Mareferans ma Mudimu ni Mashakamin ma In Kristu Mukand wa Chikumangan
© 2023 Watch Tower Bible and Tract Society of Pennsylvania
RUBING 1-7 NGOND WA 1
YOM YA USEY YIDIA MU DIZU DIA NZAMB | JOB 32-33
Yikasikesha Antu Akweta Yakamish
it-1-F p. 724 par. 2
Elihu
Elihu kadingap ni kasolikany, ni kamubabekap muntu ap umwing. Wading wij anch amusala nich rufunfut mud Job, ni Mwin Dikand Diawonsu ndiy Sakatang wend. Kadingap ni chitonyijok cha kumwakamish Job, pakwez wambamba nend mud murund wakin ni wamujimbulang pa dijin, chom chakanganay Elifaz, Bildad, ni Sofar kusal.—Jb 32:21, 22; 33:6.
w14 1/6 paj 19 par. 8-10
Ov, Ukat Kuyiman Antu Aziyila Mutapu Uyimeningay Yehova?
8 Chilik chimwing niyetu tukutwish kwikal in riy anch twavurik anch amwing pakach pa akadivar ni anambaz netu akatish aziya mulong wa milong kushalijan yayishikena—mar ma kuburen ukash wa ku mujimbu, kushakam mu kwaurik, ap kwikal ni runeng. Tukutwish kuwil niyetu mu milong ya mutapu winou dichuku dikwau. Kurutu kwa kwandam mwi Ngand ya Kushilamu, in Isarel ading atuzwendj ni aziyina mwi ngand ya Idjibit, afanyina kuvurik anch kadingap afanyidin ‘kukasikesh michim yau’ kurutu kwa mwanamakwau wading mu mar. Yehova wayita anch amumana kazwendj mudi muntu ukweta niyend kuswir kwa ukwash.—Kuv. 15:7, 11; Lev. 25:35-38.
9 Pakwez anch kwikal dirumburish ap kulondol kanang, tufanyidin kupan ukwash wa mu spiritu kudi antu amekena anch adi mu mashakamin mayimp. (Job 33:6, 7; Mat. 7:1) Chilakej: anch mwin kwendish moto wasal akisidan ni moto chad amutwal ku rupital, ov, amingang akupakish bil kukimb chakwel ijika chom ik chamusadisha kal akisidan? Bwat kwau, akupan bil kapamp kamwing mon ufanyidina chakwel amukwasha. Mu mutapu umwing, anch mwin kwitiyij umwing waziy mulong wa milong yend amwinend, chom cha kusambish tufanyidina kusal chidi kupan ukwash wa mu spiritu.—Tang 1 Tesalonik 5:14.
10 Anch twatongijokin pa milong yamushikena kal mukadivar, tukutwish kuman mar mamenay mu mutapu windjing. Tong piur pa nambaz wajijamana ku rupompat ra mu dijuku diend mu mivu yivud. Amwing akutwish kwikal amekena ikepishina ni mudi akad usu, pakwez, ov, kamekeshap kukul kwau kwa mu spiritu ni ukash wau? Chisu chiumumena nambaz ukat kwez amwinend ni mwanend ap anend ku yikumangen, ov, utambwilap dikasikesh mulong wa ritiy rend ni kwipan kwend? Ni, ov, mulong wak ansand alamin uyakin nakash chikalap nchik yibachik yiyimp ya ku shikol? Mu win yakin twij anch antu inay amekena ang aziyin, akutwish kwikal “ampich mu ritiy” ching mudi mudiau avud a pakach petu adia mu mwikadil uwamp.—Jak. 2:5.
Chisu ik Chiwapina Kulond?
17 Ikundj wa kanying weza kumutal Job wading Elihu, mwanamakwend a Aburaham. Wading util matu chisu chading chambambinay Job nau amakundj akwau asatu. Chimeken anch wading uteshin nawamp yom yading yilondinau mulong watwisha kumekesh ranaken, pakwez wapana kand pakad rubabek yiyul yamukwasha Job kuswimp mutapu wend wa kutong. (Job 33:1, 6, 17) Chitongijok chakusambish cha Elihu chading cha kumushiman Yehova, kadiap kwishiman amwinend ap muntu mukwau. (Job 32:21, 22; 37:23, 24) Kusutil chilakej cha Elihu twilejin anch kuding chisu cha kuninet ni kutesh. (Jak. 1:19) Twilejin kand anch chisu tupanina chiyul, chitongijok chetu chakusambish chifanyidin kwikal cha kumutumbish Yehova, kadiap ayinetu bwat.
18 Tukutwish kumekesh anch tukwatin nich usey chipan cha Dizu kusutil kusadin yiyul ya Bibil piur pa chisu ni mutapu wa kulond. Salomon, Mwant mwin manangu amupepila kufund anch: ‘Dizu dikat kulondau pa chisu chiwanyidina, didi mudi mabuj ma utad wa or madia pa malong ma utad wa argent.’ (Jnsw. 25:11) Anch twatesh nawamp yom yilondinau antu akwau ni kutong kurutu kwa kulond, mazu metu makutwish kwikal mudi mabuj ma or—makweta usey ni mawamp nakash. Mwamu, ap anch twalond yom yivud ap yikemp, mazu metu makuyikasikesh antu akwau, ni tukumusangaresh Yehova. (Jnsw. 23:15; Efes 4:29) Winou udi mutapu uwamp wa kumekesh kujikitish kwetu mulong wa chipan cha dizu chidiokila kudi Nzamb!
Mapit ma mu Spiritu
w13 1/15 paj 19 par. 10
Dandamen Kusej Piswimp ni Yehova
10 Chilik chimwing, chiwapin kubangin piur pa mujimbu wetu. Pakwez tuswiridinap kusal usu wa kujindjik yom yawonsu yimekeshina kunanap kwetu. Yom yiney yikutwish kumekesh kupam, kalimish ni ufun wa mukach. Chilakej, Bibil ulejen anch: “Jinvu jitok jidi chibangul cha uyaj, akat kujimen mwinjil ya kutentam.” (Jinsw. 16:31) Wawiy mutapu utumenay Yehova, ni tufanyidin kusal usu wa kwiman mudi mutumenay. (Tang 1 Pita 3:3, 4.) Ov, chidi cha manangu kwitek ayinetu mu ubaj pakad usey ni kusal anch apasula mujimbu wetu ap kuna mwon mulong wa kuwapish mujimbu wetu? “Musangar wa [Yehova]” udi musul wa ufun wakin udiokila mukach, chikalap nchik chimbu cha mivu ap ukash wa mujimbu. (Neh. 8:10) Ching kusu mu mangand masu mwawiy tukeza kwikal ni ukash wa mujimbu wawonsu ni ufun wa usand. (Job 33:25; Isay 33:24) Chawiy lel, kumekesh manangu ni ritiy ra usey kukez kutukwash kushakam piswimp ni Yehova pitusadila usu wetu wawonsu mulong wa mikadil yetu ya katat.—1 Tim. 4:8.
RUBING RA 8-14 NGOND WA 1
YOM YA USEY YIDIA MU DIZU DIA NZAMB | JOB 34-35
Anch Yom Yiyimp Yayishiken Antu Awamp
Mikadil Ik Yikwetingay Nzamb?
Nzamb usadining chisu chawonsu yom yitentamina. Chawiy, “Nzamb udi kulemp ni kuyip, Mwin Dikand Diawonsu kakutwishap [kusal yom yiyimp]!” (Job 34:10) Kurumburish kwend kuding kutentamina, mudi mwalonday nfund a kuseng pamulejay Yehova anch: “Ey ukat kurumburishang nich kutentam.” (Kuseng 67:5) Mulong ‘Yehova ukat kutal mu muchim,’ chikasiken kumudimb ni chaku cha rubabek, ukat kushinshikin chisu chawonsu uyakin ni urumburishining chisu chawonsu nich kashinsh. (1 Samwel 16:7) Chikwau kand, umening yisal yawonsu ya kuburen kutentam ni ya mafef yisadikina pa mangand, ni ukanin anch piswimp ap “antu ayimp [akuyidiosh] mwingand.”—Jinswir 2:22.
w17.04 paj 12 par. 5
Yom ik Yikudioshau Anch Want wa Nzamb Wez?
5 Yom ik yikusalay Yehova? Katat Yehova uyinkishin antu ayimp mutapu ufanyidina kuswimp. (Isay 55:7) Ap anch mangand minam akumajiyish kurutu oku, antu inay kand kal ayirumburisha bil. Yom ik yikuyishikena antu alikina kuswimp ni akwashina mangand minam chisu chikweza mar makash? Yehova washilamu kal anch ukuyijiyish antu ayimp awonsu pa divu. (Tang Kuseng 37:10.) Nlel, antu avud akat kujindjik yom yiyimp yisadiningau, ni yisu yivud kakuyipupangap kwau. (Job 21:7, 9) Pakwez Bibil utuvurishin anch: “Nzamb ukat kuman yaku ya antu awonsu, mes mend matadil kwawonsu kuyilay muntu ni muntu. Kwikil mididim ap [ndond yijingamina] yikutwisha kuyijindjik in kusal kuyip kudi Nzamb.” (Job 34:21, 22) Chawiy kwikil mutapu ap umwing wa kumujingam Yehova. Ukat kuman yom yawonsu yisadinau antu ayimp. Kupwa kwa Armagedon, tukutwish kutal ndond yading yishichau antu ayimp, pakwez tukuyimanap. Akuyijiyish chikupu!—Kuseng 37:12-15.
Ov, Ukwitiy Anch Chom Kanang Chikukangesh Kumulondul Yesu?
19 Ov, yawiy kand yom yisadikina nlel? Mwaning. Antu avud akat kulik kutesh uruu wetu anch mulong tukatap kwiyandjik mu milong ya politik. Akatin anch tusambish kuvot nau. Pakwez etu twij anch ang twamutond mwan a muntu kwikal ntakel wetu, kwakulond twamulik kal Yehova. (1 Sam. 8:4-7) Antu akat kutong kand pamwing ap anch tufanyidin kutung mashikol, ma opital ni kusal yom yikutwisha kuyikwash antu. Akat kulik kutesh uruu wetu mulong tusadin usu wa kulejan rusangu ruwamp pa ndond pa kukimb kupwish milong yirishinau nich antu mu mangand minam nlel.
20 Yom ik tufanyidina kusal mulong wa kulam ritiy? (Tang Mateu 7:21-23.) Mudimu watushilay Yesu wawiy tufanyidina kukwat nich usey nakash. (Mat. 28:19, 20) Tufanyidinap kwipan kukimb mutapu wa kupwish milong ya mangand minam. Tuyikatin antu ni tukat kuyovil riy mulong wa milong yirishinau nich, pakwez mutapu uwamp wa kuyikwash amutej netu, ud kusutil kuyifundish piur pa Want wa Nzamb ni kuyikwash chakwel ikal arund a Yehova.
Mapit ma mu Spiritu
w17.04 paj 29 par. 3
El Muchim Wey wa Kwipan Umutumbish Yehova!
3 Nsand umwing utazukinau anch Elihu wading uteshin mambamb mading pakach pa Job nau antu asatu. Papwa mambamb, Elihu wamwipula Job piur pa Yehova anch: “Anch ey utentamin, chom ik [umwinkishina]? Ap chom ik chikwakay ku makas mey?” (Job 35:7) Elihu niyend wakimba kulond anch usu wetu tusadina mulong wa kumusadin Yehova udi wa chamwamu? Bwat. Yehova kamuyulap Elihu, mudi mwayisalay antu akwau asatu. Elihu wading ni chitongijok chishalijadina ni chawawiy. Walonda anch Yehova kakwetap kuswir anch etu tumwifukwil. Yehova uwanyishin yom yawonsu. Kwikil chom tukutwisha kusal chikutwisha kumupitish ap kumwinkish usu. Pakwez mikadil yawonsu yiwamp ap ukaliweny wawonsu tukweta yidiokil kudi Nzamb, ni ukat kushinshikin mutapu tuyisadidina yom yiney.
RUBING RA 15-21 NGOND WA 1
YOM YA USEY YIDIA MU DIZU DIA NZAMB | JOB 36-37
Ukutwish Kuchingejin mu Kushilamu kwa Nzamb kwa Mwom wa Chikupu
w15-F 1/10 p. 13 par. 1-2
Ov, Tukutwish Kwijik Chakin Kamu Anch Nzamb Ud Nany?
UCHIKUPU WA NZAMB: Bibil ufundishina anch Nzamb udiaku «kudiokal chikupu ni chikupu.» (Kuseng 90:2) Chirumburikin anch Nzamb kakwetap disambishin ni kakwikalap ni disudien. Mu kuman kwa antu, «kuvul kwa mivu yend kwikil ukutwisha kuyichind.»—Job 36:26.
Mutapu ukutaninamu: Nzamb wa shilamu kuyiyukish antu awonsu ilejina kumwij. (Yohan 17:3) Anch Nzamb amwinend kashichingap chikupu, ov, kushilamu kwinoku kwafanyina kwikal kwakin? Ching kusu ndiy udia«Mwant wa chikupu» ndiy ukutwisha kuwanyish kushilamu kwinoku. (1 Timote 1:17).
Ov, Umujikitishining Nzamb Mulong wa Yipan Yakwinkishinay Kal?
6 Mem makutwishap kwikwat mulong divu dietu aditeka pa chintamp chiwanyidina ni muten. Chawiy, anch iswimpishaku pakemp chintamp chinech ni muten, mem mawonsu mafanyina kutwik ni divu diafanyina kuswan nakash ni kuwumidin, kwafanyinap kwikal yitang yikweta mwom pa divu. Chikwau kand, anch alepishaku pakemp chintamp chidia pakach pa divu ni muten, mem mawonsu mafanyina kwikwat baa ni divu din diafanyina kwikwat baa nich maglas. Mulong Yehova wateka divu pa chintamp chiwanyidina, munyingumuku wa mem madia pa divu ukat kusal anch mwom udandamen kwikalaku. Muten ukat kuswanish mem mu aturung ni pa divu ni ukat kutwikish mem chakwel masal madj. Muvu ni muvu muten ukat kutwikish mamiliyon ni mamiliyon ma malitre ma mem. Mem minam makat kusal machuku piswimp 10 mu rinzwizu kurutu manaka mudi ruval. Kupwa mem makat kuchirik kand mu aturung ap mu atuwit akwau, ni munyigumuku ukat kusambishiril kand. Mutapu wasalay Yehova munyigumuku winou chakwel divu dikal ni mem chisu chawonsu umekeshin anch Yehova udi mwin manangu nakash ni mwin dikand.—Job 36:27, 28; Mul. 1:7.
Lam Ruchingej Rey ra Win Kristu Rikash
16 Ruchingej retu ra mwom wa chikupu chid chipan cha usey nakash chitwinkishinay Nzamb. Tuchingedin machuku ma kurutu mawamp nakash, ni tukutwish kwikal nich kashinsh anch makuwanyin. Ruchingej riner rikat kutukwash mud nkal, rikat kutukwash kujamish chakwel tutwish kujijamen yikokujol, kuzengol kukash, ni ap anch tukimbin kufa. Rid mud chiful chikata kuchidij manangu metu chakwel twipuk yom yiyimp ni tusala yom yiwamp. Ruchingej retu rimedina pa Bibil rikat kutusejish piswimp ni Nzamb ni kutukwash kuman mutapu utukatinay nakash. Tukat kutaninamu nakash anch twadandamen kulam ruchingej retu rikash.
Mapit ma mu Spiritu
it-1-F p. 503 par. 1
Nsangu
Antu ading kuswimpijan jinsangu ni yitongijok mu mitapu kushalijan, mu chisu cha pakur. Jinsangu yivud jisanbangau mwi ngand ap mu jingand ja wingendj jading kwau ja kulond. (2S 3:17, 19; Jb 37:20) In kwindangan endangananga ra pansh, alejanang jninsangu jidokila kulemp chisu chimanangau mulong wa kukimb yakudia, mem ni yom yikwau mu misumb yimanangau mulong wa kupim ku jinjil. Mulong wa diyingishin dimwing kukwatin ni Azi, Afrik ni Erop, antu avud asutinanga ku Palestin kudiokal ku jindond ja kulemp ap kuya kand ku jindond ja kulemp. Chawiy antu a mu Palestin afanyina kwipul jinsangu ja yom yisadikina ndond jindj. Akang nsangu ja ngand yau ap ja ngand yindj pa ndond ja yiku.
RUBING RA 22-28 NGOND WA 1
YOM YA USEY YIDIA MU DIZU DIA NZAMB | JOB 38-39
Ov, Ukat kwitekin Chisu cha Kushinshikin Yitang?
Ov, Ukatin Kumuchingel Yehova?
7 Bibil urumburil mutapu watangay Yehova divu anch “wateka kujimb,” wajika “mashin,” ni wateka “diyal dia pa dikonk.” (Job 38:5, 6) Witekina chisu mulong wa kushinshikin pa mudimu wend. (Dis. 1:10, 12) Ukutwish kutongin mutapu wiyovau angel pading pamenau yom yisu yading yitanginay Yehova pakemp pakemp? Asangara nakash! Mulong pamanau yom yiney, “atupula disok dia musangar.” (Job 38:7) Yom ik twilejidinaku? Midimu ya kutang ya Yehova yasenda tunan twa mivu mulong wa kuyipwish, pakwez pashinshikinay yom yawonsu yitekinay chisu cha kuyitang, wamana anch “yading yiwamp kamu.”—Dis. 1:31.
Divumbuk Dimekeshin Patok Rukat ra Nzamb, Manangu ni Kushimpish Muchim Kwend
2 Yehova wamutanga chakusambish Mwanend Yesu. Kupwa, “watanga yom yawonsu,” kuwejaku ni mamiliyon ma angel, kusutil Mwanend winou. (Kol. 1:16) Yesu wasangera nakash dilau dined dia kusal mudimu pamwing ni Tatukwend. (Jnsw. 8:30) Angel niyau asangara nakash. Ading amen mutapu wading utanginau diur ni divu kudi Yehova ni Yesu, udia mwin kusal mudimu ukweta ukaliweny. Mutapu ik wamekeshau musangar winou? ‘Abula nkash ja musangar’ chisu chatangau divu, ni pakad kwidjidjek, adandamena kubul nkash mulong wa yom yawonsu yatangay Yehova, pakampwil, patangay antu. (Job 38:7; Jnsw. 8:31) Yitang yiney yawonsu yamekesha rukat ra Yehova ni manangu mend.—Kus. 104:24; Rom 1:20.
Ileja Kumwijik Yehova Nawamp Kusutin Yitang
8 Yehova uwanyidin kumuchingejin. Yehova wamukwasha Job kumuchingejin nakash. (Job 32:2; 40:6-8) Mu mambamb mau, Yehova wamuleja yitang kushalijan mud atutumbu, madj, ni milayilay. Yehova wamuleja kand piur pa annam mud mbau ni kabar. (Job 38:32-35; 39:9, 19, 20) Yitang yiney yamekeshap kwau ching kusu ukash upandakena wa Nzamb, pakwez kand rukat rend ni manangu mend mapandakena. Mulong wa mambamb minam, Job washikena kumuchingejin nakash Yehova kusutamu pasak. (Job 42:1-6) Chilik chimwing, anch twilej yitang tukuvurik anch Yehova ukwet manangu makad musul ni ukwet dikand nakash kutusutamu. Ukutwish ni ukupwish kand yakamish yetu yawonsu. Uyakin winou ukutwish kukasikesh ruchingej retu mudiay ndiy.
Mapit ma mu Spiritu
it-2-F p. 122 par. 1-2
Mwin Kupan Yijil
Yehova, mwin Kupan Yijil. Yehova ndiy udia mwin kupan yijil wakin mu mangand. Ndiy watekang yijil yikata kukwash mwom kwikalaku (Jb 38:4-38; Kus 104:5-19) ni mwom wa annam. (Jb 39:1-30) Mulong muntu ni yend ud chitang cha Yehova, ufanyidin kuziyin ni yend ku yijil yiney yikata kukwash mwom, chikwau kand mulong ud chitang chikweta manangu chikutwisha kutong ni kwikal ni mwikadil wa mu spiritu, ukutwish kuziyin kand ku yijil yitekinay Nzamb. (Rm 12:1; 1Ko 2:14-16) Chawiy yijil ya Yehova yikat kutakel kand yitang ya mu spiritu.—Kus 103:20; 2Pi 2:4, 11.
Yijil ya Yehova yikata kukwash mwom yikuswimpangap. (Jr 33:20, 21) Mu mangand mawomsu yijil yiney yikuswimpangap ni yimeken kamu patok anch yid yakin, mu yom yijikena, in manangu akutwish kuchind kunyimuk kwa ngond, kwa ma planet, ap yitang yikwau yidia mwiur. Muntu ukata kulik kulimish yijil yiney ukat kuman mar. Chilik chimwing yijil yikwau ya Nzamb muntu kakutwishap ku yiswimp ap kujip alik kukupup. Chilik chimwing kand ni yijil ya tangau nich mwom (lois naturelles) ap anch muntu kamupupinap pawiy kamu pinapa. “Mulong kwikil muntu ukutwisha kumudimb Nzamb. Yikukunay muntu, yawiy yikez kwangulay.”—Gal 6:7; 1Tm 5:24.
RUBING RA 29 NGOND WA 1–4 NGOND WA 2
YOM YA USEY YIDIA MU DIZU DIA NZAMB | JOB 40-42
Malejan Twilejidina ku Yom Yamushikena Job
w10 1/10 paj 11 par. 4-6
“Ov, Nany Wijika Chitongijok Cha [Yehova]?”
4 Anch twatongin pa mijikit ya Yehova, tufanyidin kwipuk chibachikin cha kumurumburish Nzamb kusutil ku yijil ya antu. Chibachikin chinech achimekeshin patok mu dizu dia Yehova mudi mwafundau mu Kuseng 50:21 anch: “Ey watonga anch, am nidi mudi ey.” Chidi mudi mwalonday mwin kwilej Bibil umwing pasutin kal mivu 175 anch: “Antu aswapeling kumurumburish Nzamb kwambatan ni yijil yau ayinau, ni kutong anch ndiy amukangeshin kudi yijil yiniya, yitonginau anch antu afanyidin kulondul.”
5 Tufanyidin kwipuk kulikidil mutapu tumumena Yehova wikala uyikedilau nich yijil yetu ayinetu ni maku metu. Ov, mulong wak chidi cha usey? Mwaning, mudi mutukata kwilej Bibil, yisal yimwing ya Yehova yikutwish kumekan mudi yidi yakad kutentam kwambatan nich chitongijok chetu chikweta mupak ni chakad kuwanyin. In Isarel a pasak asambisha niyawiy kutongijok mu mutapu winou ni ashikena ku kulond yom yiyimp piur pa yisal ya Yehova pantaliken. Tal yom yayilejay Yehova: “En ukat kulondany anch: ‘Yom yisadilay [Yehova] kiyitentaminap.’ En, in Isarel, nteshany. Ov, utongilany yisalijok yam kiyitentaminap? Yisalijok yenen, yawiy yakad kutentam.”—Ezek. 18:25.
6 Chom chikutwisha kutukwash twipuka kuwil mu mupit wa kumurumburish Yehova kusutil yijil yetu ayinetu chidi kwijik anch yitongijok yetu yikwet mupak ni yisu yimwing yiding yiyimp. Job waswiridina kwilej dilejan dined. Pamanay mar, Job warisha pakad ruchingej ni wasambisha kwitongin ching amwinend. Ndiy waburena kutongin pa milong yikash. Pakwez Yehova wamukwasha nich rukat chakwel aswimpa chitongijok chend. Pamwipulay Job yipul kushalijan piswimp 70, yakanganyay Job kwakul, Yehova wisambina piur pa kukep kwa ronganyin ra Job. Job wakula nich kwitudish, ni kuswimp chitongijok chend.—Tang Job 42:1-6.
w17.06 paj 18 par. 12
Dandamen Kushinshikin pa Mulong Ujim
12 Ov, Yehova waburena ranaken pa kwambamb ni Job mu mutapu winou kupwa kwa kuman mar mawonsu minam? Bwat, ni Job niyend katongap mwamu. Job watesha ni wakwata nich usey chiyul cha Yehova. Walonda anch: “Nifish kal nich mulong wa mazu mam, katat nakarumun kal muchim wam, ni kwibumburol pansh kurutu kwey.” (Job 42:1-6) Kurutu kwa yom yiney, nsand umwing utazukinau anch Elihu wamukwasha Job kurijek yitongijok yend. (Job 32:5-10) Kupwa kwa Job kutesh yiyul ya rukat ya Yehova ni kuswimp yitongijok yend, Yehova wasala anch antu akwau ijika anch wasangera kushinshaman kwa Job.—Job 42:7, 8.
‘Muchingejina Yehova’
17 Job ud kwend umwing wa atushalapol a Yehova ashala atakamena ni imana dang chisu charishau nich yikokujol yikash. Mu mukand wayifundinay in Hebereu, kambuy Paul wajimbula yilakej ya antu akwau atazukay anch “chisak chijim cha atuman atwombilamu mudi didj.” (Heb. 12:1) Awonsu arisha ni yikokujol yikash, pakwez ashala ashinshamena kudiay Yehova mu mwom yau yawonsu. (Heb. 11:36-40) Ov, kujijaman kwau ni midimu yau yikash yading kwau yakad usey? Bwat ap pakemp! Ap anch kamanap kuwanyin kwa uprofet wawonsu wa Nzamb chisu chadingau aom, adandamena kumuchingejin Yehova. Ni mulong ading nich kashinsh anch akwet dilau dia Yehova, ading nich ruchingej anch kushilamu kwawonsu kwa Nzamb kukuwanyin. (Heb. 11:4, 5) Chilakej chau chikutwish kukasikesh mupak wetu wa kudandamen kumuchingejin Yehova.
18 Nlel tushich mu mangand mayila mu kupandikan kuyip nakash. (2 Tim. 3:13) Satan udandamedin kuyipak atushalapol a Nzamb. Piur pa yikokujol tukurisha nich kurutu oku, el tukwatany amboku mupak wa kumusadin nakash Yehova, ni kwikal nich kashinsh anch “tumuchingejin Nzamb mwom.” (1 Tim. 4:10) Vurik, yiyukish yatambulay Job kud Nzamb yimekeshin anch “[Yehova] wizwil nich kuwap ni riy.” (Jak. 5:11) Elany amboku tushalany ashinshamena kud Yehova nich kashinsh anch ukuyifut “antu awonsu akata kumusurab.”—Tang Hebereu 11:6.
Mapit ma mu Spiritu
it-2-F p. 344 par. 2
Kumusip muntu
Job wading ikundj utentamin ni ushinshamena chikalap nchik tupamp tuvud twamusipau. Pakemp pakemp wasambisha kuswimp ni wikal ni chitongijok chiyimp chamushikija kukurumbuk kwa mupupinau. Eliyu walonda piur pend anch: “Ov, kwisu kudia muntu mudi Job, mwin kuna mambamb ma masaal mudi mem?” (Jb 34:7) Job washiken kwinan ni kukimb kwiyingish nich amwinend, pa ndond pa kulond anch Nzamb ndiy wading utentamina, wasambisha kushinshikin pa kutentam kwend kusut kutentam kwa Nzamb. (Jb 35:2; 36:24) Pamusipau nayimp kud “arund nend” asatu, Job watonga anch ndiy wading usipinau kadiap Nzamb. Chinech chikala mud muntu wisipishishina kwend amwinend, ni witiyina kuna mem ni musangar. Kupwa Yehova wamurumburila Job anch, mu win yakin (anch twashinshikin nawamp) antu inay ading amusipin Nzamb ni kumusal masaal. (Jb 42:7) Chilik chimwing, chisu chitau in Isarel mwant, Yehova wamulej muprofet Samwel anch: “mulong awiy kakulikinap ey, pakwez anlikin kal am kwikal mwant wau wa kuyikel.” (1S 8:7) Ni Yesu wayileja in kwilej end anch: “Antu awonsu akez kukukisany [kadiap mulong wenen] [pakwez] mulong wa kwingambat am.” (Mt 24:9) Mu kulam yom yiney mu manangu, mwin Kristu ukutwish kujijamen kumusip ni chitongejok chiwamp, kusal mwamu kukumuletin difut.—Lk 6:22, 23.
RUBING RA 5-11 NGOND WA 2
YOM YA USEY YIDIA MU DIZU DIA NZAMB | KUSENG 1-4
Tond Kushal Kumutambu wa Want wa Nzamb
“Nikez Kanyikesh Michid Yawonsu”
8 Mutapu ik wakulau antu ku uruu winou? Avud aulika. (Tang Kuseng 2:1-3) Michid yasambisha kuzazat. Yalika kumwitiy Nyikel watekau kud Yehova. Kamenap kwau uruu wa Want tulejena mud “rusangu ruwamp.” Chawiy, maguvernema mamwing makat kukangesh kand mudimu wa kulejan! Ap anch anyikel avud a michid yiney akat kulond anch amusadidin Nzamb, kakatinap kulik want ni ulabu wau. Chawiy mud ant a pa chirung cha Yesu, nlel kand anyikel akat kumubwambwil Uzizidinau Many wa Yehova kusutin kuyirishikish in kwilejend ashinshamena.—Mid 4:25-28.
w16.1/4 paj 24 par. 11
Kangal Kwiyandjik mu Mangand Maurokina
11 Yom ya kumujimbu. Anch nfalang ni yom tukweta yikwet usey nakash kudi etu, tukutwish kuman anch chidi chikash kudi etu kulik kwiyandjik mu milong ya mangand. Kupwa kwa muvu wa 1970 Atuman avud a mwingand ya Malawi asha yom yawonsu yadingau nich mulong alika kwandam mu chisak cha politik kampand. Cha ushon, amwing kashap kwau yom yau yadingau nich. Nambaz utazukinau anch Ruth wavurika ni walonda anch, “Antu amwing aya mwi ngand yikwau ni yetwetu, pakwez asambisha kand kwandam mu chisak cha politik ni achirika mwingand yetu mulong awiy kakatap kwau kwikal ni mashakamin mayimp mu kapony wa in kuchin njit.” Pakwez antu a Nzamb avud kakatap kusal mwamu. Kakatap kwiyandjik mu yom ya mangand, ap anch akwet nfalang jikemp ap ashadisha yom yau.—Hebereu 10:34.
Mapit ma mu Spiritu
it-1-F p. 261 par. 2-4
Yipapal
Yipapal yikata kuchidij mbut mud masang ni ble. Anch Bibil kisambidinap kamu yipapal mu chifanakash, pakwez ulejen milad yasadinangau pakur mulong wa kudiosh yipapal ku yom. Kupwa kwa kwangul, yipapal yiney yadioshangau kwi ntit ja usey yadingap kand ni mudimu, chading chijingidij cha yom yakad usey, yading yom yifanyidinau kwauril ni yom yiwamp ni kupwa kuyosh.
Chakusambish, kwangul kwading mulong wa kudiosh yipapal kwi mbut. Kupwa, kwa kupep mbut, masang mapipela makutwish kupepuk ni rinkind mud rufunfut (Tal VANNAGE). Chinech chitukwashin kutesh mutapu ukatay Yehova kuyidiosh in kupumbok pakach pa antu end, ap kushesh antu ayimp ni michid yimumbwambwidina. (Jb 21:18; kus 1:4; 35:5; Is 17:13; 29:5; 41:15; Os 13:3) Want wa Nzamb ukushesh akankuny awonsu ni akwikal kamu mud yipapal yikusendau kud rinkind.—Dn 2:35.
Yisu yivud akumangejang yipapal yakad usey ni kuyosh, chakwel kangal rinkind wayichrish yayipish kand mbut. Chilik chimwing, Yohan mubatish wabwaka anch antu ayimp adia mu relijon wa makasu akusheshik, Mwin kupep udia, Yesu Kristu, ukukungamej masang, “pakwez yipapal, ukuyosh kamu ni kasu kakad kutwish kujimish.”—Mt 3:7-12; Lu 3:17; tal BATTAGE.
RUBING RA 12-18 NGOND WA 2
YOM YA USEY YIDIA MU DIZU DIA NZAMB | KUSENG 5-7
Shal Ushinshamena Chikalap Nchik Yisal ya Antu Akwau
Mutapu Ukutwisha Mifund Kutwinkish Usu
7 Ov, kud murund ney ap mwanamakwey wakurumbukidina? Anch mwawiy, kushinshikin yom yasalay Mwant David pamurumbukinau kud mwanend Abisalom, ni pakimbay kumutambul want kukutwish kukukwash. Jinsangu jivud jidia mu Bibil jimekeshin anch Yehova uyikatin atushalapol end ni ukuyikwash kupandikan yoziu yirishinau nich. Mutu wa mulong winou wisambidin mutapu ukutwisha kusal dilejan diey dia pakampwil chakwel yom wilejina yikukwash.—2 Sam. 15:5-14, 31; 18:6-14.
8 (1) Lembil. Paukweta rusangu mu manangu, muleja Yehova yom yawonsu piur pa mutapu wiyovila mulong wa yom yiyimp yakusadidinau. (Kus. 6:6-9) Kupwa mwita chakwel akukwash kuman mbil ukutwisha kusadin mulong wa kurish nich chakamish chinech chikash.
Ikal Nich Kashinsh Anch Udi mu Uyakin
3 Ritiy retu rifanyidinap kwau kwimen ching kusu pa rukat ra win Kristu rimekeshinau atushalapol a Nzamb. Mulong wak? Tong bil anch mbay ney mwin Kristu—chilakej, muntu udia mukurump ap chibol—wasal chitil chijim. Ap chikwikal nchik anch mukadivar ap nambaz wakurumbukin? Ap kand chikwikal nchik anch pamwing ap muntu kanang wikal mwin kupumbuk, ni wasambish kulond anch tudiap kwetu mu uyakin? Anch yom mudi yiney yashiken, ov, ukwipwakal ni kulik kumusadin Yehova? Dilejan twilejidinaku diawiy ed: Anch ritiy rey mudiay Nzamb rimen ching kusu kwau pa yom yisadinau antu akwau pa ndond pa kwimen pa urund wey wa piswimp ni Yehova, ritiy rey rikwikalap kwau rikash. Mutapu wiyovila piur pa Yehova ni antu end ukutwish kukubachik kukudish ritiy mu chilik kanang. Pakwez chidi kand cha usey nakash kwilej Bibil chikurikina, kwov kurumburik kwa yom wilejina ni kukimbijol kand mulong wa kwikal nich kashinsh anch yom wilejina wawiy kamu uyakin piur pa Yehova. Ufanyidin amwiney kwikal nich kashinsh anch yom yilondinay Bibil piur pa Yehova yidi yakin.—Rom 12:2.
4 Yesu walonda anch antu amwing akwitiy uyakin ‘nich musangar,’ pakwez ritiy rau rikuziy anch arish ni milong. (Tang Mateu 13:3-6, 20, 21.) Pamwing ap kadingap ija anch antu amulondwila Yesu akurish ni yakamish. (Mat. 16:24) Ap kand pamwing ap ading atongin anch, ang muntu wikal mwin Kristu kwapwa kal, kakumanap kand kwend mar, ndiy ukwikal kwend ching ni yiyukish, Nzamb ukumuchidij ku yakamish yawonsu. Pakwez mulong tushich mu mangand makad kuwanyin, yakamish yikudandamen kwikalaku. Yishiken yimwing yikutwish kuswimp mwom wetu ni kukepish musangar wetu mu chisu kanang.—Kus. 6:6; Mul. 9:11.
Mapit ma mu Spiritu
it-1-F p. 776 par. 3
Nzay
Mu Rom 3:13, Kambuy Paul wajimbula Kuseng 5:9 ufanakeshina tun twa antu ayimp ni twa in makasu mud “nzay [yawash]”. Mud nzay yikata kwak afu ni ku yivundish, chawiy chimwing tun twau tukat kubudish mazu mafanyidina kujipan ni mavundina.—Tal kand Mt 15:18-20.
RUBING RA 19-25 NGOND WA 2
YOM YA USEY YIDIA MU DIZU DIA NZAMB | KUSENG 8-10
“Nikukushiman Ey Yehova”!
Sanger Ndond Ukweta mu Dijuku dia Yehova
6 Yehova waturijekina ndond yiwamp nakash ya kushakam. Kurutu amutanga ikundj wa kusambish, Yehova warijeka divu mulong wa antu. (Job 38:4-6; Jer. 10:12) Mulong ud Nzamb muwamp ni mwin kupan, Yehova watwinkisha yom yiwamp yivud chakwel twikal ni musangar. (Kus. 104:14, 15, 24) Yisu yimwing, witekinang chisu cha kutongijokin pa yom yading yitanginay, ni wamana anch “yading yiwamp kamu.” (Dis. 1:10, 12, 31) Wamekesha anch uyikwatin antu nich usey mu kuyinkish “usu wa kuyikel” yom yawonsu yiwamp yatangay pa divu. (Kus. 8:7) Nzamb ukatin anch antu awanyidina asangera chikupu kuyikel yom yiwamp yatangay. Ov, ukat kumujikitish Yehova chisu chawonsu mulong wa yom yiwamp yikaninay?
Ov, Umujikitishining Nzamb Mulong wa Yipan Yakwinkishinay Kal?
10 Mutapu umwing tukutwisha kumekesh anch tudi in kujikitish mulong wa chipan cha dizu, udi kusutil kuyirumburil antu itiyijining anch yom yawonsu yibudikina kwau chakwel ijik mulong wak twitiyijin anch Nzamb ndiy watanga yom yawonsu. (Kus. 9:1; 1 Pita 3:15) Antu afundishining mafundish minam itiyijining anch divu ni mwom win wawonsu udia pa divu yibudikina kwau. Anch twasadin Bibil ni yom twisambina kal mu mutu wa mulong winou, tukutwish kumulondin Tatukwetu wa mwiur ni kuyirumburil antu akatina kutesh mulong wak tukwet kashinsh anch Yehova ndiy Sakatang wa diur ni divu.—Kus. 102:25; Isay 40:25, 26.
Ov, Ud Chilakej Chiwamp cha Kwimburij mu Mutapu Wey wa Kulond?
13 Wang nich musangar wawonsu. Chisu tuwangina miminy ya Want, tufanyidin chakusambish kushinshikin maswir metu ma kumushiman Yehova. Nambaz Sara kimeningap amwinend mud mwin kuwang muwamp. Pakwez, ukatining nakash kumutumbish Yehova nich miminy. Mulong wa diyingishin dined, ukatining kwirijek ku chikumbu mutapu wa kuwang, mud mutapu ukatay kand kurijek yikunku yikwau ya chikumangan. Ukat kwiyijidish tupamp tuvud mutapu wa kuwang, ni kushinshikin mutapu ukwatijadina mazu madia mu miminy ni yom yikwilejau ku yikumangan. Ulondin anch: “Chinech chikat kwinkwash kushinshikin nakash pa mazu pa ndond pa kushinshikin pa mutapu wam wa kuwang.”
Mapit ma mu Spiritu
it-1-F p. 663 par. 8
Muny
Mu kulond kwa chifanakesh, alejen anch Nzamb ukat kuwanyish midumu yend ni “miny” chilakej pafunday Yijil Dikum pa yibar ya mayal (Kub 31:18; Kuv 9:10) mulong wa kusal yilay (Kub 8:18, 19) ni mulong wa kutang maur. (Kus 8:3) “Miny” yasadinay Nzamb mulong wa kutang yom, yimekeshin spiritu wend utumbila ap usu wend ukatay kusal nich midimu; yawiy yom yilejenau mu runsangu ra kutang ridia mu Disambishil, rimekeshina usu wa kusal nich (rouaḥ, “spiritu”) wa Nzamb wa mekana pa divu (Ds 1:2). Chikwau kand, Minfund ya grek ya win kristu yitukwashin kutesh kusadin kwinoku kwa chifanakesh: mu Mateu alejen anch Yesu wopata ayilembil kusutil ‘spiritu wa Nzamb’ ni mu Luka alejen anch wasadinang ‘muny wa Nzamb.’—Mt 12:28; Lk 11:20.
RUBING RA 26 NGOND–3 NGOND WA 3
YOM YA USEY YIDIA MU DIZU DIA NZAMB | KUSENG 11-15
Tongin pa Chisambu cha Nzamb Chikwikal Mwi Ngand Yisu
w06 1/6 paj 30 par. 3
Manans Majim ma Buku wa Kusambish wa Kuseng
11:3—Manguj ik masheshikina? Minam madi manguj pimedina chisak cha muntu—chijil, nkand, ni kutentam. Anch yiney yidi mu kanvundangesh, kukat kulank ruvundu mu chisak ni kwikiling kutentam. Mu mikadil mud yiney, “antu atentamina” afanyidin kumuchingejin nakash Nzamb.—Kuseng 11:4-7.
wp16-F.4 p. 10
Ov, Chiswapel Kwikal ni Mangand Makad Chisum?
Bibil ukanin anch rusot ra Nzamb ra kupwish uyimp wawonsu pa divu rikuwanyin. Mangand ma nlel makushiken ku “dichuku dikurumburishay Nzamb ni kuyishesh antu amubwambwidila ndiy.” (2 Pita 3:5-7) Kukwikalap kand antu in chisum mulong wa kuyimesh akau mar. Mutapu ik tukutwisha kwikal ni kashinsh anch Nzamb ukatin kupwish chisum?
Bibil ulondin anch Nzamb ‘ukisin muntu ukatina chisum,’ (Kuseng 11:5) Sakatang ukatin chisambu ni kutentam. (Kuseng 33:5; 37:28) Chiwiy kakuyilikap in chisum ikalaku chikupu.
w17.08 paj 7 par. 15
Ov, Ukwet Rusot ra Kuchingel Nich Kushimpish Muchim?
15 Mulong wak David wading ukwet rusot ra kuchingel nich kushimpish muchim? Utwakwil mu kuseng ndiy umwing mwafunday tupamp tunying anch: “Kushik djat ni ku muvu ik?” Ulondin anch: “Chawiy nikungamedina mu rukat rey ridumukina. Muchim wam ukusangar mulong wa dipandish diey. Nikumuwangil [Yehova], mulong ndiy wansadil kal kuwap.” (Kuseng 13:6) David wading wij anch Yehova umukatin ni wakata chisu chawonsu kumushinshamen. Watonga piur pa chisu chamukwashau kudi Yehova pakur ni wachingela chisu chikupwishau mar mend kudi Yehova. David wading wij anch chading chifanyidin kuchingel yiyukish ya Yehova.
kr paj 236 par. 16
Want Uwanyishin Rusot ra Nzamb pa Divu
16 Diking. Mazu mashimokishena mafundau mu Isay 11:6-9 makez kuwanyin kamu patok. Kwawonsu kukezau kwendin amakundj, amband ni an pa divu kukez kwikal diking. Kwikil chitangil, muntu ap nnam ukeza kuyakamish. Tongin bil pa chisu chikeza divu dined diawonsu kwikal mudi kwol kwey, mulong ukwikal ni want ipau wa kwisay mu kawit, mu dijiy, ni mu karung; kwendol ku mikandu; mu yir pakad wom. Ukezap kwakam mulong wa uchuku. Mazu madia Ezekiel 34:25 makez kuwanyin, mulong antu a Nzamb akez kutwish “kushakam nawamp mu madil ni kulangal mu ampat.”
Mapit ma mu Spiritu
w13 1/9 paj 20 par. 12
Ov, Akukarumunany Kal?
12 Cha ushon, atunyingumwokin kudi antu afanikena ni isambinay Paul. Atongining anch chidiap cha usey ap chifanyidinap kushinshikin pa yijil ni yany. Alej ni anvaj avud akat kulikidil yaku yiyimp ni akat kukasikesh mutapu wa kutong wa “kwisotil.” Kudi awiy, akutwish kusal yom mudi musotinau, kwikil mupak ku yom yisadilau. Ap antu avud alondina anch adi in relijon, atongining anch akutwish kusal yawonsu yimenau anch yiwapin, pakad kwikal ni chisend cha kumuziyil Nzamb ni yijil yend. (Kus. 14:1) Mwikadil winou ukutwish kwikal chakin kamu wa ubaj kudi in Kristu akin. Antu akad kubabal akutwish kwitiy chitongijok chinech piur pa yitenchik ya uteokras. Akutwish kulik mutapu wa kusal wa chikumangen ni akutwish ap kwinan piur yom yakad awiy kukatish. Akutwish ap kwidjidjek piur pa chiyul chimedina pa Bibil piur pa kwipuwangesh, kusadil Internet, ni kwilej shikol ya piur.