Yipul ya in Kutang
Anany ‘angel atondinau kal’ alejenau mu 1 Timote 5:21?
Kambuy Paul wamufundina mbay nend Timote anch: ‘Nikulejin kamu pakad maswimbu kurutu kwa Nzamb ni Kristu Yesu ni angel atondinau kal, kulondul umutakel winou pakad katond ap kasolikany.’—1 Tim. 5:21.
Mulong wa kutukwash kuyijik angel inay, tukuman angel ik akad kwikal mu chisak chinech cha angel. Chimeken patok anch kadap pakach pa antu 144 000. Pamufundinau Timote kud Paul, kwikil uzizidilau many ap umwing wading wavumbuka kal mulong wa kuya mwiur. Atwimbuy ni antu akwau azizidilau many ad kand kal ikal yitang ya mu spiritu, chawiy tukutwishap kulond anch awiy ada ‘angel atondinau kal.’—1 Kor. 15:50-54; 1 Tes. 4:13-17; 1 Yoh. 3:2.
Chikwau kand, ‘angel atondinau kal’ kadap angel abwambwila pa chirung cha Mabeb. Angel inay amulondula Satan, ikala ayilembil ni ading akankuny a Yesu. (Dis. 6:2; Luka 8:30, 31; 2 Pita 2:4) Mu machuku ma kurutu, akuyidjubwil mu ruwengil rakad musul mu mivu 1 000 ni kupwa akuyishesh pamwing ni Djabul.—Jud 6; Kuj. 20:1-3, 10.
‘Angel atondinau kal’ isambinay Paul akutwish kwikal angel ada mwiur amukwashina ‘Nzamb ni Kristu Yesu,’ ajimbwilau kand mu verse winou.
Kud tunan ni tunan twa angel ashinshamena. (Heb. 12:22, 23) Tukutwishap kutong anch awonsu akweting chisend chimwing pa chisu chimwing. (Kuj. 14:17, 18) Chilakej, Yehova wamuleja kusu mwangel umwing kujip amasalay 185 000 a in Asiria. (2 Ant 19:35) Pakwez angel avud akutwish kwikal ni chisend cha “kukumangej antu awonsu akata kuyisadish akwau yitil, ni akata kusal yitil ayinau. Akez kuyidiosh mu Want [wa Yesu].” (Mat. 13:39-41) Pakwez akwau akutwish kwikal ni chisend cha kuyikumangejin azizidilau many awonsu mwiur. (Mat. 24:31) Ni akwau akwet chisend cha ‘kutulam mu jinjil jetu jawonsu.’—Kus. 91:11; Mat. 18:10; Ilikej ni Mateu 4:11 ni Luka 22:43.
‘Angel atondinau kal’ alejenau mu 1 Timote 5:21 chimeken anch ad angel akweta chisend cha pakampwil cha kukwash mudimu wa kubangin yikumangen. Mu maverse minam, Paul wayileja amakurump mutapu ufanyidinau kuwanyish yisend yau, ni mutapu ufanyidinau antu ada mu chikumangen kuyimekeshin amakurump kalimish. Ku mutambu wau, amakurump afanyidin kuwanyish yisend yau ‘pakad katond ap kasolikany’ ni kafanyidinap kurumburish ap kukwat mupak pakad kushinshikin yom nawamp. Afanyidin kamu kulondul chiyul chinech chapepilau kud Nzamb mulong asadin mudimu ‘kurutu kwa Nzamb ni Kristu Yesu ni angel atondinau kal.’ Chawiy angel amwing akwet chisend cha kukwash chikumangen. Akwau akat kuyilam antu a Nzamb, kuyikwash mu mudimu wa kulejan ni kupan rapor kud Yehova piur pa yom yimenau.—Mat. 18:10; Kuj. 14:6.