Mutapu Ukutwisha Kwikal ni Chisambu Chikalap Nchik Njit ni Kupwitamijan Kukash
Gary wading isalay ulondin anch “kurutu kwa kusambish kwilej Bibil nadingap nija mulong wak mu mangand mud chisum mwamu, kuburen kutentam ni kanrumbangesh.” Pakwez katat nikwet chisambu cha mu manang. Mulong nij anch Yehova Nzamb ukusal mangand minam kwikal ndond yiwamp ya kushakam.”
Kadap kusu ching Gary wiyovila mwamu. Shinshikin yilakej ya antu akwau akwashau kud Bibil.
BIBIL ULONDIN ANCH: “Nsalejam Ey udi muwamp, ukat [kulikishinang].”—Kuseng 86:5.
MUTAPU UKASIKESHINAY VERSE WINOU: “Verse winou winginkishin kashinsh anch Yehova ud mwin kulikishin. Nij anch wanlikishidin kal yom yawonsu nasala pinakwashang njit.”—Wilmar, Kolombi.
BIBIL ULONDIN ANCH: “Am nikat kutang mangand masu ni maur masu. Yom yawonsu ya pakur akez kayivuramen.”—Isay 65:17.
MUTAPU UKASIKESHINAY VERSE WINOU: “Mulong wa yom yanshikena pinading mu usalay, nikat kuman mar mulong wa yitongijok yingovishina wom yikata kwingez mu manang ni nikat kwikashimwokin. Pakwez verse winou winvurishin anch piswimp ap Yehova ukudosh yitongijok yiyimp yingezina mu manang, nikuyivurikap kand. Yikushakamap kand mu manang mam ni mu muchim wam. Chinech chid kamu chipan chiwamp nakash!”—Zafirah, États-Unis.
BIBIL ULONDIN ANCH: “Chifanyidin kutentam kuvulijan mu machuku ma mwant, ni chisambu chipalangan kwawonsu djat ni pakujimukinay ngond.”—Kuseng 72:7.
MUTAPU UKASIKESHINAY VERSE WINOU: “Yisu yivud nikat kutongijokin pa mazu minam. Piswimp ap njit ni yibudikin yiyimp ya njit yikupwa, ni tukwiyakamishap kand piur pa diking da akatish netu.”—Oleksandra, Ikren.
BIBIL ULONDIN ANCH: “Afu etu akez kapand kand. . . . Akez kalank ni kuwang miminy ya musangar!”—Isay 26:19.
MUTAPU UKASIKESHINAY VERSE WINOU: “Antu avud a mu dijuku dam ayijipa pa chisu chakimbau kuyijip antu awonsu a mu muchid wa Atutsi. Pakwez verse winou wingikishin kashinsh anch nikuyiman kand. Nichingedin nich impu kutesh mazu mau ma musangar pakuyivumbulau!”—Marie, Rwanda.
BIBIL ULONDIN ANCH: “Mulong kwashal kal kachisu kakemp, chad antu ayimp kakwikalakup kand . . . Pakwez itudishina akez kaswan ngand, akez kasangar nakash ni kuzangijal mu chisambu.”—Kuseng 37:10, 11.
MUTAPU UKASIKESHINAY VERSE WINOU: “Ap anch njit japwa, pakwez kuburen kutentam ni antu ayimp adandemedin kwikalaku. Maverse minam mankwashin kal nakash. Yehova umen yom yin yawonsu ni uteshin mutapu niyovila. Ukanin anch piswimp mar mawonsu makupwa ni ni tukumavuramen.”—Daler, Tadjikistan.
Bibil wayikwashin kal antu ajimbulau kal mu Chinong cha Kalam chinech ada pakach pa Atuman a Yehova, kutan chisambu. Ilejin kal mutapu wa kulik kwikal ni rukis piur pa kabil, ulombu wa chikit, ap rukis ra muntu ni mukwau. (Efes 4:31, 32) Atuman a Yehova kakatap kwiyandjik mu milong ya politik ap kunung chikas mu milong ya chisum.—Yohan 18:36.
Atuman a Yehova akat kukwashijan umwing ni mukwau mud antu a mu dijuku akatijadina. (Yohan 13:35) Chilakej, Oleksandra, wajimbulangau kwiur oku wachina ni mpanyend mwi ngand yikwau mulong wa njit. Ulondin anch: “Chisu twandama mwi ngand yindj, kapamp kamwing twamana Atuman atuchingedin mulong wa kutwak. Ukwash wau watukwasha kwijidin mashakamin mwi ngand ya wingendj twading mud arefije.”
Tukutazukin amboku kukumangan netu pamwing pitukata kwilej uruu wa chisambu uda mu Bibil ni mutapu wa kuusadin. Yang pa jw.org mulong wa kutan ndond yida piswimp niyey ap it mulong wa kwilej Bibil chamwamu nau Atuman a Yehova kusutin buku Sanger Mwom Chikupu!