Twikalany Inungina Pamwing
1 Ov tupamp twinch washikenap kal ku kutongijokin piur pa mutapu ujim wamushena watangau mujimbu wa muntu? (Kus. 139:14) Chid ni chid cha mujimbu chikat kusal mu kwovijan nich yid yikwau. Dizu dia Nzamb difanikeshin chikumangen cha Ukristu nich mujimbu umwing usadila mu kwovijan. Mwishin mwa Mutu, Kristu, yid yawonsu ya chikumangen ‘yinungin pamwing nich yinungin yatenchikau. Chad chid ni chid chifanyidin kusal mudimu wach mud muchifanyidina.’ (Efe. 4:16a) Chawiy lel, Yehova utwishin kuyisadil antwend inungina pamwing mulong wa kuwanyish yom yamushena.
2 Yid ya chikumangen ya mu mivu ya kusambish yasala nich “muchim umwing” mu kukwashijan umwing ni mukwau muspiritu ni ku mujimbu. (Midimu 2:44-47, TMK) Nich ukwash wa Yehova, awiy arisha ni apandikana mu uumwing kuzengol kukash. (Midimu 4:24-31) Awiy alejana uruu wa Want ndond yawonsu yayau, ni kwizwish ndond yawonsu yadinga yijikena pa chirung chinicha pa divu nich rusangu ruwamp. (Kol. 1:23) Mu chirung cha katat, chikumangen cha Ukristu chiwanyishin mu uumwing yom yiney yimwing mu chilik chimwing chijim nakash. Yom ik yikata kukwash kuwanyish uumwing winou?
3 Akumangejinau Pamwing Kusutin ku Mafundish ma Nzamb: Mu mangand mawonsu, tudi mu uumwing kusutin ku difukwil dietu. Mutapu ik chitwishikina lel? Twitiyijin njil yimekena ya Yehova yikatay kusadil chakwel kutwinkish ‘yakudia ya muspiritu pa chisu chiwanyidina.’ (Mat. 24:45) Tukat kand kukwat nich usey ukash ‘amakundj mud yipan’ atwinkishinau mud alej mu chikumangen. Pitwitiyidina nich kwikepish yitenchik ya Yehova ya kutudish muspiritu, kutesh kwetu kwa Dizu dia Nzamb kukat kukul ni kulangwish impu mud etu ya kumwimburij Yesu mud in kwilejend. Tufanyidin kuya kurutu nakash mu kwilej kwa Dizu dia Nzamb, kwikasikesh chakin kamu djat ni “pitukwikadila mu umwing mu ritiy.” (Efe. 4:8, 11-13) Ov ukat kusadil chakwel kuwejinaku ku uumwing wetu wa muspiritu kusutin ku kutang Baibel dichuku ni dichuku?
4 Inungina Kusutin ku Urund wa Ukristu: Rukat rikat kutukumangejin pamwing mu urund wa piswimp ku yikumangan ya Ukristu. Ku yikumangan yiney, kwawiy tukata ‘kutalijan muntu ni mukwau.’ (Heb. 10:24, 25) Chinech chitinap kusu kutal kumekan kwau kwa pol bwat pakwez kushiken chakin ku kwijikijan nawamp kamu nau akadivar netu, kuyiman mutapu ukatay kuyiman Yehova, mud akweta usey ukash. (Hag. 2:7, NW) Pituteshina kurumburil kwa ritiy rau, rukat retu mulong wa awiy rikat kujimb nakash ni uumwing wetu ukat kukasikan nakash. Ov wijiken mud muntu umwing ukata kukumangan chisu ni chisu ku yikumangan ya chikumangen?
5 Ambay Netu mu Mudimu wa Chingand: Kulejan rusangu ruwamp pamwing nau ambay in ritiy kukat kutunung mu uumwing mu kusalang rusot ra Nzamb. Mupostol Paul wayisangera nakash ambay nend “akata kusal mudimu wa Want wa Nzamb pamwing.” (Kol. 4:11) Kuyishimunin antu akwau uman ni kukwashijan muntu ni mukwau chisu tudia mu mudimu kukat kutukwash chakwel kuwanyish mudimu wetu wa Ukristu ni kukasikesh moj wa uumwing wetu. —Kol. 3:14.
6 Usu wa Kunung wa Spiritu Utumbila: Chitwipanina ayinetu nich mushiku mu kusal rusot rend, Yehova ukat kutuyukish nich kutwinkish spiritu wend utumbila. Spiritu wend ukat kutukwash mutapu uswapela kukepish matend ni kushakam pamwing mu uumwing. (Kus. 133:1) Ukat kutubachik “kwikal mu umwing wa mu manangu mu kubombakan kwa chisambu.” (Efe. 4:3) Muntu ni muntu pakach petu ukutwish kusadil mulong wa uumwing udia pakach pa antu a Nzamb nich kumekesh mabuj ma spiritu mu mutapu tukata kusadil muntu ni mukwau —Gal. 5:22, 23.
7 Kusadilang pamwing mu uumwing mwishin mwa umutu wa Kristu “mujimbu wawonsu ukutwish kukul ni kukasikan mu rukat.” (Efe. 4:16) Chipandikenamu, kukat kumushiman Yehova, “Nzamb ukata kupan chisambu.” —Rom 16:20.