“[Lam] Uumwing wa Spiritu”

“Uumwing” tusangaredina nlel, ud “wa spiritu.” Chinech chirumburikin anch udokiling ku usu wa Nzamb. Pakwez, mud mwalejanay Paul, chitin kulam uumwing winou. Anany afanyidina kusal mwamu? Chakin kamu, Mwin Kristu win mwawonsu ukwet chisend cha “kulam uumwing wa spiritu.”

Chilakej, tong bil anch muntu wakwinkish motak usu; ov, ndiy kand ukudandamena kukulaminau nawamp? Bwat kamu. Ukumufishap nich muntu wakwinkishang motak anch chisu chimwing wafa mulong uulaminap nawamp.

Chilik chimwing kand, ap anch uumwing ukwetau In Kristu chid chipan cha Nzamb, muntu mwawonsu ukwet chisend cha kuulam. Anch tudap mu chisambu nau akadivar ni anambaz netu , tufanyidin kwiyipul anch: ‘Ov, niwanyishin nawamp chisend cham cha kulam uumwing wa spiritu kusutin kupwish milong pakad kulab?’

“[IKASIKESHA] CHAKIN KAMU KULAM UUMWING”

Mud mwalonday Paul, yisu yimwing tufanyidin kusal usu nakash mulong wa kulam uumwing wa spiritu. Chikutwish kwikal mwamu, pakampwil anch mukadivar ap nambaz waturumbukin. Ov, mulong wa kulam uumwing chitin chisu chawonsu kwisamb ni muntu waturumbukinang piur pa yom yatusalangay? Bwat kamu. Iyipula anch: ‘Ov, kusal mwamu kukukasikesh uumwing anch kukuyipish mulong kupandakan?’ Yisu yimwing, mupak uwamp ukutwish kwikal kwau wa kuduul ap kulikishin.​—Jnsw. 19:11; Marko 11:25.

Mud mwafunday kambuy Paul, tufanyidinany kudandamen “kuduulijan umwing ni mukwau mu rukat.” (Efes 4:2) Buku umwing ulondin anch, mazu minam akutwish kand kumalond anch “yitiyan mutapu udau.” Chinech chirumburikin kwitiy anch ambay netu In Kristu ad akayitil mud etu. Chakin kamu, tukat kusal usu wa kudjal “wuntu usu.” (Efes 4:23, 24) Pakwez, kwikil muntu pakach petu ukutwisha kusal mwamu mu mutapu uwanyidina. (Rom 3:23) Anch twitiy uyakin winou, chikutuswapel kuduulijan umwing ni mukwau, kulikishijadin, ni “kulam uumwing wa spiritu.”

Anch twayilikishin antu akwau​—ap kusu kwau mu muchim—​tukudandamen kwikal mu “chisambu [chitunungina] pamwing.” Dizu da Grek dikarumwinau mu Efes 4:3 anch “chikununginanya” adikarumwin mu mukand wa Kolosay 2:19 anch “mijir.” Mijir yid mud moj yinungininga difup dimwing ku dikwau. Chilik chimwing kand, chisambu ni kuyikat akadivar netu kukat kutukwash kwikal nau piswimp ap anch aturumbukinap nchik.

Chawiy anch mbay ney wakurumbukin ap wakujimesh, sal usu wa kumwov kurumburik pa ndond pa kushinshikin pa kurumbuk kwend. (Kol. 3:12) Mulong etu awonsu tud antu akad kuwanyin, yisu yimwing niyey wamurumbukidinap kal muntu mukwau. Kulam uyakin winou mu manang kukukukwash kuwanyish chisend chey mulong wa “kulam uumwing wa spiritu.”