BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • w23 Ndol map. 26 ​-​ 31
  • Mutapu ik Tukutwisha Kukasikesh Ritiy Retu mu Kushilamu kwa Yehova Piur pa Ngand Yisu?

Kwikil video ukimbina

Video winou umukimbinap amboku nawamp.

  • Mutapu ik Tukutwisha Kukasikesh Ritiy Retu mu Kushilamu kwa Yehova Piur pa Ngand Yisu?
  • Chinong cha Kalam Chilejen Want wa Yehova (Cha Kwilej)—2023
  • Tumitu twa milong
  • Yom Yifanakena
  • YOM MUTUFANYIDINA KUKASIKESH RITIY
  • KUTONGIJOKIN PA DIFUT
  • KUTONGIJOKIN PA DIKAND DIA YEHOVA
  • KWIPAN MU MIJIKIT YIKATA KUTUSEJISH PISWIMP NI YEHOVA
  • “CHIKUWANYIN KWAU”
  • Ritiy—Mwikadil Utukwashina Kwikal Akash
    Chinong cha Kalam Chilejen Want wa Yehova (Cha Kwilej)—2019
  • “Tuwejinaku Ritiy”
    Chinong cha Kalam Chilejen Want wa Yehova—2015
  • “Imanany Dang mu Ritiy”
    Chinong cha Kalam Chilejen Want wa Yehova—2015
  • Mutapu ik Ukutwisha Kukasikesh Ritiy Rey?
    Chinong cha Kalam Chilejen Want wa Yehova (Cha Kwilej)—2021
Chinong cha Kalam Chilejen Want wa Yehova (Cha Kwilej)—2023
w23 Ndol map. 26 ​-​ 31

MUTU WA MULONG WA KWILEJ WA 19

Mutapu ik Tukutwisha Kukasikesh Ritiy Retu mu Kushilamu kwa Yehova Piur pa Ngand Yisu?

“Ov, [Yehova] ukat kulond chom walik kuchisal?”​—KUV. 23:19.

MUMINY 142 Tulamany Ruchingej Retu

YIDIA MU MUTU WA MULONG WINOUa

1-2. Yom ik tufanyidina kusal pituchingedina ngand yisu?

TUMUJIKITISHIN nakash Yehova mulong wa kushilamu kwend kwa kuswinkesh mangand minam nich ngand yisu. (2 Pita 3:13) Ap anch twijap kamu chisu chikweza ngand yisu, yom tumena mu mangand minam yimekeshin anch ngand yisu yid kamu piswimp.​—Mat. 24:32-34, 36; Mid. 1:7.

2 Pituchingedina ngand yisu, chikalap nchik mivu twasadina kal mu uyakin, etu awonsu tufanyidin kukasikesh ritiy retu mu kushilamu kwinoku. Mulong wak? Mulong ap ritiy rikash rikutwish kuziy. Chawiy, kambuy Paul wamekesha patok anch kuburen ritiy chid ‘chitil chiswapela kutupwakesh.’ (Heb. 12:1) Mulong wa kulam ritiy retu rikash, tufanidin kushinshikin chikurikina pa uman umekeshina anch ngand yisu yikwez kamu piswimp ap.​—Heb. 11:1.

3. Yom ik tukwisambina mu mutu wa mulong winou?

3 Mu mutu wa mulong winou, tukushinshikin yom yisatu mutukutwisha kukasikesh ritiy retu mu kushilamu kwa Yehova piur pa ngand yisu: (1) kusutin kutongijokin pa difut, (2) kutongijokin pa dikand dia Yehova ni (3) kusutin kwipan mu mijikit yikata kutusejish piswimp ni Yehova. Kupwa tukushinshikin mutapu tukutwisha kukasikesh ritiy retu kusutil uruu wa Yehova wamwinkishau Abakuk. El tushinshikinany chakusambish yom yimwing turishina nich nlel yitina kukasikesh ritiy retu mu kushilamu kwa ngand yisu yikweza.

YOM MUTUFANYIDINA KUKASIKESH RITIY

4. Mipak ik yitina ritiy rikash?

4 Dichuku diawonsu, tukat kukwat mipak yitina ritiy rikash. Chilakej, tukat kukwat mipak piur pa kutond arund, kwipuwangej, kwilej shikol, uruw, kuval an ap kand piur pa mudimu wa ku mujimbu tukusala. Tufanyidin kwiyipul anch: ‘Ov mipak yam yimekeshin anch nikwet kashinsh anch mangand minam ma kusut ni anch akumaswinkan piswimp ap kud ngand yisu ya Nzamb? Ov, mipak yam yid mud yikwatinau antu akad kwitiyij anch akushakam chikupu?’ (Mat. 6:19, 20; Luka 12:16-21) Tukukwat mipak yiwamp anch twakasikesh ritiy retu anch ngand yisu yid kamu piswimp ap.

5-6. Mulong wak tufanyidin kwikal ni ritiy rikash pa yirung ya mar? Let chilakej.

5 Pamwing ap turishin kand ni yikokujol yitina ritiy rikash. Tukutwish kurish ni kuzengol, mayej madandamedina, ap kand yom yikwau yikutwisha kutuziyish. Kwinsambishin, tukutwish kuman anch tukutwish kujijamen yikokujol yiney ayinetu. Pakwez yikokujol mud yiney yikata kulab, yitining kuyijijamen nich ritiy rikash mulong wa kudandamen kumusadin Yehova ni musanger.​—Rom 12:12; 1 Pita 1:6, 7.

6 Anch twajijamen chikokujol mu machuku mavud, tukutwish kutong anch ngand yisu ya Yehova yikwezap kwau. Ov, chinech chirumburikin anch ritiy retu riziyin? Bwat kwau. Shinshikin chilakej ech. Pa chirung cha mashik nakash, tukutwish kwiyov anch chirung cha marungul chikwezap. Pakwez kupwa kwa chirung cha mashik, kukat kwez chirung cha marungul. Chilik chimwing, chisu tuziyina nakash, tukutwish kwiyov anch ngand yisu yikwezap kwau. Anch ritiy retu rid rikash, tukat kwikal nich kashinsh anch kushilamu kwa Nzamb kukuwanyin. (Kus. 94:3, 14, 15; Heb. 6:17-19) Anch tukwet kashinsh kinaku, tukutwish kudandamen kutek difukwil dietu mulong wa Yehova pa ndond ya kusambish mu mwom wetu.

7. Mutapu ik wa kutong tufanyidina kwipuk?

7 Tufanyidin kand kwikal ni ritiy rikash mulong wa kusal mudimu wa kulejan. Antu avud tukata kulej akat kwiyov anch “rusangu ruwamp” piur pa ngand yisu ya Nzamb yikweza chilata kwau. (Mat. 24:14; Ezek. 33:32) Tufanyidin kubabal chakwel kangal twidjidjek piur pa yom yitufundishinau kud Yehova mud musadinau antu inay. Chawiy, mulong wa kwipuk kusal mwamu, tufanyidin kukasikesh ritiy retu. Tushinshikinany mitapu yisatu mutukutwisha kusal mwamu.

KUTONGIJOKIN PA DIFUT

8-9. Kutongijokin pa difut kukutukwash mutapu ik kukasikesh ritiy retu?

8 Mutapu umwing tukutwisha kukasikesh ritiy retu ud wa kutongijokin pa difut. Difut ditwinkishin kashinsh anch kushilamu kwa Nzamb kukuwanyin. Anch twatongijokin chikurikina pa diyingishin diamubachika Yehova kupan difut ni usey ukweta difut dined, tukat kukasikesh ritiy retu mu kushilamu kwa Nzamb kwa kuswinkesh mangand minam ni ngand yisu anch kud kwakin ni kukuwanyin. Mulong wak tulondina mwamu?

9 Usey ik ukweta difut? Yehova wamutuma Mwanend kapokal mukatish, wadingay nend piswimp nakash, mulong wa kwez pansh mud muntu uwanyidina. Panap pa divu, Yesu wajijamena yikokujol ya mutapu ni mutapu. Wamana mar ni wafa rufu risansena. Dined diading kamu difut dijim diafutay Yehova! Yehova Nzamb wetu wa rukat kafanyinap kwitiy anch Mwanend aman mar ni kufa mulong wa kutwinkish kwau mwom uwamp mu ka chisu kakemp. (Yoh. 3:16; 1 Pita 1:18, 19) Mulong Yehova wamupana Mwanend wa usey nakash mulong wa kutukwash, chimeken anch ukwet kashinsh anch tukwikal ni mutapu wa kushakam chikupu mwi ngand yisu.

KUTONGIJOKIN PA DIKAND DIA YEHOVA

10. Kukwatijan ni Efes 3:20, yom ik yikutwishay Yehova kusal?

10 Chom cha kaad chikutukwasha kukashikesh ritiy retu chid kutongijokin pa dikand dia Yehova. Ukwet dikand dia kusal chom chin chawonsu chitukaninay. Chakin kamu, antu avud nlel akat kutong anch chikasiken kushakam chikupu mwi ngand yisu. Pakwez chisu ni chisu Yehova ukat kukan yom yimeningau antu anch yikasiken kusal ap kuwanyish. Ndiy ukutwish kusal mwamu mulong ud Nzamb Mwin Dikand Diawonsu. (Job 42:2; Mar. 10:27) Chawiy komb, tufanyidinap kushimok anch wakan kusal yom yimekena anch yid yikash.​—Tang Efes 3:20.

11. Let chilakej cha kushilamu kumwing kukash kwa Nzamb. (Tal mushet “Kushilamu Kumwing Kukash Kwawanyina.”)

11 Shinshikin yom yimwing yashilayamu Yehova kud antu a pasak yading yimekena mud yikasiken kuwanyish. Wamuleja Aburaham ni Sara anch akuval mwan ku upal wau. (Dis. 17:15-17) Yehova wamuleja kand Aburaham anch ukez kayinkish antu a majuku mend ngand ya Kanan. Mu kusut kwa mivu yivud, antu a majuku ma Aburaham, in Isarel ashakama mu uswik mu Idjibit ni chafanyina kumekan mud kushilamu kwinoku kwafanyinap kuwanyin. Pakwez kwawanyina. Kupwa, Yehova wamuleja Elizabet mband wading wapamina kal anch ukaval mwan. Wamuleja kand Mariy, wading kajik, anch ukumuval Mwan wa Nzamb. Kusal mwamu kwafanyina kuwanyish kushilamu kwashilayamu Yehova mu tunan twa mivu mu chir cha Eden!​—Dis. 3:15.

KUSHILAMU KUMWING KUKASH KWAWANYINA

Aburaham ni Sara amusendin mwanau Isak wavadika kal kandikal palab.

Kushilamu

Aburaham ni Sara afanyina kuval mwan ku upal wau.​—Dis. 18:14.

Mulong wak Kwamekena Mud Kukutwishap Kuwanyin

Sara wading wasutin kal pa mivu ya kuval.​—Dis. 18:11.

Mutapu Kwawanyina

Dis. 21:1, 2

Joshua ukwet mpak ya musamun mu chikas ni utadin mwiur.

Kushilamu

An a mu dijuku dia Aburaham afanyina kushakam mwi ngand ya Kanan.​—Dis. 17:8.

Mulong wak Kwamekena Mud Kukutwishap Kuwanyin

In Isarel ikala aswik mu Idjibit.​—Kub. 1:13, 14.

Mutapu Kwawanyina

Jos. 11:23

Josef ni Mariy pamwing ni mwanau Yesu wavadika kal ad mu chidil cha annam.

Kushilamu

Mwan wa mu dijuku dia David wafanyina kushakam chikupu pa ditand dia Yehova.​—2 Sam. 7:8, 16.

Mulong wak Kwamekena Mud Kukutwishap Kuwanyin

Kupwa kwa rufu ra Sedekias, mu Isarel mwadingap kand mwant wa mu dijuku dia David.​—Jer. 52:11.

Mutapu Kwawanyina

Luka 1:32, 33

In Isarel adiokil mu Babilon.

Kushilamu

Yerusalem afanyina kumutunguril kupwa kwa in Isarel kusal mivu 70 mu winkwal mu Babilon.​—Jer. 29:10.

Mulong wak Kwamekena Mud Kukutwishap Kuwanyin

Yerusalem washala mankur, ni in Babilon ading ijiken mud antu akading kulikishangaku antu adia mu winkwal.​—Isay 14:17.

Mutapu Kwawanyina

Esi. 1:1-3; 2:1

Mwangel ukwet mpak ya musamun ni utwikin piur pa amasalay in Asiri.

Kushilamu

In Asiria kafanyinap kushesh Yerusalem.​—2 Ant 19:32-34.

Mulong wak Kwamekena Mud Kukutwishap Kuwanyin

Amasalay a in Asiria ading avud ni ading akwatang kal misumb yivud ya Yuda.​—2 Ant 18:13.

Mutapu Kwawanyina

Isay 37:36, 37

Elizabet ukat kumwak Mariy nich musangar.

Kushilamu

Elizabet wafanyina kuval mwan, ni Mariy wafanyina kuval Mwan wa Nzamb.​—Luka 1:13, 31.

Mulong wak Kwamekena Mud Kukutwishap Kuwanyin

Elizabet wading wasutin kal mivu ya kuval. Mariy wading kajik.​—Luka 1:18, 34.

Mutapu Kwawanyina

Luka 1:57; 2:7

12. Yom yilondinau mu Joshua 23:14 ni mu Isay 55:10, 11 yitwinkishin kashinsh ik piur pa dikand dia Yehova?

12 Anch twatongijokin piur pa kushilamu kwawonsu kwa Yehova kwakanay ni mutapu wawanyishay kushilamu kwinoku, tukat kuman chakin kamu anch ukwet dikand dipandakena. (Tang Joshua 23:14; Isay 55:10, 11.) Chinech chitukwashin kwirijek mulong wa kuyikwash antu akwau kwijik anch kushilamu kwa Nzamb piur pa ngand yisu chidiap chilat. Piur pa diur disu ni divu disu, Yehova amwinend ulondin anch: ‘Mazu minam mad makin ni ma kuchingejin.’​—Kuj. 21:1, 5.

KWIPAN MU MIJIKIT YIKATA KUTUSEJISH PISWIMP NI YEHOVA

Antu akumanganang kal akat kumulondul nawamp mukadir usadina diskur.

YIKUMANGAN

Mutapu ik ukutwisha mujikit ni mujikit pakach pa mijikit yiney ya mu spiritu kukasikesh ritiy rey? (Tal paragraf wa 13)

13. Mutapu ik ukutwisha yikumangan kukasikesh ritiy retu? Rumburil.

13 Chom cha kasatu chikutwisha kutukwash kukasikesh ritiy retu kud kwipan mu mijikit yikata kutusejish piswimp ni Yehova. Chilakej, shinshikin mutapu tukata kutaninamu mu yikumangan yetu. Anna, wasutishina kal mivu yivud mu milad kushalijan ya mudimu wa chisu chawonsu ulondin anch: “Yikumangan yikat kwinkwash kukasikesh ritiy ram. Ap anch mwin kufundish kakwetap ukaliweny mu kufundish ap anch kafundishinap chom chisu, nikat kuteshamu chom kanang chikwinkwasha kutesh nawamp Bibil ni kukasikesh ritiy ram.”b Chakin kamu, ritiy retu rikat kukasikan anch twatesh yom yakwilau akadivar ni anambaz netu ku yikumangan.​—Rom 1:11, 12; 10:17.

Mukadivar ukat kupan uman kud mbay nend wa mudimu kwi ndond kukatau kusudin.

MUDIMU WA KULEJAN

Mutapu ik ukutwisha mujikit ni mujikit pakach pa mijikit yiney ya mu spiritu kukasikesh ritiy rey? (Tal paragraf wa 14)

14. Mutapu ik ukata mudimu wa kulejan kukasikesh ritiy retu?

14 Tukat kukasikesh kand ritiy retu chisu twipanina mu mudimu wa kulejan. (Heb. 10:23) Barbara, wamusadidina kal Yehova mu mivu 70 ulondin anch: “Chisu chawonsu nimening anch mudimu wa kulejan ukat kukasikeshang ritiy. Anch nayilej antu akwau piur pa kushilamu kupandakena kuwap kwa Yehova, ritiy ram rikat kukasikan kamu nakash.”

Nambaz ukat kusadin mikand yimedina pa Bibil mu dilejan diend dia pakampil.

DILEJAN DIA PAKAMPWIL

Mutapu ik ukutwisha mujikit ni mujikit pakach pa mijikit yiney ya mu spiritu kukasikesh ritiy rey? (Tal paragraf wa 15)

15. Mutapu ik ukutwisha dilejan dia pakampwil kukasikesh ritiy retu? (Tal kand yipich.)

15 Shinshikin chom chikwau chikata kukasikesh ritiy retu: dilejan dia pakampwil. Susan ulondin anch chikat kumukwash nakash anch watenchik program wa kwilej. Ulondin anch: “Diarumbing, nikat kwilej mutu wa mulong wa Chinong cha Kalam wa rubing rikwambakenap. Diakajikamu ni Diakaad, nikat kurijek chikumangan cha mukwach mwa rubing. Mu machuku mashadinaku, nikat kusal dilejan diam dia pakampwil.” Mulong ukat kulimish program wend wa kwilej, Susan udandamedin kukasikesh ritiy rend. Irene, wasadidina kal mu mivu yivu ku biro mujim wa pa mangand mawonsu, ulondin anch ritiy rend rakasikana kusutil kwilej uprofet wa Bibil. Ulondin anch: “Chikat kwishimokish nakash pa kuman mutapu uwanyidina uprofet wa Yehova ap mu tuyom tukemp tukemp.”c

“CHIKUWANYIN KWAU”

16. Mulong wak kashinsh kamwinkishau Abakuk kud Yehova katutadin niyetu nlel? (Hebereu 10:36, 37)

16 Atushalapol amwing a Yehova achingela disudien dia mangand mu chisu chilemp nakash. Antu amwing atongin anch disudien dilabin nakash kushik. Yehova wijing mutapu ukatau kwiyov atushalapol end. Wamuleja muprofet Abakuk anch: “Rufunda mulong chisu chau chakuruwanyish kand kal chishika. Pakwez chikat kwez swa. Yom yinikulejina yikwikalaku kamu. Ap anch chisu chalabap nchik, ey chingel, chikuwanyin kwau. Kichikulabap, bwat.” (Aba. 2:3) Ov, Nzamb wapana kashinsh kinak ching kwau mulong wa Abakuk? Ov, mazu minam matutadin niyetu? Yehova wamupepila kambuy Paul chakwel ayifundina in Kristu mazu minam mulong achingedin ngand yisu. (Tang Hebereu 10:36, 37.) Chakin kamu, ap anch tutongin anch kushilamu kwa Yehova mulong wa kutupandish kulabin pa kuwanyin tufanyidin kwikal nich kashinsh anch, chisu “chikuwanyin kwau. Kichikulabap, bwat.”

17. Mutapu ik wasadinay nambaz umwing chiyul chamwinkishau Abakuk kud Yehova?

17 Atushapol avud a Yehova akat kusadin chiyul cha Yehova cha ‘kudandamen kuchingel ap mivu yivud.’ Chilakej, Louise, wasambisha kumusadin Yehova mu muvu wa 1939. Ulondin anch: “Pa chisu chinicha, natonga anch Armagedon wafanyina kwez kurutu nipwisha shikol. Pakwez yom yasadikap mwamu. Mu kusut kwa mivu, kutang nsangu ja mu Bibil jisambidina atushalapol amuchingela Yehova chakwel awanyisha kushilamu kwend kwankwasha niyam kumuchingel Yehova chakwel awanyisha kushilamu kwend. Natangang nsangu piur pa Nowa, Aburaham, Josef, ni atushalapol akwau afutau mulong amuchingela Yehova. Kudandamen kuchingel kwankwasha am pamwing ni antu akwau kwikal nich kashinsh anch ngand yisu yid kamu piswimp ap.” Antu akwau avud amusadidina kal Yehova mu mivu yivud itiyin mazu minam!

18. Kushinshikin yitang kukutwish kukasikesh mutapu ik ritiy retu piur pa kwez kwa ngand yisu?

18 Chid chakin, ngand yisu kand kal yeza. Pakwez tongin piur pa yom yimwing tumena, mud atutumbu, mitond, annam ni antu. Kwikil muntu ukutwisha kutadik kwikalaku kwa yom yiney ap anch pa chisu chimwing yadingapaku. Anch nlel yidiaku, chid mulong Yehova wayitanga. (Dis. 1:1, 26, 27) Nzamb wetu ukwet kand rutong ra kulet ngand yisu. Ukuwanyish chakin kamu rutong rend riner. Mwi ngand yisu, antu akusanger mwom wa chikupu nich ukash wa mujimbu uwanyidina. Tukutwish kwikal nich kashinsh anch ngand yisu yikwez pa chisu chatenchikay kal Nzamb.​—Isay 65:17; Kuj. 21:3, 4.

19. Mutapu ik ukutwisha kukasikesh ritiy rey?

19 Pichuchingedina ngand yisu, sal usu wey win wawonsu mulong wa kukasikesh ritiy rey. Mekesh chisu chin chawonsu anch ud mwin kujikitish mulong wa difut. Tongijokin pa dikand dia Yehova. Ipana mu mijikit yikukusejisha piswimp ni Yehova. Anch wasal yom yiney, ukutwish kwikal pakach pa antu akweta “ritiy ashimpishina michim akata kutambul yom yashilayimu Nzamb.”​—Heb. 6:11, 12; Rom 5:5.

MUTAPU IK TUKUTWISHA KUKASIKESH RITIY RETU KUSUTIN . . .

  • kutongijokin pa difut?

  • kutongijokin pa dikand dia Yehova?

  • kwipan mu mijikit yikata kutusejish piswimp ni Yehova?

MUMINY 139 Tongin Chisu Chikwikala Yom Yawonsu Yisu

a Antu nlel kitiyijinap mu kushilamu kudia mu Bibil piur pa ngand yisu. Akat kutong anch chid kwau chilat. Pakwez, etu twitiyijin kamu anch kushilamu kwawonsu kwa Yehova kukuwanyin. Ap mwamu, mulong wa kulam ritiy retu rikash, tufanyidin kudandamen kurikasikesh. Mutapu ik? Tukutan chakul mu mutu wa mulong winou.

b Majin mamwing amaswimpin.

c Tukutwish kutan mitu ya milong yivud piur pa uprofet wa Bibil pafundinau anch “Uprofet” mu buku Ukwash wa Kukimbijol Nich wa Atuman a Yehova. Chilakej, mutu wa mulong “Yawonsu Yalonday Yehova Yawanyina” mu Chinong cha Kalam cha 1 Ngond wa 1, 2008 paj wa 22.

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan