Yehova mulong wa kuyishesh antu ayimp ku Harmagedon.

Pakwez Mifund yitulejin yom yawonsu tukweta kuswir kwa kwijik mulong wa kujijamen yom yikusadika mu machuku ma kurutu nich kashinsh ni kutakaman. Chilakej, twij anch tushich kwinsudiel kwa “machuku ma kwisudiel.” (2Tm 3:1) Twij anch akez “kukepish kuvul kwa machuku” ma kusheshik kwa relijon chakwel kangal relijon wakin washeshik. (Mt 24:22) Twij anch Yehova ukuyipandish antu end. (2Pi 2:9) Ni twij anch muntu watondinay kal Yehova mulong wa kuyijip antu ayimp ni kuchidij chisak chijim ku Harmagedon utentamin ni ukwet usu nakash.—Kuj 19:11, 15, 16.

Chakin kamu yom yikusadika mu machuku ma kurutu yikuyishikij antu ku “kufa mutentu” mulong wa wom. Pakwez, kusutil kutang ni kutongijokin pa yisal ya dipandish ya Yehova ya pasak ni yom yitulejinay piur pa machuku ma kurutu, tukutwish ‘kwiman piur, ni kuzambul mes metu,’ nich kashinsh anch dipandish dietu did piswimp .—Lk 21:26, 28.