Mulong Wak Njit ni Kupwitamijan Kukash Yidandamedin?

CHITIL

Nzamb wayitanga anvaj etu a kusambish, Adam ni Ev mu chifu chend. (Disambishil 1:27) Chinech chirumburikin anch ading ni mutapu wa kwimburij mikadil ya Nzamb, kuwejaku chisambu ni rukat. (1 Korint 14:33; 1 Yohan 4:8) Pakwez, Adam ni Ev amubwambwila Nzamb ni asala chitil. Chawiy nlel etu awonsu twaswana chitil ni rufu. (Rom 5:12) Kuburen kuwanyin kukat kutubachik yisu yivud kutong yom yiyimp ni kuyisal.​—Disambishil 6:5; Marko 7:21, 22.

MAGUVERNEMA MA AN A ANTU

Nzamb katutangap kwend mulong wa kwiyikel ayinetu. Bibil ulondin anch: “Kwikil muntu ukutwisha kutakel mwom wend amwinend.” (Yeremiy 10:23) Mulong wa diyingishin dined, maguvernema ma an a antu makutwishap kupwish njit ni kupwitamijan.

SATAN NAU AYILEMBIL END

Bibil ulondin anch “mangand mawonsu amayikedin kud muyimp.” (1 Yohan 5:19) “Muyimp” winou amutazukin anch Satan Djabul, ud mwin kujipan wa chisum. (Yohan 8:44) Ndiy ni ayilembil end akat kuyibachik antu kuletish njit ni kwikal in chisum.​—Kujingunik 12:9, 12.