Mutapu Ukupwa Njit ni Kupwitamijan Kukash

NZAMB UKUSHESH MAGUVERNEMA MA AN A ANTU

Nzamb ukushesh maguvernema ma an a antu kusutin yitazukinay Bibil anch njit ja Armagedon.a (Kujingunik 16:16) Pa chisu chinicha, “ant ashicha pa divu da kabuj” akuyikumangej “mulong wa njit ja dichuku dijim da Nzamb Mwin Dikand Dawonsu.” (Kujingunik 16:14) Armagedon jid njit ja Nzamb jikupwisha jinjit jawonsu.

Nzamb ukuswinkesh maguvernema ma an a antu nich Want wend, charumburik anch guvernema ukuyikela kudokal mwiur, chikupu ni chikupu. (Daniel 2:44) Nzamb wamutondin kal Mwanend, Yesu Kristu kwikal Mwant. (Isay 9:6, 7; Mateu 28:18) Guvernema winou wawiy Wantb wayilejay Yesu in kwilej end kulembil. (Mateu 6:9, 10) Antu awonsu akwikal mu uumwing mwinshin mwa guvernema ukuyikela pa mangand mawonsu, ni ukuyikelau kud Yesu.

Yesu kakwikalap mud anyikel a an a antu, mulong ndiy kakusadinap ulabu wend mulong wa kutaninamu kwa amwinend. Mulong utentamin ni kakwetap kasolikany, kwikil kwau muntu ukwiyakamisha anch ukumukwat nich kapipej mulong ud chindel ap muntu mujal, mulong wa kabil kend, ap mulong wa kwi ndond kwadokalay. (Isay 11:3, 4) Ni antu kakwikalap kand ni ­kuswir kwa kurishin want ipau. Mulong wak? Yesu ukusal anch mashakamin ma muntu mwawonsu mikal mawamp. ‘Ukez kumukamunin chimanamar umutazukina, ni kazwendj kand uburedina mwin kumukwash. . . . Ni kuyikol ku kuzengol ni ku chisum.’​—Kuseng 72:12-14.

Want wa Nzamb ukudosh uyimp uda pa divu udokila kwi njit. (Mika 4:3) Ukuyishesh kand antu ayimp adandamedina kuyirishikish akwau ni kuyipish chisambu. (Kuseng 37:9, 10) Muntu mwawonsu, ikala ikuny, mband, ap mwan ukwiyov anch ud mu diking chikalap nchik ndond yiday.​—Ezekiel 34:28.

Antu akusanger mashakamin mawamp pakuyikela Want wa Nzamb pa divu. Ukupwish yom yikata kuyibachik antu kurish, mud uzwendj, nzal, ni kuburen kwa jindond jiwamp ja kushakam. Muntu mwawonsu ukwikal ni yakuda yivud ni kwikal ni ndond yiwamp ya kushakam.​—Kuseng 72:16; Isay 65:21-23.

Pakuyikela Want wa Nzamb, yibudikin yiyimp ya njit akuyidosh. Kuwejinaku kand mar mamenau kal antu ku mujimbu ni mu manang. Ap antu afila kal akuyivumbul mulong wa kushakam kand pa divu. (Isay 25:8; 26:19; 35:5, 6) Majuku makwikal kand pamwing, ni antu kakuvurikap kand yom yawonsu yiyimp yasadika pasak, mulong “yom yikur [yikwikal] yasutin kal.”​—Kujingunik 21:4.

NZAMB UKUDOSH CHITIL

Want wa Nzamb ukuyibomb antu mu difukwil da Nzamb umwing kusu wakin Yehova,c “Nzamb wa rukat ni wa chisambu.” (2 Korint 13:11) Antu akwilej mutapu wa kushakam pamwing mu chisambu. (Isay 2:3, 4; 11:9) Antu awonsu akumuziyina Nzamb akukwolik ku yibudikin ya chitil.​—Rom 8:20, 21.

NZAMB UKUMUSHESH SATAN NAU AYILEMBIL END

Want wa Nzamb ukumushesh Satan nau ayilembil end akata kuletish njit. (Kujingunik 20:1-3, 10) “Kukwikal chisambu mwi ngand” mulong awiy kakwikalap kand ni yibachikin mu mwom wa antu​—Kuseng 72:7.

Ukutwish kwikal ni kashinsh anch kushilamu kwa Nzamb kwa kupwish njit ni kupwitamijan kukash kukuwanyin. Mulong ukatin kamu kupwish njit ni ukwet usu wa kusal mwamu.

• Nzamb ukwet manang ni usu wa kupwish njit ni chisum. (Yobu 9:4) Kwikil chom chikutwishay kukangany kusal.​—Yobu 42:2.

• Nzamb kakatinap kuyiman antu akat kuman mar. (Isay 63:9) Ni “ukisin in chisum.”​—Kuseng 11:5.

• Nzamb uwanyishining chisu chawonsu yom yikaninay; kakutwishap kudimban.​—Isay 55:10, 11; Titus 1:2.