Dandamen Kukul mu Rukat

1. Uyakin ik wajingunina chisu wasambisha kwilej Bibil?

OV, UVURIKIN chisu wasambisha kwilej Bibil? Pamwingap wakashimuka nakash piuwajingunina anch Nzamb ukwet dijin. Pamwingap wakolika kusutin kujingunin anch Nzamb kakatap kuyimesh antu mar mu dijiy dia kasu. Ni pamwingap wasangar nakash pa kwikal ni ruchingej ra kuyiman kand akatish ney afila kal ni ra kushakam nau pa divu dikwikala paradis.

2. Kudioshaku kwilej uyakin wa Bibil, mu yom ik yikwau wayila kurutu? (Efes 5:1, 2)

² Piwadandamedina kwilej Bibil, rukat rey mulong wa Yehova rakudin. Rukat riner rakubachikin kusadin yom wileja. Wakwatin mipak yiwamp yimedina pa mbil ja Bibil. Wilejin kutongijok ni kusal yom yidia yiwamp mulong wa kumusangaresh Nzamb. Mud mwan ukata kumwimburij nvaj wend wa rukat, wakwata mupak wa kumwimburij Tatukwend wa rukat udia mwiur.​—Tang Efes 5:1, 2.

3. Yipul ik tufanyidina kwiyipul?

³ Tufanyidin kwiyipul anch: ‘Ov, rukat ram mulong wa Yehova rid rikash kusutamu pa chisu nikala mwin Kristu? Kudiosh natambwila dibatish, mutapu wam wa kutong ni yaku yam yikwatijadin ni njil ya Yehova, pakampwil mu kuyimekeshin akadivar nau anambaz nam rukat?’ Anch ‘rukat rey ra kusambish’ ratalel kal, kangal waziy. Chawiy chom chayishikena in Kristu a mu mivu chitot ya kusambish. Yesu kaziyap mulong wa awiy, ni kaziyinap mulong wetwetu bwat. (Kuj. 2:4, 7) Wij anch tukutwish kuchirishiril kand rukat retu mud ritwading nich chisu twileja uyakin.

4. Yom ik tukushinshikina mu mutu wa mulong winou?

⁴ Mutu wa mulong winou ukwisambin mutapu tukutwisha kudandamen kukul mu rukat retu mulong wa Yehova ni mulong wa antu akwau. Kupwa tukuman yiyukish yimwing tukutwisha kutambul etu ni antu akwau anch twakasikesh rukat retu.

KUL MU RUKAT REY MULONG WA YEHOVA

5-6. Yikokujol ik yarishay nich Paul mu mudimu wend wa kulejan, pakwez yom ik yamubachika kudandamen kumusadin Yehova?

⁵ Kambuy Paul wading ni musangar mu mudimu wa Yehova, pakwez chamwita kupandakan yikokujol yivud. Paul wasalang yisu yivud ma weny malemp, ni chadingap chiswapela kusal weny mu machuku minima. Mu ma weny mend, yisu yimwing Paul wading “mu ubaj mulong wa mawit” ni “mulong wa ampongarik.” Yisu yimwing kand amubula kud akankuny nend. (2 Kor. 11:23-27) Ni akadivar in Kristu a Paul kadingap chisu chawonsu in kujikitish mulong wa usu wading usadinay mulong wa kuyikwash.​—2 Kor. 10:10; Fil. 4:15.

⁶ Yom ik yamukwasha Paul kudandamen kusal mudimu wa Yehova? Paul wileja yom yivud piur pa wuntu wa Yehova kusutin Mifund ni kusutin yom yamushikena. Paul yading nich kashinsh anch Yehova Nzamb umukatin. (Rom 8:38, 39; Efes 2:4, 5) Ni washikena kumukat Yehova nakash. Paul wamekesha rukat mulong wa Yehova kusutin ‘kuyikwash anamakwend in Kristu kudiokal pakur ni katat.’​—Heb. 6:10.

7. Mu mutapu ik umwing tukutwisha kukul mu rukat mulong wa Yehova?

⁷ Tukutwish kukul mu rukat mulong wa Nzamb kusutin kwilej Dizu diend nich mushiku. Pawilejina Bibil, pakish kushinshikin yimekeshinay verse ni verse piur pa Yehova. Iyipula anch: ‘Rusangu riner rimekeshin mutapu ik anch Yehova winkatin? Ringinkishin mayingishin ik ma kumukat Yehova?’

8. Malembil makutwish kutukwash mutapu ik kukul mu rukat retu mulong wa Nzamb?

⁸ Mutapu ukwau tukutwisha kukul mu rukat retu mulong wa Yehova ud kusutin kumufungwil muchim wetu chisu chawonsu mu malembil. (Kus. 25:4, 5) Ku mutambu wend, Yehova ukwakul malembil metu. (1 Yohan 3:21, 22) Khanh, nambaz udia mu Aziy ulondin anch: “Kwinsambishin namukata Yehova mulong wa yom nileja, pakwez pinamana anch ukat kwakul ku malembil mam, namukata chad chipandakena. Chinech chambachika kusal yom yimusangareshina.”b

KUL MU RUKAT MULONG WA ANTU AKWAU

9. Mutapu ik wamekeshay Timote anch wading ukudil mu kumekesh rukat?

⁹ Kupwa kwa kwikal mwin Kristu, Paul watanijana ni nsand muwamp utazukinau anch Timote. Timote wading umukatin Yehova, ni wading uyikatin kand antu. Paul wayileja in Filip anch: “Kinikwetap muntu mukwau nichingejina mwin kutal ku yom ya mwom wenen mudi [Timote].” (Fil. 2:20) Pinap Paul kisambidinap piur pa ukaliweny wa Timote mud muntu wija kurijek yom nawamp ap mwin kusal madiskur, pakwez Paul wamana rukat radingay nich Timote mulong wa akadivar nau anambaz nend. Chawiy chovaken patok mulong wak yikumangen yendinay Timote yading mu kumuchingel nich impu nakash.​—1 Kor. 4:17.

10. Mutapu ik wamekeshay Ana ni nfumwend rukat mulong wa akadivar nau anambaz nend?

¹⁰ Niyetu tukat kukimb mitapu ya kuyikwash akadivar nau anambaz netu in Kristu. (Heb. 13:16) Shinshikin chilakej cha Ana, twisambina mu mutu wa mulong wasambelangaku ou. Kupwa kwa rinkind mukash kutut, ndiy ni nfumwend endina dijuku dimwing dia Atuman ni ajingunina anch rinkind wasenda malat ma chikumbu cha dijuku dined. Mud chibudikin, dijuku diadingap ni masun mawamp. Ana ulondin anch: “Twasenda masun mau, twamatuta, twamakom ni kumabam, kupwa twayichirishinam. Ku mutambu wetu twamana anch chid kwau chom cha usweral twasala, pakwez mulong wa chom chinech, twikala arund nakash kushik ni nlel.” Rukat ra Ana ni nfumwend mulong wa akadivar nau anambaz rayibachika kupan ukwash.​—1 Yohan 3:17, 18.

11. (a) Mutapu ik ukatau antu akwau kwiyov anch twamekesh anch tuyikatin? (b) Kukwatijan ni Jinswir 19:17, mutapu ukatay Yehova kusal anch twamekesh rukat?

¹¹ Anch twayisadin akwetu kwa rukat ni ranaken, akuman kamu usu tusadina mulong wa kwimburij mitapu yikatay Yehova kutong ni kusal yom. Akutwish kusanger mutapu uwamp tuyisadidina mu chilik twakad kutongin. Khanh, twisambina kal kwiur oku ukat kuvurik antu amukwasha. Ulondin anch: “Niyijikitishin nakash anambaz akatish ezang kwinsend mulong wa kuya nau mu mudimu. Ansendang, Antazukang kudia nau yakudia, ni asalang usu chakwel nichirik ni kushik nawamp ku chikumbu. Nlel nijungunin anch wading mudimu ujim nakash wasalangau. Ni asalang mwamu mulong wa rukat rau.” Chid chakin anch kadiap muntu mwawonsu ukutujikitisha mulong wa yom tumusadidina. Khanh ulondin piur pa antu amukwasha anch: “Natongijoka ja kuyifut mulong wa yom yawonsu yiwamp yansadinau, pakwez nijap kwindond kushichau. Pakwez Yehova wij, ni nikat kumulembil chakwel anfutinau.” Khanh uyingin nich. Yehova ukat kuman ap tuyom tukemp nakash tuwamp tukata kuyisadin akwetu. Ukat kuman tuyom twinetu mud chipan cha usey nakash ni mud dibaz tumusondjikina ndiy ni dikutufutay.​—Tang Jinswir 19:17.

12. Mutapu ik ukutwishau akadivar kumekesh rukat mu chikumangen? (Tal kand yipich.)

¹² Anch ud mukadivar, mutapu ik ukutwisha kuyimekeshin antu akwau rukat ni kuyikwash? Jordan, mukadivar nsand, wamwipula mukurump umwing yom yafanyinay kusal mulong wa kukwash chikumangen. Mukadivar wamujikitisha mulong wa yom yivud yasalangay yamekeshang anch uyil kurutu, kupwa wamwinkisha chiyul piur pa mutapu wafanyinay kusutish pa yom yasalangay. Chilakej, wamuyula Jordan kushikang kurutu kwa chisu ku Chot cha Want ni kuyilangwish antu akwau, kwakul ku yikumangan, kulejan chisu chawonsu ni chisak chend cha mudimu wa kulejan, ni kukimb mitapu yikutwishay kuyikwash antu akwau. Chisu chasadinay Jordan chiyul chinech, wileja mutapu wa kusal yom yikwau ni wileja kand kuyikat akadivar nau anambaz nend nakash. Jordan wileja anch, ang mukadivar wikal nkwash wa mudimu, kasambishinap kuyikwash akwau; pakwez udandamedin kuyikwash.​—1 Tim. 3:8-10, 13.

13. Rukat ramukwasha mutapu ik mukadivar Christian kwikal kand mukurump wa chikumangen?

¹³ Chid nchik anch wasadin kal mud nkwash wa mudimu ap mukurump wa chikumangen? Yehova uvurikin mudimu wey wasala pakur ni rukat rakubachika kusal mwamu. (1 Kor. 15:58) Ni ukat kushinshikin kand rukat udandamedina kumekesh. Mukadivar Christian wanenganana nakash pamulejau anch kadiap kand mukurump. Pakwez ulondin anch: “Nakwata mupak wa kusal yom yawonsu nading nitwishina mulong wa kumusadin Yehova nich rukat nikala mukurump ap bwat.” Mu kusut kwa chisu, amutonda kand kwikal mukurump. Christian witiyidin anch: “Nidjidjekaku pa kusambishiril kand mudimu. Pakwez nakwata mupak anch, ang chid mulong wa ranaken rend, Yehova witiy kal anch nisala kand mud mukurump, chawiy nifanyidin kwitiy mulong nimukatin ndiy ni akadivar nau anambaz.”

14. Yom ik wilejidina ku yom yilondinay nambaz wa mu Georji?

¹⁴ Atushalapol a Yehova akat kuyimekeshin kand amutej nau rukat. (Mat. 22:37-39) Chilakej, nambaz Elena wa mu Georji ulondin anch: “Kwinsambishin, chom chimwing chambachika kulejan rading rukat ram mulong wa Yehova. Pakwez pading payila rukat mulong wa Tatukwam wa mwiur kukul, rukat ram mulong wa antwend rapama ni rawiy. Napakisha kutongin milong yading yirishinau nich ni yom yafanyina kupukun michim yau. Pinatonginang nakash piur pau mu mutapu winou, rusot ram ra kuyikwash rapandakana.”​—Rom 10:13-15.

YIYUKISH YIDIOKILA KU KUYIMEKESHIN ANTU AKWAU RUKAT

15-16. Mud mumekeshinau pa yipich, yiyukish ik yidiokila ku kuyimekeshin antu akwau rukat?

¹⁵ Anch twayimekeshin akadivar netu rukat, kadiap kwau ching kusu awiy akutaninamu. Pasambisha chipupu cha KOVID-19, mukadivar Paolo ni mukajend ayikwasha anambaz amapal avud kwilej mutapu wa kusadin yom ya elektronik mulong wa kupan uman. Nambaz umwing wading umen kwinsambishin anch chikasiken kusadin yom yiney washikena kutwish. Watwisha kuyisadin mulong wa kuyitazuk anamakwend ku Chivurikish. Antu 60 pakach pau akumangana kusutin videokonferans! Nambaz ni anamakwend awonsu ataninamu mu usu wasalay Paolo ni mukajend. Nambaz wamufundina Paolo anch: “Wajikit amboku mulong wa kutufundish etu amapal ey. Nikezap kavuramen mutapu utubangidinay Yehova ni usu wasadinanya mulong wa kutukwash.”

¹⁶ Chom chinech chid pakach pa yom yamushikena Paolo ni yamufundisha dilejan dijim nakash. Amuvurisha anch rukat rid ra usey nakash kusutamu ronganyin ni ukaliweny wa chivadik. Uvurikin anch: “Nading kalam wa munyingumuku. Katat najingunin kal anch, ap anch in kulejan akutwish kuvuramen madiskur mam, pakwez achidandamedin kuvurik ukwash wam.”

17. Nany kand ukutaninamu anch twamekesh rukat?

¹⁷ Anch twayimekeshin antu akwau rukat, niyetu ayinetu tukat kutaninamu mu mutapu wakad kuchingejin. Jonathan ushicha mu Nouvelle-Zélande witiyin chom chinech. Diampos dimwing, pikwading muten usansena nakash, wamumana chibol umwing ukat kulejan kwi njil. Jonathan wakwata mupak wa kulejan pamwing ni chibol winou kupwa kwa midi kwa diampos diambakenap. Kwinsambishin kajinguninap mutapu wafanyinay kutaninamu mu chisal chinech cha ranaken. Jonathan ulondin anch: “Pa chirung chinicha mu mwom wam, nadingap nikatina mudimu wa kulejan. Pakwez panlejay chibol winou mutapu uwamp wa kufundish ni kuman mutapu mudimu wend wading ukweta yibudikin yiwamp, nakata kamu mudimu winou. Wikala kand murund nam wa piswimp ni wankwasha kukul mu spiritu, kusanger mudimu wa kulejan, ni kwikal piswimp ni Yehova.”

18. Yom ik yikatinay Yehova anch tusal?

¹⁸ Yehova ukatin anch etu awonsu tukudish rukat retu mulong wendendiy ni mulong wa antu akwau. Mud mutapu twileja kal, tukutwish kukasikesh rukat retu mulong wa Yehova kusutin kutang Dizu diend ni kutongijokin pa yom tutangina, ni kusutin kwambambang nend chisu chawonsu mu malembil. Tukutwish kukudish rukat retu mulong wa akadivar nau anambaz kusutin kuyikwash nich yom tukweta. Padandamedina rukat retu kukul, tukusej kamu nakash piswimp ni Yehova ni dijuku dietu dia mu spiritu. Ni tukusanger urund winou chikupu ni chikupu!