Ukwash kud Amband Ameshinau Mar
“MAMILIYON ma amband amakurump nau ayangadin pa mangand mawonsu ayimeshin mar mu mitapu kushalijan. Ov, niyey yakushikedinap kal? Jingunin mulong wak Nzamb ukatin anch wikal mu diking ni yom yikusalay piur pa mar mayimeshinau amband.”
Winou wawiy mutapu usambishina mutu wa mulong uda pa jw.org ulondina anch: “La sécurité des femmes: Ce qu’en dit la Bible.” Kwinsuden kud ndond ya kushat chakwel upwit mukand ukutwisha kubudish mulong wa kusal trakt wa mapaj manying. Nambaz Stacy uda mu Etats-Unis ulondin anch: “Nabudisha makopi, ni am pamwing ni nambaz mukwau twamapana kwi ndond kwading kuyilamidinau amband ading mu ubaaj.”
Nsalamudimu umwing kwinikwa wipula anch ukutwish kutambul makopi makwau mulong wa kumapan kud antu akwau ading ashicha ndond yiney. Mud chibudikin, matrakt makwau 40 amapana pamwing ni makart 30 ma kwiyijikish nich ma jw.org. Pitwachirika kapamp kakwau, ntakel wa ndond yiney wakata nakash ni wita chakwel anch chiswapel Atuman ayirumburila antu ading ashicha kwi ndond kwinoku mutapu ukata kusadik dilejan da Bibil da muntu panrend.
Stacy ni anambaz akwau aad atana kand yibudikin ya mutapu winou ku jindond jikwau kulamidinau amband kwapanau matrakt matan ni kwayitau makopi makwau mavud. Nsalamudimu umwing walonda anch: “Mukand winou ukuyikwash nakash amband ada kwinoku.” Wawejinaku anch “tumaswirikedin kamu.” Payaurilau kand, amband akumangana pamwing mulong wa kuyilej mutapu ukata kusadik dilejan da Bibil, ni aad pakach pau akumangana ku yikumangan ya rubing ralondulaku ku Chot cha Want.
Stacy ulondin anch: “Tukwet musangar nakash mulong antu avud asangera mutu wa mulong winou uwamp nakash. Ud mutapu uwamp nakash wa kupalangesh Uruu wa Want ku chisak cha antu inay ameshinau mar. Mutapu watwakau watupukuna nakash, ni tuchingedin nich impu kuman mutapu ukuyukishay Yehova usu tusadina mulong wa kuyikwash antu inay kusutin rusang ruwamp.”