“[Yehova] Nzamb Umwing” Uyikumangejin Majuku Mend

‘Nakulembijekany anch, ikalany mu umwing wakwinkishanyau kudi mwiku utumbila.’—EFES 4:1, 3.

MUTAPU IK UKUTWISHA KURUMBURIL?

Ov, risu rutong ra ditenchik dia Nzamb?

Ov, mutapu ik tukata ‘kwikal mu uumwing watwinkishanyau kudi mwiku utumbila’?

Chom ik chikeza kutukwash chakwel ‘twikala antu adimukina . . . muntu ni mukwau’?

1, 2. Ov, rutong ik radingay nich Yehova mulong wa divu ni mulong wa antu?

DIJUKU. Ov, dizu dinech dikuvurishin chom ik? Ov, mwikadil wa chirungul? Musangar? Kusal pamwing nich rutong rimwing? Ndond ya diking mutukutwisha kupamin, kwilejin, ni kwisambin? Chitwishikin kwikal mwamu, anch udi mu dijuku diwamp. Yehova amwinend udi Disambishil dia dijuku. (Efes 3:14, 15) Ndiy wasala anch yitang yend yawonsu yidia mwiur ni pa divu yisangera diking, kwichingejin umwing ni mukwau, ni uumwing wa kashinsh.

² Pasalau chitil, antu kadingap kand mu dijuku dia Nzamb dia mangand mawonsu, pakwez kakangeshap kusadik kwa rutong ra Yehova. Ndiy ukez kusal anch divu dizula ni an a Adam ni Ev. (Dis. 1:28; Isay 45:18) Ndiy watenchika yom yawonsu chakwel awanyisha rutong riner. Uvud wa yitenchik yiney aulejen mu mukand wa Bibil wa in Efes, mudia uumwing mudi mutu wa mulong. Shinshikinany amboku maverse mamwing madia mu mukand winou ni talany mutapu ik tukutwisha kusal pamwing ni rutong ra Yehova ra kutek chitangil chend mu uumwing.

DITENCHIK NI MUDIMU WAD

3. Ov, ditenchik ik dia Nzamb disambidinau mu Efes 1:10, ni chisu ik chasambisha mudimu wad wa kusambish?

³ Moses wayileja in Isarel anch: “[Yehova] wetu udi Nzamb umwing.” (Kuv. 6:4) Yisal ni rutong ra Yehova yikat kusal pamwing. Chawiy lel, “pa chisu chiwanyidina,” Nzamb wasambisha kusal “yom yatenchikay”—yom yatenchikay mulong wa kuyitek mu uumwing yitangil yend yawonsu yikweta manangu. (Tang Efes 1:8-10.) Ditenchik dined dikez kuwanyish rutong riner mu mitapu yaad. Chakusambish kutenchik chikumangen cha azizidilau many mulong wa kwikal nich mwom mwiur mwishin mwa Yesu Kristu mudi Ntakel wau wa muspiritu. Rizau riner rasambisha pa Pentekot muvu wa 33 C.C. Pasambishay Yehova kukumangej antu akeza kuyikel pamwing ni Kristu mwiur. (Mid. 2:1-4) Mulong azizidilau many amekana kwikal ashinshamena mulong wa kutambul mwom piur pa yakupesh ya difut dia Kristu, awiy itiyija kapamp kamwing anch ikala “an a Nzamb.”—Rom 3:23, 24; 5:1; 8:15-17.

4, 5. Ov, chisu chikunku cha kaad cha ditenchik mu yom yikeza kusadik?

⁴ Mudimu wa kaad ukat kuyirijek antu akeza kushakam mu Paradis pa divu mwinshin mwa Want wa Kristu Mesia. “Chisak chipandakena kujimb” chawiy chisadila chikunku cha kusambish cha chisak chinech. (Kuj. 7:9, 13-17; 21:1-5, TMK) Mu Mivu Kanan ya Kuyikel, awiy akez kwinung pamwing ni mabiliyon ma antu akeza kuvumbuk. (Kuj. 20:12, 13) Tongin bil mutapu kuvumbuk kukeza kumekesh kand uumwing wetu! Kwinsudiel kwa mivu kanan, “yom yidia pa divu” akez kuyipak kapamp ka nsudiel. Antu akeza kushinshaman akez kwikal “an a Nzamb” a pa divu.—Rom 8:21; Kuj. 20:7, 8.

⁵ Mitapu yiney yaad ya kutenchik kwa Nzamb yiyil kurutu nlel unou—mwiur ni pa divu. Pakwez, muntu ni muntu, ov mutapu ik tutwisha kusal yom pamwing ni ditenchik dia Nzamb?

‘KWIKAL MU UMWING WAKWINKISHANYAU KUDI MWIKU UTUMBILA’

6. Ov, mutapu ik ulejena Mukand wa Nzamb anch in Kristu afanyidin kwikal pamwing umwing ni mukwau?

⁶ Mukand wa Nzamb ulejen anch in Kristu afanyidin kwikumangej ayinau pamwing. (1 Kor. 14:23; Heb. 10:24, 25) Chinech chitin yom yivud kupandakanamu kusutish chisu pamwing mwin ndond yimwing, mudi muyilingau antu mu chiku ap mwindond ya masengan. Uumwing wa kashinsh upandikenamu yom yiney. Tukutwish kushiken ku uumwing winou anch twasadil malejan ma Yehova ni kusal anch atutakela kudi mwiku utumbila wa Nzamb.

7. Ov, chom ik chirumburikina ‘kwikal mu umwing watwinkishanyau kudi mwiku utumbila’?

⁷ Ap anch Yehova walonda anch antwend azizidilau many atentamin mudi an ni amikoku akwau atentamina mudi arund kusutil ku yakupesh ya difut dia Kristu, kukez kwikal tumilong tukemp-tukemp pakach petu pitudia mu ditenchik dined dia yom. (Rom 5:9; Jak. 2:23) Chikwau kand tukutwishap kwikal nich kuswir kwa kutambul chiyul cha muspiritu chakwel tudandamena ‘kukwashijan muntu ni mukwau.’ Mutapu ik tukutwisha kushiken ku kwikal mu umwing ni ambay netu akaritiy? Tufanyidin kukudish ‘kwitudish ni kudimuk.’ Chikwau kand, Paul utulejin anch tufanyidin kwikasikesh ‘kwikal mu umwing watwinkishanyau kudi mwiku utumbila. Ndiy ukata kutwinkish chisambu chitukasina etwawonsu pamwing.’ (Tang Efes 4:1-3.) Kusadil chiyul chinech kwitin kwitiyij chibachikin cha mwiku wa Nzamb ni kumulikidil chakwel usonga dibuj diend mud etu. Dibuj dined dikat kutenchik urund pakach pa antu, chinyim ni yisalijok ya wuntu yikata kuyauril.

8. Ov, mu mutapu ik yikata yisalijok ya wuntu kuyipish uumwing?

⁸ Tal mutapu yikata “yisalijok ya wuntu” kuyipishang uumwing. (Tang Galatia 5:19-21.) Usund ukat kuyauril antu a usadila kudi Yehova ni ku chikumangen, ni masandj makat kuyauril nayimp an kudi anvaj ni ambay a uruw akad mulong kudi ambay nau a uruw. Kwimik dis kukat kuyipish uumwing wa muntu ni Nzamb ni antu amukatina. Muntu usotina kukwatish yom yaad pamwing ufanyidin kwijik anch yom yiney yifanyidin kwikal zwang kurutu kwa kuyitek pamwing nawamp. Yisalijok yiyimp yikat kumekesh anch tukatap kuziyil ku yijil yitentamina ya Nzamb. Yisalijok ni yisalijok yikwau ya wuntu yikat kuyauril antu umwing ni mukwau ni kudi Nzamb. Chisal chinech chambatenap nich untu wa Yehova.

9. Ov, mutapu ik tukutwisha kwishinshikin ayinetu anch tukat ‘kwikasikesh kwikal mu uumwing watwinkishanyau kudi mwiku utumbila’?

⁹ Chawiy lel, muntu ni muntu pakach petu ufanyidin kwiyipul amwinend anch: ‘Mudi mu nidia muntu wa kashinsh ov, nipakashin “kwikal mu umwing [wangikishau] kudi mwiku utumbila, . . . ukata [kunung] chisambu chitukasina etu awonsu pamwing”? Ov, chom ik nikata kusal anch kudi milong? Ov, nikat kulejan milong yam kurutu kwa antu, ni kuchingejin anch arund avud akez kutukasikesh? Ov, nikat kuchingejin chakwel anch amakurump andamina mu milong yam pa ndond pa kusal usu wa kutek chisambu mu urund wetu? Ov, nikat kuyipuk antu akwau chakwel kangal nayivurish uyimp wansalau, ni kwikal pamwing ap nich kashinsh anch adi chakin kamu kulemp niyam?’ Ov, yisal yiney yimekeshin anch asadil yom kwambatan nich rutong ra Yehova ra kuyikumangej yom yawonsu pamwing mudi Kristu?

10, 11. (a) Ov, mutapu ik chidi cha usey kwikal mu chisambu ni akadivar netu? (b) Ov, yisal ik yikeza kulet chisambu ni kuya kurutu kwa muspiritu?

¹⁰ Yesu walonda anch: “Anch usotil kupan yakupesh yey kudi Nzamb pa chintamb, kwinikwa anch wavurik anch: ‘Mwanamakwam mu ritiy ukwet mulong ni yamam,’ shang yakupesh yey pa chintamb. Yang swa, ukachakulany nend mwanamakwey wa mu ritiy, chad uchirik lel ni kupan yakupesh yey kudi Nzamb. ‘Anch muntu wakufund, chad wakutwal ku dirumburish, swakal kwovijan nend.’” (Mat. 5:23-25) Jakobu wafunda anch “In kulet chisambu akat kukun chisambu mudi mbut, chad chisambu chikat kusong mabuj ma mwom utentamina.” (Jak. 3:17, 18) Chawiy lel, tukutwishap kulam yisal yitentamina pakad kwikal mu chisambu.

¹¹ Chilakej, amana anch mu jingand jivud mudia njit, mu jingand 35 pa chitot ni kusut ela kudimamu anch antu a ul kadingap ni wom wa ma min matekau mwingand. Padioshau ma min, yir ayilika kudi andim, mal mashala pakad antu ni misumb pakad yakudia. Chilik chimwing, tukutwishap kuya kurutu muspiritu anch tukwet yaku yikutwisha kuyipish chisambu ni akadivar netu. Pakwez, anch tuyilikishin swaa ni tusadil usu mulong wa kuyisadil antu akwau yom yiwamp, tukez kwikal nich mikadil yikutwisha kusal anch tuya chakin kamu kurutu.

12. Ov, mutapu ik ukutwishau amakurump kutukwash chakwel twikala mu uumwing?

¹² Chikwau kand, ‘yipan mudi antu’ yikutwish kusal usu nakash chakwel twikala mu umwing. Atwinkisha antu inay chakwel atukwasha kwikal “mu umwing mu ritiy.” (Efes 4:8, 13) Pasadilau amakurump pamwing netu mu mudimu utumbila ni kulet yiyul yimedina pa Dizu dia Nzamb, akat kutukwash kuya kurutu kusutil ku kudjal muntu musu. (Efes 4:22-24) Ov, umen anch kusutil ku chiyul chau Yehova usadil usu wa kukukwash chakwel urijeka mwom wey mulong wa kushakam mu mangand masu mwinshin mwa umutakel wa Mwanend? Ov, amakurump, upakishinany kuyitenchik antu akwau nich rutong riner mu manangu?—Gal. 6:1.

“IKALANY ANTU ADIMUKINA . . . MUNTU NI MUKWAU”

13. Ov, chom ik chikeza kushiken anch tuteshinap chiyul chidia mu Efes 4:25-32?

¹³ Efes 4:25-29 ulejen yaku tufanyidina pakampwil kwipuk. Mudi kulond ya makasu, kujiman, ap kuziy, ni kusaalan masaal pa ndond pa kulond yom yiwamp ni yikasikeshina. Anch muntu wakangany kutesh chiyul chinech, ukez kovish mwiku wa Nzamb ushon, mulong mwiku utumbila udi usu ukasikeshina uumwing. (Efes 4:30) Kusadil mazu malondwila mafundinay Paul kudi kwa usey chakwel twikala nich chisambu ni uumwing: “Dioshany rukuny rawonsu, ni kuswej kwawonsu, ni ujim wawonsu. Kangal wabarokany, ap kusaalan masaal, likany kand kukisijan kwa mitapu yawonsu. Pakwez ikalany antu adimukina, in kwanakenijan muntu ni mukwau, in kulikishijadin muntu ni mukwau mudi mwakulikishinanyau en kudi Nzamb mud Kristu.”—Efes 4:31, 32.

14. (a) Ov, chom ik chilejena mazu ‘kwikal adimukina’? (b) Chom ik chikeza kutukwash kwikal adimukina?

¹⁴ Mazu ‘kwikal adimukina’ malejen anch pa chilik chimwing tukutwish pamwing ap kuburen kwikal adimukina ni tufanyidin kwikasikesh. Chifanyidin mud ik kwikasikesh ayinetu chakwel tutongina bil pa yovil ya antu akwau kurutu kwa yovil yetu! (Fil. 2:4) Chitutongina chitwishikin pamwing ap kutusangaresh ap kumekesh anch tukwet manangu, pakwez ov, chikwikal cha kudimukin? Kutongin kurutu pa mulong winou kukez kutukwash ‘kwikal adimukina.’

ILEJA RUKAT NI LIMISH DIJUKU

15. Ov, pa mutapu ik wa kushakam kwa Kristu nich chikumangen walejanay Paul mu Efes 5:28?

¹⁵ Bibil wilikejin urund wa Kristu ni chikumangen ni udinga pakach pa ikundj ni mukajend. Chinech chifanyidin kutwinkish umutakel, rukat, ni ukwash ufanyidinay ikundj kupan ni kuziyil kufanyidinay mband kumekesh mu uruw. (Efes 5:22-33) Pafunday Paul anch: “Chifanyidin ngatan kumukat mukajend mudi mukatilay mujimbu wend amwinend,” chom ik chisotinay kulond pafundinay anch “Chifanyidin”? (Efes 5:28) Mazu mend ma kusambish mapwita manangu pa mutapu “Kristu chayikatay in Chikumbu cha Nzamb, wipana amwinend mulong wa kuyambat awiy, . . . wasala chom chinech nich dizu diend, chapwishay kuyishitwish mu mem.” Chikwau kand, chakwel tusala kwambatan nich rusot ra Yehova ra kuyikumangej kand yom yawonsu pamwing mudi Kristu, ikundj ufanyidin kusal usu wa kudish dijuku diend muspiritu.

16. Ov, chom ik chikeza kushiken anch anvaj awanyish mu chikumbu yisend yau yidia mu Mukand wa Nzamb?

¹⁶ Chiwapidil kudi anvaj kuvurik kusal mudimu wayinkishau kudi Yehova. Cha ushon, mulong mu mangand nlel unou, antu avud ‘akwet michim yichinchikina.’ (2 Tim. 3:1, 3) Atatuku avud alikining kusend yisend yau—akat kuyovish anau ushon ni kuyisal nayimp. Pakwez Paul wayiyula atatuku in Kristu anch: “Kangal wayisudishany anen ku michim. Pakwez yikandany ni kuyibabesh nich malejan ma win Kristu.” (Efes 6:4) Ov, kwisu kukutwishau antu kwilej kapamp ka kusambish rukat ni umutakel anch chidiap mu dijuku? Anvaj ilejina malejan minam nawamp asadil mudimu kwambatan nich ditenchik dia Yehova. Kusutil ku kusal anch dijuku dikala ndong yakad ujim ni yakad kusalan masaal, tukat kuyilej anetu malejan ma usey piur pa mutapu tufanyidina kumekesh rukat ni kulimish umutakel. Chinech chikez kuyikwash chakwel atwisha kushakam mu mangand masu ma Nzamb.

17. Ov, chom ik chifanyidina kusal chakwel turisha ni Djabul?

¹⁷ Twij anch Djabul, muntu wayipisha pa kusambish chisambu chadinga mu mangand mawonsu, ukez kukangesh nakash usu tusadila mulong wa kusal rusot ra Nzamb. Pakad ntad, rusot ra Satan ridi ra kupandikesh uvud wa kujip uruw, antu akatishin kwau kushakam pamwing pakad kwatijan, ni kulikidil kwatijan pakach pa antu akweta mujimbu umwing. Tukutwishap kuswimp yaku ap mikadil yetu mu kulondul yom yisadikina mu chisak cha katat. Kristu udi chilakej chetu. (Efes 4:17-21) Chawiy lel, atubabeshin anch “djalany yom yawonsu yikat kupanay Nzamb ya kurish nich njit” chakwel tutwisha kurish ni Djabul ni ayilembil end.—Tang Efes 6:10-13.

“CHIFANYIDIN EN KWIKAL NICH RUKAT”

18. Chom ik chidia cha usey kamu mu uumwing wetu wa win Kristu?

¹⁸ Chom cha usey chakin kamu mu uumwing wetu wa win Kristu chidi rukat. Pitumukatina nakash “Nsalejetu umwing,” “Nzamb umwing,” ni kukatijan umwing ni mukwau, twikasikeshin chakwel ‘twikala mu umwing watwinkishanyau kudi mwiku utumbila. Ndiy kamu ukata kutwinkish chisambu chikata kutukasikesh etu awonsu pamwing.’ (Efes 4:3-6) Yesu walembila mulong wa rukat anch: “Kinilembidilap kusu mulong wa awiy ayinau, pakwez nilembidil kand antu akwau akeza kwingitiyija am mulong wa mazu mau. Niyilembidil chakwel awonsu ikal mu umwing. A! Tatuku! Chifanyidin ikal mu umwing ni yetwetu, mudi muudia ey mu umwing ni yamam, niyam mu umwing ni yeyey. Nilembidil awiy ikal mu umwing . . . Am nakwijikishin kal ey kudi awiy, chad nikudandamen kusal mwamu, chakwel awiy akuyikat antu akwau mudi ey chiwinkatila am, chakwel kand am nikwikal mu umwing nau awiy.”—Yoh. 17:20, 21, 26.

19. Ov, ukwatin mupak wa kusal chom ik?

¹⁹ Anch tumen anch turishin nich yovil yetu ya kuburen kuwanyin, rukat rifanyidin kutubachik kulembil mudi mwasalay nfund-a-kuseng anch: “Bwalikesh muchim wam wova dijin diey wom.” (Kus. 86:11) Salany amboku usu wa kumurishish usu usadilay Djabul chakwel atuteka kulemp ni Tatukwetu wa rukat ni antu itiyijinay. Salany usu wa ‘kumwilikej Nzamb mulong en udiany anend akatilay . . . kwikal nich rukat’—mu dijuku, mu mudimu wa kulejan, ni mu chikumangen.—Efes 5:1, 2.

[Chipich chidia pa paj wa 29]

Shang chakupesh chey pa chintamb, yang swa ukasala chisambu pamwing ni mwanamakwey

[Chipich chidia pa paj wa 31]

Anvaj, yilejany anen mutapu wa kumekesh kalimish