Malembil Makutwish Kukukwash Mutapu ik?

Pamela wading uyedin nakash ni waya kwiyokish kud amingang. Pakwez, wamulembila kand Nzamb chakwel amwinkish usu wa kujijaman mu mayej mend. Ov, malembil mamukwasha?

Pamela urumburil anch: “Pinading nilondwila mon wa kanser, nova wom nakash. Pakwez, pinamulembilang Nzamb, niyovang nawamp ni nachirishang manangu. Nidandamedin kwov kusansan, pakwez malembil makat kwinkwash kwikal ni chitongijok chiwamp piur pa mashakamin mam. Anch antu angipul anch nid nchik, nikat kuyakul anch ‘nikasikenap, pakwez nikwet musangar!’”

Chakin kamu, tukutwishap kuchingel anch ching anch twayel mayej makash chakwel lel tulembil. Etu awonsu turishin ni milong yijim ap yikemp, ni yisu yivud tukat kuswirikenang ukwash chakwel tutwish kurish ni milong yiney. Ov, malembil makutwish kukukwash?

Bibil ulondin anch: “Pan yakamish yey yawonsu kudi [Yehova], ndiy ukukulam. Ndiy kakumulikap mwin kutentam kuwa ap kusu pakemp.” (Kuseng 55:23) Minam mad mazu makasikeshina mud ik! Chad, mutapu ik ukutwisha malembil kukukwash? Anch wamulembil Nzamb mu mutapu ukatinay, ukukwinkish yom uswirikedina chakwel utwisha kurish ni milong yey.—Tal mushet ulondina anch: “Ukwash wa Malembil.”

Ukwash wa Malembil

Chisambu cha mu muchim

“Mwijikishany Nzamb yom yawonsu umwitilanya. Chad chisambu cha Nzamb chisutila ronganyin ra antu chikulam michim yen ni yitongijok yen mu Kristu Yesu.” (Filip 4:6, 7) Anch wamulej Nzamb piur pa milong yey, ukukukwash kulik kuzazat ni kukwat mipak ya manangu.

Manangu ma Nzamb

“Anch umwing wenen waburen manangu, amwita Nzamb, chad ndiy ukumwinkish, mulong ukat kupan kudi awonsu wakad katond.” (Jakobu 1:5) Anch tud mu yakamish, yisu yivud tukatap kukwat mipak yiwamp. Anch walembil mulong wa kumwit Nzamb manangu, ukutwish kukukwash kuvurik mbil ja usey jidia mu Dizu diend, Bibil.

Usu ni rongoj

‘Mulong wa yom yawonsu nikwet usu kusutil ndiy ukata kwingikish ukash.’ (Filip 4:13) Mulong Yehova Nzamb ud mwin dikand diawonsu, ukutwish kukwinkish usu uswirikedina chakwel utwish kurish ni milong yey ap yakamish yey. (Isay 40:29) Bibil umutazukin Yehova anch “Nzamb ukata kupan kwongoj kwawonsu.” Ukutwish kutwongoj “mu mar metu mawonsu.”—2 Korint 1:3, 4.